លោក ងឹម អុន ជាឪពុកជនរងគ្រោះបានផ្ដល់សម្ភាសន៍កាលពីថ្ងៃទី២២ ធ្នូ ថារឿងហេតុវិវាទបានកើតឡើងរវាងមិត្តភ័ក្ដិរបស់កូនលោកជាមួយឪពុកកូនក្រមុំ លុះកូនលោកទៅសួរក៏ត្រូវប៉ូលិសវាយតែម្ដង ៖ "កូនខ្ញុំក៏ទៅសួរថា អាភានឯងកើតអីបានគេវ៉ៃ ឮកូនខ្ញុំសួរប៉ុណ្ណឹង មេប៉ូលិសស្ទុះកម្រោលមកយកកាំភ្លើងខ្លីភ្ជង់វាយក្បាលបែកបណ្ដោយ"។
លោក ចាន់ សុកុល នាយប៉ុស្តិ៍រដ្ឋបាលឃុំសោបបានបដិសេធទៅនឹងការចោទប្រកាន់នោះ ដោយអះអាងថា លោកជាមន្ត្រីប៉ូលិសមិនប្រព្រឹត្តដូចការចោទប្រកាន់នោះឡើយ ៖ "អត់មានការវាយតប់អីទេ មានតែភាពច្របូកច្របល់ ខ្ញុំទៅដល់ពួកវារត់មករញ៉េរញ៉ៃផ្អើលពេញរោងការ ប្រជាជនចូលរួមគេដឹងឮតែម្ដង មានគេឃើញថាវាហ្នឹងមកវាយប៉ូលិសខ្ញុំទៀត"។
ក្នុងលិខិតបណ្ដឹងរបស់ជនរងគ្រោះ មានភ្ជាប់ស្នាមមេដៃសាក្សីចំនួន ៤៣នាក់ បញ្ជាក់ថាបានឃើញសកម្មភាពដូចការចោទប្រកាន់នោះ ដែលលោក ហ៊ុំ យ៉ិត សាក្សីម្នាក់បានឃើញផ្ទាល់អះអាងថា ពិតជាមានរឿងដូចការចោទប្រកាន់មែន ៖ "យកកាំភ្លើងខ្លីវ៉ៃក្បាលចំហៀងខាងឆ្វេង វ៉ៃលើជនរងគ្រោះឈ្មោះ ខុន ហ្នឹងអត់មានមូលហេតុអីទេ"។
អ្នកស្រី ធីម ណារីន មន្ត្រីសិទ្ធិមនុស្សនៃសមាគមអាដហុក បានផ្ដល់សម្ភាសន៍ក្រោយទទួលពាក្យបណ្ដឹងថា យោងតាមការស៊ើបអង្កេត សាក្សីជាច្រើនបានបង្ហាញថា ប៉ូលិសប៉ុស្តិ៍បានយកកាំភ្លើងវាយក្បាលជនរងគ្រោះ អ្នកស្រីបានដាក់ពាក្យអន្តរាគមន៍ជូនលោកស្នងការឲ្យផ្ដល់ភាពយុត្តិធម៌ ៖ "ចង់ឲ្យលោកស្នងការធ្វើការត្រួតពិនិត្យឡើងវិញចំពោះរបាយការណ៍របស់អធិការស្រុក ដែលរកឃើញក៏ដូចជារបាយការណ៍របស់អាដហុក ដែលបានរកឃើញ វាមានការផ្ទុយគ្នា មានវិធានការយ៉ាងណាធ្វើឲ្យបុគ្គលរូបហ្នឹងក្លាយជាទីស្រឡាញ់ និងជាទីគោរព និងមានទំនុកចិត្តដល់ប្រជាពលរដ្ឋទាំងអស់ហ្នឹង"។
របាយការណ៍របស់លោកអធិការស្រុកបានបំភ្លឺថា លី ខុន ជាមួយក្រុមទំនើង ៧-៨នាក់ បានអុកឡុកពិធីការនាយប់នោះ ហើយបានវាយទៅលើប៉ូលិសទៀតផង តែក្បាល លី ខុន អាចប៉ះនឹងខ្នោះដែលប៉ូលិសចូលទៅអន្តរាគមន៍ ក្នុងពេលច្របូកច្របល់នោះ គឺមិនមែនកាំភ្លើងទេ។ តែទោះជាយ៉ាងណាក្ដី ក៏មន្ត្រីសិទ្ធិមនុស្សអាដហុកសុំការផ្ដល់យុត្តិធម៌ទាំងសងខាង៕