អតីត​កងទ័ព​ខ្មែរ​ក្រហម​នៅ​ខេត្ត​ប៉ៃលិន សោក​ស្ដាយ​ចំពោះ​សេចក្ដី​សម្រេច​សាលា​ក្ដី​ខ្មែរ​ក្រហម

ដោយ សុ ជីវី
2022.09.22
Share on WhatsApp
Share on WhatsApp
អតីត​កងទ័ព​ខ្មែរ​ក្រហម​នៅ​ខេត្ត​ប៉ៃលិន សោក​ស្ដាយ​ចំពោះ​សេចក្ដី​សម្រេច​សាលា​ក្ដី​ខ្មែរ​ក្រហម អង្គជំនុំជម្រះតុលាការកំពូល​នៃសាលាក្ដី​ខ្មែរក្រហម ធ្វើសវនាការ​លើ​បណ្ដឹងសាទុក្ខ​របស់​លោក ខៀវ សំផន អតីត​ប្រធាន​គណៈ​ប្រធានរដ្ឋ​នៃរបប​កម្ពុជា​ប្រជាធិបតេយ្យ ដែល​ត្រូវ​ផ្ដន្ទាទោស​ដាក់​គុក​អស់​មួយ​ជីវិត កាល​ពី​ថ្ងៃ​ទី២២ ខែកញ្ញា ឆ្នាំ២០២២។
រូបពីពលរដ្ឋ

អតីត​កងទ័ព​ខ្មែរក្រហម​នៅ​តំបន់​ប៉ៃលិន​សោក​ស្ដាយ​ ចំពោះ​ការ​សម្រេច​របស់​តុលាការ​កំពូល​ខ្មែរ​ក្រហម ដែល​តម្កល់​សាល​ដីកា​របស់​សាលា​ដំបូង ដាក់​ទោស​លោក ខៀវ សំផន អស់​មួយ​ជីវិត​ នៅថ្ងៃ​ទី​២២ កញ្ញា។ ពួក​គាត់​បញ្ជាក់​ថា ការ​សោក​ស្ដាយ​នេះ​ ដោយសារ​តែ​តុលាការ​ខ្មែរ​ក្រហម​មិន​អាច​នាំ​ខ្លួន​មេដឹកនាំ​គណបក្ស​កាន់​អំណាច​មួយ​ចំនួន​ មក​ឆ្លើយ​បំភ្លឺ​និង​កាត់ទោស​ដែរ។

អតីត​កងទ័ព​ខ្មែរ​ក្រហម​ និង​ជា​អ្នក​ធ្លាប់​ឆ្លង​កាត់​សម័យ​កាល​សង្គ្រាម​ យល់ថា​តុលាការ​កំពូល​ខ្មែរ​ក្រហម​ មិន​គួរ​ដាក់ទោស​លោក​ ខៀវ សំផន អស់​មួយ​ជីវិត​ឡើយ ព្រោះ​លោក​គ្មាន​ទំនួល​ខុស​ត្រូវ​អ្វី​ខ្ពស់​ទេ​ក្នុង​របប​កម្ពុជា​ប្រជាធិបតេយ្យ។

អតីត​កងទ័ព​ខ្មែរ​ក្រហម​ លោក ថោង ធន ប្រាប់​វិទ្យុ​អាស៊ី​សេរី​ ថ្ងៃ​ទី​២២ ខែ​កញ្ញា​ ថា​ លោក​គ្មាន​ការ​ភ្ញាក់ផ្អើល​ចំពោះ​ការ​សម្រេច​របស់​តុលាការ​កំពូល​ ពាក់ព័ន្ធ​សំណុំ​រឿង​លោក​ ខៀវ សំផន ព្រោះ​លោក​គិត​ថា​ការ​កាត់ទោស​នេះ​មិន​ចំ​គោលដៅ​  ហើយ​លោក​ ខៀវ សំផន គ្មាន​អំណាច​ឡើយ​ ។ លោក​បន្ត​ថា​ ការ​កាត់​ទោស​មេ​ដឹកនាំ​កំពូល​មាន​លោក​ ប៉ុល ពត និង​លោក នួន ជា ​ទើប​ត្រូវ​ចំ​គោល​ដៅ​។លើស​ពី​នេះ​ លោក​ សោក​ស្ដាយ​ដែល​តុលាការ​មិន​អាច​នាំ​ខ្លួន​មេ​ដឹកនាំ​ក្នុង​គណបក្ស​ប្រជាជន​មួយ​ចំនួន​ ដើម្បី​ចូល​បំភ្លឺ​ឡើយ​។ លោក​បន្ត​ថា​ បញ្ហា​សង្គ្រាម​នៅ​ប្រទេស​កម្ពុជា​ គឺ​មិនមែន​កើត​ឡើង​ដោយ​សារ​តែ​ភាគី​ខ្មែរ​ក្រហម​នោះ​ទេ​ ហើយ​បទល្មើស​កើត​ឡើង​ គឺ​គ្មាន​ការ​ស្រាវជ្រាវ​ស៊ី​ជម្រៅ​អស់​ហើយ​បែរ​ជា​​ កាត់​ទោស​តែ​បុគ្គល ២នាក់ ៣នាក់​ទៅ​វិញ៖ «ដើម្បី​យុត្តិធម៌​គួរ​តែ តា ខៀវ សំផន ហ្នឹង​ បើ​រក​ឃើញ​ថា ទោស​អ៊ីចឹង​ហើយ​ ប៉ុន្តែ​គាត់​អត់​បាន​ ចង់​និយាយ​ថា​ បទ​បញ្ជា​របស់​គាត់​ស្អី​មួយ​នោះ​ វា​អត់​នឹង​មាន​ផង​ហ្នឹង​។ អ៊ីចឹង​អាច​ថា​ចោទ​គាត់​ក៏​ចោទ​ទៅ​ ប៉ុន្តែ​កុំ​ដាក់​គាត់​មួយ​ជីវិត​អី​ វា​អត់​សូវ​ចំ​ផង​ ខ្ញុំ​វា​ខ្មាស​គេ​ផង​ ខ្មាស​គេ​។ អា​អ្នក​ដែល​សម្លាប់​រង្គាល​ប្រជាពលរដ្ឋ​នៅ​ដើរ​គឃ្លើន​ ហើយ​ស្រាប់​តែ​ខ្មែរ​ខ្លួនឯង​តែ​២នាក់​ ៣នាក់​ ត្រូវ​ទទួល​រង​ទោស​។ អ៊ីចឹង​ជា​បទ​ពិសោធន៍​សម្រាប់​អនាគត​ជាតិ​ ដឹក​នាំ​ក្រោយ​ៗ​អី​ យើង​គ្រាន់​ថា​កុំ​យក​គំរូ​តាម​ ហើយ​ក៏​ធ្វើ​ម៉េច​រក​យុត្តិធម៌​ឱ្យ​ជន​រងគ្រោះ​អោយ​បាន​ កុំ​អោយ​វា​ចេះ​តែ​និទ្ទណ្ឌភាព​តែ​រហូត»

អតីត​កង​ទ័ព​ខ្មែរ​ក្រហម​ម្នាក់​ទៀត​ សុំ​មិន​បញ្ចេញ​ឈ្មោះ​ ថ្លែង​ថា​ លោក​ ខៀវ សំផន មាន​តែ​តួនាទី​ជា​ប្រមុខរដ្ឋ​ ប៉ុន្តែ​គ្មាន​ឥទ្ធិពល​ឡើយ​ក្នុង​សម័យ​កាល​កម្ពុជា​ប្រជាធិបតេយ្យ​​។ លោក​បន្ត​ថា​ សាលា​ក្ដី​ខ្មែរ​ក្រហម​គួរ​ដោះលែង​លោក​ ខៀវ សំផន និង​មិន​គួរ​កាត់​ទោ ស​គាត់​ជាប់​គុក​អស់​មួយ​ជីវិត​ឡើយ​ ព្រោះ​វា​អយុត្តិធម៌​សម្រាប់​គាត់​។ លោក​សង្កេត​ឃើញ​ថា​ សាលា​ក្ដី​ខ្មែរ​ក្រហម​អនុវត្ត​ការងារ​គ្មាន​ឯករាជ្យ​ភាព​ឡើយ​ ព្រោះ​ភាគី​ពាក់ព័ន្ធ​ ឬ​បុគ្គលិក​ដែល​មាន​តួនាទី​ក្នុង​រដ្ឋាភិបាល​ជាប់​ពាក់​ព័ន្ធ​ គឺ​គ្មាន​ការ​ចូលរួម​ដោះស្រាយ​ឡើយ​។ លោក​យល់​ថា​ សាលា​ក្ដី​គ្រាន់​តែ​ជា​ឆាក​ល្ខោន​បង្គ្រប់​កិច្ច​ ដើម្បី​ចោទ​ប្រកាន់​អតីត​មេដឹកនាំ​ខ្មែរក្រហម​ទទួល​ទោស​ ហើយ​លុបលាង​នូវ​ទង្វើ​កំហុស​មួយ​ចំនួន​របស់​មេដឹកនាំ​សព្វ​ថ្ងៃ​ប៉ុណ្ណោះ៖ «មិន​គួរ​ណា​គាត់​ទោស​ដាក់​គុក​មួយ​ជីវិត​ទេ​ គាត់​ចំណាស់​ៗ​នេះ​ហើយ​ មិនមែន​គាត់​សម្លាប់​ខ្មែរ​ឯណា​ទាំង​ស្រុង​ ដោយសារ​គាត់​សម្លាប់​ខ្មែរ​អស់​ គាត់​ទៅ​ដឹកនាំ​អ្នក​ណា​ ដឹកនាំ​ដើមឈើ​ ឬ​ដឹកនាំ​ដី​ទទេ​ ? ព្រោះ​អ្នកដឹកនាំ​គេ​ត្រូវការ​ប្រជាពលរដ្ឋ​ ប្រជាពលរដ្ឋ​នៅ​មិន​បាន​សេចក្ដី​សុខ​ ដោយសារ​អ្វី​? ដោយសារ​មាន​នយោបាយ​វា​អត់​ល្អ​ ក្នុង​ចំណោម​គាត់​ដឹក​នាំ​ គេ​រុក​ គេ​ឆ្កៀល​គាត់​ គេ​ក្បត់​ គេ​បំផ្លាញ​នយោបាយ​។ បើ​ចង់​អោយ​តុលាការ​ឯករាជ្យ​អ្នក​ពាក់ព័ន្ធ​ទាំងអស់​ អ្នក​មាន​ជាប់​និន្នាការ​នយោបាយ​កម្ពុជា​ប្រជាធិបតេយ្យ​ទៅ​ ចូល​តុលាការ​ទាំងអស់​គ្នា​ទៅ​ កាត់​ទោស​ទៅ​ មិនមែន​តែ​ខៀវ​ សំផន​ តា​ ប៉ុល ពត និង​ អៀង សារី ​ឯណា​ច្រើន»

ពួក​គេ​យល់ថា​វិនាសកម្ម​របស់​ខ្មែរ​ គឺ​គ្រាន់​ជា​ល្បិច​នយោបាយ​ប្រទេស​វៀតណាម​ ដើម្បី​អោយ​កម្ពុជា​មាន​ជម្លោះ​ផ្ទៃ​ក្នុង​ និង​ដណ្ដើម​អំណាច​គ្នា។

ការ​លើក​ឡើង​របស់​អតីត​ទាហាន​ខ្មែរក្រហម​នេះ​ គឺ​បន្ទាប់​ពី​តុលាការ​កំពូល​ នៃ​សាលា​ក្ដី​ខ្មែរក្រហម​ នៅ​ថ្ងៃ​ទី២២ ខែ​កញ្ញា​សម្រេច​តម្កល់​ការ​ផ្ដន្ទាទោស​ លោក​ ខៀវ សំផន ឲ្យ​ជាប់​ពន្ធនាគារ​អស់​មួយ​ជីវិត​ ពី​បទ​ឧក្រិដ្ឋកម្ម​ប្រឆាំង​នឹង​មនុស្ស​ជាតិ​ រួម​មាន​ ការ​សម្លាប់​រង្គាល​ ការ​ធ្វើ​ទុក្ខបុកម្នេញ​ដោយ​មូលហេតុ​នយោបាយ​ និង​អំពើ​អមនុស្សធម៌​ផ្សេង​ទៀត។

លោក ខៀវ សំផន ជា​បញ្ញវន្ត​ខ្មែរ​មួយ​រូប បាន​រៀន​ចប់​ថ្នាក់​បណ្ឌិត​ផ្នែក​សេដ្ឋកិច្ច​នៅ​ប្រទេស​បារាំង។ លោក​ធ្លាប់​​ជាប់​ជា​សមាជិក​សភា​តំណាង​រាស្ត្រ ពីរ​អាណត្តិ​ក្នុង​សម័យ​សង្គម​រាស្ត្រ​និយម។ ក្រោយ​មក លោក​ក្លាយ​ជា​កម្មាភិបាល​ជាន់​ខ្ពស់ ក្នុង​របប​ខ្មែរ​ក្រហម។ ក្រោយ​របប​ខ្មែរ​ក្រហម​ដួល​រលំ លោក​នៅ​បន្ត​កាន់​មុខ​តំណែង​ជាន់​ខ្ពស់​នេះ រហូត​ដល់​ថ្ងៃ​ចាប់​ខ្លួន ដោយ​សាលាក្ដី​ខ្មែរក្រហម។ ប៉ុន្តែ លោក​ធ្លាប់​អះអាង​ថា ការទទួលខុសត្រូវ​របស់​លោក មិន​ស្មើ​នឹង​ការ​ទទួល​ខុស​ត្រូវ​របស់​លោក​នាយក​រដ្ឋ​មន្ត្រី ហ៊ុន សែន កាល​ក្នុង​របប​ខ្មែរ​ក្រហម​នោះ​ទេ។

ទោះ​ជា​យ៉ាង​ណា សេចក្ដី​សម្រេច​របស់​អង្គ​ជំនុំ​ជម្រះ​តុលាការ​កំពូល បាន​បិទ​ផ្លូវ​តវ៉ា និង​ចារ​ទុក​ក្នុង​ប្រវត្តិសាស្ត្រ​ថា លោក ខៀវ សំផន គឺ​ជា​ជន​ឧក្រិដ្ឋ ត្រូវ​ស្ថិត​ក្នុង​មន្ទីរ​ឃុំឃាំង​របស់​សាលាក្ដី​ខ្មែរ​ក្រហម ​ដែល​នឹង​ត្រូវ​អនុវត្ត​ទោស រហូត​ដល់​ជីវិត​ចុង​ក្រោយ​របស់​លោក៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។