ប្រជាសហគមន៍ខេត្តកោះកុង បន្តរកកិច្ចអន្តរាគមន៍និងដំណោះស្រាយពីលោក ហ៊ុន សែន ក្នុងទំនាស់ដីធ្លីជាមួយក្រុមហ៊ុនចិន
2019.04.25
ប្រជាសហគមន៍ ២៧នាក់ តំណាងឲ្យ ៧៧គ្រួសារមកពីស្រុកចំនួនពីរនៃខេត្តកោះកុង ប្រមូលផ្ដុំគ្នាលើកបដា នៅក្បែរភូមិគ្រឹះ លោក ហ៊ុន សែន ជិតវិមានឯករាជ្យ សុំអន្តរាគមន៍ជួយដោះស្រាយវិវាទដីធ្លីជាមួយក្រុមហ៊ុនចិន យូញៀន ដែលអូសបន្លាយជាង ១០ឆ្នាំមកហើយ។ ប៉ុន្តែការទាមទាររបស់អ្នកស្រុកគីរីសាគរ និងបទុមសាគរ ត្រូវបានកម្លាំងសន្តិសុខខណ្ឌដូនពេញជាច្រើននាក់ ហាមឃាត់ និងប្រាប់ឲ្យពួកគាត់ទៅរកដំណោះស្រាយពីក្រសួងបរិស្ថានវិញ។ ក្នុងពេលស្រែករកដំណោះស្រាយរឿងដីធ្លីពីលោក ហ៊ុន សែន មិនមានការប៉ះទង្គិចគ្នាដោយហិង្សា រវាងពលរដ្ឋនិងក្រុមសន្តិសុខនោះទេ។
តំណាងសហគមន៍កោះស្ដេច ស្រុកគិរីសាគរ ខេត្តកោះកុង លោកស្រី សាំង ពុយ ថ្លែងថា ការបន្តដើររកដំណោះស្រាយពីលោកនាយករដ្ឋមន្ត្រី ហ៊ុន សែន នៅព្រឹកថ្ងៃទី ២៤ មេសា ដោយសារតែពួកគាត់អស់ជំនឿលើក្រសួងបរិស្ថាន និងក្រសួងរៀបចំដែនដី ដែលរុញដាក់ទៅវិញទៅមក ហើយមិនព្រមទទួលខុសត្រូវដោះស្រាយបញ្ចប់បញ្ហាដីធ្លីឲ្យពួកគាត់។ តំណាងពលរដ្ឋរូបនេះ ស្នើសុំលោក ហ៊ុន សែន ជួយអន្តរាគមន៍និងផ្ដល់ដំណោះស្រាយរឿងដីធ្លីដល់ពួកគាត់ទាំង៧៧គ្រួសារ។
ដំណោះស្រាយ ដែលពលរដ្ឋមកពីខេត្តកោះកុង ចង់បានពីលោក ហ៊ុន សែន គឺស្នើសុំកាត់ឆ្វៀលដី ចេញពីតំបន់របស់ក្រុមហ៊ុន និងចេញប្លង់កម្មសិទ្ធិកាន់កាប់ដីធ្លីឲ្យពួកគាត់ ហើយភាគីក្រុមហ៊ុនត្រូវផ្ដល់ជាសំណងទឹកប្រាក់តាមតម្លៃទីផ្សារ ចំពោះដីធ្លីរបស់ពលរដ្ឋណាដែលក្រុមហ៊ុនត្រូវការ៖ «អត់បានដាក់ញត្តិ យើងទៅសុំអន្តរាគមន៍ដើម្បីឲ្យសម្ដេចគាត់ដោះស្រាយ ព្រោះដាក់ញត្តិយើងដាក់ដឹងប៉ុន្មានសន្លឹកមកហើយ កន្លែងខុទ្ទកាល័យហ្នឹងណា៎។ អញ្ចឹង! យើងអត់បានដាក់ញត្តិ យើងចង់ឲ្យសម្ដេចគាត់បានដឹងព័ត៌មាន ព្រោះកន្លងយើងជឿថា មានមន្ត្រីរាយការណ៍មិនត្រូវ អ៊ីចឹងណា៎ រាយការណ៍បិទបាំងមិនឲ្យគាត់ដឹង។ យើងថាស្នើដោះស្រាយឲ្យលឿនទៅឲ្យពួកយើង គឺពួកយើងអត់មានការដោះស្រាយ»។
កាលពីម្សិលមិញ ថ្ងៃទី២៣ មេសា អ្នកកោះកុងជិត៣០នាក់ នាំគ្នាទៅរកដំណោះស្រាយពីក្រសួងដែនដី ក៏ប៉ុន្តែត្រូវមន្ត្រីតំណាងក្រសួង ប្រាប់ពួកគាត់ឲ្យទៅសាកសួរដំណោះស្រាយពីក្រសួងបរិស្ថានវិញ។
តំណាងពលរដ្ឋ លោកស្រី សាំង ពុយ ឲ្យដឹងថា អស់រយៈពេល២ថ្ងៃមកហើយ ដែលពួកគាត់តវ៉ារកដំណោះស្រាយនៅរាជធានីភ្នំពេញ ប៉ុន្តែមិនទាន់ទទួលបានការឆ្លើយតបណាមួយ ពីខាងក្រសួងបរិស្ថានដែលជាប្រធានអន្តរក្រសួង ក្នុងការដោះស្រាយទំនាស់ដីធ្លីជាមួយក្រុមហ៊ុនចិន យូញៀន៖ «យើងទៅក្រសួងបរិស្ថានដូចដដែលអ៊ីចឹង។ ពួកយើងគ្រាន់តែនិយាយថា រង់ចាំ ក្រសួងកំពុងតែធ្វើការ និយាយបានតែប៉ុណ្ណឹងហើយក៏ដើរចូលទៅក្នុងវិញ។ អត់មានអ្នកណា ឬក៏អត់មានជួបគណៈកម្មការដោះស្រាយរឿងយើង គេថា អត់មានអ្នកណានៅទេ អត់មានអ្នកណានៅទាំងអស់។ ព្រឹកមិញ! យើងមកក្រសួងបរិស្ថាន ហ្នឹង ហើយយើងអង្គុយចាំនៅក្រសួងបរិស្ថានហ្នឹង សមត្ថកិច្ចឲ្យទៅធ្វើនៅកន្លែងដើមឈើដែរ អត់ឲ្យឈរនៅមុខក្រសួងបរិស្ថានទេ។ យើងថា អត់ព្រមទេ ចង់ជួបគណៈកម្មការដោះស្រាយឲ្យបាន តែនៅតែអត់ជួប។ គេអត់ចេញមកជួប»។
ចំពោះដំណោះស្រាយបញ្ហានេះ អ្នកនាំពាក្យក្រសួងបរិស្ថាន លោក នេត្រ ភ័ក្ត្រា លើកឡើងថា ក្រសួងមិនអាចធ្វើទៅបាន និងទាន់ពេលវេលា ដូចការចង់បានរបស់ប្រជាពលរដ្ឋនោះទេ ព្រោះក្រសួងត្រូវការស៊ើបអង្កេត និងពិនិត្យឲ្យបានត្រឹមត្រូវជាមុនសិន។ លោក នេត្រ ភ័ក្ត្រា បញ្ជាក់ ក្រសួងបរិស្ថាន កំពុងគិតគូរអំពីដំណោះស្រាយរឿងនេះហើយ ប៉ុន្តែត្រូវរង់ចាំសេចក្ដីសម្រេចពីថ្នាក់ដឹកនាំជាមុនសិន ថាតើគួរបន្តឲ្យអន្តរក្រសួង ដែលមានក្រសួងដែនដីនិងក្រសួងបរិស្ថាន ជាអ្នកដោះស្រាយ ឬក៏ត្រូវផ្ទេរទៅអាជ្ញាធរជាតិដោះស្រាយទំនាស់ដីធ្លី ជាអ្នកដោះស្រាយវិញ។ គិតដល់ពេលនេះ អ្នកនាំពាក្យរូបនេះ ថា ថ្នាក់ដឹកនាំមិនទាន់សម្រេចយកយន្តការដោះស្រាយណាមួយនៅឡើយទេ ចំពោះទំនាស់ដីធ្លីនៅខេត្តកោះកុង៖ «យើងមិនឱបបញ្ហានៅក្នុងទ្រូង ពីព្រោះថាតើមានសារប្រយោជន៍ដែលយើងត្រូវទុកបញ្ហាជម្លោះនេះ វាអត់មានប្រយោជន៍អីទាំងអស់។ អ៊ីចឹងហើយ! បានជាយើងខិតខំនៅក្នុងការដោះស្រាយ ក៏ប៉ុន្តែការដោះស្រាយត្រូវមានការចូលរួមពីគ្រប់ភាគីទាំងអស់។ បើសិនជា ការសម្រេចថាយើងត្រូវបន្តតាមរយៈយន្តការអន្តរក្រសួង គឺយន្តការអន្តរក្រសួងដែលមានស្រាប់ គឺបន្តដោះស្រាយបញ្ហានេះ និងភាគីដែលពាក់ព័ន្ធ មានប្រជាពលរដ្ឋ និងក្រុមហ៊ុន»។
ចំណែក ប្រធានគ្រប់គ្រងការិយាល័យឃ្លាំមើលសិទ្ធិមនុស្សនៃអង្គការលីកាដូ (Licadho) លោក អំ សំអាត សង្កេតឃើញថា ភាគីក្រុមហ៊ុនចិន យូញៀន ឌីវេឡុបមិន គ្រុប ( Union Development Group Co.,Ltd) កំពុងពន្លឿនការសាងសង់ប្រលានយន្តហោះនៅលើដីដែលរដ្ឋសម្បទានក្នុងខេត្តកោះកុង ឲ្យបានរួចរាល់នៅឆ្នាំក្រោយ។ ហេតុនេះ លោក អំ សំអាត យល់ថា អន្តរក្រសួង ជាពិសេស ក្រសួងបរិស្ថាន ក៏គួរពន្លឿនការដោះស្រាយឲ្យប្រជាពលរដ្ឋឲ្យឆាប់ដែរ ដោយមិនគួរអូសបន្លាយតទៅទៀតនោះទេ៖ «ខ្ញុំគិតថា ឲ្យវាស្របគ្នា ឲ្យការអភិវឌ្ឍន៍ហ្នឹងទៅវាគ្មានបញ្ហា ក្រសួងដែលពាក់ព័ន្ធ គួរតែរូតរះ ដើម្បីបញ្ចប់បញ្ហាសេសសល់ រឿងដីធ្លីដែលមានទំនាស់ជាមួយក្រុមហ៊ុន យូញៀន គ្រុប ហ្នឹងទៅ។ បើមិនអ៊ីចឹងទេ វានឹងជះឥទ្ធិពលនៅតែគេរិះគន់ថា បញ្ហាដីធ្លីនៅតែមានហើយវាជាករណីរំលោភលើដីធ្លី និងសិទ្ធិរបស់ប្រជាពលរដ្ឋដែលកាន់កាប់ដីធ្លីនៅហ្នឹង វាអត់ចេះចប់ទេ នាំឲ្យសហគមន៍ជាតិនិងអន្តរជាតិ គេនៅតែមានការរិះគន់ អ៊ីចឹងបាទ!» ។
ជម្លោះដីធ្លីដ៏រ៉ាំរ៉ៃរវាងពលរដ្ឋជាមួយនឹងក្រុមហ៊ុនចិន យូញៀន ឌីវេឡុបមិន គ្រុប (Union Development Group Co.,Ltd) នៅខេត្តកោះកុង បានអូសបន្លាយជាង ១០ឆ្នាំមកហើយ។ ពលរដ្ឋថា ក្រុមហ៊ុនចិន យូញៀន នៅពេលកន្លងមកបានធ្វើសកម្មភាពជាច្រើន ដើម្បីបណ្ដេញប្រជាពលរដ្ឋចេញពីលំនៅឋាន ក្នុងភូមិក្បែរមាត់សមុទ្រ ដោយឲ្យសំណងមិនសមរម្យទៅពលរដ្ឋ។ ពលរដ្ឋអះអាងថា ក្រុមហ៊ុនចិនមួយនេះ បានដុតកម្ទេចផ្ទះ និងកាប់បំផ្លាញផលដំណាំរបស់ពួកគាត់អស់ជាច្រើនហិកតារ នៅតំបន់ថ្មពាន ក្នុងឃុំព្រែកខ្សាច់ ស្រុកគីរីសាគរ ខេត្តកោះកុង។
ក្រុមហ៊ុនចិន យូញៀន ឌីវេឡុបមិន គ្រុប (Union Development Group Co.,Ltd) បានទទួលដីសម្បទានសេដ្ឋកិច្ចសរុបចំនួនជាង៤ម៉ឺន៥ពាន់ហិកតារ (៤៥.១០០) ពីរបបក្រុងភ្នំពេញ កាលពីឆ្នាំ២០០៨ ដើម្បីសាងសង់ទីក្រុងទេសចរណ៍ដ៏ធំមួយ ដែលត្រូវចំណាយទឹកប្រាក់ជិត៤ពាន់លានដុល្លារ (៣,៨ពាន់លានដុល្លារ)។ គម្រោងទីក្រុងទេសចរណ៍ដ៏ធំសម្បើមមួយនេះ កំពុងសាងសង់នៅចំកណ្ដាលឧទ្យានជាតិបទុមសាគរ ក្នុងខេត្តកោះកុង ដែលអាចប្រើពេល២៥ឆ្នាំដើម្បីបញ្ចប់ការសាងសង់។
គម្រោងអភិវឌ្ឍនេះ បានបណ្ដាលឲ្យប្រជាពលរដ្ឋជាង១ពាន់គ្រួសារ ចាកចេញពីលំនៅឋាន ប៉ុន្តែនៅមានប្រជាពលរដ្ឋជាច្រើនគ្រួសារទៀតនៅមិនទាន់ទទួលបានដំណោះនៅឡើយមកដល់ពេលនេះ។
ប្រជាសហគមន៍ដីធ្លីខេត្តកោះកុងដែលមានទំនាស់ដីធ្លីជាមួយក្រុមហ៊ុនចិន យូញៀន បញ្ជាក់ជំហរថា ពួកគេនៅតែបន្តឡើងមកតវ៉ាទាមទាររកដំណោះស្រាយពីក្រសួងដែនដី និងក្រសួងបរិស្ថាន ជាថ្មីទៀត លុះត្រាតែទទួលបានដំណោះស្រាយពិតប្រាកដពីអាជ្ញាធរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។