គ្រួសារជនជាប់ឃុំដោយសារបញ្ហាដីធ្លីដែលស្លាប់នៅពន្ធនាគារខេត្តកណ្តាលរស់នៅជាមួយការឈឺចាប់
2021.09.13
លោកស្រី សុខ សូផា ប្រពន្ធសពលោក ប៊ុន ចាន់សិដ្ឋ យំបោកខ្លួនស្តាយស្រណោះចំពោះការបាត់បង់ស្វាមីជាទីស្រលាញ់របស់ខ្លួន ក្នុងពេលពិធីបូជាសពស្វាមីកាលពីថ្ងៃទី៥ ខែកញ្ញា ឆ្នាំ២០២១។
រូប៖ ពលរដ្ឋផ្ដល់ឱ្យ
គ្រួសារជនជាប់ឃុំដោយសារបញ្ហាដីធ្លីជាមួយបុគ្គលឯកជនដែលអាជ្ញាធរមិនបង្ហាញអត្តសញ្ញាណហើយបានស្លាប់នៅក្នុងពន្ធនាគារខេត្តកណ្តាល កំពុងរស់នៅលាយឡំដោយទុក្ខក្រៀមក្រំ និងការឈឺចាប់ ក្នុងគ្រាដែលជីវភាពកំពុងយ៉ាប់យឺន។ មន្រ្តីសង្គមស៊ីវិល ចាត់ទុកការចាប់ខ្លួនពលរដ្ឋដែលមានទំនាស់ដីធ្លីកន្លងមក គឺជាការរំលោភសិទ្ធិមនុស្សធ្ងន់ធ្ងរ ផ្ទុយពីគោលកាណ៍ប្រជាធិបតេយ្យ។
ប្រពន្ធជនជាប់ឃុំដោយសារបញ្ហាដីធ្លីដែលបានស្លាប់នៅមន្ទីរពេទ្យជ័យជំនះ ក្រុងតាខ្មៅ ខេត្តកណ្តាល កាលពីដើមខែកញ្ញានេះ កំពុងរស់នៅជាមួយកូនពីរនាក់ដោយរងទុក្ខក្រៀមក្រំ បន្ទាប់ពីបាត់បង់មនុស្សជាទីស្រឡាញ់។ ស្ត្រីមេម៉ាយរូបនេះ នៅតែខកចិត្តដោយសារអាជ្ញាធរមិនត្រឹមតែមិនបានជួយដោះស្រាយបញ្ហាដីធ្លីរបស់គាត់ប៉ុន្តែថែមទាំងចាប់ប្តីលោកស្រីយកទៅឃុំរហូតដល់ធ្លាក់ខ្លួនឈឺស្លាប់ទៀតផង។
ប្រពន្ធសពលោក ប៊ុន ចាន់សិដ្ឋ គឺលោកស្រី សុខ សូផា រៀបរាប់ប្រាប់អាស៊ីសេរីនៅថ្ងៃទី១២ ខែកញ្ញាថា ប្តីលោកស្រីជាជំហរគ្រួសារដោយពេលនៅរស់ធ្វើជាកម្មករលក់ទឹកសុទ្ធឱ្យក្រុមហ៊ុនឯកជននៅរាជធានីភ្នំពេញ ដើម្បីរកប្រាក់ចិញ្ចឹមកូន និងសងបំណុលធនាគារ។ ប៉ុន្តែជីវភាព គ្រួសារលោកស្រីបានធ្លាក់ចុះមួយរំពេចក្រោយប្តីជាប់ឃុំរឿងការពារដីធ្លីស្រែ។ ស្រ្តីវ័យ ៣៥ ឆ្នាំរូបនេះបន្តទាំងថា បច្ចុប្បន្នលោកស្រីកំពុងរស់នៅដោយទុក្ខក្រៀមក្រំព្រោះមិនអស់ចិត្តចំពោះរឿងរ៉ាវដែលបានកើតឡើង ហើយអ្វីដែលលោកស្រីស្រងោយចិត្តបំផុតនោះ គឺកូនយំនឹកឪពុករាល់ថ្ងៃ ខណៈលោកស្រីត្រូវរ៉ាប់រងបន្ទុកគ្រួសារម្នាក់ឯង៖ «ពេលវាឃើញរូបថតយើងសែនបាយ គឺវាយំវាអត់ប្រាប់តែវាអត់ប្រាប់យើងទេអាធំ តែកូនស្រីតូចគ្នាអត់ដឹងអីទេ តែសួរយើងតើថ្ងៃណាប៉ាវាចុះមកវិញ ប៉ាលែងចុះហើយ ប៉ាឡើងឋានលើបាត់ហើយខ្មោចប៉ាគេដុតបាត់ហើយ វាថាឱ្យប៉ាខ្ញុំមកវិញមក ខ្ញុំអត់ដឹងត្រូវប្រាប់កូនមិចទៀត ខ្ញុំជាម្តាយក៏អួលអាក់ក្នុងទ្រូងដែរ រាល់ថ្ងៃខ្ញុំធ្វើការទាំងទឹកភ្នែកនឹកឃើញស្រណោះពីប្តីហើយឃើញកូនដេកយំទន្ទឹមគ្នា ប្រសិនម្តាយមានរឿងអីទៀតកូនខ្ញុំពីរមិនដឹងគ្មានអ្នកមើលការខុសត្រូវទេ»។
លោកស្រី សុខ សុផា បញ្ជាក់ថា អាជ្ញាធរបានធ្វើកោសល្យវិច័យសពប្តីនៅមន្ទីរពេទ្យជ័យជំនះភ្លាមៗ ហើយប្រាប់ថា ប្តីលោកស្រីស្លាប់ដោយសារជំងឺបេះដូង ប៉ុន្តែរហូតមកដល់ពេលនេះអាជ្ញាធរមិនបានបកស្រាយហេតុការណ៍នៅក្នុងពន្ធនាគារ ឬបង្ហាញឯកសារច្បាស់លាស់ជុំវិញករណីនេះបន្ថែមនៅឡើយទេ។ លោកស្រីយល់ថា បញ្ហាផ្ទួនៗទាំងនេះ គឺជារឿងអយុត្តិធម៌ ប៉ុន្តែលោកស្រីមិនស្នើឱ្យមានការស៊ើបអង្កេតករណីស្លាប់និងដីធ្លីទេ ព្រោះបារម្ភពីសុវត្ថិភាព។
លោក ប៊ុន ចាន់សិដ្ឋ អាយុ ៣៤ ឆ្នាំ ជាពលរដ្ឋម្នាក់ដែលជាប់ពន្ធនាគារដោយសារតវ៉ារឿងដីធ្លីនៅខេត្តកណ្តាល បានស្លាប់នៅមន្ទីរពេទ្យជ័យជំនះ ក្រុងតាខ្មៅ កាលពីថ្ងៃទី៤ ខែកញ្ញា បន្ទាប់ដឹកចេញពីពន្ធនាគារខេត្ត ហើយអាជ្ញាធរអះអាងថា លោកស្លាប់ដោយសារជំងឺបេះដូង។
វិទ្យុអាស៊ីសេរី មិនអាចទាក់ទងអភិបាលខេត្តកណ្តាលលោក គង់ សោភ័ណ្ឌ អនុប្រធានពន្ធនាគារខេត្តកណ្តាលលោក ហេង ចលនា និងអ្នកនាំពាក្យតុលាការខេត្តកណ្តាល ឯក ស៊ុនរស្មី ដើម្បីបញ្ជាក់ជុំវិញរឿងនេះបានទេ នៅថ្ងៃទី១២ ខែកញ្ញា ដោយទូរស័ព្ទចូលតែពុំមានអ្នកទទួល។
ប៉ុន្តែអភិបាលខេត្តកណ្តាលលោក គង់ សោភ័ណ្ឌ បានប្រាប់វិទ្យុអាស៊ីសេរីថ្មីៗនេះថា លោក ប៊ុន ចាន់សិដ្ឋ បានស្លាប់ដោយសារជំងឺបេះដូង ដោយមិនពាក់ព័ន្ធជំងឺកូវីដ-១៩ទេ។ លោកអះអាងថា ករណីនេះគ្រូពេទ្យ និងមន្រ្តីពន្ធនាគារខេត្តបានព្យាយាមយកចិត្តទុកដាក់ និងជួយសង្គ្រោះគាត់ដោយត្រឹមត្រូវ ហើយអាជ្ញាធរបានជួយឧបត្ថម្ភថវិកាមួយចំនួនដល់គ្រួសារសពផងដែរ។
ជុំវិញករណីជម្លោះដីធ្លីនេះ រហូតមកដល់ពេលនេះ អាជ្ញាធរខេត្តកណ្តាលមិនទាន់បង្ហាញសញ្ញាណាមួយក្នុងការឈានដល់ការពិនិត្យមើលករណីជនជាប់ឃុំ ពីរនាក់ផ្សេងទៀត តបតាមការអះអាងរបស់អាជ្ញាធរកន្លងទៅនៅឡើយទេ។ គ្រួសារពលរដ្ឋជាប់ឃុំ ដោយសារបញ្ហាធ្លីនៅក្នុងពន្ធនាគារខេត្តកណ្តាលកំពុងបារម្ភអំពីសុខទុក្ខប្តី និងឪពុកជាខ្លាំង ហើយពួកគេស្នើឱ្យអាជ្ញាធរពាក់ព័ន្ធដោះលែងអ្នកទាំងនោះឱ្យមានសេរីភាព។
លោកស្រី ទ្រី ស្រីមុំ មានប្រសាសន៍ថា ប្តីរបស់លោកស្រី គឺលោក គឹម បូរិន កំពុងជាប់ពន្ធនាគារដោយអយុត្តិធម៌ជាង ២ ខែហើយពាក់ព័ន្ធរឿងទាមទាររកដំណោះស្រាយបញ្ហាដីធ្លី ហើយលោកស្រីមិនបានជួបមុខប្តី ឬ ទទួលដំណឹងពីពន្ធនាគារសោះឡើយ។ លោកស្រីព្រួយបារម្ភពីសុខទុក្ខប្តីជាពិសេសសុខភាពដោយខ្លាចមន្រ្តីពន្ធនាគារមិនបានយកចិត្តទុកដាក់ត្រឹមត្រូវ ព្រោះគាត់ធ្លាប់មានជំងឺប្រចាំកាយ។ ស្រ្តីវ័យ៣១ឆ្នាំរូបនេះត្អូញត្អែរថា គ្រួសារលោកស្រីកំពុងជួបបញ្ហាខ្វះខាតជីវភាពខ្លាំងដោយសារបាត់បង់ចំណូលហើយត្រូវចិញ្ចឹមកូនៗបីនាក់នៅក្នុងបន្ទុកបន្ទាប់ពីប្តីជាប់ពន្ធនាគារ។ លោកស្រីស្នើដល់តុលាការដោះលែងប្តី និងពលរដ្ឋម្នាក់ទៀតឱ្យមកជួបជុំគ្រួសារវិញ៖ «ចេះភ័យខ្លាចដែរហ្នឹងព្រោះអីឮដំណឹងស្លាប់មួយហើយភ័យខ្លាចដែរ ខ្លាចគាត់ឈឺអីព្រោះគាត់ឧស្សាហ៍ឈឺនៅក្រៅ ខ្ញុំចង់ឱ្យពន្លឿនទៅដោះលែងគាត់មកខាងក្រៅកុំឱ្យនៅក្នុងពន្ធនាគារចឹង»។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុកលោក នី សុខា ស្តោកស្តាយដែលអាជ្ញាធរបណ្តោយឱ្យករណីជម្លោះដីធ្លីឈានដល់ការចាប់ពលរដ្ឋដាក់ពន្ធនាគារ ដោយមិនព្យាយាមរកដំណោះស្រាយដោយសន្តិវិធី និងស្របតាមគោលការណ៍ច្បាប់។ លោកចាត់ទុកករណីស្លាប់នេះថា ជាសោកនាកម្មជម្លោះដីធ្លីដោយបន្សល់ទុកនូវស្រ្តីមេម៉ាយ កូនកំព្រាឪពុក បាត់បង់ជំហរគ្រួសារជាដើម។ លោកបញ្ជាក់ថា ជនជាប់ឃុំមានសិទ្ធិទំនាក់ទំនងជាមួយគ្រួសារ តែប្រសិនមន្រ្តីពន្ធនាគារមិនបានផ្តល់ដំណឹងដល់សាច់ញាតិជនជាប់ឃុំទេនោះ វាគឺជាការរំលោភសិទ្ធិមនុស្ស។ លើសពីនេះលោកយល់ថា អាជ្ញាធរគួរបង្ហាញលទ្ធផលកោសល្យវិច័យ និងបញ្ជាក់មូលហេតុឱ្យបានត្រឹមត្រូវដើម្បីឱ្យគ្រួសារអ្នកជាប់ឃុំអស់មន្ទិលសង្ស័យជុំវិញរឿងនេះ៖ «ប្រសិនបើឃុំខ្លួនដើម្បីឱ្យគេឈប់តវ៉ា អានេះជារឿងបំបិទសិទ្ធិសេរីភាពគេធ្ងន់ធ្ងរណាស់ នៅពេលណាដែលមានជម្លោះកើតឡើង នៅពេលមានបញ្ហារំលោភទៅលើដីធ្លី គេមានសិទ្ធិក្នុងការតវ៉ាទាមទារ បើសិនជាយើងមិនឱ្យគេតវ៉ាទាមទារ ហើយអ្នកដែលទាមទារអ្នកដែលតវ៉ាត្រូវចាប់ដាក់គុកដាក់ទោសដាក់ទណ្ឌ ខ្ញុំគិតថាយើងកំពុងអនុវត្តគឺថាមិនមែនគោលការណ៍ប្រជាធិបតេយ្យទេ»។
សមត្ថកិច្ចខេត្តកណ្តាល បានចាប់ខ្លួនពលរដ្ឋមានបញ្ហាដីធ្លី គឺលោក ផៃ ថី លោក គឹម បូរិន និងលោក ប៊ុន ចាន់សិដ្ឋ កាលពីថ្ងៃទី២ ខែកក្កដា ពាក់ព័ន្ធនឹងបញ្ហាដីធ្លីមួយកន្លែងនៅស្រុកស្អាង បន្ទាប់ពីពួកគាត់ចេញមុខការពារដីស្រែពលរដ្ឋសរុបទំហំ ១៧៥ហិតារ កាលពីចុងខែមិថុនាកន្លងទៅ ដែលពួកគាត់ថា មានឈ្មួញមិនស្គាល់អត្តសញ្ញាណម្នាក់ បានរំលោភយក។ ចៅក្រមស៊ើបសួរនៃសាលាដំបូងខេត្តកណ្ដាលលោក ជា សុខហៀង សម្រេចឃុំខ្លួនដាក់ពន្ធនាគារ ពលរដ្ឋទាំង ៣នាក់ ក្រោមបទចោទតាមក្រមព្រហ្មទណ្ឌតែមួយ គឺញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ដែលប្រព្រឹត្តនៅចំណុចអូរសន្ធៃ ភូមិលេខ៤ ឃុំប្រាសាទ ស្រុកស្អាង ខេត្តកណ្ដាល កាលពីដើមខែកក្កដា។
ប្រពន្ធសពលោក ប៊ុន ចាន់សិដ្ឋ នៅតែមិនអស់ចិត្តចំពោះអ្វីដែលលោកស្រីហៅថា ការធ្វេសប្រហែល មិនយកចិត្តទុកដាក់របស់អាជ្ញាធរ ព្រមទាំងមិនបានជូនដំណឹងឱ្យគ្រួសារពីស្ថានភាពប្តីរបស់លោកស្រីរហូតដល់ស្លាប់ទើបអាជ្ញាធរប្រាប់គ្រួសារឱ្យទៅយកសពនៅឯមន្ទីរពេទ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
