ពលរដ្ឋនៅស្រុកថ្មគោល ខេត្តបាត់ដំបង អះអាងថា អាជ្ញាធរបានកាយដីភូមិរបស់គាត់យកទៅលក់ក្រោមហេតុផលស្ដារអូរធម្មជាតិ ដែលបណ្ដាលឱ្យដីរបស់គាត់រួមតូច ប៉ះពាល់ដល់ការដាំដំណាំ និងទ្រព្យសម្បត្តិផ្ទាល់ខ្លួន។ មន្ត្រីសង្គមស៊ីវិល យល់ឃើញថា គម្រោងស្ដារប្រព័ន្ធធារាសាស្ត្ររបស់អាជ្ញាធរនៅទីនោះមិនសមហេតុផល។
ពលរដ្ឋរងគ្រោះដោយការបាត់បង់ដីធ្លីនៅឃុំអូរតាគី ស្រុកថ្មគោល ចោទអាជ្ញាធរនៅតំបន់នោះថាបានកាយយកដីភូមិរបស់ពួកគាត់ ដែលនៅជាប់អូរធម្មជាតិនោះ យកទៅលក់ ក្រោមលេសស្ដារប្រព័ន្ធធារាសាស្ត្រ។
ពលរដ្ឋនៅឃុំអូរតាគី ស្រុកថ្មគោល លោកស្រី ប៊ិត ពៅ ប្រាប់វិទ្យុអាស៊ីសេរី នៅថ្ងៃទី១០ វិច្ឆិកា ថា កាលពីដើមឆ្នាំ២០២៣ អាជ្ញាធរឃុំអូរតាគី និងមន្ត្រីរបស់មន្ទីរធនធានទឹក បានដកបង្គោលព្រំដីខាងក្រោយផ្ទះរបស់លោកស្រី និងកាយយកអាចម៍ដី អស់ជាងពាក់កណ្ដាល ក្រោមលេសថា ដើម្បីស្ដារអូរ។ ក៏ប៉ុន្តែ លោកស្រី ថា ការលើកឡើងរបស់អាជ្ញាធរ មិនពិតនោះទេ ព្រោះទម្រង់ផ្ទៃដីដែលអាជ្ញាធរកាយ មានទំហំធំក្លាយជាបឹង ដែលប៉ះពាល់ដល់ដីកសិកម្មដែលជាកម្មសិទ្ធិរបស់លោកស្រីមានប្លង់កាន់កាប់ត្រឹមត្រូវ។
លោកស្រី ប៊ិត ពៅ៖ «កាលហៅបង(លោកស្រី ប៊ិត ពៅ)ទៅប្រជុំហ្នឹង គេថា បើបងរករឿងគេ ទៅនៅឯណា ក៏ទៅទៅ!ប៉ុន្តែបើគេអត់រករឿង ទុកឱ្យគេធ្វើតាមអំពើចិត្តគេ គេឱ្យនៅលើទំនប់សំណង់ គេនិយាយអ៊ីចឹង។ ដល់ពេលមកដល់ថ្ងៃប្រព្រឹត្តិ លេងមកលួចដករបង។ ដកបង្គោលរបងច្រើនណាស់ ដកអស់ហើយ ប៉ុន្មានសារអស់រលីង។ គ្នាគេគប់គិតគ្នាច្រើនណាស់ មកលួចដក គេថតបានឱ្យបង»។
រូបភាពចាប់ពីផ្កាយរណប (Google Earth) ក្នុងពេលបច្ចុប្បន្ន ធៀបនឹងឆ្នាំ២០២១ ដីក្រោយផ្ទះលោកស្រី ប៊ិត ពៅ និងពលរដ្ឋដទៃទៀត ជិត ២០គ្រួសារ ដែលនៅក្បែរនោះ បានបាត់បង់ក្លាយទៅជាផ្ទៃបឹងយ៉ាងធំ ខណៈលោកស្រីនៅសល់តែដីផ្ទះប្រហែល ៣០ម៉ែត្រប៉ុណ្ណោះ។
ឆ្លើយតបនឹងបញ្ហានេះ មេភូមិត្រស់ លោក ហឿន សាលួត ប្រាប់វិទ្យុអាស៊ីសេរី ថា អាជ្ញាធរមិនបានកាយដីឯកជន របស់ប្រជាពលរដ្ឋនោះទេ ហើយការកាយដី ដែលលោកអះអាងថា ដើម្បីស្ដារអូរនោះ គឺអាជ្ញាធរបានវាស់ដីចំណែករបស់រដ្ឋ ពីមាត់អូរប្រវែង ៤០ម៉ែត្រដោយមិនប៉ះពាល់ដល់ដីកម្មសិទ្ធិរបស់ពលរដ្ឋឡើយ។
លោក ហឿន សាលួត៖ «អូរវាមានទម្រង់របស់វាហើយ ប៉ុន្តែគេកាយប្របកៀនហ្នឹង ទីណាគេអាចកាយបាន គេកាយទីហ្នឹងទៅ»។
ទោះជាបែបនេះក្ដី ពលរដ្ឋដែលរស់នៅជាប់អាងស្តុកទឹកអូរតាគី លើកឡើងថា អាជ្ញាធរយកលេស ស្ដារអូរតាគីនេះ ដើម្បីកាយយកអាចម៍ដីលក់ ព្រោះទីតាំងដែលអាជ្ញាធរកាយ មានលក្ខណៈឆក រដិបរដុប គឺមិនមែនជាការស្ដារយកជម្រៅ ឬពង្រីកនោះឡើយ ហើយការកាយដីនេះ មានប្រវែង ៧០ម៉ែត្រ ពីមាត់អូរ ដែលលើសពីការបកស្រាយរបស់អាជ្ញាធរ។ ក្នុងនោះ មានពលរដ្ឋជិត ២០គ្រួសារផ្សេងទៀត ក៏ទទួលរងពីផលប៉ះពាល់ពីការកាយដីនៅតាមមាត់អូរតាគី នេះដូចគ្នា។
ជុំវិញរឿងនេះ អ្នកសម្របសម្រួលកម្មវិធីផ្នែកឃ្លាំមើលការរំលោភសិទ្ធិមនុស្សនៃអង្គការលីកាដូ ប្រចាំខេត្តបាត់ដំបង លោក អ៊ិន គង់ជិត មានប្រសាសន៍ថា គម្រោងស្ដារប្រព័ន្ធធារាសាស្ត្រ និងធ្វើទ្វារទឹកនៅលើដីលោកស្រី ប៊ិត ពៅ គឺជារឿងមិនសមហេតុផល និងឆ្លុះបញ្ចាំងឱ្យឃើញពីចេតនារបស់អាជ្ញាធរដែលចង់រំលោភយកដីពលរដ្ឋ ខណៈជនរងគ្រោះជាស្ត្រីមេម៉ាយរស់នៅម្នាក់ឯង។ លោកជំរុញឱ្យអាជ្ញាធរផ្ដល់ដំណោះស្រាយដល់លោកស្រី ប៊ិត ពៅ ដើម្បីឱ្យគាត់ទទួលបានភាពយុត្តិធម៌ និងសំណងឱ្យបានសមស្របទៅនឹងអ្វីដែលគាត់បានបាត់បង់។
លោក អ៊ិន គង់ជិត៖ «អ៊ីចឹងត្រូវផ្ដល់សំណងឱ្យគាត់ទៅ ហើយបើមិនផ្ដល់សំណងទេ គឺត្រូវរកដីណាសមរម្យ ដីកសិកម្មណាទំនេរសមរម្យ ប៉ះប៉ូវឱ្យគាត់វិញទៅ។ គិតថាអាជ្ញាធរគាត់ធ្វើដើម្បីជាប្រយោជន៍សាធារណៈហើយ ប៉ុន្តែកន្លែងហ្នឹង វាអត់គួរត្រូវធ្វើផង។ វាមានទ្វារទឹកមួយធំទៅហើយហ្នឹង។ ត្រូវតែដោះស្រាយឱ្យគាត់ ប្រកបដោយភាពយុត្តិធម៌ដើម្បីឱ្យគាត់មានអារម្មណ៍ស្ងប់ចិត្ត ដែលគាត់ជាស្ត្រីមានជំងឺផង ជាស្ត្រីមេម៉ាយផង ហើយទៅធ្វើអ៊ីចឹង វាធ្វើបាបគាត់ខ្លាំងក្លាមែនទែន»។
ពលរដ្ឋរងគ្រោះ និងមន្ត្រីសង្គមស៊ីវិលលើកឡើងថា រាល់គម្រោងអភិវឌ្ឍក្នុងមូលដ្ឋាន អាជ្ញាធរមិនត្រូវធ្វើឱ្យមានផលប៉ះពាល់ដោយគ្មានសំណង និងគ្មានដំណោះស្រាយបែបនេះឡើយ បើពុំនោះទេ នឹងមានការរិះគន់ថា អាជ្ញាធរជាជនឆ្លៀតឱកាសកេងចំណេញលើពលរដ្ឋដើម្បីប្រយោជន៍ផ្ទាល់ខ្លួនមិនខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។