អ្នក​មាន​ជម្លោះដីធ្លី​នៅ​ឃុំ​ដូង​ប្រតិកម្ម​នឹង​អាជ្ញាធរ​ខេត្ត​កំពង់ធំ​ករណី​ជម្លោះ​ដី​ធ្លី

ដោយ ថន ថារ៉ូ
2019-08-30
អ៊ីម៉ែល
មតិ
Share
បោះពុម្ព
ពលរដ្ឋ​នៅ​ឃុំ​ដូង ស្រុក​ប្រាសាទ​បល្ល័ង្ក​ ខែត្រ​កំពង់ធំ លើក​គ្នា​តវ៉ា​នៅ​សាលា​ឃុំ រឿង​អាជ្ញាធរ​ខេត្ត​ដក​ដី​ពួក​គាត់​យក​ទៅ​ធ្វើ​ជា​ដី​សម្បទាន​សេដ្ឋកិច្ច កាល​ពី​ថ្ងៃ​ទី២៦ ខែ​មេសា ឆ្នាំ២០១៩។
ពលរដ្ឋ​នៅ​ឃុំ​ដូង ស្រុក​ប្រាសាទ​បល្ល័ង្ក​ ខែត្រ​កំពង់ធំ លើក​គ្នា​តវ៉ា​នៅ​សាលា​ឃុំ រឿង​អាជ្ញាធរ​ខេត្ត​ដក​ដី​ពួក​គាត់​យក​ទៅ​ធ្វើ​ជា​ដី​សម្បទាន​សេដ្ឋកិច្ច កាល​ពី​ថ្ងៃ​ទី២៦ ខែ​មេសា ឆ្នាំ២០១៩។
រូប៖ ពលរដ្ឋ

ពលរដ្ឋ​មាន​ជម្លោះដីធ្លី​នៅ​ឃុំ​ដូង ស្រុក​ប្រាសាទ​បល្ល័ង្ក មិន​ពេញ​ចិត្តនឹង​អាជ្ញាធរ​ខេត្ត​កំពង់ធំ ដែល​គ្រោង​បញ្ចប់​ជំហាន​ទី​២ នៃ​គម្រោង​ចែក​ដី​សម្បទាន​សង្គមកិច្ច ឱ្យ​ទៅ​ពលរដ្ឋ​ចំនួន ៦០០​គ្រួសារ នៅ​ពេល​មិនទាន់​ដោះស្រាយ​បញ្ចប់​ទំនាស់​ជាមួយ​ពួកគេ។

ពលរដ្ឋ​មាន​ជម្លោះដីធ្លី នៅ​ភូមិ​ដង​ផ្ដៀក​ម្នាក់ លោក ទី ទើម ឱ្យ​ដឹង​ថា ដី​របស់​លោក​ជាង ៤​ហិកតារ ត្រូវបាន​អាជ្ញាធរ​ដកហូត​យក​ទៅ​ចែក​ជា​ដី​សម្បទាន​សង្គមកិច្ច ហើយ​មិន​ព្រម​ដោះស្រាយ​ផល​សំណង​ទេ ទើប​រូបលោក​មិន​ពេញចិត្ត​។ លោក​បន្ត​ថា អាជ្ញាធរ​ភូមិ​ឃុំ មិន​ឆ្លើយតប​នឹង​សំណួរ​របស់​ពលរដ្ឋ​រឿង​ដំណោះស្រាយ​នេះ​ទេ គឺ​រុញ​ដាក់គ្នា​ទៅវិញ​ទៅ​មក៖ «បាទ គេ​អត់​មាន​កោះហៅ​អ្វី​ទេ សូម្បី​ការប្រកាស​អ្វី ក៏​គ្មាន​នរណា​ពាក់ព័ន្ធ​ហៅ។ លោក​មេភូមិ លោក​មេឃុំ ក៏​គាត់​មិន​និយាយ​ពី​ការងារ​អ្វី​ទេ គាត់​ថា គាត់​អត់​ដឹង​រឿង​អ្វី​ទាំងអស់»

តំណាង​ពលរដ្ឋ​ម្នាក់ទៀត សុំ​លាក់​ឈ្មោះ ប្រាប់​ថា ពួកគេ​គ្មាន​សង្ឃឹមថា នឹង​បាន​ដីស្រែ​មកវិញ​ទេ ព្រោះ​នៅ​ពេល​លោក​ដឹកនាំ​ពលរដ្ឋ​ដាក់​ញត្តិ​តវ៉ា​ម្ដងៗ អាជ្ញាធរ​តែង​រករឿង​លោក និង​បាន​ប្ដឹង​លោក​ទៅ​តុលាការ ពី​បទ​ញុះញង់។ លោក​ថា សព្វថ្ងៃ រូបលោក​ផ្ទាល់ និង​ពលរដ្ឋ​មួយ​ចំនួន​ភ័យ​បាក់ស្បាត លែង​ហ៊ាន​ត្រឡប់​ទៅ​ភូមិ ព្រោះ​អាជ្ញាធរ តែង​ប្រើ​ហិង្សា​លើ​ពលរដ្ឋ ដែល​ហ៊ាន​តវ៉ា ចាប់​ពលរដ្ឋ​ដាក់​ពន្ធនាគារ​ម្នាក់ បំភ័យ​ម្ចាស់​ដី​ឱ្យ​រត់គេច​ខ្លួន​ចោលផ្ទះ​សម្បែង និង​បន្ត​ប្ដឹង​លោក​ទៅ​តុលាការ​។ លោក​ថា បើ​លោក​ព្រម​នៅ​ស្ងៀម មិន​ដឹកនាំ​ការ​តវ៉ា​ទាមទារ​ដី​ទេ តុលាការ​នឹង​ផ្អឹប​ពាក្យបណ្ដឹង​លោក​ទុក​៖ «ខ្ញុំ​លែង​ខ្វាយ​លែង​ខ្វល់​ហើយ​។ វា​អស់ជម្រើស​ណា​បង​។ មិន​ដឹង​ទៅ​រក​អ្នកណា ទាល់តែ​ហៅ​ប៉ាវ​ចិន មក​ជួយ​កាត់ក្ដី​។ តុលាការ​ស្រុក​ខ្មែរ គេ​ប្ដឹង​ខ្ញុំ​ហើយ ខ្ញុំ​សុំ​copy (​ថតចម្លង​) ឯកសារ​ដែល​ពាក់ព័ន្ធ​នឹង​ពាក់​បណ្ដឹង តើ​នរណា​ប្ដឹង​យើង តើ​យើង​ខុស​អ្វីខ្លះ គេ​មិន​ឱ្យ​ផង​។ គេ​ចោទប្រកាន់​ខ្ញុំ​ពី​បទ​ញុះញង់ ប្រើ​ឯកសារ​ក្លែងក្លាយ ហើយ​នឹង​ឆបោក ហើយ​ដល់ពេល​សួរ​ប្រជាពលរដ្ឋ​ទៅ ខ្ញុំ​បោក​អស់​ប៉ុន្មាន​ពាន់​ដុល្លារ អស់​ប៉ុន្មាន​រយ​ដុល្លារ ប្រជាពលរដ្ឋ​អត់​មាន​នរណា​ឆ្លើយ​ផង ហើយ​ឯកសារ​ក្លែងក្លាយ​ដែល​ខ្ញុំ​ប្រើ​ហ្នឹង ឯកសារ​ណា បង្ហាញ​មក អត់​បង្ហាញ​ទៀត​។ អ៊ីចឹង​វា​អត់​មាន​អ្វី​ហ្មង គេ​ចង់​ធ្វើ​ស៊ី​យើង និយាយ​ឱ្យ​ខ្លី​មក គេ​ចេះតែ​បង្កបង្កើត​រឿង»

ប្រតិកម្ម​នេះ ធ្វើឡើង​ក្រោយ​ពេល អភិបាល​ខេត្ដ​កំពង់ធំ លោក សុខ លូ ប្រាប់​សារព័ត៌មាន​ក្នុងស្រុក (​កាសែត​ភ្នំពេញ​ប៉ុស្តិ៍​) ថា រដ្ឋាភិបាល​នឹង​ចំណាយ​ថវិកា​ប្រមាណ ៤​លាន​ដុល្លារ​អាមេរិក លើ​គម្រោង​បែងចែក​ដី​សង្គមកិច្ច និង​ការ​អភិវឌ្ឍ​សេដ្ឋកិច្ច​ជំហាន ២ ដល់​ពលរដ្ឋ​ក្រីក្រ​ជាង ៦០០​គ្រួសារ នៅ​ឃុំ​ដូង ព្រោះ​មក​ដល់​ពេលនេះ មាន​ពលរដ្ឋ​ក្រីក្រ​ជាង ៥០០​គ្រួសារ​ហើយ បាន​មក​ធ្វើ​កិច្ចសន្យា​ទទួលយក​ដី​នៅ​ក្នុង​ឆ្នាំនេះ​។ ថវិកា​ចំនួន ៤​លាន​ដុល្លារ នឹង​ត្រូវ​យក​ទៅ​អភិវឌ្ឍ​ជា​ហេដ្ឋារចនាសម្ព័ន្ធ ផ្លូវថ្នល់ សាលារៀន មន្ទីរពេទ្យ​នៅ​ឃុំ​ដូង សម្រាប់​ឱ្យ​ពលរដ្ឋ​ក្រីក្រ​ទទួល​បាន​ដី​សម្បទាន​សង្គមកិច្ច​ប្រើប្រាស់។

ពលរដ្ឋ​ប្រាប់​ថា ពួកគេ​មិន​ជំទាស់​នឹង​គម្រោង​សម្បទាន​សង្គមកិច្ច​ទេ ប្រសិនបើ​អាជ្ញាធរ​ដោះស្រាយ​ទំនាស់​នេះ ចប់​សព្វគ្រប់​ជាមួយ​ពលរដ្ឋ​។ អាស៊ីសេរី មិន​អាច​សុំ​ការ​បញ្ជាក់​បន្ថែម​ពី​អភិបាលខេត្ត​កំពង់ធំ លោក សុខ លូ បាន​ទេ​។ ប៉ុន្តែ​មេឃុំ​ដូង លោក ជុត ចេន ធ្លាប់​ប្រាប់​អាស៊ីសេរី​ថា អាជ្ញាធរ​ជំរុញ​ឱ្យ​ពលរដ្ឋ​ធ្លាប់​អាស្រ័យ​ផល​លើ​ដី ទៅ​ជួប​អាជ្ញាធរ ដើម្បី​ទទួល​បាន​ដី​មួយ​ចំណែក ពី​គម្រោង​សម្បទាន​សង្គមកិច្ច​នោះ។

ជម្លោះ​ដីស្រែ​នៅ​ឃុំ​ដូង កើតឡើង​ក្នុង​កំឡុង​ឆ្នាំ​២០១៦ ក្រោយ​ពេល​ដែល​អាជ្ញាធរ​ឃុំ ប្រាប់​ពលរដ្ឋ​ឱ្យ​ផ្ដិតមេដៃ ដើម្បី​ធ្វើ​ប្លង់​កម្មសិទ្ធិ​។ ប៉ុន្តែ​ពលរដ្ឋ​អះអាង​ថា នៅ​ឆ្នាំ​២០១៨ អាជ្ញាធរ បាន​បញ្ជូន​គ្រឿងចក្រ​ចូល​ឈូស​ឆាយ​ដីស្រែ​ពលរដ្ឋ និង​ប្រាប់​ថា ពលរដ្ឋ​បាន​ផ្ដិតមេដៃ​ប្រគល់​ដីស្រែ​ទាំងនោះ ទៅ​ឱ្យ​អាជ្ញាធរ​ធ្វើជា​ដី​សម្បទាន​សង្គមកិច្ច​តាំងពី​ឆ្នាំ​២០១៦។

តំណាង​ពលរដ្ឋ​ដែល​សុំ​មិន​បញ្ចេញ​ឈ្មោះ​ប្រាប់​ថា ពលរដ្ឋ​ជាង ៦​រយ (៦២៦) គ្រួសារ បាន​នាំ​គ្នា​ធ្វើ​ញត្តិ ដាក់​ជូន​រដ្ឋសភា កាលពី​ថ្ងៃ​ទី​២ មករា តែ​គ្មាន​ដំណោះស្រាយ​។ បន្ទាប់​ពី​ពលរដ្ឋ​បាន​ដាក់​ញត្តិ​នៅ​ក្រសួង​ដែនដី ខុទ្ទកាល័យ​លោក ហ៊ុន សែន សាលាស្រុក និង​សាលាខេត្ត​កំពង់ធំ និង​មាន​មន្ត្រី​ក្រោមបង្គាប់​របប​ក្រុងភ្នំពេញ មកពី​ស្ថាប័ន​ឧត្ដមក្រុមប្រឹក្សា និង​ពិគ្រោះ​យោបល់ ចុះទៅ​ជួប​ពលរដ្ឋ តែ​គ្មាន​ដំណោះស្រាយ​ទាំងអស់​។ ពលរដ្ឋ​អះអាង​ថា ដី​មាន​ជម្លោះ​មាន​ទំហំ សរុប​ជិត ៣​ពាន់ (.៧០០) ហិកតារ ជា​ប្រភេទ​ដីស្រែ លាតសន្ធឹង​លើ​ភូមិ​ចំនួន​៥ នៃ​ឃុំ​ដូង គឺ​ភូមិ​គ្រួស ភូមិ​ដង​ផ្ដៀក ភូមិ​ក្របៅ ភូមិ​តា​មុំ និង​ភូមិ​ដងតាឯក។

អ្នក​សម្របសម្រួល​សមាគម​ការពារ​សិទ្ធិមនុស្ស​អាដហុក (Adhoc) ខេត្ត​កំពង់ធំ លោក សុក រដ្ឋា សង្កេត​ឃើញ​ថា ការ​ផ្ដល់​ដី​សម្បទាន​សង្គមកិច្ច​នៅ​ឃុំ​ដូង មាន​ភាព​មិន​ប្រក្រតី ទាំង​ការ​ដក​ហូត​ដី​ពី​អ្នកភូមិ និង​មិន​ប្រក្រតី​ទាំង​អ្នក​ដែល​ត្រូវ​ទទួល​បាន​ដី​សម្បទាន​សង្គម​សង្គមកិច្ច​។ សង្គម​ស៊ីវិល​រូប​នេះ ថា ពលរដ្ឋ​បាន​មក​ប្ដឹង​សមាគម​អាដហុក និង​អះអាង​ថា អាជ្ញាធរ​មូលដ្ឋាន បោក​បញ្ឆោត​ពួកគេ​ឱ្យ​ផ្ដិតមេដៃ ដាក់​ជា​ដី​សម្បទាន​សង្គមកិច្ច​។ លោក សុក រដ្ឋា យល់ថា អាជ្ញាធរ​ខេត្ត​កំពង់ធំ គួរ​រក​ដំណោះស្រាយ​ជាមួយ​ពលរដ្ឋ ជាជាង​ការ​ប្រើ​វិធីសាស្ត្រ​គំរាម​ពលរដ្ឋ៖ «សមាគម​យើង​នៅតែ​មាន​ការ​ព្រួយបារម្ភ​ណាស់ ចំពោះ​ការ​ផ្ដល់​ដី សម្បទាន​សង្គមកិច្ច​នៅ​ឃុំ​ដូង​ហ្នឹង​។ អាហ្នឹង​សមាគម​អាដហុក​មានការ​ព្រួយបារម្ភ​ខ្លាំង​។ យើង​ព្រួយបារម្ភ​ខ្លាច​ពួកគាត់ (​អាជ្ញាធរ​)​ហ្នឹង ប្រើ​អំណាច ប្រើ​កម្លាំង ប្រើ​វិធីសាស្ត្រ​ណាមួយ ដែល​ចូលចិត្ត​ប្រើ​ឱ្យ​ពលរដ្ឋ​ខ្លាច ពលរដ្ឋ​ខឹង ពលរដ្ឋ​ស្អប់​។ អាហ្នឹង​យើង​បារម្ភ អាហ្នឹង ហើយ​យើង​ក៏​មិន​ចង់​ឱ្យ​ពួកគាត់​ប្រើប្រាស់​អស់ហ្នឹង​ដែរ គឺ​ធ្វើ​យ៉ាង​ម្ដេច​ធ្វើការ​ឱ្យ​បាន​ម៉ត់ចត់​ទៅ»

ពលរដ្ឋ និង​សង្គម​ស៊ីវិល អំពាវនាវ​ឱ្យ​អាជ្ញាធរ​ខេត្ត​កំពង់ធំ កោះហៅ​ពលរដ្ឋ​មាន​ជម្លោះដីធ្លី​នៅ​ឃុំ​ដូង ទៅ​ដោះស្រាយ​ទំនាស់​ឱ្យ​ចប់​សិន ចាំ​យក​ដីស្រែ ដែល​ពួកគេ​ធ្លាប់​អាស្រ័យ​ផល ដាក់​ជា​ដី​សម្បទាន​សង្គមកិច្ច៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

គេហទំព័រ​ទាំងមូល