ក្រុមប្រជាពលរដ្ឋប្រមាណជាង ២៥គ្រួសារដែលទៅរស់នៅក្នុងឃុំឃ្សឹម ស្រុកស្នួល ខេត្តក្រចេះ មានការព្រួយបារម្ភ ដោយសារអាជ្ញាធរប្រុងបណ្ដេញពួកគាត់ចេញពីកន្លែងរស់នៅរបស់ខ្លួនក្នុងពេលឆាប់ៗនេះ។ អាជ្ញាធរស្រុកបញ្ជាក់ថា ប្រជាពលរដ្ឋទាំងនោះរស់នៅដោយខុសច្បាប់លើដីបរិស្ថាន ហើយអាជ្ញាធរក៏បានប្រាប់ជាច្រើនលើកច្រើនសាចំពោះបញ្ហានេះ ដើម្បីឱ្យពួកគាត់ធ្វើពាក្យស្នើសុំដីសម្បទានសង្គមកិច្ច។
ប្រជាពលរដ្ឋម្នាក់រស់នៅឃុំឃ្សឹម ស្រុកស្នួល ខេត្តក្រចេះ លោក ប៊ន នី មានប្រសាសន៍ថា នៅពេលថ្មីៗនេះ ខាងអាជ្ញាធរបានប្រាប់ពួកគាត់ឱ្យនាំគ្នារើឥវ៉ាន់ចេញពីកន្លែងរស់នៅរបស់ពួកគាត់ ប៉ុន្តែប្រជាពលរដ្ឋនាំគ្នាតវ៉ាដោយមិនព្រមចាកចោលរោងស្នាក់នៅ និងដំណាំក្នុងចម្ការរបស់ខ្លួនឡើយ។
លោកបន្តថា ដោយសារតែពួកគាត់មិនព្រមចេញ ទើបអាជ្ញាធរប្រាប់ថា នឹងដឹកនាំកងកម្លាំងចម្រុះមកម្តងទៀតនៅថ្ងៃ៣ មីនា។ ប្រជាពលរដ្ឋអះអាងថា ពួកគាត់បានមករស់នៅទីនោះតាំងពីឆ្នាំ២០០៧ ដោយធ្វើជាកម្មករចម្ការកៅស៊ូ៖ «ខ្ញុំមានព្រួយបារម្ភខ្លាំងណាស់ ពីព្រោះខ្ញុំជាប្រជាជនមិនមានអីទប់ទល់ គេមកគេរកវ៉ៃ។ មានតែឱ្យលោកជួយផងបាន បានមើលទៅ ខ្ញុំមិនដឹងធ្វើម៉េចដែរ។ ថ្ងៃមុនគេមកដកកាំបិតដកអី គេថា ឱ្យត្រូវតែរើចេញតែថ្ងៃប៉ុន្មានទៀតហ្នឹងត្រូវគ្រោះថ្នាក់ចាប់យកទៅទាំងអស់»។
រីឯប្រជាពលរដ្ឋម្នាក់ទៀតដែលថ្លែងក្នុងលក្ខខណ្ឌមិនបញ្ចេញឈ្មោះបានឱ្យដឹងថា ដំបូងដីនោះគឺជាតំបន់រណ្ដៅជ័រ ក្រោយមកក៏ពួកគាត់នាំគ្នារានដើម្បីធ្វើចម្ការ។ លោកបន្តថា នៅពេលក្រុមនិស្សិតចុះទៅវាស់វែងនោះ គឺដីតំបន់ដែលពួកគាត់រស់នៅអាជ្ញាធរចាត់ចូលថា ជាប្រភេទដីជម្លោះ ហើយថ្មីៗនេះ អាជ្ញាធរបានប្រាប់ពួកគាត់ឱ្យនាំគ្នារុះរើចេញហើយនឹងមានកន្លែងរស់នៅថ្មី ប៉ុន្តែប្រជាពលរដ្ឋមិនព្រមចេញ ដោយយល់ថា កន្លែងថ្មីនោះគឺតំបន់ដីដែលមិនមានជីវជាតិ ហើយស្ថិតនៅឆ្ងាយពីទីផ្សារ សាលារៀន និងមន្ទីរពេទ្យទៀតផង៖ «បាទ! គេអត់ប្រាប់ផង គេថាចង់ដោះដូរឱ្យ គេថា មានដីនៅស្រុកសំបូរ ខេត្តក្រចេះ គេថា ដីសម្បទានមានពីរម៉ឺនហិកតារ។អ៊ីចឹងដីដែលគាត់ខំប្រឹងរុករានពីមុនមកហ្នឹង អ៊ីចឹងគាត់អត់ចេញទេ»។
ចំពោះបញ្ហានេះអភិបាលស្រុកស្នួល លោក គង់ គឹមនី មានប្រសាសន៍ថា ប្រជាពលរដ្ឋទាំងនោះរស់នៅដោយខុសច្បាប់នៅលើតំបន់អភិរក្សបរិស្ថាន ហើយកន្លងមកអាជ្ញាធរតែងតែចុះទៅធ្វើការណែនាំ ប៉ុន្តែហាក់ដូចជាប្រជាពលរដ្ឋមិនបានអើពើទៅនឹងការណែនាំនោះសោះឡើយ សូម្បីនៅពេលដែលពួកគាត់ចូលទៅរុករានដីព្រៃដើម្បីរស់នៅក៏មិនបានជម្រាបដល់អាជ្ញាធរឱ្យបានដឹងនោះដែរ។
លោក គង់ គឹមនី៖ «ពេលខ្ញុំទៅមើលពីរបីសប្ដាហ៍មុនមានតែបួនដប់គ្រួសារទេ ហើយគាត់លើកឡើងថា គាត់រស់នៅតាំងពីឆ្នាំ២០០៨ ម្ល៉េះ គាត់សុទ្ធតែអះអាងអ៊ីចឹងទាំងអស់ ហើយមានអ្នកសារព័ត៌មានមួយចំនួនជំរុញឱ្យបងប្អូនចូលទៅរុករានទន្រ្ទានដីព្រៃដែលជាដីខាងបិស្ថាន ដីអភិរក្សបរិស្ថាន។ អ៊ីចឹងបានជាខ្ញុំប្រាប់ឱ្យពួកគាត់ស្នើសុំដីសង្គមកិច្ចមកដើម្បីបានច្រើនបន្តិចយកទៅមួយសាឱ្យចប់ តែគាត់ដូចជាមិនទទួលការគោរពច្បាប់ អ៊ីចឹងយើងត្រូវតែអនុវត្តច្បាប់ ពីព្រោះយើងបានចុះទៅផ្សព្វផ្សាយហើយ»។
លោកបន្ថែមទៀតថា ប្រជាពលរដ្ឋទាំងនោះមិនមែនជាប្រជាពលរដ្ឋដែលមានដើមកំណើតនៅក្នុងខេត្តក្រចេះ នោះទេ ភាគច្រើនគឺបានចំណាកស្រុកមកពីខេត្តផ្សេងៗ ហើយដីតំបន់នោះក៏បានផ្ដល់សម្បទានទៅឱ្យក្រុមហ៊ុនវៀតណាម មួយឈ្មោះ ឌុកយ៉ុង រួចហើយដែរ។ លោកបញ្ជាក់ថា អាជ្ញាធរបានដាក់ពេលកំណត់សម្រាប់ពួកគាត់ក្នុងការរើចេញ ហើយប្រសិនបើពួកគាត់មិនរើចេញ នោះអាជ្ញាធរនឹងអនុវត្តទៅតាមផ្លូវច្បាប់ ហើយប្រសិនបើប្រជាពលរដ្ឋគោរពច្បាប់នោះ នឹងអាចមានដំណោះស្រាយជូនពួកគាត់បានងាយស្រួល។
មន្ត្រីផ្នែកអង្កេតនៃសមាគមការពារសិទ្ធិមនុស្សអាដហុក (ADHOC) ប្រចាំខេត្តក្រចេះ លោក ហេង ភារៈ មានប្រសាសន៍ថា ប្រសិនបើអាជ្ញាធរនៅតែអនុវត្តវិធីសាស្ត្រក្នុងការបណ្ដេញប្រជាពលរដ្ឋដោយបង្ខំនោះ វានឹងអាចធ្វើឱ្យអាជ្ញាធរបាត់បង់ប្រជាប្រិយភាព និងប្រាសចាកពីគោលនយោបាយកំណែទម្រង់ស៊ីជម្រៅរបស់រដ្ឋាភិបាលទៀតផង។
លោក ហេង ភារៈ៖ «ប្រសិនបើអាជ្ញាធរស្រុកស្នួល ជ្រើសរើសដំណោះស្រាយក្នុងការដោះស្រាយទំនាស់ដីធ្លី ដោយប្រើមធ្យោបាយនូវផែនការបណ្ដេញចេញប្រជាពលរដ្ឋដោយបង្ខំនោះ នោះប្រជាពលរដ្ឋនឹងបាត់បងផ្ទះសម្បែង បាត់បង់ដីធ្លី និងធ្វើឱ្យប្រជាពលរដ្ឋទទួលរងការភ័យខ្លាច។ ជាការឆ្លើយតបប្រជាពលរដ្ឋនឹងមានការថ្នាំងថ្នាក់ចំពោះអាជ្ញាធរ»។
លោកបន្តថា ជាការប្រសើរ រដ្ឋាភិបាលគប្បីដោះស្រាយបញ្ហាជូនប្រជាពលរដ្ឋដោយវិធីត្រជាក់ និងស្វែងរកកន្លែងថ្មីជូនពួកគាត់ឱ្យបានសមរម្យ ហើយអាចធានាថា កន្លែងថ្មីមានភាពងាយស្រួលជាងកន្លែងចាស់ នោះពួកគាត់នឹងអាចទទួលយកដោយសន្តិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។