អាជ្ញាធរខេត្តក្រចេះប្រកាសមិនទទួលស្គាល់ដីពលរដ្ឋជាង៣០គ្រួសារ ប៉ុន្តែពលរដ្ឋថា អាជ្ញាធរភូមិឃុំទទួលស្គាល់

ដោយ សុជីវី
2024.09.23

អាជ្ញាធរខេត្តក្រចេះប្រកាសមិនទទួលស្គាល់ដីពលរដ្ឋជាង៣០គ្រួសារ ប៉ុន្តែពលរដ្ឋថា អាជ្ញាធរភូមិឃុំទទួលស្គាល់

អភីបាលខេត្តក្រចេះ លោក វ៉ា ថន (ស្ដាំ) និងអនុប្រធានគណបក្សប្រជាជនកម្ពុជា អ្នកស្រី ម៉ែន សំអន ក្នុងកម្មវិធីប្រកាសទទួលស្គាល់គណៈកម្មាធិការរណសិរ្សសាមគ្គី អភិវឌ្ឍន៍មាតុភូមិកម្ពុជាខេត្ត កាលពីថ្ងៃទី២២ កញ្ញា ២០២៤។

រូប៖ ហ្វេសប៊ុករដ្ឋបាលខេត្តក្រចេះ

អាជ្ញាធរខេត្តក្រចេះប្រកាសមិនទទួលស្គាល់ដីពលរដ្ឋរស់នៅជាង ៣០គ្រួសារដែលអាជ្ញាធរគ្រោងបណ្ដេញនៅស្រុកស្នួល ខេត្តក្រចេះ ថា ពលរដ្ឋទាំងនោះ គឺជាប្រជាពលរដ្ឋចំណាកស្រុកទើបមករស់នៅក្នុងអំឡុងឆ្នាំ២០១២។ ប៉ុន្តែពលរដ្ឋរស់នៅតំបន់នោះ អះអាងថា ពួកគាត់មានឯកសារគ្រប់គ្រាន់ដែលទទួលស្គាល់ដោយអាជ្ញាធរភូមិឃុំ និងបានយកឯកសារទាំងនោះទៅខ្ចីលុយពីធនាគារបានថែមទៀត។

ក្រោយពីអាជ្ញាធរខេត្តក្រចេះផ្សព្វផ្សាយថា គ្រោងបណ្ដេញពលរដ្ឋជាង៣០គ្រួសារចេញពីលំនៅឋានជាង៣០គ្រួសាររួចមកអាជ្ញាធរនៅស្រុកស្នួល ខេត្តក្រចេះ បានចេញលិខិតបដិសេធមួយ កាលពីថ្ងៃទី២០ ខែកញ្ញា ដោយមិនទទួលស្គាល់ប្រជាពលរដ្ឋដែលរស់នៅឃុំស្នួល ស្រុកស្នួល ខេត្តក្រចេះ មិនមែនជាប្រជាពលរដ្ឋរស់នៅតំបន់មូលដ្ឋានរបស់ខ្លួននោះទេ និងទាំងចាត់ទុកពលរដ្ឋទាំងនោះជាប្រជាពលរដ្ឋចំណាកស្រុក រស់នៅលើដីរបស់រដ្ឋ។

ឆ្លើយតបនឹងលិខិតបដិសេធរបស់អាជ្ញាធរស្រុកស្នួល តំណាងប្រជាពលរដ្ឋ លោក គឹម ចាន់ធី រៀបរាប់ប្រាប់វិទ្យុអាស៊ីសេរី នៅថ្ងៃទី២២ ខែកញ្ញា ថា ប្រសិនបើអាជ្ញាធរមិនទទួលស្គាល់ប្រជាពលរដ្ឋ និងចោទពលរដ្ឋថា រស់នៅលើដីរបស់រដ្ឋខុសច្បាប់បែបនេះ ហេតុអ្វីអាជ្ញាធរភូមិឃុំចេញឯកសារទទួលប្រជាពលរដ្ឋនៅតំបន់នោះ និងអាចបោះឆ្នោត និងខ្ចីលុយពីធនាគារបានថែមទៀត។

លោក គឹម ចាន់ធី៖ «ពួកប៉ូលិសក៏ដោយអភិបាលស្រុកក៏ដោយ បើគិតថាកន្លែងនឹងខុសច្បាប់ លំនៅឋានខុសច្បាប់ បណ្ដោយឲ្យប្រជាពលរដ្ឋធ្វើផ្ទះមួយហើយមួយទៀតធ្វើអ្វី ខ្ញុំគិតថាបើសិនជាខុសច្បាប់បណ្ដោយឲ្យនៅដល់២០ឆ្នាំធ្វើអ្វី រុះរើតាំងពីផ្ទះទីមួយទីពីរឲ្យហើយទៅ ឬមួយកន្លែងនឹងមិនទាន់ត្រូវថ្លៃ»។

ពលរដ្ឋលើកឡើងទៀតថា ចាប់តាំងពីមានការសាងសង់បុរីផ្ទះល្វែង និងកន្លែងលេងកម្សាន្តនៅក្បែរនោះ អាជ្ញាធរស្រុកស្នួលតាមធ្វើទុក្ខបុកម្នេញ ទៅលើប្រជាពលរដ្ឋរស់នៅតំបន់នោះជាច្រើនលើកច្រើនសា។

ជុំវិញរឿងនេះ វិទ្យុអាស៊ីសេរី មិនអាចទាក់ទងអភិបាលស្រុកស្នួល លោក សាម ណាល់ និងអភិបាលខេត្តក្រចេះ លោក វ៉ា ថន ដើម្បីសុំការអត្ថាធិប្បាយបានទេ នៅថ្ងៃទី២២ ខែកញ្ញា។

ទោះជាយ៉ាងណា កាលពីថ្ងៃទី១១ ខែកញ្ញា អាជ្ញាធរឃុំបានចុះបិទសេចក្ដីជូនដំណឹងមួយច្បាប់នៅលើជញ្ជាំងផ្ទះរបស់ប្រជាពលរដ្ឋ ដោយបានដាក់កំហិតឲ្យពលរដ្ឋរស់នៅតំបន់នោះ រុះរើផ្ទះសម្បែងចេញពីតំបន់នោះ និងចោទប្រជាពលរដ្ឋថា រស់នៅតំបន់នោះដោយខុសច្បាប់។

ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក លោក យិន ម៉េងលី យល់ឃើញថា អាជ្ញាធរគួរពិនិត្យមើលភាពជាក់ស្ដែងពីការកាន់កាប់ដីរបស់ប្រជាពលរដ្ឋ និងការរស់នៅតាំងពីពេលណាមក។ លោកថា វាមិនមែនជារឿងល្អនោះទេ ដែលអាជ្ញាធរគេចវេះ មិនទទួលស្គាល់ប្រជាពលរដ្ឋខ្លួនឯង។

លោក យិន ម៉េងលី៖ «សូមឲ្យអាជ្ញាធរខេត្តពិនិត្យមើលឡើងវិញលើឯកសារគតិយុត្តិទាំងអស់នឹង ពីការរស់នៅរបស់ប្រជាពលរដ្ឋ ប្រសិនបើជាចង់អភិវឌ្ឍន៍នៅតំបន់នឹងបើចង់ឲ្យប្រជាពលរដ្ឋចាកចេញត្រូវនាំគ្នាពិនិត្យទៅលើផ្លូវច្បាប់វិញ ហើយធ្វើការដោះស្រាយជាមួយពួកគាត់ទៅ កុំយកហេតុផលផ្សេងៗទៀត ចង់បណ្ដេញពួកគាត់មិនទទួលខុសត្រូវដល់ប្រជាពលរដ្ឋ»។

ប្រជាពលរដ្ឋស្នើឲ្យអាជ្ញាធរគួរស្វែងរកដំណោះស្រាយ និងផ្ដល់សំណងសមរម្យដល់ពួកគាត់ ពីព្រោះប្រជាពលរដ្ឋទាំងនោះមិនមានដីសម្រាប់អាស្រ័យផល និងស្នាក់នៅទៀតនោះទេ។ ពលរដ្ឋថា ប្រសិនបើអាជ្ញាធរមិនមានដំណោះស្រាយ ហើយដាក់គ្រឿងចក្រឈូសឆាយផ្ទះសម្បែងរបស់ពួកគាត់ពលរដ្ឋនឹងឡើងទៅរាជធានីភ្នំពេញ ដើម្បីសុំកិច្ចអន្តរាគមន៍ពីនាយករដ្ឋមន្ត្រី និងស្ថាប័នពាក់ព័ន្ធ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទពេញនិយម

RFA

ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍