ពលរដ្ឋ​​​ប៉ោយប៉ែត​៣៥​គ្រួសារ​គ្រោង​ឡើង​សុំ​អន្តរាគមន៍​ពី​លោក ហ៊ុន សែន រឿង​ដីធ្លី

ដោយ ម៉ៅ សុធានី
2018-04-08
Share
ផែនទី​ខេត្ត​បន្ទាយមានជ័យ ៦២០ ផែនទី​ខេត្ត​បន្ទាយមានជ័យ
Photo: RFA

ប្រជាពលរដ្ឋ​ដែល​មាន​បញ្ហា​ដីធ្លី​នៅ​ក្រុង​ប៉ោយប៉ែត ខេត្ត​បន្ទាយមានជ័យ ចំនួន ៣៥​គ្រួសារ គ្រោង​នាំគ្នា​ធ្វើដំណើរ​ទៅ​រាជធានី​ភ្នំពេញ ដើម្បី​សុំ​អន្តរាគមន៍​ពី​លោកនាយក​រដ្ឋមន្ត្រី ហ៊ុន សែន ឲ្យ​ជួយ​ជំរុញ​ទៅ​អាជ្ញាធរ​មូលដ្ឋាន ចុះ​វាស់វែង​ធ្វើ​ប័ណ្ណ​កម្មសិទ្ធិ​ដីធ្លី​ស្របច្បាប់​ជូន​ពួកគាត់។

ការស្វែងរក​កិច្ច​អន្តរាគមន៍​នេះ ដោយសារ​ពលរដ្ឋ​បាន​ដាក់​ពាក្យ​ស្នើ​សុំ​ទៅ​អាជ្ញាធរ​ក្រុង និង​អាជ្ញាធរ​ខេត្ត អស់​ពេល​ច្រើន​ថ្ងៃ​ហើយ តែ​ពុំ​មាន​ដំណោះស្រាយ។

តំណាង​ពលរដ្ឋ​ដែល​មាន​បញ្ហា​ដីធ្លី​នៅ​សង្កាត់​ប៉ោយប៉ែត លោក ម៉ៅ សាមឿន ឲ្យ​ដឹង​នៅ​ថ្ងៃ​ទី​៨ ខែ​មេសា​ថា ពួកគាត់​ចំនួន ៣៥​គ្រួសារ ជា​ពលរដ្ឋ​ក្រីក្រ និង​គ្មាន​ប្រាក់​សម្រាប់​ទិញ​ដី​សង់​លំនៅឋាន​ថ្មី​នោះ​ទេ។ លោក ម៉ៅ សាមឿន ទទូច​ឲ្យ​អាជ្ញាធរ​ក្រុង​ប៉ោយប៉ែត និង​មន្ត្រី​ពាក់ព័ន្ធ ធ្វើ​ប័ណ្ណ​កម្មសិទ្ធិ​ដីធ្លី​ជូន​ពួកគាត់​ឲ្យ​បាន​ឆាប់ៗ ដើម្បី​ងាយស្រួល​ទៅ​ខ្ចី​ប្រាក់ ពី​ធនាគារ ធ្វើ​ដើមទុន​ប្រកប​របរ​ដោះស្រាយ​ជីវភាព​ប្រចាំថ្ងៃ៖ «ហើយ​ដី​ប្រហែល​២០០​ម៉ែត្រ​នឹង​យក​ទៅ​អភិវឌ្ឍន៍​អី? ព្រោះ​ដូច​សម្ដេច​នាយក​គាត់​ថា​ហើយ​បើ​៥​ឆ្នាំ​ឡើង​ទៅ​ប្រជាពលរដ្ឋ បើ​ប្រជាពលរដ្ឋ​រស់នៅ​នឹង​ហើយ​មិនបាច់​អភិវឌ្ឍន៍​អី​ទេ ឲ្យ​ប្រជាពលរដ្ឋ​ទៅ។ បើ​យើង​អភិវឌ្ឍន៍​យើង​មើល​ពលរដ្ឋ​នឹង​ដែរ មិន​ដឹង​ជា​អភិវឌ្ឍន៍​អី បើ​ផ្លូវ​មាន​ស្រាប់​ហើយ​មិន​យក​ទៅ​ធ្វើ​ទៅ មក​យក​អី​ផ្លូវ​ដែល​ពលរដ្ឋ​រស់នៅ​នោះ? ព្រោះ​មិន​វា​មិន​បម្រើ​ផលប្រយោជន៍​ដល់​ពលរដ្ឋ​ផង»

កាលពី​ថ្ងៃ​ទី​៤ កុម្ភៈ កន្លងទៅ មន្ត្រី​រៀបចំ​ដែនដី​នគរូបនីយកម្ម និង​សំណង់ ក្រុង​ប៉ោយប៉ែត បាន​ចុះ​វាស់វែង​ដី​ធ្វើ​ប័ណ្ណ​កាន់កាប់​ស្របច្បាប់ ជូន​ពលរដ្ឋ​នៅ​ភូមិ​ក្បាលស្ពាន​១ ប៉ុន្តែ​មន្ត្រី​ក្រុង​ប៉ោយប៉ែត​មិន​បាន​វាស់វែង​ដី​របស់​ពលរដ្ឋ​ចំនួន ៣៥​គ្រួសារ​ទេ ដោយ​យក​ហេតុផល​ថា ជា​ដី​ផ្លូវ​សាធារណៈ។

ពលរដ្ឋ​ទាំង ៣៥​គ្រួសារ​បាន​ប្រតិកម្ម​នឹង​បញ្ហា​នេះ ហើយ​កាលពី​ថ្ងៃ​ទី​២១ កុម្ភៈ ពួកគាត់​ក៏​បាន​នាំ​តវ៉ា​នៅមុខ​សាលាក្រុង​ដើម្បី​ឲ្យ​អាជ្ញាធរ​ជួយ​អន្តរាគមន៍​ពួកគាត់ ប៉ុន្តែ​គ្មាន​ដំណោះស្រាយ​នោះ​ទេ។

អភិបាលក្រុង​ប៉ោយប៉ែត លោក សាន ស៊ានហូ មាន​ប្រសាសន៍​ថា រឿង​នេះ​អាជ្ញាធរ​ក្រុង​មិន​អាច​ជួយ​ដោះស្រាយ​ជូន​ពលរដ្ឋ​ទាំងនោះ​បានទេ ព្រោះ​ពួកគាត់​រស់នៅ​លើ​ដី​ផ្លូវ​ខុស​ច្បាប់៖ «ហើយ​រឿង​នីតិវិធី​ខ្ញុំ​ក៏​មិន​ហ៊ាន​ដែរ មិនមែន​ចេះតែ​អន្តរាគមន៍​ឲ្យ​អ្វី​ដែល​ចង់​ធ្វើ​ចេះតែ​ឲ្យ​ធ្វើ​ណា​បាន វា​សំខាន់​ការ​សម្រេច​របស់​ភូមិបាល។ ជួន​កាល​នៅ​តាំង​១៩៧៩​ក៏​មិន​អាច​ដែរ​បើ​នៅ​លើ​ផ្លូវ​អីចឹង​នោះ ហើយ​បើ​យើង​ចេះតែ​នៅ​បាន​ក៏​នៅ​ទៅ​បើកាលណា​ផ្លូវ​គឺ ផ្លូវ​ហើយ»

ប៉ុន្តែ​តំណាង​ប្រជាពលរដ្ឋ លោក ម៉ៅ សាមឿន អះអាង​ថា ពួកគាត់​រស់នៅ​ដី​នោះ​តាំងពី​ឆ្នាំ​១៩៩៣​មក គឺ​តាំងតែ​នៅ​ក្រុង​ប៉ោយប៉ែត​មិន​សូវ​មាន​មនុស្ស​រស់នៅ ហើយ​ម្យ៉ាងទៀត​ដើម​ឡើយ ក៏​ពុំ​មែន​ជា​ដី​ផ្លូវ​ដែរ ទើប​ពួកគាត់​ទៅ​តាំងទី​លំនៅ​លើ​ដី​នោះ។

មន្ត្រី​សម្របសម្រួល​សិទ្ធិមនុស្ស​អង្គការ​លីកាដូ (Licadho) ខេត្ត​បន្ទាយមានជ័យ​លោក អ៊ិន គង់ជិត ដែល​បាន​ចុះ​អង្កេត​បញ្ហា​ដីធ្លី​នេះ​អះអាង​ថា ទីតាំង​ដី​ដែល​ពលរដ្ឋ​រស់នៅ​នោះ បច្ចុប្បន្ន​ពុំ​មែន​ជា​ដី​ផ្លូវ​សាធារណៈ​ទេ ដូច្នេះ​លោក​ថា បញ្ហា​នេះ​អាជ្ញាធរ​ពាក់ព័ន្ធ​គួរតែ​ធ្វើ​ប័ណ្ណ​កម្មសិទ្ធិ​ស្របច្បាប់​ជូន​ពួកគាត់ ព្រោះ​ពួកគាត់​តាំង​ទី​លំនៅ​ជាច្រើន​ឆ្នាំ​ហើយ៖ «ប្រជាពលរដ្ឋ​គាត់​មិន​ធ្លាប់​ទទួល​ព័ត៌មាន​ហើយ​អាជ្ញាធរ​សង្កាត់ និង​សុរិយោដី​ក្រុង​មិន​ធ្លាប់​បាន​ផ្សព្វផ្សាយ​ឲ្យ​គាត់​បាន​ដឹង ដូច្នេះ​កិរិយា បទ​របស់​ពួកគាត់​ដែល​បាន​កាន់កាប់​កន្លងមក​នឹង គឺ​កាន់កាប់​ដោយ​ជាប់​លាប់ ដូច្នេះ​គាត់​បាន​បំពេញ​លក្ខខណ្ឌ ៥​យ៉ាង​នៃ​មាត្រា​១៨ នៃ​ច្បាប់​ភូមិបាល ដូច្នេះ​អាជ្ញាធរ​គួរតែ​ពិចារណា​ដើម្បី​ផ្ដល់​ជា​កម្មសិទ្ធិ​ឲ្យ​ពួកគាត់»

ផ្ទៃដី​ដែល​មាន​បញ្ហា​ជា​ប្រភេទ​ដី​លំនៅឋាន ទទឹង​២០​ម៉ែត្រ និង​បណ្ដោយ​ជាង​២០០​ម៉ែត្រ ស្ថិតនៅ​ភូមិ​ក្បាលស្ពាន​១ សង្កាត់​ប៉ោយប៉ែត។ ពលរដ្ឋ​ចំនួន​៣៥​គ្រួសារ​សង់​ទីលំនៅ​លើ​ដី​នេះ​ជាច្រើន​ឆ្នាំ​ហើយ ដោយ​អ្នកខ្លះ​កាន់កាប់​ដី​ទទឹង ៤​គុណ នឹង​២០ និង​ខ្លះ​ទៀត​ទទឹង ១០​គុណ​២០​ម៉ែត្រ​ជាដើម។កាលពី​ចុងខែ​កុម្ភៈ​ឆ្នាំ​២០១៨ ពលរដ្ឋ​ទាំង​៣៥​គ្រួសារ បាន​ដាក់​ពាក្យ​សុំ​អន្តរាគមន៍​ទៅ​សាលាខេត្ត​បន្ទាយមានជ័យ​ម្ដង​រួច​មក​ហើយ គឺ​អាជ្ញាធរ​ខេត្ត​មួយ​នេះ​ថា នឹង​ដោះស្រាយ​ជូន​ពួកគាត់ ប៉ុន្តែ​រហូត​មក​ទល់​ពេលនេះ​មិន​ទាន់​មាន​ដំណោះស្រាយ​នៅឡើយ។

លោក ម៉ៅ សាមឿន អះអាង​ថា អាជ្ញាធរ​ពន្យារ​ដោះស្រាយ​នេះ គឺ​ធ្វើ​ឲ្យ​ពួកគាត់​ជួប​ការ​លំបាក​កាន់​តែខ្លាំង ហើយ​លោក​បញ្ជាក់​ថា ប្រសិនបើ​អំឡុង​ខែ​មេសា​នេះ អាជ្ញាធរ​ខេត្ត​មិន​អាច​ដោះស្រាយ​ជូន​ពួកគាត់​បានទេ ពួកគាត់​នឹង​នាំគ្នា​ទៅ​តវ៉ា​នៅមុខ​ផ្ទះ​លោកនាយក​រដ្ឋមន្ត្រី ហ៊ុន សែន ដើម្បី​សុំ​អន្តរាគមន៍​ឲ្យ​ជួយ​ជំរុញ​ទៅ​អាជ្ញាធរ​មូលដ្ឋាន​ចុះ​វាស់វែង​ដី​ធ្វើ​ប័ណ្ណ​កម្មសិទ្ធិ​ស្របច្បាប់​ជូន​ពួកគាត់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល