ពលរដ្ឋជិត ១៧០គ្រួសារ នៅខេត្តព្រះវិហារចោទមេឃុំម្នាក់ថា បិទផ្លូវសាធារណៈ បណ្ដាលឱ្យរាំងស្ទះដល់ ការដឹកកសិផល និងសកម្មភាពសេដ្ឋកិច្ចរបស់អ្នកភូមិជាច្រើនគ្រួសារ។ ពួកគាត់បានផ្ដិតមេដៃ ស្នើឱ្យអាជ្ញាធរមូលដ្ឋាន រកដំណោះស្រាយជុំវិញរឿងនេះជាច្រើនខែមកហើយ តែគ្មានដំណោះស្រាយ។
ពលរដ្ឋរាប់រយគ្រួសាររស់នៅភូមិបដិវត្តឃុំច្រាច់ ស្រុកជ័យសែន មិនសប្បាយចិត្ត ចំពោះទង្វើរបស់មេឃុំច្រាច់ លោក សៅ សំ ដែលពួកគាត់ចោទថា បានប្រើអំណាចជាអាជ្ញាធរបិទផ្លូវសាធារណៈមួយខ្សែជាង ១ឆ្នាំមកហើយ បណ្ដាលឱ្យរាំងខ្ទប់ការធ្វើដំណើរ និងដឹកកសិផលរបស់អ្នកស្រុក។
តំណាងពលរដ្ឋ លោក សូវិត ផល្លា ប្រាប់វិទ្យុអាស៊ីសេរី នៅថ្ងៃទី២៩ តុលាថា មេឃុំរូបនេះ បានធ្វើរបងលួសបិទផ្លូវជាច្រើនខែមកហើយ ធ្វើឱ្យអ្នកភូមិត្រូវចំណាយប្រាក់យ៉ាងច្រើន បើកគោយន្តតាមផ្លូវវាង ដើម្បីទៅស្រែ។ លោកថា ពលរដ្ឋ ១៧០គ្រួសារបានផ្ដិតមេដៃ និងសរសេរលិខិតម្ដងហើយម្ដងទៀត ដើម្បីស្នើឱ្យអាជ្ញាធរឃុំមេត្តាបើកផ្លូវនេះឡើងវិញ ប៉ុន្តែអាជ្ញាធរនៅតែបដិសេធ។ លោកបន្ថែមថា ផ្លូវនេះអ្នកភូមិធ្វើដំណើរជាង ៤០ឆ្នាំមកហើយ អាជ្ញាធរទើបតែបិទខ្ទប់នៅចុងឆ្នាំ២០២០៖ «នរណាក៏ដើរដែរផ្លូវហ្នឹង មួយភូមិដើរផ្លូវហ្នឹងទាំងអស់។ សូម្បីតែខ្ញុំវាងទៅភូមិផ្សេងមួយស្រែ ក្នុងមួយវស្សានេះ ចំណាយអស់ប្រេង ៦០លីត្រ។ បង្កការលំបាកប្រចាំថ្ងៃវាលំបាកណាស់ហើយ ដល់ពេលស្រូវទំហើយ ដឹកស្រូវវាងទៅភូមិគេ វាយ៉ាប់លំបាក»។
ដំណាងពលរដ្ឋដដែលបន្ថែមថា រដូវប្រមូលផលកសិកម្មកាន់តែកៀក អ្នកភូមិនឹងជួបការលំបាកខ្លាំង ក្នុងការដឹកកសិផលពីស្រែ ប្រសិនបើមេឃុំមិនបើកផ្លូវនោះទេ។ លោកថា នៅគ្រាដែលមេឃុំបិទផ្លូវពួកលោក ត្រូវធ្វើដំណើរតាមផ្លូវវាងឆ្លងកាត់ភូមិផ្សេងទៀតជាច្រើនគីឡូម៉ែត្រ ទម្រាំដល់ដីស្រែ។
ជុំវិញការចោទប្រកាន់នេះ មេឃុំច្រាច់ លោក សៅ សំ បកស្រាយថា លោកបិទផ្លូវនេះ ដោយសារផ្លូវនៅកៀក សាលាឃុំ និងប៉ុស្តិ៍នគរបាល រំខានការងាររបស់អាជ្ញាធរ ហើយលោកបានបើកផ្លូវនៅតំបន់ផ្សេងទៀត ដើម្បីឱ្យពលរដ្ឋធ្វើដំណើរជំនួសរួចហើយ។ លោកបញ្ជាក់ថា ផ្លូវនេះ ពុំមែនជាផ្លូវពីបុរាណ ដូចការលើកឡើងរបស់ពលរដ្ឋនោះទេ គឺទើបសាងសង់ ក្នុងអំឡុងឆ្នាំ២០០៧ ក្នុងពេលដែលត្រួសត្រាយព្រៃសំអាតសាលាឃុំ៖ «ឥលូវខ្ញុំសុំបិទហើយ ព្រោះកន្លែងរដ្ឋបាល វាមិនត្រូវមានផ្លូវកាត់ ឬក្បែរសាលាឃុំទេ ដល់បិទទៅ ពលរដ្ឋសុំបើក ខ្ញុំមិនឱ្យបើកទេ ព្រោះវាមិនមែនជាផ្លូវពីបុរាណ ដូនតា ដែលថា បងប្អូនត្រីបងប្អូនឆ្លងកាត់។ កន្លែងផ្លូវបើកត្រូវអាងទឹក ខ្លាចជាន់ទុយយោ និងខ្សែភ្លើងវាផ្ទុះ វាដាច់»។
ទោះជាយ៉ាងណាក្ដី អ្នកភូមិម្នាក់ទៀត គឺលោក ហឿន ណន ចាត់ទុកការលើកឡើងរបស់មេឃុំរូបនេះ ជារឿងមិនពិត ព្រោះផ្លូវនេះអ្នកភូមិធ្វើដំណើរ តាំងពីមិនទាន់មានសាលាឃុំ។ លោកបញ្ជាក់ថា ផ្លូវរទេះនេះ ពលរដ្ឋធ្វើដំណើរតាំងពីសម័យ ប៉ុល ពត ដូច្នេះអាជ្ញាធរគួរតែដោះស្រាយ ព្រោះការបិទផ្លូវនេះប៉ះពាល់ជីវភាព និងមុខរបរពលរដ្ឋ៖ «ពលរដ្ឋចង់បានផ្លូវដើរ តែដើរវាង អំណាចនៅលើគេហើយ គេបិទផ្លូវ ផលប៉ះពាល់ធ្វើដំណើរ ដឹកគោ និងទៅចម្ការ»។
ជុំវិញរឿងនេះ ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង ចាត់ទុកទង្វើរបស់មេឃុំបែបនេះ ជាការរំលោភអំណាច ប៉ះពាល់សកម្មភាពសេដ្ឋកិច្ចរបស់ពលរដ្ឋ។ លោកថា អាជ្ញាធរខេត្តព្រះវិហារត្រូវតែស៊ើបអង្កេតរឿងនេះ ឱ្យច្បាស់លាស់និងដោះស្រាយឱ្យឆាប់រហ័ស ដើម្បីសម្រាលទុក្ខលំបាករបស់ពលរដ្ឋ។ លោកពន្យល់ថា តួនាទីរបស់អាជ្ញាធរឃុំ គឺបម្រើពលរដ្ឋ សម្របសម្រួលដោះស្រាយបញ្ហា និងអភិវឌ្ឍន៍សេដ្ឋកិច្ច ពុំមែនបង្កើតបញ្ហាធ្វើឱ្យពលរដ្ឋថ្នាំងថ្នាក់នោះទេ៖ «បើផ្លូវនោះ គឺពលរដ្ឋធ្លាប់ដើរតាំងពីយូរយារមកហើយ គាត់ទៅបិទ គឺជារឿងមួយ ជាការរំលោភអំណាចមួយធំ ត្រូវតែមានការដោះស្រាយឆាប់រហ័សជូនពលរដ្ឋ»។
អ្នកភូមិថា ផ្លូវរទេះដែលមេឃុំបិទនោះមានទំហំទទឹង ៣ម៉ែត្រភ្ជាប់ពីផ្លូវក្រាលក្រួសក្រហម ឆ្ពោះទៅកាន់ដីស្រែចម្ការរបស់អ្នកស្រុកឋិតក្នុងភូមិបដិវត្ត ឃុំច្រាច់ ស្រុកជ័យសែន។ អ្នកភូមិចាត់ទុកផ្លូវនោះ ថាជាចរន្តសេដ្ឋកិច្ចយ៉ាងសំខាន់ ដូចជាដឹកជញ្ជូនកសិផលដឹកគោក្របីទៅស្រែ និងការធ្វើចរាចរទៅស្រែរកត្រីសាច់បរិភោគជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។