សង្គម​ស៊ីវិល​គ្មាន​ជំនឿ​លើ​គណៈកម្មាធិការ​ថ្មី​បង្ក្រាប​ការ​កាប់​ទន្ទ្រាន​ដី​និង​ព្រៃ​អភិរក្ស​ខុសច្បាប់

ដោយ ថន ថារ៉ូ
2019-07-05
អ៊ីម៉ែល
មតិ
Share
បោះពុម្ព
ក្រុម​មន្ត្រី​ឧទ្យានុរក្ស​របស់​ក្រសួង​បរិស្ថាន ខេត្ត​កំពង់ស្ពឺ និង​ប្រធាន​អង្គការ​ប្រឆាំង​អំពើពុករលួយ​ ទប់ស្កាត់​ធនធាន​ធម្មជាតិ​ និង​ការពារ​សិទ្ធិពល​រដ្ឋ​ លោក​ ជា ហ៊ាន (រូប​ឆ្វេង​ទី២) ពេល​ចុះ​បំពេញ​បេសកកម្ម ចុះ​ល្បាត​ដែន​ជម្រក​សត្វព្រៃ​ភ្នំ​ឱរ៉ាល់ កាល​ពី​ចុង​ខែ​មិថុនា ឆ្នាំ​២០១៩។
ក្រុម​មន្ត្រី​ឧទ្យានុរក្ស​របស់​ក្រសួង​បរិស្ថាន ខេត្ត​កំពង់ស្ពឺ និង​ប្រធាន​អង្គការ​ប្រឆាំង​អំពើពុករលួយ​ ទប់ស្កាត់​ធនធាន​ធម្មជាតិ​ និង​ការពារ​សិទ្ធិពល​រដ្ឋ​ លោក​ ជា ហ៊ាន (រូប​ឆ្វេង​ទី២) ពេល​ចុះ​បំពេញ​បេសកកម្ម ចុះ​ល្បាត​ដែន​ជម្រក​សត្វព្រៃ​ភ្នំ​ឱរ៉ាល់ កាល​ពី​ចុង​ខែ​មិថុនា ឆ្នាំ​២០១៩។
រូប​ពីលោក ជា ហ៊ាន

មន្ត្រី​សង្គម​ស៊ីវិល និង​ជនជាតិ​ដើម​ភាគតិច គ្មាន​ជំនឿ លើ​ប្រសិទ្ធភាព​ការងារ របស់​គណៈកម្មាធិការ​ជាតិ​ថ្មី​មួយទៀត ដែល​រដ្ឋាភិបាល​ទើប​បង្កើត​ឡើង ក្នុង​ទិសដៅ បង្ក្រាប​ការ​កាប់​រុករាន ទន្ទ្រាន​ដី​ព្រៃ​សាធារណៈ​របស់​រដ្ឋ និង​ដី​ព្រៃ​អភិរក្ស​ដោយ​ខុសច្បាប់ នៅ​តាម​បណ្ដា​ខេត្ត​មួយ​ចំនួន។ ពួកគេ​មើល​ឃើញ​ថា ការអនុវត្ត​ច្បាប់​ធូររលុង និង​អំពើពុករលួយ គឺជា​មូលហេតុ​សំខាន់ បណ្ដាល​ឱ្យ​ព្រៃ​អភិរក្ស​គ្រប់​តំបន់ និង​ដី​ព្រៃ​សាធារណៈ​របស់​រដ្ឋ ជាច្រើន​ម៉ឺន​ហិកតារ ទទួលរង​ការ​ឈូស​ឆាយ និង​កាប់​រុករាន បម្លែង​ជា​កម្មសិទ្ធិឯកជន ដោយ​ខុសច្បាប់​បែប​អនាធិបតេយ្យ។

ក្រុម​ជនជាតិ​ដើម​ភាគតិច និង​អង្គការ​ឃ្លាំមើល​បរិស្ថាន សង្កេត​ឃើញ​ថា ការ​រីក​រាលដាល​សកម្មភាព​កាប់​រុករាន ដី​ព្រៃ​អភិរក្ស និង​ដី​ព្រៃ​សាធារណៈ​របស់​រដ្ឋ ដោយ​ខុសច្បាប់ បាន​ក្លាយ​ជា​ជំងឺ​មហារីក​ធ្ងន់ធ្ងរ​មួយ ក្នុង​សង្គម។ ពួកគេ​វាយតម្លៃ​ថា ការ​បង្កើត​គណៈកម្មាធិការ​ថ្មី​នេះ នឹង​មិន​អាច​រកមុខ​ជនល្មើស ដែល​ជា​អ្នក​មាន​អំណាច ក្រុម​ឧកញ៉ា និង​មន្ត្រី​គ្រាក់ៗ​ក្នុង​របប​លោក ហ៊ុន សែន មក​ផ្ដន្ទាទោស​តាមច្បាប់​បាន​នោះ​ទេ។

កាលពី​ថ្ងៃ​ទី២១ ខែ​មិថុនា ឆ្នាំ​២០១៩ រដ្ឋាភិបាល​បាន​បង្កើត​គណៈកម្មាធិការ​ជាតិ​ថ្មី​មួយទៀត ក្នុង​បំណង​ទប់ស្កាត់ លុបបំបាត់ និង​បង្ក្រាប​ការ​កាប់​រាន ដុត ឈូស​ឆាយ និង​ហ៊ុមព័ទ្ធ​ដី​ព្រៃ​ឈើ យក​ដី​ធ្វើ​កម្មសិទ្ធិ​នៅ​តាម​បណ្ដា​ខេត្ត​មួយ​ចំនួន។ គណៈកម្មាធិការ​នេះ មាន​រដ្ឋមន្ត្រី​ក្រសួង​កសិកម្ម លោក វេង សាខុន ជា​ប្រធាន និង​មាន​អន្តរក្រសួង​មួយ​ចំនួន​ទៀត ជា​សមាជិក។ លើស​ពី​នេះ គណៈកម្មាធិការ​នេះ មាន​ភារកិច្ច​ត្រួតពិនិត្យ និង​ស្រាវជ្រាវ​ដល់​មូលដ្ឋាន ដោយ​ត្រូវ​សហការ​ជាមួយ​ក្រុម​អង្គការ​សង្គម​ស៊ីវិល និង​សហគមន៍។

ប្រធាន​អង្គការ​ប្រឆាំង​អំពើពុករលួយ ទប់ស្កាត់​ធនធាន​ធម្មជាតិ និង​ការពារ​សិទ្ធិ​ពលរដ្ឋ លោក ជា ហ៊ាន ឱ្យ​ដឹង​នៅ​ថ្ងៃទី៤ កក្កដា​ថា លោក​គ្មាន​ជំនឿ​លើ​ប្រសិទ្ធភាព ការងារ​របស់​គណៈកម្មាធិការ​ជាតិ​មួយ​នេះ​ទេ ព្រោះ​ដី​ព្រៃ​អភិរក្ស​រាប់ពាន់​ហិកតារ ក្នុង​ដែន​ជម្រក​សត្វព្រៃ​ភ្នំ​ឱរ៉ាល់ និង​តំបន់​អភិរក្ស​ផ្សេងទៀត កំពុង​ទទួលរង​ការ​ឈូស​ឆាយ កាប់​រុករាន ធ្វើជា​កម្មសិទ្ធិ​បែប​អនាធិបតេយ្យ​។ លោក​ថា បុគ្គល​ដែល​ហ៊ាន​កាប់​ទន្ទ្រានព្រៃ​អភិរក្ស​រាប់ពាន់​ហិកតារ សុទ្ធ​សឹង​ជា​បុគ្គល​មានអំណាច ក្រុម​ឧកញ៉ា និង​បុគ្គល​មាន​ងារ​ជា​ឯកឧត្ដម​មួយ​ចំនួន បាន​ឃុបឃិត​គ្នា​ជា​ប្រព័ន្ធ​ជាមួយ​មន្ត្រី​ជំនាញ​នៅ​មូលដ្ឋាន។ លោក​បន្ថែម​ថា ការអនុវត្ត​ច្បាប់​ធូររលុង និង​ការ​ឃុបឃិត​គ្នា ធ្វើ​ឯកសារ​កាន់កាប់​ដីធ្លី ជាន់​ចំ​ដី​ព្រៃ​អភិរក្ស​ខុសច្បាប់ បាន​កើតមានឡើង​ជាច្រើន​ឆ្នាំ​មក​ហើយ៖ «ខ្ញុំ​ដូចជា​អត់​មាន​ជំនឿ លើ​ការអនុវត្ត​ច្បាប់​ទេ ប្រសិនជា​យើង​អនុវត្ត​ច្បាប់​ឱ្យ​មែនទែន អនុវត្ត​តាំងពី​អ្នក​ប្រព្រឹត្ត​បទល្មើស មាន​អ្នកខ្លះ​គឺ​ឯកឧត្ដម​ផ្កាយ ទៅ​ប្រព្រឹត្ត​បទល្មើស ប្រសិនជា​យើង​អនុវត្ត​ច្បាប់ អ្នក​ដែល​ធំ​ហ្នឹងហើយ គឺ​អ្នក​តូចៗ​គឺ​ខ្លាច​តែម្ដង»

មន្ត្រី​សង្គម​ស៊ីវិល​រូប​នេះ បង្ហាញ​តម្រុយ​ទីតាំង​ខ្លះៗ ដែល​លោក​ចុះ​អង្កេត​ជាក់ស្ដែង រក​ឃើញ​ថា ក្នុង​ភូមិ​ស្រែកិន និង​ភូមិ​ពោធិ៍​មាស នៃ​ឃុំ​ត្រពាំង​ជោរ ស្រុក​ឱរ៉ាល់ ខេត្ត​កំពង់ស្ពឺ ព្រៃ​អភិរក្ស ក្នុង​ដែន​ជម្រក​សត្វព្រៃ​ភ្នំ​ឱរ៉ាល់ បាន​ទទួលរង​ការ​កាប់​រុករាន ព្រៃ​អភិរក្ស អស់​រាប់ពាន់​ហិកតារ បំប្លែង​ជា​កម្មសិទ្ធិឯកជន​។ រីឯ​ឈ្មួញ​មានអំណាច បាន​ឃុបឃិត​ជាមួយ​មន្ត្រី​ជំនាញ ដាក់ពាក្យ​ស្នើសុំ​រដ្ឋាភិបាល ដើម្បី​ផ្ដាច់​តំបន់​នោះ ចេញពី​ព្រៃ​ការពារ​ធម្មជាតិ​។ សកម្មភាព​កាប់​ទន្ទ្រាន​ដី​ព្រៃ​ទាំងនោះ ក្រុម​ឈ្មួញ បាន​យក​ពលរដ្ឋ​ជា​ខែល និង​ធ្វើ​ឯកសារ​ភូតភរ​ទៅ​ថ្នាក់លើ​ថា ដី​ព្រៃ​នៅ​តំបន់​នោះ ជា​ដីចម្ការ​របស់​ពលរដ្ឋ។ លោក​បន្ថែម​ថា ព្រៃ​អភិរក្ស​ទាំងនោះ​មាន​ផ្នែក​ខ្លះ បាន​ក្លាយ​ជា​ចម្ការ ស្វាយ ស្វាយចន្ទី និង​ដំណាំ​ផ្សេងទៀត ដែល​ទើបតែ​នៅ​ដាំ​នៅ​ប៉ុន្មាន​ឆ្នាំ​ចុង​ក្រោយនេះ​៖ «ដី​កន្លែង​ហ្នឹង​រាប់ពាន់​ហិកតារ ភ្នំ​មួយ​ដែល​ខ្ញុំ​ចង្អុល គឺ​តំបន់​ហ្នឹងហើយ គឺជា​តំបន់​ព្រៃ ហើយ​ក្នុង​លិខិត​របស់​អាជ្ញាធរ​គឺ​ដាក់​ដីចម្ការ ធ្វើ​ការ​លក់ ហើយ​រដ្ឋាភិបាល​លោក​អត់​ដឹង​ថា តំបន់​ហ្នឹង ព្រោះ​ការអនុវត្ត​ច្បាប់ វា​ជា​ប្រព័ន្ធ​នៃ​ការ​ផ្សំគំនិត​។ ការ​បង្កើត​គ្រាន់តែ​ជា​ការ​បង្កើត រីឯ​ការទប់ស្កាត់ កាប់​ទន្ទ្រាន​ដី​រដ្ឋ ដូច​អត់​មាន​ប្រសិទ្ធភាព​ទេ អ្វី​ដែល​គេ​បាន​ប្រព្រឹត្ត​នៅ​តំបន់​ហ្នឹង គឺ​គេ​បាន​ពិភាក្សា​គ្នា​អស់ហើយ»

អាស៊ីសេរី​បាន​ព្យាយាម​ទាក់ទង អ្នកនាំពាក្យ​ក្រសួងកសិកម្ម​លោក ស្រី វុឌ្ឍី ដើម្បី​សុំ​ការ​បំភ្លឺ​ជុំវិញ ការ​លើកឡើង​នេះ តែ​ទូរស័ព្ទ​ហៅ​ចូល​គ្មាន​អ្នកទទួល​នៅ​ថ្ងៃទី៤ កក្កដា។

ចំណែក​អ្នកនាំពាក្យ​រដ្ឋាភិបាល លោក ផៃ ស៊ីផាន មាន​ប្រសាសន៍​ថា ការ​បង្កើត​គណៈកម្មាធិការ​អន្តរក្រសួង​នេះ ជា​ការ​ខិតខំ​ប្រឹងប្រែង របស់​រដ្ឋាភិបាល បំណង​ទប់ស្កាត់ និង​បង្ក្រាប​ការ​កាប់​រុករាន​ដី​ព្រៃ​ដោយ​ខុសច្បាប់។ លោក​បញ្ជាក់​ថា ការ​ចុះ​ប្រតិបត្តិ​ការ​អនុវត្ត​ការងារ​ជាក់ស្ដែង មាន​ប្រសិទ្ធភាព​បែប​ណា​នោះ សូម​ឱ្យ​រង់ចាំ​អ៊ុត​មើល​ទាំងអស់​គ្នា​សិន​។ ចំពោះ​សំណួរ​ដែល​សួរ​ថា តើ​គណៈកម្មាធិការ​នេះ នឹង​អនុវត្ត​ច្បាប់​ចំពោះ​ជនល្មើស​ជា​អ្នក​មាន​អំណាច ឧកញ៉ា និង​មន្ត្រី​ធំៗ ឬទេ ប្រសិនបើ​រក​ឃើញ​ថា ពួកគេ​បាន​ប្រព្រឹត្ត​បទល្មើស​ព្រៃឈើ​ខុសច្បាប់​? អ្នកនាំពាក្យ​រូប​នេះ​ឆ្លើយ​យ៉ាង​ខ្លី​ថា គ្មាន​ជន​ណា​ម្នាក់ នៅ​ក្រៅ​អំណាច​គណៈកម្មការ​ជាតិ​នេះ​ទេ៖ «ការ​បង្កើត​គណៈកម្មាធិការ​អន្តរក្រសួង​ហ្នឹងហើយ ជា​ការ​ខំ​ប្រឹងប្រែង​របស់​រដ្ឋាភិបាល ក្នុង​ការ​ទប់ស្កាត់​រាល់​ការបំផ្លាញ​ហ្នឹងឯង នេះ​ជា​ជំហរ​ហើយ បាន​ចេញ​ជា​គណៈកម្មាធិការ​នេះ​។ អ្វី​ដែល​ប្រតិបត្តិការ និង​មាន​ប្រសិទ្ធភាព​បែប​ណា​នោះ យើង​នឹង​ចាំ​មើល»

ចំណែក ជនជាតិ​ដើម​ភាគតិច​ទំពួន រស់នៅ​ភូមិ​កែងសាន់ ឃុំ​សេដា ស្រុក​លំផាត់ ខេត្ត​រតនគិរី លោក ខាំ និន អះអាង​ថា ដែន​ជម្រក​សត្វព្រៃ​លំផាត់ នៅ​ភូមិ​កែងសាន់ និង​ភូមិ​សមុទ្រ​ក្រោម ក្នុង​ឃុំ​សេដា ស្រុក​លំផាត់ ទទួលរង​ការ​កាប់​រុករាន និង​ឈូស​ឆាយ បំប្លែង​ជា​សម្បត្តិ​បុគ្គល អស់​រាប់ពាន់​ហិកតារ នៅ​រយៈពេល ២ ឆ្នាំ​ចុង​ក្រោយនេះ​។ សកម្មភាព​កាប់​រុករាន​ដី​ព្រៃ​អភិរក្ស ដោយ​ខុសច្បាប់ អាច​ធ្វើ​ទៅ​បាន ដោយសារ​មេភូមិ និង​មេឃុំ ឃុបឃិត​គ្នា។ លោក​ថា ប្រសិនបើ​គណៈកម្មាធិការ​ជាតិ​នេះ ធ្វើ​កិច្ច​ការងារ​ដើម្បី​ប្រយោជន៍​ជាតិ និង​ពលរដ្ឋ​មែន​នោះ ត្រូវតែ​ចុះ​ស៊ើបអង្កេត​សកម្មភាព​កាប់​រុករាន​ដី​ព្រៃ​អភិរក្ស​នេះ និង​ចាប់​ជនល្មើស និង​អ្នក​ពាក់ព័ន្ធ​មក​អនុវត្ត​ច្បាប់៖ «មិន​ឃើញ​គណៈកម្មាធិការ​ណា​ចុះទៅ​ទប់ស្កាត់ ឱ្យ​ប្រជាជន​មាន​សង្ឃឹម មាន​ទឹកចិត្ត​ឱ្យ​ជួយ​ឱ្យ​ពលរដ្ឋ​ហ្នឹង តែ​ចុងក្រោយ​នៅតែ​ហិន​ហោច​ទៅៗ​។ មួយ​ពាន់​ហិកតារ​នៅ​សល់​តែ​ដើមឈើ​ដួល តែ​អត់​ឃើញ​ចាប់​ជនល្មើស​មក​ផ្ដន្ទាទោស​ផង»

ជនជាតិ​ដើម​ភាគតិច​រូប​នេះ​បន្ថែម​ថា ដែន​ជម្រក​សត្វព្រៃ​លំផាត់ ដែល​ធ្លាប់​ជា​ម្លប់​បៃតង និង​ជា​ជម្រក​សត្វព្រៃ​កម្រ​រស់នៅ ដែល​ជនជាតិ​ដើម​ភាគតិច​ទំ​ពូន​អាស្រ័យ​ផល បែប​ប្រពៃណី ជាច្រើន​ជំនាន់​មក​ហើយ​នោះ បាន​បាត់បង់​ស្ទើរ​ទាំងស្រុង នៅ​រយៈពេល​ប៉ុន្មាន​ឆ្នាំ​ចុង​ក្រោយនេះ។ មក​ទល់​ពេល​នេះ​ពួកគេ​មិន​ឃើញ មន្ត្រី​នគរបាល​យុត្តិធម៌ និង​សមត្ថកិច្ច​ជំនាញ ចាប់ខ្លួន​ជនល្មើស​ណា​ម្នាក់ មក​ផ្ដន្ទាទោស​នោះ​ទេ​។ រីឯ​ពលរដ្ឋ​ដែល​ចូលរួម​ការពារ​ព្រៃឈើ និង​លាតត្រដាង​ពី​បទ​ល្មើស​ព្រៃឈើ ត្រូវ​បាន​អាជ្ញា​ធរមាន​សមត្ថកិច្ច​គំរាមកំហែង និង​ប្ដឹង​ទៅ​តុលាការ​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល