​អ្នក​ច្បាប់​​ភ្ញាក់​ផ្អើល​​នឹង​​ការ​​ដោះសា​រ​របស់​មេឃុំ​ ​ដែល​ថា ​ខ្លួន​មិន​​ចេះ​​ច្បាប់​ ​រឿង​​ចេញ​​លិខិត​​បញ្ជាក់​​កម្មសិទ្ធិ​ដីធ្លី

ដោយ មួង ណារ៉េត
2021-07-27
Share
​អ្នក​ច្បាប់​​ភ្ញាក់​ផ្អើល​​នឹង​​ការ​​ដោះសា​រ​របស់​មេឃុំ​ ​ដែល​ថា ​ខ្លួន​មិន​​ចេះ​​ច្បាប់​ ​រឿង​​ចេញ​​លិខិត​​បញ្ជាក់​​កម្មសិទ្ធិ​ដីធ្លី (ស្ត្រីអាវខៀវ) លោកស្រី កែវ សុផាត មេឃុំត្រែងត្រយឹម ស្រុកភ្នំស្រួច ខេត្តកំពង់ស្ពឺ ដែលចេញលិខិតមោឃភាពលើការចុះហត្ថលេខាលើទិញលក់ដីធ្លី កាលពីថ្ងៃទី២៨ ខែឧសភា ឆ្នាំ២០២១។
រូប៖ រដ្ឋបាលឃុំត្រែងត្រយឹង

អ្នកច្បាប់​ ​និង​​មន្រ្តី​សង្គម​ស៊ីវិល​ ​ភ្ញាក់ផ្អើល​​នឹង​ការ​ដោះសា​រ​របស់​មេឃុំ​ជាច្រើន​នាក់​ ​នៅ​តាម​ខេត្ត​មួយ​ចំនួន​ ​ដែល​ថា ​ខ្លួន​មិន​ចេះ​ច្បាប់​ ​ទើប​ចេញ​​លិខិត​បញ្ជាក់​​កម្មសិទ្ធិ​ដីធ្លី​ជូន​ប្រជាពលរដ្ឋ​ ​រួចហើយ​ប្រកាស​លុបចោល​វិញ​ ​ក្រោយ​ពី​មាន​លិខិត​អន្តរាគមន៍​ពី​រដ្ឋ​មន្រ្តី​ក្រសួង​បរិស្ថាន​។ 

លិខិត​ប្រកាស​ទាត់ចោល​ហត្ថលេខា​ខ្លួនឯង​របស់​មេឃុំ​ជាច្រើន​រូប​ ​នៅ​តាម​បណ្តា​ខេត្ត​មួយ​ចំនួន​ ​ដូចជា​ ​ខេត្តកំពង់ធំ​ ​កំពង់ស្ពឺ​ ​កោះ​កុង​ ​និង​កំពត​ជាដើម​ ​បាន​ធ្លាក់​មក​ជាហូរហែ​ ​តាំងពី​ពាក់កណ្តាល​ខែ​ឧសភា​មក។​ ​លិខិត​ភាគច្រើន​ ​មាន​ទម្រង់​តែមួយ​ ​គ្រាន់តែ​ដូរ​ឈ្មោះ​មេឃុំ​ ​ដូចជា​ មេឃុំ​ព្រែកត្នោត​ ​ស្រុក​ទឹក​ឈូ​ខេត្ត​កំពត​លោក​ ​គង់​ ​ប៊ុរា​ ​មេឃុំ​កោះ​តូច​ ​ស្រុក​ទឹក​ឈូរ​ ​ខេត្ត​កំពត​ដែរ​ ​លោក​ ​ឈូក​ ផូ ​និង​មេឃុំ​ត្រែង​ត្រយឹង​ ​ស្រុក​ភ្នំ​ស្រួច​ ​ខេត្ត​កំពង់ស្ពឺ​អ្នកស្រី​ ​កែវ​ ​សុផាត​ ​សុទ្ធតែ​​ប្រកាស​ធ្វើ​មោឃភាព​ ​ឬ​លុបចោល​ការ​ចុះហត្ថលេខា​របស់​ខ្លួន​កន្លងមក​ ​ទៅលើ​ឯក​សារលិខិត​ស្នើសុំ​ផ្ទេរ​សិទ្ធិ​កាន់កាប់​ដីធ្លី​ ​ពាក្យសុំ​ប្រើប្រាស់​ដីធ្លី​ ​លិខិត​លក់​ទិញ​ ​និង​ប្លង់​បង្ហាញ​ទីតាំង​គ្រប់​ប្រភេទ​ ​នៅ​ក្នុង​តំបន់​ការពារ​ធនធានធម្មជាតិ​ ​និង​ក្នុង​របៀង​អភិ​រក្ស​ជីវៈ​ចម្រុះ​នៃ​តំបន់​ឧទ្យាន​ជាតិ​មុនីវង្ស​បូកគោ​ ​និង​ឧទ្យាន​ជាតិ​ព្រះ​សុរាម្រិត​កុសុមៈ​គិរីរម្យ​។​

មូលហេតុ​តែមួយ​គត់​ ​ដែល​ពួកគាត់​ត្រូវ​ប្រកាស​លែង​ទទួលស្គាល់​ហត្ថលេខា​ខ្លួនឯង​បែប​នេះ​ ​គឺ​ពួកគាត់​អះអាង​ថា​ ​មកពី​ពួកគាត់​មិនសូវ​យល់​ដឹង​អំពី​ច្បាប់ទម្លាប់​ច្រើន​ ​ព្រោះ​ឃើញ​តែ​ប្រជាពលរដ្ឋ​អាស្រ័យផល​ជាក់ស្តែង​នៅ​ទីតាំង​ទាំងនោះ​។​

លោក​មេធាវី​ ​ផែង​ ​ហេង​ ​ហួសចិត្ត​នឹង​ការ​អះអាង​បែប​នេះ​។​ ​លោក​ថា​ មន្រ្តី​សារ​ធារ​ណៈ ​ដែល​មាន​ឋានៈ​រហូតដល់​មេឃុំ​បែប​នេះ​ទៅ​ហើយ​ ​មិន​អាច​និយាយ​យក​រួចខ្លួន​ ​ដោយ​យកលេស​ថា ​ខ្លួន​មិន​យល់​អំពី​ច្បាប់​នោះ​ឡើយ​៖ «ច្បាប់​និយាយ​ហើយ​ថា​ គ្មាន​បុគ្គល​ណាមួយ​ ​និយាយ​ថា ​ខ្លួន​មិន​យល់​ច្បាប់​ហ្នឹង​ ​ដើម្បី​ចៀស​ផុត​ពី​ការចោទប្រកាន់​បានទេ​។​ ​ឧទាហរណ៍​ចោរលួច​ ​ឬ​ចោរប្លន់​ ​ស្រាប់តែ​ចាប់​វា​បាន​ ​វា​ថា​អត់​ដឹង​ថា​ អា​ប្លន់​ហ្នឹង​ជាប់គុក​ផង​។​ ​ដូច្នេះ​ត្រូវ​ដោះលែង​ ​ឲ្យ​រួចពី​បទ​ចោទ​ឬ​យ៉ាងម៉េច?»។

ការ​ចេញ​លិខិតផ្លូវការ​ដោយ​មន្រ្តី​សាធារណៈ​របស់​រដ្ឋ​ ​ដែល​ធ្វើឲ្យខូច​ខាត​ដល់​ប្រយោជន៍សាធារណៈ​ ​និង​ប៉ះពាល់​ដល់​ពលរដ្ឋ​បែប​នេះ​ ​លោក​មេធាវី​ ​ផែង​ ​ហេង​ ​ថា​មេឃុំ​ទាំងនេះ​ប្រឈម​នឹង​ទោស​ព្រហ្មទណ្ឌ​៖ «តើ​ការ​ចេញ​លិខិត​អស់ហ្នឹង​ជា​របៀប​រំលោភ​អំណាច​ ​ឬក៏​យ៉ាងម៉េច​? ​ហើយ​សំណង​រដ្ឋប្បវេណី​ ​រដ្ឋ​ជា​អ្នក​ចេញ​?»។​

លោក​មេធាវី​ ​ផែង​ ​ហេង​ ​ថា​ការប្រកាស​លុបចោល​លិខិតផ្លូវការ​របស់​ខ្លួន​បែប​នេះ​ ​ធ្វើឲ្យ​ពលរដ្ឋ​ជាច្រើន​ដែល​ជា​អ្នក​អាស្រ័យផល​ជាក់ស្តែង​ទាំងនោះ​ ​ក្លាយ​ជា​ជន​រង​គ្រោះ​ ​ព្រោះ​ពលរដ្ឋ​ជឿ​ទុកចិត្ត​លើ​មន្រ្តី​សាធារណៈ​ ​ដែល​អនុញ្ញាត​ឲ្យ​ពួកគាត់​ទិញ​ឬ​លក់​ ​ឬ​អាស្រ័យផល​លើ​ដី​ទាំងនោះ​ ​ដោយ​ស្រប​ច្បាប់​។​

ដូចគ្នា​នេះ​ដែរ​ ​អ្នកវិភាគ​នយោបាយ​ ​និង​ជំនាញ​ផ្នែក​ច្បាប់​ ​ថា​ការ​បដិសេធ​ហត្ថលេខា​របស់​ខ្លួន​របស់​មេឃុំ​ទាំងនេះ​ ​គឺ​ពួកគាត់​មិន​ត្រូវឲ្យ​រួចខ្លួន​ពី​ទោសកំហុស​របស់​ខ្លួន​ឡើយ​។​

លោក​បណ្ឌិត​ ​ឡៅ​ ​ម៉ុង​ហៃ​ ​ថា​ទង្វើ​ខ្វះ​ការទទួលខុសត្រូវ​របស់​មេឃុំ​ទាំងនេះ​ ​បំពាន​ច្រើន​ករណី​។​ ​លោក​ថា​ ​ទី​១​.​គឺ​រំលោភ​លើ​ការ​ទុកចិត្ត​ប្រជាពលរដ្ឋ​ ​ដែល​បាន​បោះ​ឆ្នោ​ត​​ឲ្យ​ខ្លួន​ ​ឬ​ ​គណបក្ស​របស់​ខ្លួន​ ​ដែល​ក្នុងករណីនេះ​មេឃុំ​ទាំងនោះ​ ​គួរ​មាន​សេចក្ដីក្លាហាន​លាឈប់​ជាបន្ទាន់​។​ ​ទី​២​. ​ពួកគាត់​មិនបាន​បំពេញ​ករណីយ​កិច្ចការពារ​ ​ថែរក្សា​ការពារ​បរិស្ថាន​ ​និង​ធនធានធម្មជាតិ​ ​និង​គ្របគ្រង​ព្រៃឈើ​ ​ដែល​ត្រូវ​ទទួលទណ្ឌកម្ម​ពី​ក្រុមប្រឹក្សា​ឃុំ​ ​និង​ពី​ក្រសួងមហាផ្ទៃ​ ​ក្នុង​ក្របខណ្ឌ​នៃ​ច្បាប់​ស្តីពី​ការ​គ្រប់គ្រង​ឃុំ​សង្កាត់​ ​ស្តីពី​ការ​តាមដាន​ ​ការ​ត្រួតពិនិត្យ​និង​ការធ្វើអន្តរាគមន៍​ ​និង​ទី​៣​. ​មេឃុំ​ទាំងនេះ​ ​ប្រព្រឹត្ត​ខុសច្បាប់​ស្តីពី​តំបន់​ការពារ​ធម្មជាតិ​ ​ដែល​បទល្មើស​ធម្មជាតិ​ ​គឺ​ត្រូវ​សង​ការខូចខាត​ដល់​ធនធានធម្មជាតិ​ ​និង​ទទួលទោស​ជា​ចារី​សមគំនិត​ប្រព្រឹត្ត​បទល្មើស​។​

មិនតែប៉ុណ្ណោះ​លោក​បណ្ឌិត​ ​ឡៅ​ ​ម៉ុង​ហៃ​ ​ថា​ក្រសួង​មហាផ្ទៃ​ ​ដែល​ស្ថាប័ន​អាណាព្យាបាល​ ​ក៏​ត្រូវ​មាន​ការទទួលខុសត្រូវ​ចំពោះ​កំហុស​ឆ្គង​ ​និង​ការ​ខ្វះខាត​ក្នុង​ការ​បំពេញ​តួនាទី​ ​ករណីយកិច្ច​ ​និង​កាតព្វកិច្ច​របស់​មន្ត្រី​សា​ធារ​ណ​:​ក្រោម​ឱវាទ​របស់​ខ្លួន​ដែរ​។​

លោក​បន្ថែម​ថា​ ​ក្រសួង​បរិស្ថាន​ (​និង​ក្រសួង​ដទៃទៀត​) ​និង​ក្រសួងមហាផ្ទៃ​ ​ក៏​ត្រូវ​ទទួលខុសត្រូវ​ចំពោះ​ការ​ខ្វះខាត​ ​ក្នុង​ការ​ប្រទាក់ប្រទង​ការងារ​ ​ដើម្បីឲ្យ​មន្ត្រី​ក្រោម​​ឱវាទ​ ​បាន​យល់​ដឹង​ ​និង​អនុវត្ត​ធ្វើតាមច្បាប់​ពាក់ព័ន្ធ​វិ​ស័យ​ ​និង​ដែន​សមត្ថភាព​រៀងៗខ្លួន​ដែរ​។​

ទោះ​ជាង​យ៉ាងនេះក្តី​ ​រដ្ឋលេខាធិការ​ក្រសួងមហាផ្ទៃ​ ​និង​ជា​ប្រធាន​លេខាធិការដ្ឋាន​នៃ​គណៈកម្មាធិការ​ជាតិ​សម្រាប់​ការ​អនុវត្ត​តាម​បែប​ប្រជាធិបតេយ្យ​នៅ​ថ្នាក់ក្រោម​ជាតិ​(​គជអប​ )​លោក​ ​ង៉ា​ន់ ​ចំរើន​ ​ឲ្យដឹង​ថា​ ​ការពិនិត្យ​សើរើ​ ​និង​ចុះ​ស្រាវជ្រាវ​រក​ភាព​មិន​ប្រក្រតី​ក្នុង​​រឿង​នេះ​ ​គឺ​ស្ថិត​ក្នុង​ដែន​សមត្ថកិច្ច​របស់​អាជ្ញាធរ​ខេត្ត​ ​ព្រោះ​ក្រសួងមហាផ្ទៃ​ ​បាន​ធ្វើ​ប្រតិភូ​កម្ម​ ​ឬ​ផ្ទេរ​អំណាច​ពី​ថ្នាក់​ជាតិ​ឲ្យ​ថ្នាក់​ខេត្ត​ដោះស្រាយ​។​

លោក​បញ្ជាក់​ថា​ ​ប្រជាពលរដ្ឋ​ដែល​រង​ការខូចខាត​នៅ​តំបន់​នោះ​ ​អាច​ប្ដឹង​អាជ្ញាធរ​ថ្នាក់ក្រោម​ ​រឿង​ចេញ​លិខិត​បដិសេធ​ច្រានចោល​ដីធ្លី​របស់​ពួកគាត់​នេះ​ ​ហើយ​​រដ្ឋបាល​ខេត្ត​ដែល​ពាក់ព័ន្ធ​ ​ត្រូវ​មាន​តួនាទី​ចុះ​ស្រាវជ្រាវ​និង​ដោះស្រាយបញ្ហា​ជូន​ពលរដ្ឋ​៖ ​«​បើ​គាត់​សម្រេច​ក្នុងនាម​ក្រុមប្រឹក្សា​ ​អា​ហ្នឹង​ក្រុមប្រឹក្សា​ទាំងមូល​ត្រូវ​ទូទាត់​សំណង​នោះ​។​ ​តែ​បើ​សម្រេច​ដោយ​បុគ្គល​ ​មេឃុំ​ ​ឬ​ចៅសង្កាត់​ ​គឺ​បុគ្គល​នោះ​ត្រូវ​ចេញ​សង​។​ ​ហើយ​មិន​យក​ថវិកា​ឃុំ​សង​ទេ​ ​គឺ​យក​ថវិកា​របស់​ខ្លួន​សង​។​ ​អា​ហ្នឹង​! ​ជា​រឿង​ឯកជន​ ​ដែល​សម្រេច​ខុស»។

រឿង​សម្រេច​ខុស​នេះ​ ​បើ​តាម​មន្រ្តី​ឃ្លាំមើល​ការបោះឆ្នោត​ ​ថា​មិនមែន​ជា​រឿង​ឯកជន​នោះ​ទេ​។​ ​អ្នក​សម្របសម្រួល​ផ្នែក​អង្កេត​ ​និង​តស៊ូ​មតិ​នៃ​អង្គការ​ខុមហ្វ្រែល​ (​COMFREL) ​លោក​ ​កន​ ​សាវាង្ស ​ថា​មេឃុំ​ជា​ភ្នាក់ងារ​របស់​រដ្ឋ​ ​ដែល​បំ​ពេញការងារ​ទៅតាម​កា​រដាក់​បញ្ជា​ពី​រដ្ឋ​ ​ព្រោះ​មេឃុំ​ ​ឡើង​កាន់​តំណែង​មាន​អាណត្តិ​ប្រាំ​ឆ្នាំ​ ​តាមរយៈ​ការបោះឆ្នោត​ ​និង​ក្របខណ្ឌ​អាណាព្យាបាល​ត្រឹមត្រូវ​។​ ​លោក​ថា​ ​ការ​ខកខាន​ក្នុង​ការទទួលខុសត្រូវ​ចំពោះ​ការប្រព្រឹត្តិ​ខុសឆ្គង​នេះ​ ​នឹង​ប៉ះពាល់​ដល់​សេចក្តី​ទុកចិត្ត​​របស់​​ប្រជាពលរដ្ឋ​ជាទូទៅ​ ​និង​ប៉ះពាល់​ដល់​សុចរិត​ភាព​របស់​ស្ថាប័ន​ក្រុមប្រឹក្សា​ឃុំ​សង្កាត់​នេះ​ផង​។​

លោក​ព្រមាន​ថា​ ​គណបក្ស​ណា​ដែល​មាន​មេឃុំ​ប្រព្រឹត្ត​បែប​នេះ​ ​នឹង​ប៉ះពាល់​ដល់​ប្រជាប្រិយ​របស់​ខ្លួន​ជាក់​ជាមិនខាន​៖ «កន្លងមក​បញ្ហា​កើតឡើង​ក្នុង​ឆ្នាំ​ ​២០១២​ ​ឬ​ ​២០១៧​ ​ភាគច្រើន​កើតឡើង​ដោយសារ​ការ​មិន​សប្បាយចិត្ត​បែប​នេះ​។​ ​ដូច្នេះ​ការប្រកួតប្រជែង​មួយ​ដែល​ត្រឹមត្រូវ​ ​វា​អាច​នឹង​មាន​បញ្ហា​នៅ​ក្នុង​ការ​គាំទ្រ​ ​ប្រសិនបើ​នៅតែ​ធ្វើ​បែប​ហ្នឹង»។

មន្រ្តី​អង្គការសង្គម​ស៊ីវិល​មួយ​រូប​ទៀត​ ​ថា​បញ្ហា​ដែល​មេឃុំ​ជា​ច្រើន​ចុះហត្ថលេខា​លើ​លិខិតផ្លូវការ​ ​រួច​ប្រកាស​លុបចោល​វិញ​បែប​នេះ​ ​បង្ហាញ​ឲ្យ​ឃើញ​នូវ​បញ្ហា​ពីរ​ធំៗ​។​

នាយក​ប្រតិបត្តិ​សម្ព័ន្ធ​គណនេយ្យ​ភាព​សង្គម​នៅ​កម្ពុជា​លោក​ ​សន​ ​ជ័យ​ ​ថា​បញ្ហា​ទី​១​,​ ​គឺ​ភាព​ឆក​ល្វែងក្នុង​ការ​ផ្សព្វផ្សាយ​គោល​នយោបាយ​ឬ​ព័ត៌មាន​ ​ដែល​មិន​គ្រប់ជ្រុងជ្រោយ​ ​ដែល​សូម្បីតែ​មន្រ្តី​ឃុំ​ ​នៅតែ​អះអាង​ថា ​មិន​ដឹង​។​ ​ចុះ​ទម្រាំ​ប្រជាពលរដ្ឋ​សាមញ្ញ​? ​មួយទៀត​ ​លោក​ ​សន​ ​ជ័យ​ ​ថា​គឺ​សមត្ថភាព​របស់​មេឃុំ​ ​នៅ​មាន​ក​ម្រិ​ត​​ដែរ​។​ ​លោក​ថា​ ​ចំណុច​នេះ​ ​ក៏​គួរ​មានការ​កែ​ទម្រង់​ស៊ី​ជម្រៅ​នោះ​ដែរ​៖ «សម្រាប់​បេក្ខជន​ជា​មេឃុំ​ ​ជា​ក្រុមប្រឹក្សា​ហ្នឹង​ ​ថ្ងៃក្រោយ​គួរតែ​មានការ​ធ្វើ​វិសោធនកម្ម​ច្បាប់​ ​ដើម្បី​កំណត់​លក្ខខណ្ឌ​ចំណេះ​ដឹង​ ​និង​ជំនាញ​ឲ្យបាន​ខ្ពស់​បន្តិច​។​ ​ចង់បាន​ឲ្យ​មាន​ស​មាស​ភាព​យុវជន​ក្នុង​ឃុំ​សង្កាត់​ឲ្យបាន​ច្រើន»។

កាលពី​ខែ​​ឧសភា​ ​រដ្ឋ​មន្រ្តី​ក្រសួង​បរិស្ថាន​លោក​ ​សាយ​ ​សំ​អា​ល់ ​បាន​ចេញ​លិខិត​មួយ​​ស្នើ​ឲ្យ​ចាត់វិធានការ​បញ្ឈប់​ជាបន្ទាន់​ ​និង​ធ្វើ​មោឃភាព​(​ឬ​លុបចោល​) ​នូវ​រាល់​ការ​​ចុះហត្ថលេខា​ ​ឬ​ការ​បញ្ជាក់​ទទួលស្គាល់​លើ​លិខិត​ផ្ទេរ​សិទ្ធិ​ ​ពាក្យ​ស្នើសុំ​កាន់កាប់​ប្រើប្រាស់​ដីធ្លី​ ​លិខិត​ទិញ​លក់​ដី​រដ្ឋ​ ​និង​ការ​បញ្ជាក់​លើ​ប្លង់​បង្ហាញ​ទីតាំង​ដី​ជាអាទិ៍​ ​ដែល​ធ្វើឡើង​នៅ​លើ​ដី​ក្នុង​តំបន់​ការពារ​ធម្មជាតិ​ ​និង​ក្នុង​របៀង​អភិ​រក្ស​ជីវៈ​ចម្រុះ​។​

ប៉ុន្តែ​លិខិត​នេះ​ ​មិនបាន​ចែង​អំពី​ទោស​ទណ្ឌ​អ្វី​ ​ដែល​ត្រូវ​អនុវត្ត​លើ​មន្រ្តី​ឃុំ​សង្កាត់​ ​ដែល​បាន​ចុះហត្ថលេខា​លើ​ឯកសារ​ទាំងនោះ​រួចហើយ​នោះ​ទេ​។​ ​ក្រសួង​នេះ​ ​ក៏​មិនបាន​បង្ហាញ​អំពី​យន្ត​ការ​ដោះស្រាយ​សំណង​ខូចខាត​ ​ពី​ការប្រព្រឹត្ត​ខុស​របស់​មន្រ្តី​ឃុំ​សង្កាត់​ទាំងនោះ​ ​នោះ​ដែរ​។​

ក្នុង​ការបោះឆ្នោត​ក្រុមប្រឹក្សា​ឃុំ​សង្កាត់​ឆ្នាំ​២០១៧​ ​គណបក្សប្រជាជន​កម្ពុជា​ ​ឈ្នះ​តំណែង​ក្រុមប្រឹក្សា​ឃុំ​សង្កាត់​ ​៦​,​៥០៣​ ​នាក់​ ​និង​គណបក្ស​សង្គ្រោះ​ជាតិ​ឈ្នះ​តំណែង​នេះ​ ​៥០០៧​ ​នាក់​។​ ​ប៉ុន្តែ​ ​ក្រោយមក​គណបក្ស​កាន់អំណាច​ ​បាន​រម្លាយ​គណបក្សប្រឆាំង​ ​រួច​ប្រមូល​យក​អ​សនៈ​ឃុំ​សង្កាត់​នេះ​ទាំងអស់​ ​ទៅ​គ្រប់គ្រង​ ​តាម​បែប​ឯក​បក្ស​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល