មន្រ្តីជំនាញខាងកសិកម្មរបស់ក្រសួងកសិកម្ម រុក្ខាប្រមាញ់ និងនេសាទ ក្នុងប្រទេសកម្ពុជា បានអះអាងថា ទិន្នផលស្រូវសម្រាប់ឆ្នាំ២០០៨ និងឆ្នាំ២០០៩នេះ បានកើនដល់ជាង៦លានតោនគឺលើសឆ្នាំ២០០៧ ចំនួនជាង ៥សែនតោន។
ប្រភពបានឲ្យដឹងថា តួលេខជាបណ្តោះអាសន្ននិងមិនទាន់ជាផ្លូវការជាង ៦លានតោនខាងលើនេះ គឺគេនៅមិនទាន់បានបូកសរុបជាមួយនឹងទិន្នផលស្រូវនៃរដូវប្រាំងនៅទ្បើយទេ។
លោក ម៉ាក់ សឿន អនុប្រធាននាយកដ្ឋានផែនការ ស្ថិតិ និងសហប្រតិបត្តិការអន្តរជាតិនៃក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ប្រាប់វិទ្យុអាស៊ីសេរីថា ការកើននៃចំនួនទិន្នផលស្រូវរដូវវស្សានៃឆ្នាំ២០០៨នោះ គឺដោយសារតែមានការកើនទ្បើងនៃផៃ្ទដីធ្វើស្រែរដូវវស្សារហូតដល់ជាង ២លាន ២សែនហិកតារ រីឯផៃ្ទដីធ្វើស្រែរដូវប្រាំងវិញ គឺមានចំនួនប្រមាណ ៣៥០.០០០ហិកតារ។
លោកបានបន្តថា ៖ «យើងមិនមានការព្រួយបារម្ភទេ ពីព្រោះបើប្រៀបធៀបនឹងឆ្នាំទៅ យើងលើសពីឆ្នាំទៅ ហើយនាយកដ្ឋានផ្សព្វផ្សាយកសិកម្មផ្សព្វផ្សាយយ៉ាងម៉េចកុំឲ្យគាត់លក់ស្រូវនៅពេលដែលចុះថោក គាត់អាចដាំបន្លែ ឬចិញ្ចឹមសត្វលក់»។
ការប៉ាន់ស្មានអំពីកំណើនផលស្រូវឆ្នាំ២០០៨ និងឆ្នាំ២០០៩ ខាងមុខនេះ នៅស្របពេលដែលកសិករខែ្មរកំពុងតែច្រូតកាត់ប្រមូលផលស្រូវរដូវវស្សា ដែលនឹងផុតរដូវច្រូតកាត់នៅខែក្រោយនេះ ហើយការដាំដុះស្រូវរដូវប្រាំងនឹងចាប់ផ្តើមនាពេលឆាប់ៗខាងមុខនេះ។
ស្របពេលដែលមន្រ្តីជំនាញខាងកសិកម្មបានសម្ដែងការពេញចិត្តនឹងកំណើនទិន្នផលស្រូវឆ្នាំ២០០៨ ថាមានការកើនទ្បើងជាងឆ្នាំ២០០៧កន្លងទៅ មានប្រជាពលរដ្ឋខែ្មរមួយចំនួនបានត្អូញតែ្អរអំពីទិន្នផលស្រូវរបស់ខ្លួនឆ្នាំ២០០៨ បានធ្លាក់ចុះជាងឆ្នាំ២០០៧ ទៅវិញ។
លោក អិត អែល ជាប្រជាកសិកររស់នៅក្នុងភូមិស្វាយព្រៃ ឃុំសណ្តែក ស្រុកបាធាយ ខេត្តកំពង់ចាម បានថែ្លងឲ្យដឹងថា ដីស្រែរបស់លោកសរុបចំនួន ៦ហិកតារ ប៉ុនែ្តលោកបានធ្វើស្រូវរដូវវស្សាឆ្នាំ២០០៨នោះ បានតែចំនួន២ហិកតារប៉ុណ្ណោះ ដោយសារតែភាពរាំងស្ងួត។
លោក អិត អែល ថ្លែងដូច្នេះថា ៖ «ឆ្នាំនេះ ស្រែច្រើនដែរ ប៉ុន្តែធ្វើអត់ទាន់ ព្រោះវាភ្លៀងចុងដៃហើយ ធ្វើបានតែពីរហិកតារ។ ធៀបនឹងឆ្នាំកន្លងទៅ ឆ្នាំនេះមានការថយចុះ ព្រោះយើងធ្វើចុងដៃហើយ ស្រូវវាអត់សូវល្អ អ៊ីចឹងវាថយចុះជិតពាក់កណ្ដាលពីឆ្នាំមុន»។
លោក យ៉ង់ សាំងកុមារ ជាប្រធានមជ្ឈមណ្ឌលសិក្សានិងអភិវឌ្ឍន៍កសិកម្មកម្ពុជា ហៅកាត់ថា សេដាក់ បានមានប្រសាសន៍ថា ៖ «ស្រូវរដូវវស្សាឆ្នាំ២០០៨នេះ យើងសង្កេតឃើញថា វាប្រហាក់ប្រហែលនឹងឆ្នាំ២០០៧ដែរ ទោះបីជាមានភាពរាំងស្ងួតនៅតំបន់មួយចំនួនក៏ដោយ។ ជារួម ស្ថានភាពវាល្អប្រហាក់ប្រហែលនឹងឆ្នាំទៅ ហើយវាអាចលើសពីឆ្នាំទៅបន្តិចបន្តួច»។
លោកបានឲ្យដឹងថា មជ្ឈមណ្ឌលរបស់លោកបានចាប់ផ្តើមប្រមូលទិញស្រូវពីប្រជាពលរដ្ឋកិនជាអង្ករបានចំនួនជាង ១.០០០តោនហើយ ហើយលោកមានគម្រោងប្រមូលទិញនៅក្នុងឆ្នាំ២០០៩នេះទៀត ក្នុងចំនួន ៤.០០០តោនដើម្បីផ្គត់ផ្គង់ដល់ទីផ្សារក្នុងស្រុកផងនិងនាំចេញទៅបរទេសផង៕