ក្រុម​ស្ត្រី​ទាមទារ​ឱ្យ​មាន​ដំណោះស្រាយ​ដីធ្លី​មួយ​ចំនួន​ប្រឈម​នឹង​វិបត្តិ​ផ្លូវ​ចិត្ត និង​ការ​រើសអើង​ពី​រដ្ឋាភិបាល

ដោយ សុជីវី
2025.01.22
ក្រុម​ស្ត្រី​ទាមទារ​ឱ្យ​មាន​ដំណោះស្រាយ​ដីធ្លី​មួយ​ចំនួន​ប្រឈម​នឹង​វិបត្តិ​ផ្លូវ​ចិត្ត និង​ការ​រើសអើង​ពី​រដ្ឋាភិបាល ពលរដ្ឋ​មាន​ទំនាស់​ដីធ្លី ២៤គ្រួសារ​ នៅ​តំបន់​ភ្នំ១៥០០ នៅក្នុង​ស្រុក​វាលវែង ​ខេត្ត​ពោធិ៍សាត់ ឡើងមកតវ៉ានៅមុខរដ្ឋសភា កាលពីថ្ងៃទី២២ តុលា ២០២៤។
រូប៖ ពលរដ្ឋផ្ដល់ឱ្យ

ក្រុម​ស្ត្រី​រងគ្រោះ​ពី​ការ​រំលោភ​យក​ដីធ្លី និង​ជា​អ្នក​តស៊ូ​មតិ​មួយ​ចំនួន​កំពុង​ប្រឈម​នឹង​បញ្ហា​សម្ពាធ​ផ្លូវចិត្ត និង​ការ​រស់នៅ​ព្រាត់ប្រាស​ពី​ក្រុម​គ្រួសារ បន្ទាប់​ពី​ដីធ្លី​របស់​ពួកគាត់​រង​ការ​រំលោភ​យក​ពី​សំណាក់​អ្នក​មាន​លុយ​មាន​អំណាច និង​ពុំ​ទទួល​បាន​សំណង​សមរម្យ។ ពួកគាត់​អះអាង​ថា កាន់តែ​ឈឺ​ចាប់​ជាង​នេះ​ទៅ​ទៀត​នោះ នៅ​ពេល​ពលរដ្ឋ​រង​គ្រោះ​ដីធ្លី ស្នើសុំ​កិច្ច​អន្តរាគមន៍​ពី​រដ្ឋាភិបាល​ឱ្យ​ដោះស្រាយ​វិវាទ​ដីធ្លី ពួកគាត់​បែរជា​រង​ការ​ចោទ​ប្រកាន់​ពី​តុលាការ​ទៅ​វិញ។

ក្រោយ​ពេល​ដែល​លោក ហ៊ុន ម៉ាណែត ឡើង​កាន់​ដំណែង​ជា​នាយករដ្ឋមន្ត្រី​បន្ត​ពី​ឪពុក​របស់​លោក គឺ​លោក ហ៊ុន សែន រយៈពេល​ជាង ១ឆ្នាំ​មក​នេះ លោក​នៅ​មិន​ទាន់​ធ្វើ​ឱ្យ​ពលរដ្ឋ​រស់នៅ​មាន​សុខ​សន្តិភាព​ដូច​ការ​អះអាង​របស់​លោក​នៅ​ឡើយ ជាពិសេស​ពលរដ្ឋ​រងគ្រោះ​ដីធ្លី​មួយ​ចំនួន​រស់នៅ​ទាំង​ភិតភ័យ និង​រង​ការ​ធ្វើ​ទុក្ខបុកម្នេញ​គ្រប់​រូបភាព​ពី​អាជ្ញាធរ​រដ្ឋ។

ពលរដ្ឋ​មាន​ជម្លោះ​ដីធ្លី​នៅ​សហគមន៍​បឹង​តាមោក ក្នុង​រាជធានី​ភ្នំពេញ លោកស្រី សឿន ស្រីសុត ឱ្យ​វិទ្យុ​អាស៊ីសេរី​ដឹង​ថា សព្វថ្ងៃ​នេះ​លោកស្រី​មាន​ជីវភាព​ខ្វះខាត ដោយសារ​តែ​លោកស្រី​បង្ខំ​ចិត្ត​ទទួល​យក​គោល​នយោបាយ​ដោះដូរ​ដី ទៅ​រស់នៅ​ទីតាំង​ថ្មី ដែល​គ្មាន​កន្លែង​អាស្រ័យផល។ លោកស្រី​រៀបរាប់​ថា អាជ្ញាធរ​ខណ្ឌ​ព្រែកព្នៅ​បាន​ធ្វើ​ទុក្ខបុកម្នេញ​លើ​ពលរដ្ឋ​គ្រប់​រូបភាព ដើម្បី​បណ្ដេញ​ពលរដ្ឋ​ចេញ​ពី​ចេញ​ពី​លំនៅ​ឋាន ដែល​បញ្ហា​នេះ​ធ្វើ​ឱ្យ​ប្ដី​លោកស្រី​មាន​បញ្ហា​ផ្លូវ​ចិត្ត​ធ្ងន់ធ្ងរ។

លោកស្រី សឿន ស្រីសុត៖ «រាល់​ការ​អភិវឌ្ឍន៍​មិន​ថា នៅ​សហគមន៍​បឹង​តាមោក ឬ​ក៏​សហគមន៍​ផ្សេង​ដែល​គាត់​កំពុង​រងគ្រោះ​ទេ​សូម​ឱ្យ​រដ្ឋាភិបាល​គិត​ពី​ជូន​ពលរដ្ឋ​ជា​មុន​សិន សឹម​រដ្ឋាភិបាល​អភិវឌ្ឍន៍​តាម​ក្រោយ។ សូម​ឱ្យ​រាល់​ការអភិវឌ្ឍន៍​សូម​ឱ្យ​គាត់​អញ្ជើញ​ពលរដ្ឋ​ដើម្បី​ចូលរួម​ដោះស្រាយ​ចរចា​គ្នា​រាល់​ការអភិវឌ្ឍន៍​ដែល​ប៉ះពាល់​មក​លើ​ពួកគាត់​ខ្ញុំ»

ជម្លោះ​ដីធ្លី​រ៉ាំរ៉ៃ​របស់​ពលរដ្ឋ​រស់នៅ​បឹង​តាមោក​ប្រមាណ​ជាង ១០០គ្រួសារ កើត​ឡើង​ក្រោយ​ពី​អតីត​នាយក​រដ្ឋមន្ត្រី​លោក ហ៊ុន សែន បាន​កាត់​ឆ្វៀល​ដី​បឹង​ជា​បន្តបន្ទាប់​ឱ្យ​ទៅ​អ្នក​មាន​លុយ​មាន​អំណាច សម្រាប់​យក​ទៅ​ធ្វើ​ជា​អាជីវកម្ម​សាងសង់​បុរី និង​ខុនដូ លក់។ ចំណែក​ឯ ពលរដ្ឋ​ដែល​រស់នៅ​អាស្រ័យផល​លើ​បឹង​តាមោក​តាំង​ពី​ឆ្នាំ​១៩៩៧ មក​ត្រូវ​បាន​អាជ្ញាធរ​ខណ្ឌ​ព្រែកព្នៅ​បណ្ដេញ​ចេញ​ទាំង​បង្ខំ។

បញ្ហា​ទំនាស់​ដីធ្លី​នេះ​មិនមែន​កើត​មាន​តែ​នៅ​ក្នុង​រាជធានី​ភ្នំពេញ​នោះ​ទេ តែ​កើត​មាន​ស្ទើរតែ​គ្រប់​ខេត្ត​ក្រុង​នៅ​ទូទាំង​ប្រទេស ក្រោម​រូបភាព​រដ្ឋាភិបាល​ផ្ដល់​ដី​សម្បទាន​សេដ្ឋកិច្ច​ឱ្យ​ទៅ​ក្រុមហ៊ុន​ឯកជន និង​កាត់​ឆ្វៀល​ដី​ព្រៃ ឬ​ដី​នៅ​តំបន់​បឹង​ធម្មជាតិ​ឱ្យ​ទៅ​ក្រុម​ឧកញ៉ា និង​អ្នក​មាន​លុយ​មាន​អំណាច​យក​ទៅ​ធ្វើ​កម្មសិទ្ធិ​ឯកជន ដែល​បញ្ហា​នេះ​ធ្វើ​ឱ្យ​ប៉ះពាល់​ដល់​ជីវភាព​ពលរដ្ឋ និង​ដី​ព្រៃ​ជំនឿ​របស់​សហគមន៍​ជនជាតិ​ដើម​ភាគ​តិច។ បើ​ទោះ​បី​ជា​ការ​ផ្ដល់​ដី​សម្បទាន​ទាំងនេះ​ប៉ះពាល់​ដល់​ការ​រស់នៅ​របស់​ពលរដ្ឋ​ក្ដី ក៏​រដ្ឋាភិបាល​មិន​បាន​យក​ចិត្ត​ទុក​ដាក់​ដោះស្រាយ​ឱ្យ​មាន​តម្លាភាព​នោះ​ដែរ។ ផ្ទុយ​ទៅ​វិញ​ពលរដ្ឋ​ដែល​រងគ្រោះ​ពី​ការ​រំលោភ​ដីធ្លី បែរជា​រង​ការ​ធ្វើ​ទុក្ខបុកម្នេញ ការ​បង្ក្រាប​ដោយ​ហិង្សា ការ​ចោទ​ប្រកាន់​តាម​ផ្លូវ​តុលាការ និង​ចាប់​តំណាង​ពលរដ្ឋ​ដាក់​ពន្ធនាការ ដោយសារតែ​ពួកគាត់​ឡើង​មក​ដាក់​ញត្តិ​ដើម្បី​សុំ​កិច្ច​អន្តរាគមន៍​ពី​នាយករដ្ឋមន្ត្រី។

តំណាង​សហគមន៍​ដីធ្លី១៩៧ គ្រួសារ​នៅ​ខេត្ត​កោះកុង​ដែល​ធ្លាប់​ជាប់​ពន្ធនាគារ​រយៈពេល​២ខែ ដោយសារ​ការ​ព្យាយាម​ឡើង​មក​ដាក់​ញត្តិ​នៅ​ភ្នំពេញ​លោកស្រី ដេត ហ៊ួរ ថ្លែង​ថា លោកស្រី​នៅ​តែ​ឈឺចាប់​ពេល​រំលឹក​ដល់​រឿង​អាជ្ញាធរ​ចាប់​លោកស្រី​ដាក់​ពន្ធនាគារ​ទាំង​គ្មាន​កំហុស។ លោកស្រី​បន្ត​ថា ដោយសារតែ​អាជ្ញាធរ​ចាប់​លោកស្រី​ដាក់​ពន្ធនាគារ បាន​ធ្វើ​ឱ្យ​កូនៗ​របស់​លោកស្រី​បោះបង់​ការ​សិក្សា​នៅ​ត្រឹម​ថ្នាក់ទី១២ ហើយ​គ្រួសារ​លោកស្រី​ក៏​ប្រឈម​នឹង​អំពើ​ហិង្សា​ក្នុង​គ្រួសារ​ផង​ដែរ។

លោកស្រី ដេត ហ៊ួរ៖ «ពួកខ្ញុំ​ធ្លាក់​ខ្លួន​ក្រីក្រ​មែនទែន ហើយ​ពួក​គាត់​ខ្លះ​ទៀត​ឈឺ ខ្លះ​ទៀត​ជា​កូនៗ​របស់​សកម្មជន​តវ៉ា​ដីធ្លី​ដោយសារតែ​យើង​រវល់​ទាមទារ​តវ៉ា​ដាក់​ញត្តិ ការ​តស៊ូ​មតិ ធ្វើ​ឱ្យ​ក្មេងៗ​បោះបង់​ការ​សិក្សា។ ដូច​កូន​ខ្ញុំ​ជាក់ស្ដែង​ឆ្នាំ២០២៣​ពេល​ដែល​ខ្ញុំ​ជាប់​ពន្ធនាគារ គឺ​គាត់​បាក់​ទឹកចិត្ត​គាត់​ប្រឡង​ធ្លាក់​រហូត​មក​ដល់​ពេល​ចុង​ឆ្នាំ​នេះ​គាត់​បោះបង់​ការ​សិក្សា​ដោយសារ​គាត់​ប្រឡង​អត់​ជាប់ ដោយសារតែ​គាត់​បាក់​ទឹកចិត្ត»

ចំណែក​ឯ ពលរដ្ឋ​រងគ្រោះ​ដីធ្លី​នៅ​ខេត្ត​ក្រចេះ​លោកស្រី អែល រ៉ូស្សា ឱ្យ​ដឹង​ថា ដី​ស្រែចម្ការ​របស់​លោកស្រី​ចំនួន​៣​ហិកតារ​ត្រូវ​បាន​ក្រុមហ៊ុន​វៀតណាម​ឈ្មោះ កាម៉ាដេនូ វេនឈ័រ (Kamdhenu Ventures) និង​ក្រុមហ៊ុន​កសិកម្ម​យុវជន​ស្វាយរៀង​សហការ​គ្នា​រំលោភ​យក​ធ្វើ​ជា​កម្មសិទ្ធិ​ឯកជន។ ស្ត្រី​មេម៉ាយ​រូប​នេះ​បន្ត​ថា បច្ចុប្បន្ន​លោកស្រី​រស់នៅ​ពឹងផ្អែក​លើ​ដីស្រែ​ចម្ការ​សម្រាប់​បង្កបង្កើន​ផល​ចិញ្ចឹម​ជីវិត ហើយ​ប្រសិនបើ​អាជ្ញាធរ​នៅតែ​អូស​បន្លាយ​វិវាទ​ដីធ្លី មិន​ព្រម​ដោះស្រាយ​នោះ​អាជ្ញាធរ​មិន​ខុស​អ្វី​ពី​បំផ្លាញ​ឆ្នាំង​បាយ​ពលរដ្ឋ​ទេ។

លោកស្រី អែល រ៉ូស្សា៖ «រាល់ថ្ងៃ​រស់នៅ​មាន​ទុក្ខ​លំបាក​ហើយ​រស់នៅ​ដូច​វេទនា​អត់​មាន​ក្តី​សុខ​ទាំង​ផ្លូវចិត្ត​ទាំង​ផ្លូវ​កាយ​វា​អត់​មាន​ក្តី​សុខ​សោះ ការ​ហូប​ចុក​ខ្វះខាត។ ការ​ហូប​ចុក​ខ្វះខាត​ហើយ​ស្រាប់តែ​អាជ្ញាធរ​អត់​មាន​មើល​ពលរដ្ឋ​ថា នៅ​លើ​ដី​ស្រែចម្ការ​អត់​គាត់​អត់​មាន​គិត មិន​គាត់​គិត​ពី​អី​ខ្ញុំ​មិន​យល់»

ក្រុម​សកម្មជន​ដីធ្លី​ភាគ​ច្រើន​ជា​ស្ត្រី ក្រៅ​ពី​ពួក​គាត់​បាត់បង់​ដីធ្លី​សម្រាប់​អាស្រ័យផល និង​គ្មាន​ប្រាក់​ចំណូល​ដើម្បី​ផ្គត់ផ្គង់​ជីវភាព​ហើយ​នោះ ពួកគាត់​ក៏​រង​នូវ​ការ​ចោទ​ប្រកាន់​តាម​ផ្លូវ​តុលាការ​ពី​សំណាក់​អាជ្ញាធរ ការ​តាម​ឃ្លាំ​មើល ការ​បំភិត​បំភ័យ​ក្រុម​គ្រួសារ និង​លាប​ពណ៌​ស្ត្រី​ទាំង​នោះ​ថា ជា​ក្រុម​ស៊ីឈ្នួល​ធ្វើ​បដិវត្តន៍​ពណ៌​ជាដើម។ ជាក់ស្ដែង​តំណាង​សហគមន៍​មាន​ជម្លោះ​ដីធ្លី​នៅ​ខេត្ត​កោះកុង​ចំនួន​១២នាក់ រួមមាន​លោកស្រី ដេត ហួរ លោកស្រី ផាវ ញ៉ើង និង​អ្នក​មួយ​ចំនួន​ទៀត​រង​ការ​បទ​ចោទ​ពី«ញុះញង់​ឱ្យ​ប្រព្រឹត្ត​អំពើ​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» ដោយសារ​ការ​ស្វែង​រក​កិច្ច​អន្តរាគមន៍​ពី​ស្ថាប័ន​ពាក់ព័ន្ធ​នៅ​រាជធានី​ភ្នំពេញ ឱ្យ​ជួយ​ដោះ​ស្រាយ​រឿង​វិវាទ​ដីធ្លី​ជាមួយ​ក្រុមហ៊ុន​ឧកញ៉ា លី យ៉ុងផាត់ និង​ឧកញ៉ា ហេង ហ៊ុយ។

លើស​ពី​នេះ នៅ​មាន​សកម្មជន​ដីធ្លី​ជា​ច្រើន​នាក់​ទៀត​ត្រូវ​រស់នៅ​ព្រាត់ប្រាស​ពី​ក្រុម​គ្រួសារ​តាមរយៈ​ការ​ចាប់​ដាក់​ពន្ធនាគារ និង​ស្ត្រី​ខ្លះ​បាន​ក្លាយ​ជា​ស្ត្រី​មេ​ម៉ាយ ហើយ​ស្ត្រី​ខ្លះ​ទៀត​មាន​បញ្ហា​ប៉ះ​ទង្គិច​ផ្លូវ​ចិត្ត​ដោយសារតែ អាជ្ញាធរ​រារាំង និង​បង្ក្រាប​ដោយ​ហិង្សា​ដោយសារ​ការ​ទាមទារ​ឱ្យ​មាន​ដំណោះស្រាយ​ដីធ្លី។

វិទ្យុ​អាស៊ីសេរី​មិន​អាច​ទាក់ទង អ្នកនាំ​ពាក្យ​ក្រសួង​រៀបចំ​ដែនដី នគរូបនីយកម្ម និង​សំណង់ លោក សេង ឡូត និង​អ្នក​នាំ​ពាក្យ​ក្រសួង​កិច្ចការ​នារី អ្នកស្រី ស ស៊ីណែត ដើម្បី​សុំ​ការ​បកស្រាយ​ជុំវិញ​រឿង​នេះ​បាន​ទេ​នៅ​ថ្ងៃ​ទី២១ ខែ​មករា។

ជុំវិញ​រឿង​នេះ អនុប្រធាន​ផ្នែក​សិទ្ធិ​មនុស្ស​ដីធ្លី ធនធាន​ធម្មជាតិ​នៃ​សមាគម​ការពារ​សិទ្ធិ​មនុស្ស​អាដហុក លោក យិន ម៉េងលី មាន​ប្រសាសន៍​ថា ការ​អូស​បន្លាយ​មិន​ដោះស្រាយ​បញ្ហា​វិវាទ​ដីធ្លី​មិន​ត្រឹមតែ ប៉ះពាល់​ជីវភាព​គ្រួសារ​របស់​ពួកគាត់​តែ​ប៉ុណ្ណោះ​ទេ ប៉ុន្តែ​ជា​ការ​រំលោភ​លើ​សិទ្ធិ​រស់​រៀន​របស់​កុមារ​តូចៗ​ផង​ដែរ។ លោក​បន្ត​ថា រដ្ឋាភិបាល និង​មន្ត្រី​ពាក់ព័ន្ធ​គួរតែ​ធ្វើ​ការ​វាយតម្លៃ​ពី​ផល​ប៉ះពាល់​ឱ្យ​បាន​ច្បាស់លាស់ មុន​នឹង​រដ្ឋាភិបាល​ផ្ដល់​ដី​សម្បទាន​សេដ្ឋកិច្ច​ឱ្យ​ទៅ​ក្រុមហ៊ុន​ឯកជន ពីព្រោះ​ក្រុមហ៊ុន​ឯកជន​បាន​ទៅ​ឈូស​ឆាយ​លើ​ដី​ស្រែចម្ការ និង​ដី​លំនៅឋាន​ដែល​ជា​ជីវិត​របស់​ពលរដ្ឋ។

លោក យិន ម៉េងលី៖ «ប្ដឹងផ្ដល់​គ្នា​ទៅ​តុលាការ​រហូត​ធ្វើ​ឱ្យ​ប្រជាពលរដ្ឋ​ដែល​ជា​អ្នក​ការពារ​ព្រៃ​សហគមន៍​ពេល​ខ្លះ​ប្រឈម​នឹង​ផ្លូវ​តុលាការ​ទៅ​វិញ ហ្នឹង​ពេល​ខ្លះ​ការ​ដោះស្រាយ​យើង​ដោះ​អត់​ចំ​បញ្ហា​ទេ។ ដូចជា​បញ្ហា​ការ​ដក​ហូត​ដី​ជា​សាធារណៈ​របស់​រដ្ឋ​អី​ហ្នឹង​មាន ស..ណ មាន​អនុក្រឹត្យ​របស់​រដ្ឋាភិបាល​ដូច​នៅ​ខេត្ត​ពោធិ៍សាត់​អាច​ធ្វើ​ឱ្យ​ពលរដ្ឋ​ប្រឈម​នឹង​ជាប់​គុក​អ៊ីចឹង​ទៅ មាន​អ្នក​ខ្លះ​ត្រៀម​រត់​គេច​ខ្លួន​អ៊ីចឹង​ទៅ»
របាយការណ៍​របស់​សមាគម​ការពារ​សិទ្ធិ​មនុស្ស​អាដហុក (Adhoc) ចេញ​ផ្សាយ​កាល​ពី​ឆ្នាំ​២០២៣ រក​ឃើញ​ថា ពលរដ្ឋ​រងគ្រោះ​ដីធ្លី​នៅ​តែ​បន្ត​កើត​មាន​ឡើង​ឥត​ឈប់ឈរ​ក្នុង​នោះ​ប្រហែល​ពាក់កណ្ដាល កើតឡើង​ដោយសារ​ការ​រំលោភ​ដោយ​បុគ្គល​មាន​លុយ​មាន​អំណាច ហើយ​វិវាទ​ដីធ្លី​មួយ​ចំនួន​នៅ​តែ​បន្ត​អូស​បន្លាយ​រហូត​ដល់​ពេល​បច្ចុប្បន្ន​នៅ​មិន​ទាន់​មាន​ដំណោះស្រាយ។

ក្រុម​ស្ត្រី​រងគ្រោះ និង​មន្ត្រី​អង្គការ​សង្គម​ស៊ីវិល ស្នើ​ឱ្យ​លោកនាយក​រដ្ឋមន្ត្រី ហ៊ុន ម៉ាណែត ជួយ​ដោះស្រាយ​វិវាទ​ដីធ្លី​រ៉ាំរ៉ៃ​ដែល​រង​ការ​រំលោភ​យក​ពី​អ្នក​មាន​លុយ​មាន​អំណាច និង​ជួយ​ការពារ​ស្ត្រី​គ្រប់រូប​ពី​ការ​រំលោភបំពាន​ផ្សេងៗ។ ពួកគាត់​បារម្ភ​ថា ប្រសិនបើ​គ្មាន​ដី​ស្រែចម្ការ​ដើម្បី​អាស្រ័យ​ផល​ទេ នោះ​កូនៗ​របស់​ពួកគាត់​នឹង​បាត់បង់​អនាគត​ដោយសារ​ឪពុកម្ដាយ​គ្មាន​លទ្ធភាព​បញ្ជូន​កូនៗ​ទៅ​សាលារៀន ហើយ​ពួកគាត់​ប្រឈម​នឹង​ជំពាក់​បំណុល​ធនាគារ​វ័ណ្ឌក៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។