ពលរដ្ឋខេត្តកំពង់ស្ពឺស្នើឱ្យអាជ្ញាធរកាយដីចេញពីបឹងអូរតោងដោយអ្នកមានអំណាចចាក់លុប
2023.08.18
អភិបាលខេត្តកំពង់ស្ពឺ លោក វុី សំណាង។
រូប៖ រដ្ឋបាលខេត្តកំពង់ស្ពឺ
បឹងធម្មជាតិអូរតោង ដែលជាអាងស្តុកទឹកយ៉ាងសំខាន់ដែលពលរដ្ឋចំនួន ២ឃុំ រស់នៅខេត្តកំពង់ស្ពឺប្រើប្រាស់ប្រចាំថ្ងៃ កំពុងប្រឈមការរំលោភបំពាន ដោយបុគ្គលមានលុយមានអំណាច។ ពលរដ្ឋទាមទារឱ្យអាជ្ញាធរខេត្តកាយដីដែលចាក់លុបបឹងនេះឱ្យដូចដើម ដើម្បីរក្សាទម្រង់បរិស្ថានធម្មជាតិឱ្យស្រស់បំព្រងឡើងវិញ។
បឹងធម្មជាតិអូរតោង ឋិតក្នុងឃុំត្រពាំងជោ ស្រុកឱរ៉ាល់ និងឃុំអមលាំង ស្រុកថ្ពង ខេត្តកំពង់ស្ពឺ បានក្លាយជាដីគោករាក់មួយផ្នែកធំ ដោយសារបុគ្គលមានអំណាច បានចាក់ដីលយចូលផ្ទៃទឹកចន្លោះពី៦០ ម៉ែត្រដល់ ជិត ១០០ម៉ែត្រ និងបណ្ដោយជាង ១០០ម៉ែត្រ។ សកម្មភាពចាក់ដីលុបផ្នែកខ្លះនៃបឹងនេះ ធ្វើឡើងកាលពីខែកក្កដាកន្លងទៅ មុនការបោះឆ្នោតជាតិ រហូតមកទល់ពេលនេះ អាជ្ញាធរមិនទាន់មានវិធានការច្បាប់លើជនប្រព្រឹត្តនៅឡើយទេ។
ពលរដ្ឋរស់រស់នៅឃុំត្រពាំងជោ លោក នៅ ណែម ប្រាប់វិទ្យុអាស៊ីសេរី នៅថ្ងៃទី១៧ សីហាថា ពលរដ្ឋរាប់ពាន់គ្រួសារបានប្រើប្រាស់ទឹកបឹងនេះប្រចាំថ្ងៃ ដោយពលរដ្ឋខ្លះទៀត ទទួលទាន និងដាំស្ល ជាដើម។ លោកបន្ថែមថា ជនប្រព្រឹត្តដែលចាក់ដីរំលោភយកផ្ទៃបឹងនេះ គឺជាមន្ត្រីយោធាម្នាក់ ក៏ប៉ុន្តែអ្នកភូមិមិនស្គាល់ឈ្មោះនិងមិនដឹងថា តើបុគ្គលនោះធ្វើការនៅអង្គភាពណាទេ?
លោក នៅ ណែម៖ «វាប៉ះពាល់ដល់វិស័យទេសចរគេមកលេងចាក់ដីមើលទៅបឹងរាងតូច លុបមាត់ទំនប់អូរតោងបាត់ហើយ។ គាត់ធ្វើពាណិជ្ជកម្ម និងផ្ទះបង្គន់ក្បែរៗហ្នឹង វាប៉ះពាល់ផ្ទះក្បែរៗហ្នឹង បើកាយចេញវាស្អាតស្អំឡើងវិញ វាមិនប៉ះពាល់ដល់ពលរដ្ឋក្នុងភូមិ មួយឃុំត្រពាំងជោរប្រើប្រាស់ទឹកហ្នឹងទាំងអស់ប៉ះពាល់»។
បឹងអូរតោង ក៏ជាអាងស្តុកទឹកយ៉ាងសំខាន់ ដែលពលរដ្ឋជាង ១០ភូមិ រស់នៅក្នុងឃុំត្រពាំងជោ និងឃុំអមលាំង ប្រើប្រាស់ ដែលឋិតក្នុងដែនជម្រកសត្វព្រៃភ្នំឱរ៉ាល់។ បឹងនេះមានទំហំរាប់រយហិកតារប្រជុំភ្នំខ្ពង់រាប ព័ទ្ធជុំវិញរំលេចទេសភាពស្រស់បំព្រង ដោយមានប្រភពទឹកហូរចេញពីល្អាងភ្នំ ខួបប្រាំង និងវស្សា អំណោយផលដល់វិស័យទេសចរ ការធ្វើកសិកម្ម និងនេសាទត្រីជាដើម ជាពិសេសកន្លែងត្រីមេពូជពងកូន។
វិទ្យុអាស៊ីសេរីមិនទាន់អាចទាក់ទងសុំការអធិប្បាយរឿងនេះ ពីអភិបាលខេត្តកំពង់ស្ពឺ លោក វ៉ី សំណាង បាននៅឡើយទេ នៅថ្ងៃទី ១៧ សីហា ដោយទូរស័ព្ទហៅចូលតែគ្មានអ្នកលើក។
មេឃុំត្រពាំងជោ លោក ទេព ណែម ទទួលស្គាល់ថា ពិតជាមានការចាក់ដីលុបបឹងនេះ ក៏ប៉ុន្តែពេលនេះលោកថា បានផ្អាកហើយ។
លោក ទេព ណែម៖ «មានអីគេឈប់ចាក់យូរហើយតើ បើចង់ច្បាស់ប្អូនសួរទៅមេភូមិ»។
ទាក់ទងរឿងនេះ សកម្មជនការពារបរិស្ថាន បានចាត់ទុកទង្វើនេះជាគំរូអាក្រក់មួយ ឆ្លុះបញ្ចាំងពីការអនុវត្តច្បាប់ធូររលុង និងអសមត្ថភាព ការពារសម្បត្តិជាតិរបស់អាជ្ញាធរមូលដ្ឋាន។
សកម្មជនការពារបរិស្ថាន ខេត្តកំពង់ស្ពឺ លោក លីង សារ៉ុម សង្កេតឃើញថា ការចាក់ដីបឹងនេះឱ្យគោករាក់ ទំនងជាអ្នកចាក់នោះចង់សង់ផ្ទះលម្ហែ និងសំណង់អគារ ដើម្បីរស់នៅអចិន្ត្រៃយ៍ជាប់ផ្ទៃបឹងនោះ ប៉ះពាល់ខ្លាំងដល់បរិស្ថាន និងគុណភាពទឹក។ លោកថា នៅគ្រាដែលផ្ទះឯកជន និងសំណង់អាគារ សង់លយចូលផ្ទៃទឹក ទឹកកខ្វក់ដែលហូរចេញពីអគារ នឹងធ្វើឱ្យប៉ះពាល់ដល់បរិស្ថាន និងគុណភាពទឹកបឹងទាំងមូល។
លោក លីង សារ៉ុម៖ «វាធ្វើឱ្យប៉ះពាល់ទឹកពលរដ្ឋប្រើប្រាស់ប៉ុន្មានភូមិនៅម្តុំហ្នឹង ស្រោចដំណាំ ពលរដ្ឋភាគច្រើនហូបទឹកហ្នឹងទៀត។ ខ្ញុំសូមសំណូមពរឱ្យអភិបាលខេត្តចុះទៅមើល និងកាយដីឡើងវិញ ព្រោះដីជាដីសាធារណៈរបស់រដ្ឋមិនអាចបុគ្គលណាយកទៅប្រើប្រាស់បានទេ»។
ជុំវិញរឿងនេះ ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ លោក ជា ហ៊ាន ដែលចុះអង្កេតរឿងនេះ ពន្យល់ថា ការចាក់ដីលុបបឹងនេះ គឺជាទង្វើល្មើសច្បាប់ ហើយលោកនឹងសរសេរលិខិតស្នើឱ្យស្ថាប័នពាក់ព័ន្ធបំភ្លឺរឿងនេះ៖ «កាលណាចាក់ដីមានគោលបំណងធ្វើផ្ទះ និងបើកហាងអី ហើយបើសិនបើក គឺប៉ះពាល់ហើយ ពលរដ្ឋរស់នៅក្បែរៗហ្នឹង ដែលប្រើប្រាស់ទឹកមិនសុខចិត្តទេ នឹងប្តឹងផ្តល់ដែរ។ គាត់មានការប្តឹងផ្តល់ដែរ។ សប្តាហ៍ក្រោយខ្ញុំដាក់លិខិតទៅមន្ទីរ បើអត់មានចំណាត់ការ គឺខ្ញុំបន្តទៅក្រសួងធនធានទឹកទៀត»។
ច្បាប់ភូមិបាលឆ្នាំ២០០១ មាត្រា ២៥៩ និងមាត្រា ២៦១ ចែងថា ការប៉ះពាល់កម្មសិទ្ធិនៃទ្រព្យសម្បត្តិសាធារណៈរបស់រដ្ឋត្រូវផ្ដន្ទាទោសពិន័យជាប្រាក់ពី ៥លានរៀល (៥.០០០.០០០) ដល់៥០លានរៀល (៥០.០០០.០០០) និងផ្ដន្ទាទោសដាក់ពន្ធនាគារពី ១ឆ្នាំ ដល់ ៥ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
- លោក សម រង្ស៊ី អំពាវនាវឱ្យកងកម្លាំងប្រដាប់អាវុធ និងអ្នកនយោបាយរួមគ្នាផ្លាស់ប្ដូររបបត្រកូល ហ៊ុន