ព្រឹទ្ធ​សភា​អនុម័ត​សេចក្ដី​ព្រាង​ច្បាប់​សហជីព​ដោយ​គ្មាន​សំឡេង​គាំទ្រ​ពី​បក្ស​ប្រឆាំង

ដោយ ប្រាជ្ញ ចេវ
2016-04-12
អ៊ីម៉ែល
មតិ
Share
បោះពុម្ព
លោក ម៉ម ប៊ុននាង សមាជិក​ព្រឹទ្ធសភា​គណបក្ស​ប្រជាជន​កម្ពុជា និង​ជា​អ្នកនាំពាក្យ​ព្រឹទ្ធសភា ថ្លែង​បន្ទាប់​ប្រជុំ​ទាក់ទង​នឹង​សេចក្ដី​ព្រាងច្បាប់​សហជីព នា​វិមាន​ព្រឹទ្ធសភា នៅ​ថ្ងៃ​ទី​១២ ខែ​មេសា ឆ្នាំ​២០១៦។ RFA/Brach Chev
លោក ម៉ម ប៊ុននាង សមាជិក​ព្រឹទ្ធសភា​គណបក្ស​ប្រជាជន​កម្ពុជា និង​ជា​អ្នកនាំពាក្យ​ព្រឹទ្ធសភា ថ្លែង​បន្ទាប់​ប្រជុំ​ទាក់ទង​នឹង​សេចក្ដី​ព្រាងច្បាប់​សហជីព នា​វិមាន​ព្រឹទ្ធសភា នៅ​ថ្ងៃ​ទី​១២ ខែ​មេសា ឆ្នាំ​២០១៦។ RFA/Brach Chev
RFA/Brach Chev

ព្រឹទ្ធ​សភា​អនុម័ត​សេចក្ដី​ព្រាង​ច្បាប់​សហជីព ដោយ​សំឡេង​គាំទ្រ ៤០ លើ ៤៦ ដោយ​គ្មាន​ការ​គាំទ្រ​ពី​សមាជិក​ព្រឹទ្ធ​សភា​របស់​គណបក្ស សម រង្ស៊ី ដែល​ចូលរួម​ប្រជុំ​នោះ​ទេ។ សមាជិក​ព្រឹទ្ធសភា​គណបក្ស សម រង្ស៊ី ស្នើ​ឲ្យ​ស្ថាប័ន​កំពូល​នីតិប្បញ្ញត្តិ​នេះ បញ្ជូន​សេចក្ដី​ព្រាង​ច្បាប់​ទៅ​រដ្ឋសភា​អោយ​ពិនិត្យ​កែប្រែ​ខ្លឹមសារ​ឡើង​វិញ​ឲ្យ​បាន​យ៉ាង​តិច ៥០​ភាគរយ។

សេចក្ដី​ព្រាង​ច្បាប់​សហជីព​ដែល​បញ្ជូន​ដល់​ដៃ​ព្រឹទ្ធសភា​អនុម័ត​ពេល​នេះ ព្រឹទ្ធសភា​មិន​បាន​កែប្រែ​ចំណុច​ណា​មួយ​នោះ​ទេ ទោះ​មាន​សំណើ​ពី​សមាជិក​ព្រឹទ្ធសភា គណបក្ស សម រង្ស៊ី ក្ដី។ កិច្ចប្រជុំ​ដែល​ចំណាយ​ពេល​ជាង ២​ម៉ោង នៅ​ថ្ងៃ​ទី​១២ ខែ​មេសា ក្នុង​ពេល​ជជែក​សួរ​ដេញដោល​នោះ មាន​សមាជិក​ព្រឹទ្ធ​សភា​គណបក្ស សម រង្ស៊ី តែ​ម្នាក់​ទេ គឺ​លោក យូ ស៊ាងហេង មាន​ឱកាស​បញ្ចេញ​មតិ​ចោទ​សួរ និង​ដាក់​សំណើ។

ក្រៅ​ពី​នេះ សមាជិក​ព្រឹទ្ធសភា​មកពី​គណបក្ស​ប្រជាជន​កម្ពុជា សឹងតែ​ទាំង​អស់ បាន​យក​វេទិកា​នោះ​វាយប្រហារ​ទៅ​លើ​ការ​បញ្ចេញ​មតិ​របស់​សមាជិក​ព្រឹទ្ធសភា​បក្ស​ប្រឆាំង និង​ថ្លែង​ការពារ​សេចក្ដី​ព្រាង​ច្បាប់​សហជីព។

​អ្នកនាំពាក្យ​ព្រឹទ្ធ​សភា លោក ម៉ម ប៊ុននាង ថ្លែង​ក្រោយ​កិច្ច​ប្រជុំ​អនុម័ត​ថា ការ​ស្នើ​របស់​សមាជិក​ព្រឹទ្ធសភា គណបក្ស សម រង្ស៊ី ស្នើ​ឲ្យ​បញ្ជូន​សេចក្ដី​ព្រាង​ច្បាប់​ទៅ​រដ្ឋសភា​ពិនិត្យ​ឡើង​វិញ​ថា គ្មាន​មូលដ្ឋាន​ត្រឹមត្រូវ​ទេ។ លោក​ថា សេចក្ដី​ព្រាង​នេះ ការពារ​ទាំង​កម្មករ និង​អ្នក​វិនិយោគ«ខ្ញុំ​សន្និដ្ឋាន​ថា នេះ​ជា​ចរិត​របស់​អ្នក​ប្រឆាំង គឺ​ថា​ធ្វើ​ម៉េច​ឲ្យ​តែ​ប្រឆាំង បើ​យើង​គិត​ពី​ទម្រង់​ច្បាប់ គឺ​ត្រឹមត្រូវ​ស្រប​ច្បាប់​ទាំងអស់»

កិច្ច​ប្រជុំ​នោះ​ដែរ មាន​ការ​ចូលរួម​ពី​តំណាង​រាជរដ្ឋាភិបាល គឺ​រដ្ឋមន្ត្រី​ក្រសួង​ការងារ លោក អ៊ិត សំហេង និង​តំណាង​ក្រសួង​យុត្តិធម៌ មក​ថ្លែង​ការពារ​នៅ​វិមាន​ព្រឹទ្ធសភា។ សេចក្ដី​ព្រាង​ច្បាប់​ដែល​មាន ១៧​ជំពូក និង ១០០​មាត្រា ត្រូវ​បាន​រដ្ឋសភា​អនុម័ត​កាល​ពី​ថ្ងៃ​ទី​៤ ខែ​មេសា។

សមាជិក​ព្រឹទ្ធសភា​មក​ពី​គណបក្ស សម រង្ស៊ី លោក យូ ស៊ាងហេង លើក​ឡើង​ថា សេចក្ដី​ព្រាង​ច្បាប់​រឹតត្បិត​សិទ្ធិ​ធ្វើ​បាតុកម្ម កូដកម្ម​របស់​កម្មករ បង្ក​ការ​លំបាក​ដល់​ការ​បង្កើត​សហជីព និង​បើកដៃ​ឲ្យ​រដ្ឋាភិបាល​ជ្រៀតជ្រែក​ផ្នែក​ហិរញ្ញវត្ថុ​របស់​សហជីព។ លោក​ស្នើ​ឲ្យ​មាន​ការ​កែសម្រួល​សេចក្ដី​ព្រាង​ច្បាប់​នេះ​ឡើង​វិញ«សរុប​ជា​រួម​មក គឺ​ច្បាប់​នេះ​នៅ​សល់​មាន​ប្រហោង​ច្រើន ហើយ​ភាគី​សហជីព​ដែល​ចូលរួម​ក្នុង​សិក្ខាសាលា មិន​បាន​ដែល​បញ្ចេញ​មតិ​មិន​បាន​ដាក់​បញ្ចូល​ទេ។ ដូច្នេះ ខ្ញុំ​សុំ​ឲ្យ​អង្គ​ព្រឹទ្ធសភា បញ្ជូន​សេចក្តី​ព្រាង​ច្បាប់​នេះ​ទៅ​រដ្ឋសភា​វិញ»

​គណបក្ស​ប្រឆាំង សង្គម​ស៊ីវិល សហជីព សមាជិក​សភា​អាស៊ាន និង​សហគមន៍​អន្តរជាតិ តែង​បញ្ចេញ​ប្រតិកម្ម​មិន​ពេញ​ចិត្ត​ចំពោះ​សេចក្ដី​ព្រាង​ច្បាប់​នេះ។

កាលពី​ថ្ងៃ​ទី​៥ ខែ​មេសា ក្រុម​សមាជិកសភា​អាស៊ាន ផ្នែក​សិទ្ធិមនុស្ស ស្នើ​អោយ​ព្រឹទ្ធ​សភា​បដិសេធ​ច្បាប់​នេះ ហើយ​បញ្ជូន​ត្រឡប់​ទៅ​ឲ្យ​ស្ថាប័ន​ជំនាញ​ពិនិត្យ​ឡើង​វិញ ដោយសារ​តែ​ពួកគេ​យល់​ថា សេចក្ដី​ព្រាង​ច្បាប់​នេះ​ពុំ​បាន​ឆ្លង​ការ​ពិគ្រោះ​យោបល់​គ្រប់គ្រាន់ និង​បំពេញ​បាន​ត្រឹមត្រូវ​តាម​បទដ្ឋាន​ច្បាប់​អន្តរជាតិ ប៉ុន្តែ​មិន​ទទួល​បាន​ការ​ឆ្លើយ​តប​ទេ។

ចំណែក​រដ្ឋមន្ត្រី​ក្រសួង​ការងារ លោក អ៊ិត សំហេង ឡើង​ថ្លែង​ប្រាប់​អង្គប្រជុំ ក្រោយ​ព្រឹទ្ធសភា​អនុម័ត​សេចក្ដី​ព្រាង​ច្បាប់​ថា សេចក្ដី​ព្រាង​ច្បាប់​នេះ មិន​ជ្រៀតជ្រែក​ហិរញ្ញវត្ថុ​សហជីព​ទេ ប៉ុន្តែ​ក្រសួង​ត្រូវ​ដឹង​ពី​ប្រភព​ចំណូល​របស់​សហជីព។ ទាក់ទង​ការ​ធ្វើ​កូដកម្ម ឬ​បាតុកម្ម  លោក​ថា នេះ​ជា​វិធី​ចុង​ក្រោយ​ដែល​កម្មករ​ចង់​បាន​យុត្តិធម៌ ប៉ុន្តែ​មិន​មែន​គ្រាន់តែ​មនុស្ស​ពីរ​បី​នាក់​មក​ធ្វើ​បាតុកម្ម​រំខាន ឬ​បំពាន​ទៅ​កម្មករ​ផ្សេង​ដែល​គេ​មិន​ដឹង​អី​នោះ​ទេ«មិន​ដូច​អ្នក​នយោបាយ​ខ្លះ​ថា យើង​ខ្លាច​បាតុកម្ម​នោះ​ទេ សំខាន់​ឲ្យ​តែ​យើង​ធ្វើ​តាម​នីតិវិធី ប៉ុន្តែ​ផ្ទុយ​ទៅ​វិញ សិទ្ធិ​នេះ​ត្រូវ​បំពាន និង​អនុវត្ត​មិន​បាន​ត្រឹមត្រូវ»

អ្នក​នាំ​ពាក្យ​ព្រឹទ្ធសភា លោក ម៉ម ប៊ុននាង  ឲ្យ​ដឹង​ថា បន្ទាប់​ពី​ព្រឹទ្ធសភា​អនុម័ត​សេចក្ដី​ព្រាង​ច្បាប់​សហជីព​រួច​ហើយ ព្រឹទ្ធសភា​នឹង​បញ្ជូន​ទៅ​ក្រុមប្រឹក្សា​ធម្មនុញ្ញ​ពិនិត្យ​មើល បន្ទាប់​មក​ទៀត នឹង​ថ្វាយ​ព្រះមហាក្សត្រ​ដើម្បី​ឡាយព្រះហស្តលេខា។ រដ្ឋមន្ត្រី​ក្រសួង​ការងារ​អះអាង​ថា នៅ​ពេល​ច្បាប់​នេះ​ចូល​ជា​ធរមាន លោក​នឹង​អនុវត្ត​ឲ្យ​បាន​លឿន និង​ឲ្យ​មាន​ប្រសិទ្ធភាព៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (3)
Share

អ្នក​អាន​អនាមិក

តាមសង្កេតមើលទៅ មន្ត្រី CPP បក្សប្រជាជនកំណើតយួន ក្លាយជា មនុស្សយន្ត ទាំងអស់ ។

Apr 12, 2016 02:36 AM

អ្នក​អាន​អនាមិក

>. ម៉ម ប៊ុននាង ជាមនុស្ស ឬ សត្វ បានជានិយាយដូច្នេះ !

Apr 12, 2016 12:27 AM

អ្នក​អាន​អនាមិក

គឹតៗទៅ ខួរក្បាលខ្មែរខ្លះ បានបុណ្យស័ក្ត បន្តិចបន្តួច មិនពិចារណា បែរជា ឆ្កួតដើរចោទគេ ចោទអែង ដោយគ្មានវិចារណញ្ញាណ ទៅវិញ !

Apr 11, 2016 11:39 PM

គេហទំព័រ​ទាំងមូល