តុលាការ​ខេត្ត​មណ្ឌលគិរី​កោះ​ហៅ​ប៉ូលិស​២​នាក់​ចូល​បំភ្លឺ​រឿង​ជំរិត​ប្រាក់​ជនជាតិ​វៀតណាម

ដោយ រដ្ឋា វិសាល
2014.07.31
Share on WhatsApp
Share on WhatsApp

ចៅក្រម​ស៊ើបសួរ​តុលាការ​សាលា​ដំបូង​ខេត្ត​មណ្ឌលគិរី កោះ​អញ្ជើញ​មន្ត្រី​ប៉ូលិស​នៃ​ស្នងការដ្ឋាន​ខេត្ត​ពីរ​នាក់ ឲ្យ​ចូល​ខ្លួន​ទៅ​បំភ្លឺ​ពី​ការ​ចោទ​ប្រកាន់​បទ​ជំរិត​ទារ​ប្រាក់ ២​ម៉ឺន​ដុល្លារ ពី​ពលរដ្ឋ​វៀតណាម អ្នក​លួច​ឆ្លង​ដែន​ខុស​ច្បាប់​មក​កាប់​ឈើ​ក្នុង​ដី​ខ្មែរ។

មន្ត្រី​ប៉ូលិស ២​នាក់ នៃ​ស្នងការដ្ឋាន​ប៉ូលិស​ខេត្ត​មណ្ឌលគិរី នឹង​ចូល​ទៅ​បំភ្លឺ​នៅ​តុលាការ​ខេត្ត​នៅ​ថ្ងៃ​ច័ន្ទ សប្ដាហ៍​ក្រោយ បន្ទាប់​ពី​ចៅក្រម​ស៊ើបសួរ​បាន​ចេញ​ដីកា​កោះ​ឲ្យ​មន្ត្រី​ទាំង​ពីរ​នាក់​ចូល​ខ្លួន។

វរសេនីយ៍ទោ នង ប៊ុនថុង នាយសេនាធិការ​នៃ​ស្នងការដ្ឋាន​នគរបាល​ខេត្ត និង​មន្ត្រី​ការិយាល័យ​ប្រឆាំង​បទល្មើស​សេដ្ឋកិច្ច លោក ជឹម ទូច ត្រូវ​បាន​ពលរដ្ឋ​វៀតណាម មួយ​រូប​ចោទ​ប្រកាន់​ពី​បទ​ជំរិត​ទារ​ប្រាក់ ៤០០​លាន​ដុង ប្រហែល ២​ម៉ឺន​ដុល្លារ ជា​ថ្នូរ​នឹង​ការ​ដោះ​លែង​ពលរដ្ឋ​វៀតណាម ពីរ​នាក់ ដែល​មន្ត្រី​ប៉ូលិស​ទាំង​ពីរ​នាក់​ឃាត់​ខ្លួន ខណៈ​លួច​ឆ្លង​ដែន​ចូល​មក​កាប់​ឈើ​ក្នុង​ដី​ខ្មែរ។

ប្រធាន​មន្ទីរ​បរិស្ថាន ខេត្ត​មណ្ឌលគិរី លោក ឈិត សុផល ទទួល​ស្គាល់​ថា ក្នុង​កំណត់​ហេតុ​សាកសួរ​ជនជាតិ​វៀតណាម ទាំង​ពីរ​នាក់ ដោយ​មន្ត្រី​បរិស្ថាន បន្ទាប់​ពី​សមត្ថកិច្ច​ប៉ូលិស​បាន​បញ្ជូន​ពួក​គេ​មក​មន្ត្រី​ជំនាញ គឺ​ពួក​គេ​បាន​ឆ្លើយ​បញ្ជាក់​ថា ពិត​ជា​មាន​ការ​ជំរិត​ទារ​ប្រាក់។ យ៉ាង​ណា​ក៏ដោយ លោក​ថា​បាន​កសាង​សំណុំ​រឿង​នេះ​បញ្ជូន​ទៅ​ស្ថាប័ន​អយ្យការ​អស់​ហើយ៖ «ចាប់​មក​ហើយ ថា​មាន​ទារ​អី​អ៊ីចឹង ខាង​មន្ទីរ​អត់​ដឹង​ទេ គ្រាន់​តែ​ខាង​វៀតណាម គាត់​ឆ្លើយ​អ៊ីចឹង ពិត​មិន​ពិត​ខ្ញុំ​មិន​ដឹង​ដែរ»

ទាក់ទិន​រឿង​ក្តី​នេះ ព្រះរាជ​អាជ្ញា​រង​អម​តុលាការ​ខេត្ត​មណ្ឌលគិរី លោក ជា សុវ៉ាន់ថេត បាន​ចោទ​ប្រកាន់​ជនជាតិ​វៀតណាម ទាំង​ពីរ​នាក់ ក្នុង​បទ​ឆ្លង​ដែន និង​ប្រមូល​ផល​ព្រៃ​ឈើ​ខុស​ច្បាប់​ក្នុង​ដី​ខ្មែរ។ លោក​បញ្ជាក់​ថា បាន​បញ្ជូន​សំណុំ​រឿង​ពលរដ្ឋ​វៀតណាម ទាំង​ពីរ​នាក់​ទៅ​ចៅក្រម​ស៊ើបសួរ​បន្ត ក៏ប៉ុន្តែ​លេច​ចេញ​ការ​ចោទ​ប្រកាន់​បទល្មើស​ជំរិត​ទារ​ប្រាក់ ទើប​ចៅក្រម​ស៊ើបសួរ​ពន្លាត​ការ​សាកសួរ​ទៅ​លើ​មន្ត្រី​ប៉ូលិស​ទាំង​ពីរ​នាក់៖ «លោក​ចៅក្រម​គាត់​បាន​ចេញ​ដីកា​ហ្នឹង​សម្រាប់​ឲ្យ​លោក​ប៉ូលិស​ទាំង​ពីរ​ហ្នឹង គាត់​ចូល​មក​បំភ្លឺ​នៅ​ចំពោះ​មុខ។ យើង​ចោទ​តែ​ជនជាតិ​វៀតណាម តែ​ប៉ុណ្ណឹង​ទេ ហើយ​រឿង​ប៉ូលិស​ហ្នឹង​គាត់ គឺ​គាត់​អ្នក​ពន្លាត​ខ្លួន​ឯង»

វិទ្យុ​អាស៊ីសេរី នៅ​ថ្ងៃ​ទី​៣១ ខែ​កក្កដា មិន​អាច​ទាក់ទង​មន្ត្រី​ប៉ូលិស​ទាំង​ពីរ​នាក់ សុំ​អធិប្បាយ​ការ​ចោទ​ប្រកាន់​នេះ​បាន​ទេ។

យ៉ាង​ណា ស្នងការ​ប៉ូលិស​ខេត្ត​មណ្ឌលគិរី លោក ញ៉ែម វ៉ាន់នី ទទួល​ស្គាល់​ថា លោក​បាន​ផ្តល់​រថយន្ត​ស៊ីរ៉ែន​មួយ​គ្រឿង អន្តរាគមន៍​ដឹក​ជញ្ជូន​ពលរដ្ឋ​វៀតណាម ពីរ​នាក់​មក​ស្នងការដ្ឋាន​ប៉ូលិស តាម​សំណើ​របស់​មន្ត្រី​ប៉ូលិស​ដែល​បាន​ឃាត់​ខ្លួន​ពួក​គេ​ពី​បទ​ឆ្លង​ដែន​ខុស​ច្បាប់ មក​កាប់​ឈើ​ក្នុង​ដី​ខ្មែរ។ លោក​បន្ត​ថា ចៅក្រម​ស៊ើបសួរ​នឹង​ស្វែងរក​អង្គ​ហេតុ និង​ភស្តុតាង​ដាក់​បន្ទុក មក​លើ​មន្ត្រី​ប៉ូលិស​ទាំង​ពីរ​នាក់ ប្រសិន​ពួក​គេ​បាន​ប្រព្រឹត្ត​ដូច​ការ​ចោទ​ប្រកាន់៖ «ខ្ញុំ​អត់​ហ៊ាន​អះអាង​ថា រឿង​ហ្នឹង តើ​វា​ពិត​មែន ឬ​ក៏​អត់​ទេ ព្រោះ​ខ្ញុំ​ហៅ​សាមី​ខ្លួន​មក​សួរ បដិសេធ​រហូត។ មួយ​ទៀត អ្នក​ប៉ោង​សភាពការណ៍ គឺ​ដោយសារ​យើង​អត់​ធ្វើ​តាម​សំណូមពរ​ពួក​គាត់​យក​លុយ​មក​សូក ខ្ញុំ​បញ្ជា​ដាច់​ខាត ថា​អត់​បាន​ទេ»

ជនជាតិ​វៀតណាម ទាំង​ពីរ​នាក់ មាន​ឈ្មោះ ឡេង វ៉ាន់ចាង ភេទ​ប្រុស អាយុ ២៥​ឆ្នាំ និង​ឈ្មោះ វាង តុងបាវ ភេទ​ប្រុស អាយុ ៣០​ឆ្នាំ រស់នៅ​ភូមិ​ទី​១០​អា (10A) ឃុំ​ដាក់ឡាវ ស្រុក​ដាក់ម៉ីល ខេត្ត​ដាក់ណុង។ អ្នក​ទាំង​ពីរ ត្រូវ​ឃាត់​ខ្លួន​នៅ​យប់​ថ្ងៃ​ទី​២៦ ខែ​កក្កដា ឆ្នាំ​២០១៤ នៅ​ក្បែរ​តំបន់​ព្រំដែន​កម្ពុជា​វៀតណាម ក្នុង​ឃុំ​ប៊ូស្រា ស្រុក​ពេជ្រាដា ខេត្ត​មណ្ឌលគិរី គ្រា​ដែល​ជនជាតិ​វៀតណាម កំពុង​ដឹក​ឈើ​គគីរ​តាម​រទេះគោ​យន្ត បំណង​ឆ្លង​ចូល​ដី​វៀតណាម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។