ក្រុមមេធាវីការពារក្តីឲ្យលោក អ៊ុំ សំអាន តំណាងរាស្ត្រគណបក្សសង្គ្រោះជាតិ មិនចូលរួមស្តាប់ការប្រកាសសាលក្រមទេ នៅរសៀលថ្ងៃទី១០ តុលា។ មេធាវីការពារក្តីលោក អ៊ុំ សំអាន គឺលោក ជូង ជូងី ឲ្យអាស៊ីសេរី ដឹងថា មូលហេតុដែលក្រុមមេធាវី ព្រមទាំងកូនក្តីរបស់លោកមិនចូលស្តាប់ការប្រកាសសាលក្រមនៅរសៀលនេះ ដោយសារក្រុមមេធាវីយល់ថា តុលាការបំពាននីតិវិធី។
ចៅក្រមជំនុំជម្រះសាលាដំបូងរាជធានីភ្នំពេញ លោក ហេង សុខណា ឲ្យអាស៊ីសេរី ដឹងនៅរសៀលថ្ងៃទី១០ តុលា នេះថា តុលាការសម្រេចផ្ដន្ទាទោសលោក អ៊ុំ សំអាន ឲ្យជាប់ពន្ធនាគាររយៈពេល ២ឆ្នាំ ៦ខែ និងពិន័យជាប្រាក់ចំនួន ៤លានរៀល។
លោក អ៊ុំ សំអាន ត្រូវបានអយ្យការអមសាលាដំបូងរាជធានីភ្នំពេញ ចោទប្រកាន់ពីបទញុះញង់នាំឲ្យមានការរើសអើង និងប្រព្រឹត្តបទឧក្រិដ្ឋជាអាទិ៍ ទាក់ទងនឹងផ្សព្វផ្សាយឯកសារផែនទីព្រំដែនកម្ពុជា-វៀតណាម ក្លែងក្លាយ តាមមាត្រា៤៩៥ និងមាត្រា៤៩៦ នៃក្រមព្រហ្មទណ្ឌ បន្ទាប់ពីលោកត្រូវបានសមត្ថកិច្ចចាប់ខ្លួននៅខេត្តសៀមរាប កាលពីយប់ថ្ងៃទី១១ ខែមេសា។
ទោះយ៉ាងណា ក្រៅតែពីមិនទទួលស្គាល់សាលក្រមផ្ដន្ទាទោសនេះ មេធាវីការពារក្តីឲ្យលោក អ៊ុំ សំអាន គឺលោកមេធាវី ជូង ជូងី នៅមិនទាន់អាចបញ្ជាក់ថានឹងបន្តប្ដឹងទាស់ការសម្រេចនេះទៅសាលាឧទ្ធរណ៍ ឬយ៉ាងណានោះទេ។ លោកថា ក្រុមមេធាវីត្រូវពិភាក្សាជាមួយកូនក្តីជាមុនសិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។