សង្គម​ស៊ីវិល​ថ្កោលទោស​រដ្ឋសភា​អនុម័ត​ច្បាប់​កែទម្រង់​ប្រព័ន្ធ​តុលាការ

ដោយ វោហារ ជាតិ
2014-05-26
អ៊ីម៉ែល
មតិ
Share
បោះពុម្ព

អង្គការ​ជាតិ និង​អន្តរជាតិ​ចំនួន ៩ ចេញ​សេចក្ដី​ថ្លែងការណ៍​រួម​មួយ នៅ​ថ្ងៃ​ទី​២៦ ឧសភា ថ្កោល​ទោស​រដ្ឋសភា ដែល​បាន​អនុម័ត​​ច្បាប់​ចំនួន​បី ទាក់ទង​នឹង​ការ​កែ​ទម្រង់​ប្រព័ន្ធ​តុលាការ ដែល​មាន​ខ្លឹមសារ​ចន្លោះ​ប្រហោង ហើយ​បាន​អំពាវនាវ​សុំ​ឲ្យ​ដាក់​ច្បាប់​ទាំង​នោះ ពិភាក្សា​ជា​សាធារណៈ​ជាថ្មី​ម្ដង​ទៀត។

កាល​ពី​ថ្ងៃ​ទី​២២ ឧសភា រដ្ឋសភា ដែល​សុទ្ធ​ជា​សមាជិក​គណបក្ស​ប្រជាជន បាន​អនុម័ត​ច្បាប់​​ទាំង​បី នេះ ហើយ​ច្បាប់​ទាំង​បី​នេះ នឹង​ត្រូវ​បញ្ជូន​ទៅ​ឲ្យ​ព្រឹទ្ធសភា​អនុម័ត​បន្ត ​នៅ​ពេល​ឆាប់ៗ​នេះ ​ដែល​ធ្វើ​ឲ្យ​អង្គការសង្គម​ស៊ីវិល​មួយ​ចំនួន ព្រួយ​បារម្ភ​យ៉ាង​ខ្លាំង។

សេចក្ដីថ្លែងការណ៍​របស់​សង្គម​ស៊ីវិល​ដដែល អំពាវនាវ​កុំឲ្យ​ព្រឹទ្ធសភា​អនុម័ត​ច្បាប់​ទាំង​បី​នោះ បន្ត​ទៅទៀត ព្រោះថា បើ​សិន​ជា​ព្រឹទ្ធសភា​អនុម័ត​​ច្បាប់​ទាំង​នោះ នឹង​ធ្វើ​ឲ្យ​មាន​ភាព​អយុត្តិធម៌​នៅ​ក្នុង​សង្គម ​រឹត​តែ​​ខ្លាំង​​ឡើង​ថែម​ទៀត។

មន្ត្រី​តំណាង​សង្គម​ស៊ីវិល​ ត្រូវ​បាន​សេចក្ដី​ថ្លែងការណ៍​នោះ​ស្រង់​សម្ដី​ថា ៖ «យើង​ខ្ញុំ ក្រុម​អង្គការ​សង្គម​ស៊ីវិល​ជាតិ និង​អន្តរជាតិ ដូច​មាន​រាយ​នាម​ខាង​ក្រោម សូម​អំពាវនាវ​ឲ្យ​ព្រឹទ្ធសភា​កម្ពុជា ពន្យារ​ពេល​ការ​ពិនិត្យ​សេចក្ដី​ព្រាងច្បាប់​ចំនួន​បី ទាក់ទង​នឹង "ការកែទម្រង់" ប្រព័ន្ធ​តុលាការ ដែល​រដ្ឋសភា​បាន​អនុម័ត ហើយ​ប្រសិន​បើ​ច្បាប់​នេះ ត្រូវ​បាន​អនុម័ត​​ដោយ​ព្រឹទ្ធសភា​ទៀត​នោះ អាច​នឹង​ធ្វើ​ឲ្យ​ប៉ះពាល់​ធ្ងន់ធ្ងរ​ដល់​នីតិរដ្ឋ​នៅ​ព្រះរាជា​ណា​ចក្រ​កម្ពុជា»

មន្ត្រី​សង្គម​ស៊ីវិល​យល់​ឃើញ​ថា បើ​សិន​ជា​សេចក្ដី​ព្រាងច្បាប់​នេះ​ត្រូវ​បាន​ព្រឹទ្ធសភា​អនុម័ត និង​ក្រុមប្រឹក្សា​ធម្មនុញ្ញ​សម្រេច​យល់ព្រម​​ នឹង​ធ្វើ​ឲ្យ​រដ្ឋាភិបាល​ពង្រឹង​អំណាច​គ្រប់​គ្រង​របស់​ខ្លួន កាន់តែ​ខ្លាំង​ឡើង លើ​ប្រព័ន្ធ​តុលាការ បើ​សិន​ជា​ច្បាប់​នេះ នៅ​មាន​ទម្រង់​និង​ខ្លឹមសារ​ដូច​សភា​អនុម័ត​​ពេល​នេះ។ ក្រុម​សង្គម​ស៊ីវិល​បាន​អំពាវនា​ឲ្យ​ដាក់​សេចក្ដីព្រាង​ទាំង​នោះ ពិភាក្សា​ជា​សាធារណៈ ដើម្បី​ធ្វើ​ច្បាប់​ទាំង​នោះ មាន​លក្ខណៈ​ពេញលេញ តាម​បទដ្ឋាន​​អន្តរជាតិ។

សេចក្ដីថ្លែងការណ៍​សរសេរ​ថា ៖ «យើង​ខ្ញុំ​សូម​អំពាវនាវ​ជាថ្មី ឲ្យ​មាន​ការ​ពិគ្រោះ​យោបល់​ជា​សាធារណៈ និង​ទូលំទូលាយ ដើម្បី​កែ​សម្រួល​ច្បាប់​ទាំង​នេះ ឲ្យ​សមស្រប​នឹង​បទដ្ឋាន​អន្តរជាតិ»

ឆ្លើយតបទៅនឹង​សេចក្ដី​អំពាវនាវ​របស់​សង្គម​ស៊ីវិល​នេះ អគ្គ​លេខាធិការ និង​ជា​អ្នក​នាំ​ពាក្យ​ព្រឹទ្ធ​សភា លោក អ៊ុំ សារឹទ្ធ បញ្ជាក់​ថា ការសម្រេច​ថា ពិភាក្សា​ឬ​មិន​ពិភាក្សា​លើ​សេចក្ដីព្រាង​ច្បាប់​ទាំង​បី​នោះ គឺ​មិន​មែន​ជា​សមត្ថកិច្ច​របស់​អគ្គលេខាធិការ​ព្រឹទ្ធសភា​សម្រេច​ទេ ៖ « ធម្មតា​សេចក្ដី​ព្រាង​ច្បាប់​ដែល​បញ្ជូន​មកពី​រដ្ឋសភា ​គឺ​ត្រូវ​ចូល​ទៅ​គណៈកម្មាធិការ​អចិន្ត្រៃយ៍ គណៈកម្មាធិការ​អចិន្ត្រៃយ៍ ត្រូវ​សម្រេច​ថា តើ​ត្រូវ​ឲ្យ​គណៈកម្មាធិការ​ណា​ត្រួត​ពិនិត្យ។ អ៊ីចឹង គណៈកម្មាធិការ​គាត់​នឹង​យក​ទៅ​ពិនិត្យ ក្នុង​ពេលវេលា​កំណត់​ក្នុង​មាត្រា ១១៣ ថ្មី​នៃ​រដ្ឋធម្មនុញ្ញ។ ប៉ុន្តែ​គ្រាន់​តែ​ចង់​ជម្រាប​ថា រហូត​មក​ដល់​ថ្ងៃ​នេះ អត្ថបទ​ច្បាប់​ទាំង​បី​នៅ​មិន​ទាន់​មក​ដល់​ព្រឹទ្ធសភា​នៅ​ឡើយ​ទេ ខាង​រដ្ឋសភា​កំពុង​កែ​សម្រួល​ទៅ​តាម​អ្វី​ដែល​បាន​អនុម័ត​ក្នុង​កិច្ច​ប្រជុំ​ពេញ​អង្គ...»

សេចក្ដី​ព្រាង​ច្បាប់​ទាំង​បី ដែល​រដ្ឋសភា​អនុម័ត​នោះ មាន​ដូច​ជា៖ សេចក្ដី​ព្រាង​ច្បាប់ ស្ដីពី​ការ​រៀបចំ​អង្គ​តុលាការ សេចក្ដី​ព្រាងច្បាប់​ស្ដីពី​លក្ខន្តិកៈ ចៅក្រម និង​ព្រះរាជអាជ្ញា និង​សេចក្ដីព្រាង​ច្បាប់​ស្ដី​ពី​ការ​រៀបចំ និង​ការ​ប្រព្រឹត្ត​ទៅ​នៃ​ឧត្ដម​ក្រុមប្រឹក្សា​អង្គចៅក្រម។​

តាម​នីតិវិធី​ច្បាប់ សេចក្ដីព្រាង​ច្បាប់​ដែល​រដ្ឋសភា​បាន​អនុម័ត​រួច នឹង​ត្រូវ​បញ្ជូន​ទៅ​ព្រឹទ្ធសភា ពេល​ព្រឹទ្ធ​សភា​អនុមតិ​ហើយ នឹង​ត្រូវ​បញ្ជូន​ទៅ​ក្រុម​ប្រឹក្សា​ធម្មនុញ្ញ ដើម្បី​ពិនិត្យ​សម្រេច មុន​នឹង​ថ្វាយ​ព្រះ​មហាក្សត្រ​ឡាយ​ព្រះហស្តលេខា ប្រកាស​ដាក់​ឲ្យ​ប្រើប្រាស់​ជា​ផ្លូវការ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (3)
Share

អ្នក​អាន​អនាមិក

ពួកអាក្បត់ជាតិសភាទាំងនេះវាមិនខ្វល់ពីរាស្ត្រទេ!ប្រទេសគេ
ៗពង្រីកទឹកដឺពួកអាតិរឆ្ឆាននេះពង្រីក,អំណាច!ចាំមើលចុះ
ទោះបោះឆ្នោតចាញ់ក៍មិនចុះចេញដែរវានឹងធ្វើរដ្ឋប្រហារដូច
ប្រទេសអាកះពិ!ប្រទេសជប៉ុនចាប់ផ្តើមដកថយហើយ!តាម
ការស្មានរបស់ខ្ញុំថៃនឹងខ្មែរគេចមិនរួចពីភាពក្រីក្រជាងគេទេ
ក្នុងពិភពលោកនេះ.។

May 27, 2014 01:48 AM

អ្នក​អាន​អនាមិក

រដ្ឋាភិបាល ហ៊ុន សែន ចេញច្បាប់ អតនោម័ត ក្បត់ប្រជាពលរដ្ឋខ្មែរ ដោយសារ ធ្វើតាម បញ្ជា យួន !

May 26, 2014 07:02 AM

អ្នក​អាន​អនាមិក

រដ្ឋសភា អែកបក្ស បក្សប្រជាជន ចេញច្បាប់ គាបសង្កត់ ក្បត់ប្រជាពលរដ្ឋ !

May 26, 2014 06:52 AM

គេហទំព័រ​ទាំងមូល