អ្នកចូលរួមយុទ្ធនាការបញ្ចប់អំពើនិទណ្ឌភាពនៃគណបក្សសង្គ្រោះជាតិ បានចុះហត្ថលេខាគាំទ្រយុទ្ធនាការនេះ បានជាង ៧ម៉ឺន ១ពាន់នាក់ (៧១.៧៧៧) គិតមកត្រឹមយប់ថ្ងៃទី៩ ខែមេសា។
ប្រជាពលរដ្ឋ និងសកម្មជនគណបក្សសង្គ្រោះជាតិ បានបន្តចុះហត្ថលេខាគាំទ្រយុទ្ធនាការបញ្ចប់និទណ្ឌភាព ឬភាពគ្មានទោសពៃរ៍ដល់ជនល្មើសនៅកម្ពុជានេះ ដោយគ្រោងប្រមូលស្នាមមេដៃប្រជាពលរដ្ឋប្រមាណកន្លះលាននាក់ ដើម្បីដាក់ញត្តិទៅតុលាការអន្តរជាតិនានា ឲ្យជួយរកយុត្តិធម៌ជូនក្រុមជនរងគ្រោះដែលបានស្លាប់ដោយអយុត្តិធម៌ ក្រោមរបបគ្រប់គ្រងរបស់លោក ហ៊ុន សែន។
គណៈកម្មការស្រាវជ្រាវសៀវភៅស ឲ្យដឹងថា សំណុំរឿងធំៗ ដែលកំពុងចងក្រងនោះរួមមាន ព្រឹត្តិការណ៍បោកគ្រាប់បែកចូលហ្វូងបាតុករដឹកនាំដោយ លោក សម រង្ស៊ី ក្នុងពេលតវ៉ាទាមទាររកយុត្តិធម៌សង្គម និងទាមទារឱ្យកំណែទម្រង់ប្រព័ន្ធយុត្តិធម៌ កាលពីថ្ងៃទី៣០ មីនា ឆ្នាំ១៩៩៧ សំណុំរឿងលោក ជា វិជ្ជា លោកបណ្ឌិត កែម ឡី លោក ឈុត វុទ្ធី ព្រះតេជព្រះគុណ សំ ប៊ុនធឿន ករណីសម្លាប់អ្នកកាសែត សិល្បៈករ និងព្រឹត្តិការណ៍រដ្ឋប្រហារថ្ងៃទី៥-៦ កក្កដា ឆ្នាំ១៩៩៧។
គណៈកម្មការនេះឲ្យដឹងទៀតថា ការចងក្រងសៀវភៅស នេះមានជាទិសដៅ ដើម្បីបង្ហាញការពិតនៃរឿងរ៉ាវឃាតកម្មជាប់ពាក់ព័ន្ធនឹងរឿងនយោបាយ ដែលអ្នកជាប់ពាក់ព័ន្ធមិនហ៊ានលាតត្រដាង ជាឯកសារភស្តុតាងដ៏រឹងមាំមួយ ដើម្បីឈានទៅបញ្ចប់អំពើនិទណ្ឌភាពនៅកម្ពុជា។
សៀវភៅស នេះ មានចំនួន ៥ជំពូក។ ជំពូកទី១ និយាយពីឃាតកម្ម លើមេដឹកនាំ សហជីព លោក ជា វិជ្ជា ករណីបាញ់សម្លាប់អ្នកវិភាគឥតសំចៃមាត់ លោកបណ្ឌិត កែម ឡី និងមនុស្សមួយចំនួនទៀត។ ជំពូកទី២ រៀបរាប់ពីករណីបាញ់សម្លាប់សិល្បករ និងអ្នកកាសែត។ ជំពូទី៣ ករណីបោកគ្រាប់បែកថ្ងៃទី៣០ មិនា ឆ្នាំ១៩៩៧។ ជំពូកទី៤ និយាយពីរដ្ឋប្រហារឆ្នាំ១៩៩៧ និងជំពូកទី៥ ចងក្រងពី អំពើនិទណ្ឌភាព និងអំពើអយុត្តិធម៌នៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។