តុលាការខេត្តកណ្ដាល ចោទប្រកាន់បុរសជនជាតិអាមេរិកាំងម្នាក់ ពីបទទិញពេស្យាចារកុមារ និងបានរំលោភបំពានផ្លូវភេទលើកុមារាខ្មែរ ក្រោមអាយុ១៣ឆ្នាំ ចំនួន២នាក់។
អង្គការសកម្មភាពដើម្បីកុមារ អាស្យុង ប៉ូលេ ហ្សង់ហ្វង់ (Action Pour Les Enfants) ហៅកាត់ថា APLE ចេញសេចក្ដីប្រកាសព័ត៌មាននៅថ្ងៃទី៨ ឧសភា ថា កុមារាក្រោមអាយុពីរនាក់ ត្រូវបានជួយសង្គ្រោះដោយអំពើរំលោភបំពានផ្លូវភេទពីសំណាក់បុរសជនជាតិអាមេរិកាំង វ័យ ៧៨ឆ្នាំម្នាក់។ បុរសនេះ រងការចោទប្រកាន់តាមមាត្រា ៣៤ នៃច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ដែលនឹងត្រូវផ្ដន្ទាទោសពី ៧ឆ្នាំដល់ ១៥ឆ្នាំ។
អង្គការនេះរាយការណ៍ថា នេះជាជនជាប់ចោទទី ១៥ហើយ ដែលបានប្រព្រឹត្តបទល្មើសផ្លូវភេទ ក្នុងរយៈពេល ២ឆ្នាំ គឺតាំងពីឆ្នាំ២០១៨។ ជាមួយគ្នានោះក៏មានមនុស្សពាក់ព័ន្ធចំនួន ២១នាក់ទៀត ជាជនជាតិខ្មែរដែលត្រូវបានចាប់ខ្លួន ក្នុងបទកេងប្រវ័ញ្ចផ្លូវភេទលើកុមារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។