សំណុំរឿង​បាញ់​សម្លាប់​លោក កែម ឡី ទៅ​ដល់​ដៃ​ចៅក្រម​ស៊ើបសួរ

ដោយ ប្រាជ្ញ ចេវ
2016-07-13
អ៊ីម៉ែល
មតិ
Share
បោះពុម្ព
ជន​សង្ស័យ​ជា​ឃាតក​សម្លាប់​លោក កែម ឡី ឈ្មោះ ជួប សម្លាប់ (ប៉ូលិស​ថា​មិន​មែន​ជា​ឈ្មោះ​ពិត) ត្រូវ​បាន​សមត្ថកិច្ច​បង្ហាញ​ក្នុង​សន្និសីទ​កាសែត​នា​ស្នងការដ្ឋាន​នគរបាល​រាជធានី​ភ្នំពេញ នៅ​ថ្ងៃ​ទី​១០ ខែ​កក្កដា ឆ្នាំ​២០១៦។ Brach Chev
ជន​សង្ស័យ​ជា​ឃាតក​សម្លាប់​លោក កែម ឡី ឈ្មោះ ជួប សម្លាប់ (ប៉ូលិស​ថា​មិន​មែន​ជា​ឈ្មោះ​ពិត) ត្រូវ​បាន​សមត្ថកិច្ច​បង្ហាញ​ក្នុង​សន្និសីទ​កាសែត​នា​ស្នងការដ្ឋាន​នគរបាល​រាជធានី​ភ្នំពេញ នៅ​ថ្ងៃ​ទី​១០ ខែ​កក្កដា ឆ្នាំ​២០១៦។ Brach Chev
Brach Chev

សំណុំរឿង​ជន​ត្រូវ​ចោទ​ដែល​បាញ់​សម្លាប់​លោក កែម ឡី បាន​ដល់ដៃ​ចៅក្រម​ស៊ើបសួរ​ហើយ បន្ទាប់​ពី​ព្រះរាជអាជ្ញា​អម​សាលាដំបូង​រាជធានី​ភ្នំពេញ ចោទ​ប្រកាន់​ពីរ​ករណី គឺ​បទ​ឃាតកម្ម​គិតទុក​ជា​មុន និង​កាន់​អាវុធ​ខុស​ច្បាប់ ដែល​នឹង​ត្រូវ​ជាប់​ទោស​អស់​មួយ​ជីវិត ប្រសិនបើ​តុលាការ​រក​ឃើញ​ថា ពិតជា​មាន​ទោស​មែន។

ក្រោយ​ការ​សាកសួរ​ពេញ​មួយ​ថ្ងៃ​នៅ​ថ្ងៃ​ទី​១៣ ខែ​កក្កដា ពី​សំណាក់​ព្រះរាជអាជ្ញា និង​ចៅក្រម​ស៊ើបសួរ​នៃ​សាលា​ដំបូង​រាជធានី​ភ្នំពេញ។ ក្រុម​សមត្ថកិច្ច​បាន​បញ្ជូន​ជន​ត្រូវ​ចោទ​ទៅ​ឃុំ​ខ្លួន​បណ្ដោះអាសន្ន​នៅ​ពន្ធនាគារ​ព្រៃ​ស ឬ​ហៅ​ថា មណ្ឌល​អប់រំ​កែប្រែ ម១។ ការ​សាកសួរ​នៅ​ថ្ងៃ​ទី​៣​នេះ ក៏​មិន​ខុស​ពី​ថ្ងៃ​មុនៗ​ដែរ ក្រុម​សមត្ថកិច្ច​បាន​ការពារ​យ៉ាង​តឹងរ៉ឹង​ពេញ​បរិវេណ​តុលាការ​ក្រុង​ភ្នំពេញ។

អ្នកនាំពាក្យ​សាលា​ដំបូង​រាជធានី​ភ្នំពេញ លោក លី សុផាណា ឲ្យ​ដឹង​ថា ចៅក្រម​ស៊ើបសួរ​បាន​សម្រេច​ឃុំ​ខ្លួន​ជន​ត្រូវ​ចោទ​បណ្ដោះអាសន្ន ប៉ុន្តែ​លោក​មិន​ទាន់​ឲ្យ​ដឹង​ពី​ពេលវេលា​ស៊ើបសួរ​បន្ត​នៅ​ឡើយ​ទេ។ លោក​បញ្ជាក់​ថា ការ​សម្រេច​ចោទ​ប្រកាន់​ថា ជន​ត្រូវ​ចោទ​ឈ្មោះ អឿត អាង ហៅ ជួប សម្លាប់ ពី​បទ​ឃាតកម្ម​គិត​ទុក​ជា​មុន និង​បទ​កាន់កាប់​អាវុធ​គ្មាន​ការ​អនុញ្ញាត តាម​មាត្រា​២០០ និង​មាត្រា​៤៩០ នៃ​ក្រមព្រហ្មទណ្ឌ បន្ទាប់​ពី​លោក​បាន​សួរចម្លើយ ពិនិត្យ​ឯកសារ និង​ភស្តុតាង​នៅ​ក្នុង​សំណុំរឿង​ឃាតកម្ម​ទៅ​លើ​លោក​បណ្ឌិត កែម ឡី អ្នក​វិភាគ​នយោបាយ ដែល​ត្រូវ​បាន​ឃាតក​បាញ់​សម្លាប់​នៅ​ព្រឹក​ថ្ងៃ​ទី​១០ ខែ​កក្កដា នៅ​ក្នុង​ហាង​លក់ទំនិញ ឬ​ហៅ​ថា ស្តាម៉ាត (Star Mart) ស្ថានីយ​សាំង​កាល់តិច ស្តុប​បូកគោ សង្កាត់​ទន្លេបាសាក់ ខណ្ឌ​ចំការមន កណ្ដាល​ក្រុង​ភ្នំពេញ។

ក្រុម​សមត្ថកិច្ច​បញ្ជូន​ជន​ជាប់​ចោទ​ដែល​បាញ់​សម្លាប់​លោក​បណ្ឌិត កែម ឡី ចេញ​ពី​សាលាដំបូង​រាជធានី​ភ្នំពេញ ថ្ងៃ​ទី​១៣ ខែ​កក្កដា ឆ្នាំ​២០១៦។ RFA/Brach Chev
ក្រុម​សមត្ថកិច្ច​បញ្ជូន​ជន​ជាប់​ចោទ​ដែល​បាញ់​សម្លាប់​លោក​បណ្ឌិត កែម ឡី ចេញ​ពី​សាលាដំបូង​រាជធានី​ភ្នំពេញ ថ្ងៃ​ទី​១៣ ខែ​កក្កដា ឆ្នាំ​២០១៦។ RFA/Brach Chev RFA/Brach Chev

ស្នងការ​នគរបាល​រាជធានី​ភ្នំពេញ លោក ជួន សុវណ្ណ អះអាង​ពី​ការ​ចាប់​បាន​ជន​សង្ស័យ។ លោក​ថា

ជន​នេះ​សារភាព​ថា ឈ្មោះ ជួប សម្លាប់ ដែល​នៅ​ពេល​ធ្វើ​សកម្មភាព​ប្រើ​កាំភ្លើង​ខ្លី​ចំនួន​គ្រាប់​ចំ​ក្បាល និង​ចំ​ដើមដៃ​ធ្លាយ​ដល់​ដល់​ក្រោម​ដោះ។ ទោះ​យ៉ាង​ក្តី​ក្នុង​ពេល​បង្ហាញ​មុខ​ជនសង្ស័យ លោក​ស្នងការ​មិន​អនុញ្ញាត​ឲ្យ​អ្នក​សារព័ត៌មាន​សួរ​សំណួរ​ទៅ​កាន់​ជន​រូប​នោះ​ទេ៖ «តាម​រយៈ​កម្លាំង​ល្បាត​យើង​ឃើញ​ថា ប្រសិទ្ធភាព​យើង​អាច​ចាប់​ជនល្មើស​បាន​នៅ​ផ្លូវ​សុធារស សង្កាត់​ទន្លេបាសាក់ ជិត​វត្ត​ស្វាយពពែ។ យើង​ពិនិត្យ​ឃើញ​ថា ទាំង​ការ​នៅ​កន្លែង​កើត​ហេតុ បន្ទាប់​ពី​កោសល្យវិច័យ ទាំង​វត្ថុតាង​ដែល​បាន​រឹបអូស​ពី​ជនល្មើស​បញ្ជាក់​ថា ជនសង្ស័យ​នេះ គឺ​ជា​ឃាតក​សម្លាប់​លោក​បណ្ឌិត កែម ឡី»

សមត្ថកិច្ច​អះអាង​ថា ចម្លើយ​សារភាព​របស់​ជនសង្ស័យ​នឹង​អាច​ធ្វើ​ឲ្យ​សមត្ថកិច្ច​ស្វែង​មុខ​អ្នក​នាំ​ពី​ក្រោយ ឬ​ក៏​បក្ស​របស់​ជន​នេះ។

​ទាក់ទង​រឿង​នេះ​ដែរ លោក លី សុផាណា បន្ថែម​ពី​នេះ តំណាង​អយ្យការ​ក៏​ចោទ​ប្រកាន់​លើ​បុគ្គល​ដែល​បាន​លក់​អាវុធ​អោយ​ជនល្មើស​ពី​បទ​លក់​អាវុធ​ដោយ​គ្មាន​ការ​អនុញ្ញាត​ដែរ។

​នៅ​ថ្ងៃ​ទី​១៣ ខែ​កក្កដា នេះ​ដែរ សារព័ត៌មាន​ក្នុង​ស្រុក​មួយ​ចំនួន​ដែល​មាន​និន្នាការ​គាំទ្រ​គណបក្ស​កាន់​អំណាច​បាន​ភ្ជាប់​ករណី​ទៅ​នឹង​គណបក្ស​ប្រឆាំង បន្ទាប់ពី​ប្រធាន​គណបក្ស​ប្រឆាំង​លោក សម រង្ស៊ី ថា ការ​បាញ់​សម្លាប់​លោក កែម ឡី ជា​អំពើ​ភេរវកម្ម​ដែល​រៀបចំ​ដោយ​រដ្ឋអំណាច៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (5)
Share

ប្អូនប្រុសតាម៉ុក

ពី កំពង់ចាម

រឿងនេះមុខតែចប់ត្រឹមហ្នឹង! ឃាដករជាប់គុកមានគេថែ
អោយមានកន្លែងដេកស្រួលស៊ីឆ្ងាញ់ព្រោះ....!។

Jul 13, 2016 12:13 PM

តា ពោកំបោ

ពី បាត់ដំបង

ចប់!មិនបាច់ឆ្ងល់ទៅទៀតទេ ហើយកុំសង្ឃឹមថារដ្ឌាភិបាល
នឹងបើកការស៊ើបអង្កេតរកអ្នកនៅពីក្រោយខ្នងឃាដករ
ជួប សម្លាប់នោះអោយសោះ អោយតែហ៊ុន សែននៅកាន់
អំណាចតទៅទៀតបញ្ញាវ័នខ្មែរមុខតែស្លាប់ទាល់តែអស់ទាល់តែឈប់រិះគន់ហ៊ុន សែននឹងត្រកូលហ៊ុន សែនទើបបានរស់។

Jul 13, 2016 11:35 AM

កូនខ្មែរម្នាក់

ពី ភ្នំពេញ

ខ្ញុំចេះតែឆ្ងល់ថា​រដ្ឋអំណាច​នៅ​តែ​និយាយ​ថា​ជន​ល្មើសឈ្មោះ ជួប សម្លាប់ តាម​ការ​ឆ្លើយ​របស់​ជន​ល្មើស។ សំណួរ​ខ្ញុំ​មួយ​ ថា​តើ​អាច​ទេ​ដែល​មាន​មនុស្ស​ឈ្មោះ​បែបនេះ? បើ​ថា​រហ័សនា​ម​នោះ​មិន​មាន​អ្វីចម្លែក​ទេ តែ​បើ​ថា​មាន​ឈ្មោះ​ពិត​បែប​នេះ ទោះទេវត្តា​មកប្រាប់​ខ្ញុំ​ក៏​ខ្ញុំ​នៅតែ​មិន​ជឿ និង​មិន​ទទួល​យក​ដែរ។ ហេតុអ្វីមិន​រក​ឯកសារបញ្ជាក់ ហេតុអ្វី​សំអាង​ត្រឹម​ការ​សារភាព? ហើយ​តើ​មាន​អាជ្ញាធរណាចេញ​លិខិត​បញ្ជាក់​អត្តសញ្ញាណឲ្យ​បើ​មាន​ឈ្មោះបែបនេះនោះ?

Jul 13, 2016 07:18 AM

អ្នក​អាន​អនាមិក

តើតុលាការមានដាក់ផែនការលំអិតអំពីការស៊ើបអង្កេតអ្នកជាប់ពាក់ព័ន្ធដែរឬទេ? រឿងធំប៉ុណ្ណេះទៅហើយមិនគួរបញ្ចប់ត្រឹមដាក់គុកឃាតករទេ ព្រោះគ្រាន់តែរឿងសង្ស័យសូកប៉ាន់សាក្សី ដែលជាប់ពាក់ព័ន្ធលុយចំនួន ២០០ដូល្លាសោះ មានអ្នកជាប់គុកដល់ទៅ៦នាក់ ហើយនៅកំពុងហៅ​៥នាក់ផ្សេងទៀត ហើយសមាជិកសភា លោកកឹមសុខា ក៏កំពុងតែជិត ចូលគុកផងដែរ។

Jul 13, 2016 02:44 AM

អ្នក​អាន​អនាមិក

តើបើតុលាការចេញបទចោទចឹងហើយមើលទៅសំណុំរឿងនិងគេយកលេសបញ្ចប់ត្រឹមបុគ្គលនិងហើយមើលទៅ

Jul 13, 2016 01:31 AM

មើល​មតិ​ទាំង​អស់.

គេហទំព័រ​ទាំងមូល