តុលាការកំពូលកោះហៅស្ត្រីពីរនាក់នៅសហគមន៍បឹងកក់ ចូលបំភ្លឺក្នុងនាមជាដើមបណ្ដឹង លើសំណុំរឿងហិង្សាទៅលើសហគមន៍បឹងកក់ បង្កដោយសមត្ថកិច្ចចម្រុះរឿងហិង្សា នៅក្បែរវត្តភ្នំកាលពីខែកញ្ញា ឆ្នាំ២០១៣។ ក្នុងសំណុំរឿងដែលអូសបន្លាយអស់ជាច្រើនមកនេះ ស្ត្រីបឹងកក់យល់ថា តុលាការមិនបានអនុវត្តច្បាប់ដោយស្មើភាពគ្នា ក្នុងការផ្ដល់យុត្តិធម៌ដល់ជនរងគ្រោះពិតប្រាកដនោះឡើយ ខណៈជនប្រព្រឹត្តហិង្សានៅតែមានសេរីភាព ដោយគ្មានការកាត់ទោសតាមច្បាប់។ ជុំវិញរឿងនេះ តុលាការកំពូលនឹងប្រកាសសាលដីកា នៅថ្ងៃទី១ តុលា ឆ្នាំ២០១៨ ។
ភាពយុត្តិធម៌ដែលស្ត្រីបឹងកក់ ២នាក់ រង់ចាំអស់រយៈពេលជាង ៥ឆ្នាំមកនេះ នៅមិនទាន់លេចចេញជាពន្លឺនៅឡើយ សម្រាប់ពួកគាត់ ក្នុងនាមជាដើមបណ្ដឹង ដែលរងគ្រោះដោយការវាយដំដោយដំបងឆក់របស់កងកម្លាំងរាជអាវុធហត្ថ និងគ្រាប់ឃ្លីដោយចម្ពាមកៅស៊ូ របស់កងសន្តិសុខខណ្ឌដូនពេញ។
នៅក្នុងបន្ទប់សវនាការតុលាការកំពូល នៅថ្ងៃទី២៦ ខែកញ្ញា លោកស្រី ង៉ែត ឃុន វ័យជាង ៨០ឆ្លាំ បានយករូបថតជាច្រើនសន្លឹកបង្ហាញពីប្រើហិង្សារបស់កម្លាំងសមត្ថកិច្ចទៅលើអ្នកបឹងកក់ និងគ្រាប់ឃ្លីមួយដែលគាត់រើសបាន ដាក់ជូនចៅក្រមជំនុំជម្រះ។ លោកស្រី ង៉ែត ឃុន ដែលរងគ្រោះត្រង់ទ្រូងដោយគ្រាប់ឃ្លី ឲ្យដឹងថា នៅពេលរូបគាត់រៀបរាប់ពីដំណើររឿងហិង្សា ដោយមានរូបភាពអមផង ស្រាប់តែចៅក្រមជំនុំជម្រះ ហាមគាត់ហាមមិនឲ្យនិយាយច្រើនឡើយ ហើយមេធាវីការពារក្ដី ក៏ត្រូវបានហាមមិនឲ្យនិយាយច្រើនដែរ៖ «ខ្ញុំបានលើកបង្ហាញភស្តុតាងរបស់ខ្ញុំនេះថា ខ្ញុំមានភស្តុតាងកម្លាំងអ្នកណាដែលចុះមកវៃខ្ញុំហ្នឹង គឺកម្លាំងសមត្ថកិច្ចនៅខណ្ឌដូនពេញ ដែលបញ្ជាឲ្យវៃហ្នឹង ត្រូវតែឲ្យតុលាការកំពូលហ្នឹង សុំឲ្យគាត់ទៅសួរនៅសាលាខណ្ឌដូនពេញទៅបានស្គាល់ ព្រោះខ្ញុំជាប្រជាពលរដ្ឋខ្ញុំអត់ស្គាល់ទេ ចាស៎។ សូមឲ្យតុលាការកំពូលហ្នឹង ជួយរកយុត្តិធម៌ ចាប់ជនល្មើសដៃដល់ផ្តន្ទាទោសឲ្យខ្ញុំ និងសងជំងឺចិត្តថ្លៃថ្នាំពេទ្យព្យាបាលខ្ញុំ ឲ្យសងសំណងឲ្យខ្ញុំ ហើយរកភាពយុត្តិធម៌សម្រាប់ខ្ញុំ»។
ចំណែកស្ត្រីបឹងកក់ម្នាក់ទៀតដែលរងរបួសបែកបាក់ដោយដំបងរបស់សន្តិសុខខណ្ឌដូនពេញ លោកស្រី ផាន់ ឈុនរ៉េត ថ្លែងថា លោកស្រីមិនសូវមានជំនឿលើចំណាត់ការ និងការកាត់សេចក្ដីរបស់តុលាការកំពូលនោះឡើយ ថានឹងអាចផ្ដល់យុត្តិធម៌ដល់ពួកគាត់៖ «ខ្ញុំថារំពឹងដូចជាមិនរំពឹង ចេញមកគឺសាលាឧទ្ធរណ៍គេរក្សាទុកសាលាដំបូង។ ខ្ញុំក៏មិនសង្ឃឹមថាសាលាកំពូលនេះរកយុត្តិធម៌ឲ្យខ្ញុំដែរ។ ប៉ុន្តែខ្ញុំសង្ឃឹមថា ពាក់កណ្ដាលចុះថាតុលាការកំពូលរកយុត្តិធម៌ឲ្យខ្ញុំ» ។
ទាក់ទងនឹងការអូសបន្លាយពេលវេលាអស់ជាច្រើនឆ្នាំ កាត់សេចក្ដី ផ្ដល់យុត្តិធម៌ឲ្យអ្នកបឹងកក់នេះ មន្ត្រីអង្កេតផ្នែកសិទ្ធិមនុស្សនៃសមាគមអាដហុក លោក ស៊ឹង សែនករុណា យល់ថា បើប្រព័ន្ធតុលាការនៅបន្តអនុវត្តស្តង់ដារពីរ នោះការផ្ដល់យុត្តិធម៌ដល់ពលរដ្ឋដែលជាជនរងគ្រោះពិតប្រាកដ នឹងមិនអាចកើតមានឡើយ ហើយជំរុញឲ្យមានអំពើនិទ្ទណ្ឌភាពបន្តកើតមាននៅក្នុងសង្គមកម្ពុជា។ លោកស្នើឲ្យតុលាការឈរលើគោលការណ៍ឆន្ទាគតិទាំងបួន ទើបអាចផ្ដល់យុត្តិធម៌ និងភាពកក់ក្ដៅដល់ពលរដ្ឋរងគ្រោះបាន៖ « យើងដឹងហើយថា គោលការណ៍អនុវត្តច្បាប់ទាំងអស់ហ្នឹង រួមទាំងស្ថាប័នតុលាការដែរ យើងហៅថា កុំឲ្យមានការលម្អៀងទៅហ្នឹងអគតិទាំងបួនហ្នឹង។ លម្អៀងដោយស្រលាញ់ ដោយស្អប់ ដោយខ្លាច អីជាដើមដោយមិនដឹងមិនយល់អីទាំងអស់ហ្នឹង។ ប៉ុន្តែយើងឃើញថា ការអនុវត្តជាក់ស្ដែង គឺផ្ទុយទៅនឹងការកំណត់ទាំងអស់ហ្នឹង ។ ដូច្នេះកាលណា អ្នកដែលអនុវត្តច្បាប់ទាំងអស់ហ្នឹង មិនបានអនុវត្តទៅតាមតួនាទី និងគ្មានអំណាចអនុវត្តទៅលើតួនាទីរបស់ខ្លួន អញ្ចឹងហើយករណីបែបនេះ ឬករណីនិទ្ទណ្ឌភាពនេះ មិនអាចកាត់ផ្ដាច់ចេញពីសង្គមកម្ពុជាបាននោះទេ» ។
លោកស្រី ផាន់ ឈុនរ៉េត និងលោកស្រី ង៉ែត ឃុនដែលគេច្រើនហៅថា យាយម៉ាំម៉ី រស់នៅតំបន់បឹងកក់ បានដាក់ពាក្យប្ដឹង ទៅតុលាការក្រុងភ្នំពេញ ដើម្បីស្វែងរកមុខជនដៃដល់ និងវែកមុខអ្នកបញ្ជាឲ្យមានអំពើហិង្សា យកមកកាត់ទោសតាមច្បាប់។ ក្នុងពាក្យបណ្ដឹងនោះ ពួកគាត់ប្ដឹងអភិបាលខណ្ឌដូនពេញ លោក សុខ ពេញវុធ ប្រធានក្រុមសន្តិសុខ លោក ទឹម វុត្ថា អធិការនគរបាលខណ្ឌដូនពេញ លោក សៅ ណុល និងមន្ត្រីសាលាខណ្ឌ អ្នកស្រី ពេជ្រ សុជាតា ថា ជាអ្នកបញ្ជាដោយផ្ទាល់ ឲ្យមានកងកម្លាំងសមត្ថកិច្ចចម្រុះវាយបង្ក្រាបធ្វើបាបមកលើពួកគាត់។
ប៉ុន្តែមកដល់ពេលនេះ លោកស្រី ផាន់ ឈុនរ៉េត ថ្លែងថា បណ្ដឹងពួកគាត់ដែលប្ដឹងបុគ្គលទាំងនោះ ចាប់តាំងពីសាលាដំបូងរាជធានីភ្នំពេញ រហូតមកដល់តុលាការកំពូល មិនត្រូវបានយកចិត្តទុកដាក់ និងដោះស្រាយឲ្យឡើយ ក្រោយពីមានសមត្ថកិច្ចប្រើហិង្សាវាយបំបែកការប្រមូលផ្ដុំសហគមន៍បឹងកក់ដែលធ្វើសមាធិ បួងសួងសុំយុត្តិធម៌ នៅវត្តភ្នំកាលថ្ងៃទី២២ ខែកញ្ញា ឆ្នាំ២០១៣ ។
នៅក្នុងហេតុការណ៍បង្ក្រាបដោយហិង្សានោះ អ្នកបឹងកក់ឲ្យដឹងថា សមត្ថកិច្ចចម្រុះរាប់រយនាក់ មាន កងរាជអាវុធហត្ថ និងកងសន្តិសុខ បានប្រើដំបងឆក់ ដំបងឈើ ចម្ពាមកៅស៊ូ ប្រើគ្រាន់ឃ្លី វាយសំពង និងបាញ់សំដៅទៅលើពួកគាត់ ដែលធ្វើសមាធិបង្អត់អាហារបួងសួងសុំយុត្តិធម៌ និងសន្តិភាព។ ការវាយបង្ក្រាបនោះ បណ្ដាលឲ្យមនុស្ស ១១នាក់រងរបួស ក្នុងនោះរបួសធ្ងន់ចំនួន ៦នាក់ត្រូវបញ្ជូនទៅព្យាបាលនៅមន្ទីរពេទ្យ។
ក្នុងចំណោមអ្នករងរបួស ក៏មានអ្នកកាសែត មន្ត្រីសិទ្ធិមនុស្សអន្តរជាតិដែលឃ្លាំមើលសកម្មភាពបង្ក្រាបនោះផងដែរ។ ក្រៅពីនេះ សមត្ថកិច្ចក៏បានវាយឲ្យខូតខាតរថយន្តសង្គមស៊ីវិល ២គ្រឿង និងរឹបអូសយកម៉ូតូកង់បីរបស់ពលរដ្ឋ ២គ្រឿងថែមទៀត។
មុនប្រើអំពើហិង្សានេះ ភ្លើងអគ្គិសនី សម្រាប់បំភ្លឺនៅតាមបង្គោលជុំវិញរមណីយដ្ឋានវត្តភ្នំ ក៏ត្រូវបានកាត់ផ្ដាច់។
ស្ត្រីបឹងកក់វ័យចំណាស់ទាំងពីនាក់ បង្ហាញជំហរថា ពួកគាត់នឹងពិភាក្សាជាមួយមេធាវីជាថ្មីទៀតដើម្បី ដាក់ពាក្យបណ្ដឹងតាមស្ថាប័នជាតិផ្សេងទៀត ដូចជាក្រសួងយុត្តិធម៌ និងអង្គការសិទ្ធិមនុស្សអន្តរជាតិ ដើម្បីជួយផ្ដល់យុត្តិធម៌ឲ្យពួកគាត់ បើសិនជាតុលាការកំពូលមិនអាចយុត្តិធម៌ឲ្យពួកគាត់បាន នៅដើមខែតុលា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។