សាលាដំបូងរាជធានីភ្នំពេញ កាលពីថ្ងៃទី២៨ ខែមិថុនា បានចេញដីកាឃុំខ្លួនជនសង្ស័យចំនួន ៥នាក់ ជុំវិញបទល្មើសជួលស្រ្តីឲ្យពពោះជំនួស។
អ្នកនាំពាក្យសាលាដំបូងរាជធានីភ្នំពេញ លោក លី សុផាន់ណា ឲ្យកាសែតក្នុងស្រុកមួយដឹងថា ជនសង្ស័យទាំង ៥នាក់នេះ ត្រូវបានអយ្យការអមសាលាដំបូងរាជធានីភ្នំពេញ សម្រេចចោទប្រកាន់ពីបទ «ការជួញដូរមនុស្សដោយឆ្លងដែន និងបទអន្តរការីជាមួយស្រ្តីពពោះ»។ កាលពីថ្ងៃទី២១ ខែមិថុនា កម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជន សហការជាមួយកម្លាំងនគរបាលមូលដ្ឋាន បានចុះឆែកឆេរផ្ទះវីឡាលេខ ២A និងលេខ ៩A ផ្លូវលេខ ៣៤៨ ស្ថិតនៅក្នុងបុរី វិមានភ្នំពេញ ហើយបានឃាត់ខ្លួនមនុស្សសរុបចំនួន ៤៣នាក់ រាប់ទាំងកុមារផង និងបានរំដោះនារីរងគ្រោះចំនួន ៣៣នាក់។
ក្រោយពីការសាកសួររួច ស្រ្តីពពោះជំនួសចំនួន ៣៣នាក់ ត្រូវបានបញ្ជួនទៅមន្ទីរសង្គមកិច្ចរាជធានីភ្នំពេញ រីឯអ្នកមិនពាក់ព័ន្ធ បានអនុញ្ញាតឲ្យត្រឡប់ទៅផ្ទះវិញ។ នារីរងគ្រោះម្នាក់ ឲ្យដឹងថា នាងសម្រេចស៊ីឈ្នួលពរពោះជំនួសនេះ គឺដោយសារទទួលបានប្រាក់កំរៃចំនួន ១ម៉ឺនដុល្លារ ដោយផ្តល់ឲ្យខែដំបូងចំនួន ៥០០ដុល្លារ ខែបន្ទាប់ៗ បាន ៣០០ដុល្លារ ហើយរហូតដល់ទារកកើត ទើបផ្តល់ប្រាក់បន្ថែមដែលនៅសល់។
ករណីពពោះនេះមិនមែនជាករណីទីមួយនោះទេ គឺកាលពីថ្ងៃទី៣ ខែសីហា ឆ្នាំ ២០១៧ តុលាការរបបក្រុងភ្នំពេញ បានកាត់ទោស ស្ត្រីសញ្ជាតិអូស្ត្រាលីឈ្មោះ ឆាលស៍ ថាំមី អាឡេន (Charles Tammy Alayne) ឱ្យជាប់ពន្ធនាគារ ១៨ខែ និងពិន័យជាប្រាក់ ៤លានរៀល ដោយសារស្ត្រីជនជាតិអូស្ត្រាលីរូបនេះ បានជួលស្រីខ្មែរ ២នាក់ឱ្យពពោះកូនជំនួស និងបញ្ជូនក្មេងដែលកើតទៅឱ្យអតិថិជននៅក្រៅប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។