អាជ្ញាធរខេត្តសៀមរាបឃាត់ខ្លួនជនសង្ស័យបាញ់អ្នកសារព័ត៌មាន លោក ឈឿង ឈឹង ឱ្យរបួសធ្ងន់
2024.12.05
លោក ឈឿង ឈឹង អ្នកសារព័ត៌មានគេហទំព័រកម្ពុជាអភិវឌ្ឍន៍ ត្រូវខ្មាំងកាំភ្លើងបាញ់របួសធ្ងន់ នៅស្រុកជីក្រែងខេត្តសៀមរាប នៅថ្ងៃទី៤ ខែធ្នូ. ឆ្នាំ២០២៤។
រូប៖ អង្គការលីកាដផ្តល់ឱ្យ
រដ្ឋបាលខេត្តសៀមរាប កាលពីយប់ថ្ងៃទី៥ ខែធ្នូ អះអាងថា អាជ្ញាធរពាក់ព័ន្ធបានឃាត់ខ្លួនជនសង្ស័យម្នាក់ យកទៅសាកសួរពាក់ព័ន្ធនឹងការប៉ុនប៉ងមនុស្សឃាតដោយចេតនា។ អាជ្ញាធរអះអាងទៀតថា ជនសង្ស័យបានសារភាពថាបានប្រព្រឹត្តរឿងនេះ ដោយសារ «ទំនាស់បុគ្គល»។
តែទោះជាយ៉ាងណា រដ្ឋបាលខេត្តសៀមរាប មិនបានបញ្ជាក់ពីអត្តសញ្ញាណជនសង្ស័យថាជានរណា មានមុខរបរអ្វី រស់នៅទីណា ហើយមានគំនុំអ្វីនឹងអ្នកសារព័ត៌មាន ដែលជាជនរងគ្រោះនោះទេ។
ចំណែកសារព័ត៌មានក្នុងស្រុកផ្សាយថាជនសង្ស័យមានឈ្មោះ ស៊ី លឿយ អាយុ ៤០ឆ្នាំ រស់នៅភូមិសាលា ឃុំគោកធ្លកលើ ស្រុកជីក្រែង ខេត្តសៀមរាប។
អ្នកកាសែតជើងចាស់នៅខេត្តសៀមរាប លោក ឈឿង ឈឹង ធ្វើការឱ្យគេហទំព័រកម្ពុជាអភិវឌ្ឍន៍ត្រូវជនមិនស្គាល់មុខ ប្រើកាំភ្លើងច្នៃលបបាញ់ប្រហារឱ្យរបួសធ្ងន់ ក្នុងពេលលោកកំពុងចុះយកព័ត៌មានពីការកាប់ទន្ទ្រានព្រៃឈើឋិតក្នុងដែនជម្រកសត្វបឹងពែរ ក្នុងស្រុកជីក្រែង កាលពីល្ងាចថ្ងៃទី៤ ខែធ្នូ។ អ្នកកាសែតវ័យ ៦៣ឆ្នាំ រូបនេះត្រូវគ្រាប់កាំភ្លើងច្នៃ ធ្លាយពោះខាងឆ្វេង របួសធ្ងន់ និងកំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប។
ប្រពន្ធ លោក ឈឿង ឈឹង សង្ស័យថា ជនសង្ស័យអាចជាជនល្មើសកាប់ទន្ទ្រានព្រៃខុសច្បាប់ ហើយករណីនេះអាចជារឿងគំនុំព្រោះជនល្មើសកាប់ទន្ទ្រានព្រៃឈើមិនសប្បាយចិត្តនឹងការងាររបស់ប្ដីលោកស្រីនោះឡើយ។
មន្ត្រីសង្គមស៊ីវិលចាត់ទុកសកម្មភាពនេះ ជាការគំរាមកំហែងលើអ្នកសារព័ត៌មាន ដែលក្លាហានបកអាក្រាតពីបទល្មើសព្រៃឈើ៕
អត្ថបទពេញនិយម
RFA
- ប៉ូលិសថៃស៊ើបអង្កេតឃើញថា ករណីធ្វើឃាតលើលោក លិម គិមយ៉ា មានការរៀបចំជាប្រព័ន្ធ ដោយមានមេខ្លោងនៅកម្ពុជា
- ខ្មាន់កាំភ្លើងមិនទាន់ហ៊ានលាតត្រដាងមេខ្លោងនៅពីក្រោយ ព្រោះបារម្ភពីសុវត្ថិភាពគ្រួសារ
- អតីតតំណាងរាស្ត្រគណបក្សសង្គ្រោះជាតិ លោក លិម គិមយ៉ា ដែលរិះគន់រដ្ឋាភិបាលត្រកូល ហ៊ុន ត្រូវឃាតកបាញ់សម្លាប់នៅប្រទេសថៃ
- ជនសង្ស័យ ដែលបាញ់សម្លាប់លោក លិម គិមយ៉ា នៅបាងកក អាជ្ញាធរចាប់បាននៅក្នុងទឹកដីខ្មែរ
- កម្ពុជាបានប្រគល់ខ្លួនខ្មាន់កាំភ្លើងបាញ់សម្លាប់លោក លិម គិមយ៉ា ឱ្យភាគីថៃហើយ និងប្រកាសបទចោទភ្លាមៗ