សាលាដំបូងរាជធានីភ្នំពេញ កំពុងពិនិត្យលើចំណាត់ការបន្តលើសមាជិកព្រឹទ្ធសភាមកពីគណបក្ស សម រង្ស៊ី គឺអ្នកស្រី ថាក់ ឡានី ដែលមិនចូលខ្លួនបំភ្លឺនៅតុលាការនៅថ្ងៃទី៨ ខែសីហា តាមការកោះហៅ។ រីឯមេធាវីការពារក្ដីឲ្យអ្នកស្រី ថាក់ ឡានី ថាការមិនចូលបំភ្លឺនេះ ដោយសារបានដាក់ពាក្យស្នើសុំពន្យារពេលចូលបំភ្លឺក្រោមមូលហេតុសមរម្យ។
សំណុំរឿងលោកនាយករដ្ឋមន្ត្រី ហ៊ុន សែន ប្ដឹងសមាជិកព្រឹទ្ធសភាមកពីគណបក្ស សម រង្ស៊ី អ្នកស្រី ថាក់ ឡានី និងលោក សម រង្ស៊ី បានបោះជំហានទៅមុខយ៉ាងលឿន ទោះបីជាមេធាវីការពារក្ដីឲ្យអ្នកស្រី ថាក់ ឡានី សុំពន្យារពេលក្ដី។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា បានឲ្យដឹងតាមបណ្ដាញទំនាក់ទំនងតេឡេក្រាម (Telegram) នៅល្ងាចថ្ងៃទី៨ សីហា ថា តុលាការកំពុងពិនិត្យលើចំណាត់ការបន្តនៅបន្ទាប់ពីជនជាប់សង្ស័យឈ្មោះ ថាក់ ឡានី មិនបានចូលខ្លួនដើម្បីឲ្យតំណាងអយ្យការស្តាប់ចម្លើយលើបណ្ដឹងរបស់លោកមេធាវី គី តិច តំណាងឲ្យលោកនាយករដ្ឋមន្ត្រី ហ៊ុន សែន នៅរសៀលថ្ងៃនេះ។
លោក លី សុផាណា បន្ថែមថា តំណាងអយ្យការមិនអនុញ្ញាតលើការស្នើសុំពន្យារពេលស្តាប់ចម្លើយរបស់មេធាវី សំ សុគង់ ដោយសារការស្នើសុំពន្យារពេលនេះមិនមានមូលដ្ឋានគតិយុត្តិ និងមិនមានមូលហេតុរបស់សាមីខ្លួនច្បាស់លាស់។
កាលពីថ្ងៃព្រហស្បតិ៍ ទី៤ ខែសីហា កន្លងទៅ មេធាវីការពារក្ដីឲ្យអ្នកស្រី ថាក់ ឡានី គឺលោក សំ សុគង់ បានដាក់លិខិតជូនសាលាដំបូងរាជធានីភ្នំពេញ ដើម្បីសុំពន្យារពេលចូលបំភ្លឺ ក្រោមមូលហេតុចំនួន៣ គឺទី១ ដោយសារមេធាវីទើបទទួលបានការពឹងពាក់ ដូច្នេះមិនទាន់សិក្សាស៊ីជម្រៅ។ ទី២ ពេលវេលានៃការកោះហៅហាក់ដូចជាខ្លីពេក ដែលមេធាវី និងកូនក្តីមិនមានពេលគ្រប់គ្រាន់ដើម្បីពិគ្រោះផ្លូវច្បាប់ និងទី៣ មេធាវីជាប់រវល់ខ្លាំងនឹងសំណុំរឿងផ្សេងៗជាច្រើនទៀត។
លោកមេធាវី សំ សុគង់ ឲ្យដឹងថា ការដែលតុលាការបដិសេធការស្នើសុំពន្យារពេលនេះ គឺមិនទាន់មានលក្ខណៈត្រឹមត្រូវនោះទេ៖«អ្វីដែលយើងបានដាក់ទៅសុំពន្យារពេលនេះ គឺជានីតិវិធីដែលមានចែងក្នុងច្បាប់ និងមានមូលហេតុសមស្រប និងមានមូលដ្ឋានគតិយុត្តិផងដែរ។ ដោយសារមូលហេតុសមស្របនេះហើយទើបយើងសុំពន្យារពេល»។
ទន្ទឹមគ្នានេះដែរ អ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត លើកឡើងថា តុលាការគួរតែអនុញ្ញាតឲ្យមានការពន្យារពេល ប្រសិនបើការស្នើសុំនោះមានមូលហេតុសមរម្យ។ លោកបន្ថែមថា ប្រសិនបើតុលាការនៅតែបន្តនីតិវិធីនោះ គឺជាការបំពានសិទ្ធិជនសង្ស័យ៖ «ខ្ញុំគិតថា កុំអោយមានការចោទប្រកាន់ផ្សេងៗរឿងថា តុលាការឋិតក្រោមសម្ពាធអ្នកនយោបាយ ឬក្រោមសម្ពាធអ្នកនេះ ក្រោមសម្ពាធអ្នកនោះ យើងត្រូវពិនិត្យទៅលើផ្លូវច្បាប់ បើមូលហេតុនៃការសុំពន្យាររបស់គេវាសមរម្យ វាគួរណាស់តែអនុញ្ញាតក្នុងការពន្យារ ឬលើកពេលក្នុងការសាកសួរ ដើម្បីធ្វើយ៉ាងម៉េចឲ្យមានយុត្តិធម៌សម្រាប់ភាគីទាំងសងខាង»។
មន្ត្រីសិទ្ធិមនុស្សរបស់អង្គការលីកាដូ ក៏បានសម្ដែងការសោកស្ដាយនៅពេលអ្នកនយោបាយចោទប្រកាន់ និងប្រើប្រាស់យន្តការតុលាការ ដើម្បីវាយបំបាក់គ្នាទៅវិញទៅមកបែបនេះ។
សាលាដំបូងរាជធានីភ្នំពេញ កោះហៅអ្នកស្រី ថាក់ ឡានី ឲ្យចូលបំភ្លឺនៅរសៀលថ្ងៃទី៨ សីហា និងលោក សម រង្ស៊ី នៅព្រឹកថ្ងៃទី១៩ សីហា ខាងមុខ ជុំវិញពាក្យបណ្ដឹងរបស់លោក ហ៊ុន សែន ប្ដឹងអ្នកទាំងពីរចំពោះការចោទប្រកាន់ថា លោក ហ៊ុន សែន ជាអ្នកនៅពីក្រោយនៃឃាតកម្មលើលោកបណ្ឌិត កែម ឡី។ មន្ត្រីគណបក្សប្រឆាំង និងអង្គការសង្គមស៊ីវិល យល់ឃើញថា អ្វីដែលរដ្ឋាភិបាលគួរធ្វើ គឺពន្លឿនការរកយុត្តិធម៌ជូនបណ្ឌិត កែម ឡី និងក្រុមគ្រួសារ ដើម្បីបង្ហាញភាពស្អាតស្អំរបស់ខ្លួន និងបំបាត់ការចោទប្រកាន់នានារបស់សាធារណជន។
លោក ហ៊ុន សែន ប្ដឹងសុំឲ្យតុលាការផ្ដន្ទាទោសលោក សម រង្ស៊ី និងអ្នកស្រី ថាក់ ឡានី តាមផ្លូវច្បាប់ និងទាមទារសំណងជំងឺចិត្តក្នុងម្នាក់ចំនួន ១០០រៀល។ ចំណែកលោក សម រង្ស៊ី កាលពីថ្ងៃទី៣ ខែសីហា នៅតែប្រកាន់ជំហរថា រដ្ឋាភិបាលជាអ្នកនៅពីក្រោយឃាតកម្មលើបណ្ឌិត កែម ឡី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។