បណ្ដាញ​សារព័ត៌មាន​ធំៗ​ចាប់​អារម្មណ៍​សវនាការ​លោក កឹម សុខា និង​ថា ជា​សំណុំរឿង​នយោបាយ

ដោយ ខែ សុណង
2020-01-19
អ៊ីម៉ែល
មតិ
Share
បោះពុម្ព
លោក កឹម សុខា ប្រធាន​គណបក្ស​សង្គ្រោះជាតិ ក្នុង​ថ្ងៃ​សវនាការ នា​សាលាដំបូង​រាជធានី​ភ្នំពេញ នៅ​ថ្ងៃ​ទី១៥ ខែ​មករា ឆ្នាំ​២០២០។
លោក កឹម សុខា ប្រធាន​គណបក្ស​សង្គ្រោះជាតិ ក្នុង​ថ្ងៃ​សវនាការ នា​សាលាដំបូង​រាជធានី​ភ្នំពេញ នៅ​ថ្ងៃ​ទី១៥ ខែ​មករា ឆ្នាំ​២០២០។
RFA

សារព័ត៌មាន​ក្នុងស្រុក​និង​ក្រៅ​ស្រុក បាន​ចាប់អារម្មណ៍​យក​ព័ត៌មាន និង​រាយការណ៍​ព័ត៌មាន​អំពី សវនាការ​របស់​លោក កឹម សុខា ប្រធាន​គណបក្ស​សង្គ្រោះ​ជាតិ កាលពី​ថ្ងៃទី១៥ និង ១៦ មករា​។

ក្នុង​អំឡុង​ពេល​សវនាការ​សំណុំរឿង លោក កឹម សុខា ដ៏​មាន​ប្រជាប្រិយភាព​ម្នាក់ បណ្ដាញ​សារព័ត៌មាន​ជាតិ និង​អន្តរជាតិ ជាច្រើន​បាន​ចុះផ្សាយ​ព្រោងព្រាត ពី​ព្រឹត្តិការណ៍​សវនាការ​ប្រវត្តិសាស្ត្រ​មួយ​នេះ​។ ក្នុង​ការ​យក​ព័ត៌មាន​ជុំវិញ​សវនាការ​នេះ គេ​មើល​ឃើញ​មាន​និន្នាការ​ពីរ។ ទី​១ សារព័ត៌មាន​ដែល​កាន់ជើង​រដ្ឋាភិបាល​លោក ហ៊ុន សែន បាន​សរសេរ​អត្ថបទ ដោយ​ផ្នែក​លើ​មេធាវី​រដ្ឋាភិបាល​ដែល​បាន​ដាក់​បន្ទុក​លើ លោក កឹម សុខា ចំណែក​សារព័ត៌មាន​ឯករាជ្យ​វិញ សរសេរ​ផ្តោត​លើ​ទស្សនវិស័យ​របស់​សង្គម​ស៊ីវិល មេធាវី​លោក កឹម សុខា មតិ លោក កឹម សុខា ផ្ទាល់ និង​ពី​ប្រតិកម្ម​សហគមន៍​អន្តរជាតិ។

ក្នុង​សវនាការ​ថ្ងៃ​ទី​១ គឺ​ថ្ងៃទី​១៥ មករា សារព័ត៌មាន​ស្វីតញូ (Swift News) ហ្វ្រេសញូវ (Fresh New) ដើម​អំពិល និង​សារព័ត៌មាន​ថ្មីៗ ដែល​នាយករដ្ឋមន្ត្រី ហ៊ុន សែន ថា ជា​សារព័ត៌មាន​រហ័ស​ទាន់​ចិត្ត បាន​រួម​គ្នា​បញ្ចេញ​អត្ថបទ​មួយ​ថា ជា​លិខិត​មិត្ត​អ្នកអាន ដាក់​ចំណងជើង​ថា ស្នៀត​របស់​ក្រុម​ប្រឆាំង គឺ​ពេល​ទឹក​ដល់​ច្រមុះ​ទើប​ស្រែក​រក​កិច្ច​សន្ទនា។ សារព័ត៌មាន​ទាំងនេះ ផ្សាយ​ថា សំណុំរឿង​លោក កឹម សុខា ដែល​ជាប់ចោទ​ពី​បទ​ក្បត់ជាតិ និង​ជា​ទោស​ព្រហ្មទណ្ឌ​ដ៏​ធ្ងន់​អាច​ថា រើខ្លួន​មិន​រួច ឥឡូវនេះ ពួកគេ​ខំ​បង្វែរ​ទៅជា​រឿង​នយោបាយ ហើយ​ងាក​មក​រក​ការសន្ទនា​ដើម្បី​បញ្ចប់​ទំនាស់ ជា​ជាង ការ​កាត់ទោស​តាម​ផ្លូវ​តុលាការ​ទៅវិញ។

សារព័ត៌មាន​ស្វីតញ៉ូ (Swift News) ហ្វ្រេសញូវ (Fresh New) ដើម​អំពិល និង​សារព័ត៌មាន​ថ្មីៗ សុទ្ធតែ​ត្រូវ​បាន លោក ហ៊ុន សែន ថា សារព័ត៌មាន​ទាំងនេះ មាន​វិជ្ជាជីវៈ ដែល​ជឿ​ទុកចិត្ត​បាន​និង​ផ្សព្វផ្សាយ​រហ័ស​ទាន់​ចិត្ត៖ «ដើម្បី​រក​រក្សា​តម្លៃ​សេចក្ដីថ្លៃថ្នូរ​និង​ការ​ជឿជាក់ ខ្ញុំ​សុំ​ដាក់​ចេញ​នូវ​ពាក្យ​ស្លោក អ្នកសារព័ត៌មាន​កុំ​បំពាន​សិទ្ធិ​អ្នកដទៃ កុំ​បំភ្លៃ​ការពិត បើសិនជា​យើង​ចង់​ឱ្យ​គេ​គោរព​សិទ្ធិ​របស់​អ្នកសារព័ត៌មាន ប៉ុន្តែ​អ្នកសារព័ត៌មាន​មិន​គោរព​សិទ្ធិ​អ្នកដទៃ តើ​យើង​ត្រូវ​ទទួល​អី​? សិទ្ធិ​សេរីភាព​ស្មើគ្នា ច្បាប់​ស្មើគ្នា ធ្វើ​ចៅក្រម​ក៏​ខ្លួនឯង ស្រាវជ្រាវ​អង្គហេតុ​ឬ​អង្គច្បាប់​ក៏​វែកញែក​បកស្រាយ​ច្បាប់​ខ្លួនឯង​ទាំងអស់ ក្នុង​ពេល​សូម្បីតែ​នាយករដ្ឋមន្ត្រី​គ្មាន​សិទ្ធិ​បកស្រាយ​ច្បាប់​ទេ អស់​លោកអ្នក​ដែល​មាន​សិទ្ធិ​បកស្រាយ​ច្បាប់ គឺ​ក្រុមប្រឹក្សា​ធម្មនុញ្ញ​ឯណោះ ប៉ុន្តែ​អ្នកសារព័ត៌មាន​របស់​យើង​បាន​ដើរ​តួនាទី​ជ្រុល​ហួស»

ដោយឡែក វិទ្យុ និង​សារព័ត៌មាន​ឯករាជ្យ ដែល​លោក ហ៊ុន សែន មិន​បាន​សរសើរ​នោះ បាន​ជ្រើសរើស​ការ​យក​វិធី​រាយការណ៍​ផ្សេង​ពី​គ្នា។

វិទ្យុ​សំឡេង​សហរដ្ឋអាមេរិក វី​អូអេ (VOA) បាន​ឆ្លៀត​ចុះទៅ​សម្ភាសន៍​ផ្ទាល់​ដល់​គេហដ្ឋាន​លោក កឹម សុខា មុន​ពេល​ដែល​លោក​ធ្វើដំណើរ​ចេញទៅ​សាលាដំបូង​រាជធានី​ភ្នំពេញ​នៅ​ថ្ងៃ​ទី​១៦ មករា ដែល​ជា​ថ្ងៃ​សវនាការ​ទី​២​។ លោក កឹម សុខា ឆ្លើយ​ទៅ​នឹង​សំណួរ​ថា តើ​លោក​សង្ឃឹមថា បាន​យុត្តិធម៌​ទេ​? លោក​តប​ថា កាលណា​ដែល​គ្មាន​កំហុស​នោះ​ហើយ​ជា​យុត្តិធម៌​ក្នុង​ចិត្ត វា​ជា​ជោគជ័យ​របស់​លោក៖ «គោលដៅ​របស់ខ្ញុំ​បាន​កំណត់​ហើយ គឺ​ឆ្ពោះ​ទៅ​រក​ការបោះឆ្នោត​អត់​មាន​ធ្វើដំណើរ​ឆ្ពោះ​ទៅ​រក​បដិវត្តន៍​ពណ៌​ដូច​ការចោទប្រកាន់​នោះ​ទេ​។ ខ្ញុំ​ជឿ​ថា កាលណា​យើង​អត់​ខុស​យើង​មាន​យុត្តិធម៌ ទី​១​គឺ​យុត្តិធម៌​ក្នុង​ចិត្ត​ហើយ​ស្រេច ហើយ​ដូច្នេះ​ហើយ​ជា​ជោគជ័យ​របស់​យើង»

ចំណែកឯ វិទ្យុ​សំឡេង​ប្រជាធិបតេយ្យ​វីអូឌី (VOD) ដែល​កំពុង​ធ្វើ​ការ​នៅ​ក្នុង​ស្រុក​ក្រៅពី​បាន​ផ្សាយ​បន្ត​ផ្ទាល់ ឬ​Live video ពី​ទិដ្ឋភាព​តុលាការ​នៅ​ថ្ងៃ​សវនាការ លោក កឹម សុខា ក៏បាន​ព្យាយាម​រក​ការ​ឆ្លើយតប​ពី​ភាគី​រដ្ឋាភិបាល​ចំពោះ ចំណាត់​ការ​លើ​ប្រទេស​៣៦ ដែល​រង​ការ​ចោទ​ថា ពាក់ព័ន្ធ​សំណុំរឿង​លោក កឹម សុខា ដែល​មេធាវី​រដ្ឋាភិបាល លោក គី តិច បាន​លើក​ឡើង​នោះ​។ ប៉ុន្តែ​មន្ត្រី​អ្នកនាំពាក្យ​ក្រសួងការបរទេស អះអាង​ថា កម្ពុជា​មិនទាន់​មាន​ចំណាត់ការ ឬ​ការ​កោះហៅ​មន្ត្រី​នៃ​ប្រទេស​ទាំង​នោះ​មក​សួរនាំ​នៅឡើយ។

សារព័ត៌មាន​ដែល​នាយករដ្ឋមន្ត្រី​សរសើរ​ថា មាន​វិជ្ជាជីវៈ នៅ​ក្រោយ​បញ្ចប់​សវនាការ​លោក កឹម សុខា បាន​ផ្សាយ​លាង​សំដី​មេធាវី​រដ្ឋាភិបាល លោក គី តិច ដែល​ព្យាយាម​បកស្រាយ​ឡើងវិញ​ថា ប្រទេស​ទាំង​៩​រួមមាន ឥណ្ឌូណេស៊ី យូហ្គោស្លាវី ស៊ែប៊ី អូស្ត្រាលី អាមេរិក កាណាដា សហភាព​អឺរ៉ុប តៃវ៉ាន់ និង​ឥណ្ឌា មិន​ពាក់ព័ន្ធ​បទល្មើស​ឬ​ការប្រព្រឹត្ត​របស់​លោក កឹម សុខា ឡើយ គឺ​ប្រទេស​ទាំងនោះ​គ្រាន់តែ​ពាក់ព័ន្ធ​នឹង​សំណុំរឿង​លោក កឹម សុខា ប៉ុណ្ណោះ ដោយ​ថា សារព័ត៌មាន​ខ្លះ​យក​ទៅ​ចុះផ្សាយ​ដោយ​មិន​បាន​ស្វែងយល់​ឱ្យ​ពិតប្រាកដ។

ចំណែក សារព័ត៌មាន​អន្តរជាតិ​ធំៗ ស្ទើរ​ពេញ​ពិភពលោក​ដូចជា សហរដ្ឋអាមេរិក កាណាដា អង់គ្លេស អូស្ត្រាលី និង​ជប៉ុន​ជាដើម ក៏​ចាប់អារម្មណ៍​នឹង​សវនាការ​លោក កឹម សុខា ដែរ។

បណ្ដាញ​សារព័ត៌មាន​អន្តរជាតិ (BBC) អូស្ត្រាលី បាន​ចុះផ្សាយ និង​វិភាគ​ពី​ការ​បដិសេធ​របស់ លោក កឹម សុខា នៅ​ថ្ងៃ​ដំបូង​ដែល​លោក​ចូលខ្លួន​ជំនុំជម្រះ​នៅ​តុលាការ។ លោក កឹម សុខា បដិសេធ​ថា​លោក​មិនបាន​ឃុបឃិត​ជាមួយ​ប្រទេស​មហាអំណាច​ដើម្បី​ផ្ដួល​រំលំ​រដ្ឋាភិបាល​កម្ពុជា​ទេ។

បណ្ដាញ​សារព័ត៌មាន​អន្តរជាតិ ឌឹ ញ៉ូវ យ៉ក ថាមស៍ (The New York Times) និង​អាលច្សាហ្សារ៉ា (Aljazeera) វិញ យល់​ដូចគ្នា ថា​ការ​កាត់​ក្តី​នេះ ជា​រឿង​នយោបាយ គ្មាន​មូលដ្ឋាន ដែល​ជា​ការ​ធ្វើ​ទុក្ខបុកម្នេញ​គណបក្សប្រឆាំង និង​ជា​ការ​រង​សម្ពាធ​ទណ្ឌកម្ម​ពី​អន្តរជាតិ។

អាលច្សាហ្សារ៉ា (Aljazeera) ដកស្រង់​ថា ចំណុច​ចុងក្រោយ ក្រុម​អ្នកធ្វើការ​ផ្នែក​សិទ្ធិមនុស្ស​យល់ថា ការ​កាត់ទោស លោក កឹម សុខា គឺជា​ឆាកល្ខោន ដែល​មានន័យ​សម្រាប់​គណបក្ស​ដែល​ដឹកនាំ​ដោយ​លោកនាយក​រដ្ឋមន្ត្រី ហ៊ុន សែន ដើម្បី​បន្ត​ក្ដោប​ក្ដាប់​អំណាច​របស់​ខ្លួន។

ចំណែក​បណ្ដាញ​សារព័ត៌មាន​ដ៏​ធំ​របស់​អាឡឺម៉ង់ ឌីដាប់ប៊ែលយូ (DW) ក៏បាន​តាមដាន​យ៉ាង​យកចិត្តទុកដាក់​ចំពោះ​ព្រឹត្តិការណ៍​សវនាការ​នេះ​ដែរ​។ សារព័ត៌មាន​នេះ សរសេរ​ថា ការ​កាត់ទោស​មេដឹកនាំ​បក្ស​ប្រឆាំង​ដ៏​លេចធ្លោ​របស់​កម្ពុជា ត្រូវ​បាន​គេ​មើលឃើញ​ថា ជា​សញ្ញា​មួយ​ដែល​បង្ហាញ​ថា លទ្ធិប្រជាធិបតេយ្យ​កំពុង​រង​ការ​គំរាមកំហែង​នៅ​ក្នុង​ប្រទេស​មួយ​ដែល​គ្រប់គ្រង​ដោយ​បុរស​ខ្លាំង​លោក ហ៊ុន សែន ដែល​កាន់អំណាច ៣៥​ឆ្នាំ​។ ក្រុម​អ្នក​រិះគន់ និយាយ​ថា ការ​កាត់ទោស​នេះ គឺ​ជា​សៀក។

អ្នកឃ្លាំមើល​បញ្ហា​សង្គម និង​មន្ត្រី​សង្គម​ស៊ីវិល​យល់ថា មេដឹកនាំ​របប​ក្រុងភ្នំពេញ​នៃ​គណបក្ស​ប្រជាជន​កម្ពុជា បាន​ប្រើប្រាស់​ប្រព័ន្ធ​ផ្សព្វផ្សាយ​របស់​ខ្លួន វាយប្រហារ​សារព័ត៌មាន​ឯករាជ្យ​ហ៊ាន​ផ្សាយ​ការពិត និង​ដើម្បី​បន្សាប​ឥទ្ធិពល​គណបក្សប្រឆាំង​។ ក្នុង​សវនាការ​លោក កឹម សុខា នេះ តុលាការ​របស់​រដ្ឋាភិបាល​លោក ហ៊ុន សែន មិនបាន​អនុញ្ញាត​ឱ្យ​អ្នកសារព័ត៌មាន​ចូល​ក្នុង​បន្ទប់​សវនាការ​នោះ​ទេ។

នៅមុន​ការ​បោះឆ្នោត​ជាតិ​ការធានា​សិទ្ធិ​សេរីភាព​ពលរដ្ឋ ដើម្បី​ទទួល​បាន​ព័ត៌មាន​ពិត​បាន​បន្ត​ធ្លាក់​ចុះ​ក្នុង​នោះ​រាប់ទាំង​ការ​ធ្វើទុក្ខបុកម្នេញ​ស្ថាប័ន​សារព័ត៌មាន អ្នកសារព័ត៌មាន​ឯករាជ្យ ការ​បិទ​ការផ្សាយ​បន្ត​នៃ​វិទ្យុ​អន្តរជាតិ ការ​បិទទ្វារ​ការិយាល័យ​ប្រចាំ​នៅ​កម្ពុជា​នៃ​សារព័ត៌មាន​សំខាន់​២ គឺ អាស៊ីសេរី និង The Cambodia Daily ការ​ចាប់ខ្លួន​អតីត​អ្នកសារព័ត៌មាន​អាស៊ីសេរី​២​នាក់​ដាក់​ពន្ធនាគារ និង​ការ​តាម​ចាប់ខ្លួន​អ្នកសារព័ត៌មាន​មួយ​ចំនួន​ទៀត។

អង្គការ​ជាតិ និង​អន្តរជាតិ​បាន​វាយតម្លៃ​ថា សេរីភាព​សារព័ត៌មាន​នៅ​កម្ពុជា បាន​ធ្លាក់​ចុះ​ដុនដាប​ខ្លាំង​ចាប់ពី​ចុង​ឆ្នាំ​២០១៧ រហូត​មក​ដល់​បច្ចុប្បន្ន ដោយសារតែ​ការ​បង្ក្រាប​ឥត​ត្រា​ប្រណី​ពី​សំណាក់​របប​ក្រុង​ភ្នំពេញ ទៅលើ​ស្ថាប័ន និង​អ្នកសារព័ត៌មាន ដែល​មិន​ព្រម​ធ្វើ​តាម​ខ្សែ​ញាក់​របស់​របប​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល