លោក សម រង្ស៊ី ប្រធានគណបក្ស លោក កឹម សុខា អនុប្រធានគណបក្សសង្គ្រោះជាតិ និងលោក រ៉ុង ឈុន ប្រធានសហភាពសហជីពកម្ពុជា ត្រូវបានកោះហៅទៅសាកសួរពាក់ព័ន្ធនឹងការញុះញង់អោយប្រព្រឹត្តបទឧក្រិដ្ឋ និងបង្កអស្ថិរភាពសង្គម ដែលទាក់ទងនឹងការធ្វើកូដកម្មបាតុកម្ម។
បន្ទាប់ពីបានសាកសួរអស់ជាច្រើនម៉ោង ទាំងមេដឹកនាំគណបក្សសង្គ្រោះជាតិ និងមេដឹកដឹកនាំសហជីព ត្រូវអនុញ្ញាតអោយត្រឡប់មកវិញ គឺពុំមានការចាប់ខ្លួនណាមួយឡើយ។
មានមនុស្សរាប់ពាន់នាក់បានទៅចូលរួមតាមដានការកោះហៅសាកសួរនោះ។
សូមស្ដាប់សេចក្ដីរាយការណ៍របស់អ្នកស្រី សុ ជីវី អំពីស្ថានភាពនៅខាងមុខតុលាការក្រុងដូចតទៅ៖
មេដឹកនាំគណបក្សសង្គ្រោះជាតិ ហៅការកោះហៅសាកសួររបស់តុលាការក្រុងភ្នំពេញ និងការចោទប្រកាន់រូបលោក ថាជាសំណុំរឿងដែលកើតឡើងពីសម្ពាធអ្នកនយោបាយ។
អនុប្រធានគណបក្សសង្គ្រោះជាតិ លោក កឹម សុខា ថ្លែងនៅចំពោះមុខអ្នកសារព័ត៌មាននៅទីស្នាក់ការបក្ស គឺពីចេញពីតុលាការថា បើតាមការសាកសួររបស់ព្រះរាជអាជ្ញា លោកជឿជាក់ថា រូបលោកក៏ដូចលោក សម រង្ស៊ី គឺពុំជាប់ពាក់ព័ន្ធនឹងការបង្កហិង្សាណាមួយឡើយ ប៉ុន្តែប្រសិនបើមានសម្ពាធនយោបាយនោះ អាចនឹងមានបញ្ហាបន្តទៅមុខទៀត។
ការសាកសួរមេដឹកនាំបក្សសង្គ្រោះជាតិ និងមេដឹកនាំសហជីពនៅពេលនេះ គឺជាការសាកសួរលើកដំបូងទៅតាមរបាយការណ៍របស់អាជ្ញាធររដ្ឋាភិបាល រួមមានរបាយការណ៍របស់នគរបាល កងរាជអាវុធហត្ថ និងរបាយការណ៍របស់សាលារាជធានីភ្នំពេញ ដែលបង្ហាញឈ្មោះមនុស្សមួយចំនួនពីការជាប់ពាក់ព័ន្ធរបស់ពួកគេទៅនឹងអំពើហិង្សា ដែលកើតចេញពីការធ្វើបាតុកម្មនាពេលកន្លងទៅ។
វិទ្យុអាស៊ីសេរីពុំអាចសុំការអធិប្បាយពីព្រះរាជអាជ្ញាសាលាដំបូងរាជធានីភ្នំពេញ លោក ហៀង សុភ័ក្រ្ត បានទេ នៅរសៀលថ្ងៃទី១៤ ខែមករា។
មេធាវីការពារអ្នកដឹកនាំគណបក្សសង្គ្រោះជាតិ និងលោក រ៉ុង ឈុន គឺលោក កែត ឃី មានប្រសាសន៍ថា បន្ទាប់ពីសាកសួរ ព្រះរាជអាជ្ញាពុំបានបញ្ជាក់ថា នឹងការកោះហៅជាថ្មី ឬទម្លាក់ចោលសំណុំរឿងនេះឡើយ។
ចំពោះករណីហិង្សាដែលកើតឡើងនៅក្នុងពេលធ្វើបាតុកម្មរបស់ក្រុមកម្មករកាលពីថ្ងៃទី២ និងទី៣ ខែមករា គណបក្សសង្គ្រោះជាតិ បានលើកឡើងថា គឺជាការបង្កដោយអាជ្ញាធរដែលទទួលភារកិច្ចបង្ក្រាបការតវ៉ារបស់កម្មករ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។