អ្នក​តំណាង​រាស្ត្រ​គណបក្ស​ប្រឆាំង​មិន​ទទួល​យក​សាល​ក្រម​របស់​តុលាការ​កំពូល

ដោយ ហេង រស្មី
2019-10-28
អ៊ីម៉ែល
មតិ
Share
បោះពុម្ព
លោក ញ៉យ ចំរើន និង​ជា​តំណាង​រាស្ត្រ​គណបក្ស​សង្គ្រោះ​ជាតិ ផ្ដល់​បទសម្ភាសន៍​ដល់​វិទ្យុ​អាស៊ីសេរី នៅ​ខែ​មិថុនា ឆ្នាំ​២០១៤។
លោក ញ៉យ ចំរើន និង​ជា​តំណាង​រាស្ត្រ​គណបក្ស​សង្គ្រោះ​ជាតិ ផ្ដល់​បទសម្ភាសន៍​ដល់​វិទ្យុ​អាស៊ីសេរី នៅ​ខែ​មិថុនា ឆ្នាំ​២០១៤។
Photo: RFA

អ្នក​តំណាង​រាស្ត្រ​គណបក្ស​សង្គ្រោះ​ជាតិ​ មិន​ទទួល​យក​សាល​ក្រម​របស់​តុលាការ​កំពូល ​ដែល​បាន​សម្រេច​ផ្ដល់​សំណង​ចំនួន ៥០លានរៀលក្នុងម្នាក់ ​ក្នុង​សំណុំ​រឿង​ប្រព្រឹត្ត​អំពើ​ហិង្សា​វាយដំ​ទៅ​លើ​អ្នក​តំណាង​រាស្ត្រ​ពីរ​រូប​កាល​ពី ៤ឆ្នាំ​មុន។ មន្ត្រី​សិទ្ធិមនុស្ស​ចាត់​ទុក​ថា​ ការ​ផ្ដល់​សំណង​រដ្ឋប្បវេណី​ក្នុង​រឿង​ព្រហ្មទណ្ឌ​នេះ​ហាក់​បីដូច​ជា​ស្រាល​ពេក​ចំពោះ​ជន​ដៃ​ដល់។

អ្នក​តំណាង​រាស្ត្រ​គណបក្ស​សង្គ្រោះ​ជាតិ​លោក​ គង់ សភា​ ប្រាប់​អាស៊ី​សេរី​ថា​ សាល​ក្រម​របស់​តុលាការ​កំពូល មាន​ភាព​អយុត្តិធម៌​ចំពោះ​លោក​ជា​អ្នក​តំណាង​រាស្ត្រ​។​លោក​បញ្ជាក់​ថា​ លោក​ ចង់​ឲ្យ​តុលាការ​នៃ​របប​ក្រុង​ភ្នំពេញ​ផ្ដន្ទាទោស​អង្គរក្ស​លោក​ហ៊ុន សែន​អោយ​ជាប់​ពន្ធនាគារ​ជាង​ការ​ទទួល​យក​សំណង​រដ្ឋប្បវេណី៖ «វា​មើល​ឃើញ​ថា​ យុត្តិធម៌​ដែល​ពួក​ខ្ញុំ​កំពុង​រង់ចាំ​នេះ​ពុំ​អាច​ទទួល​យក​បាន​ពី​សំណាក់​តុលាការ​បច្ចុប្បន្ន​ដែល​ដឹក​នាំ​ដោយ​ជន​ផ្ដាច់​ការ​ទេ​ ហើយ​ខ្ញុំ​សង្ឃឹម​ថា ថ្ងៃ​ណា​មួយ​ប្រជារាស្ត្រ​នឹង​បោះ​ឆ្នោត​ជ្រើសរើស​រដ្ឋាភិបាល​មួយ​ដែល​មាន​ឆន្ទៈ បម្រើ​រាស្ត្រ​ ពុំ​មាន​ស្តង់ដារ​ពីរ​ហើយ​ស្នើ​ឲ្យ​តុលាការ​នោះ​ដោយ​ឯករាជ្យ​នឹង​យុត្តិធម៌​ត្រឹមត្រូវ​អាច​ជឿ ជំនឿ​ទុក​ចិត្ត​ដល់​ជន​រង​គ្រោះ​ទាំង​អស់​គ្នា​។​ខ្ញុំ​នឹង​ប្ដឹង​សើ​រើ​នូវ​បណ្ដឹង​នេះ ដើម្បី​ទាមទារ​រក​រក​យុត្តិធម៌​ដល់​ខ្ញុំ​ ហើយ​ខ្ញុំ​សំណូម​ពរ​ដល់​តុលាការ​ដែល​ឯករាជ្យ​នេះ​អោយ​ស៊ើប​អង្កេត​រក​ជន​ដៃដល់»

តុលាការ​កំពូល​កាល​ពី​ថ្ងៃ​ទី២៨ តុលា បាន​សម្រេច​ផ្ដល់​សំណង​រដ្ឋប្បវេណី​ចំនួន ២០លាន​រៀល​ក្នុង​ម្នាក់ៗ បន្ថែម​ទៀត​ មាន​ន័យ​ថា សំណង​សរុប​ទាំង​អស់​មាន​ចំនួន ៥០លាន​រៀល​ក្នុង​ម្នាក់ៗ គឺ​ជាង ១ម៉ឺន​ដុល្លារ​ទៅ​ឱ្យ​ជន​រង​គ្រោះ​​ជា​អ្នក​តំណាង​រាស្ត្រ​គណបក្ស​ប្រឆាំង ២នាក់។

អនុប្រធាន​អង្គការ​លីកាដូ​ទទួល​បន្ទុក​ឃ្លាំ​មើល​ការ​រំលោភ​សិទ្ធិមនុស្ស​ លោក​ អំ សំអាត ប្រាប់​អាស៊ី​សេរី​ថា​ ការ​ផ្ដន្ទាទោស​នេះ​ហាក់​បី​ដូច​ជា​ស្រាល​បើ​ធៀប​ទៅ​ហ្នឹង​ទៅ​លើ​អ្នក​ផ្សេងទៀត​ ដូចជា​សំណុំ​រឿង​ចោទ​ប្រកាន់​លើ​សកម្មជន​បក្ស​ប្រឆាំង និង​សកម្មជន​ដីធ្លី​ជា​ដើម៖ «ទោះ​ជា​យ៉ាង​ណា​ខ្ញុំ​គិត​ថា​ សំណង​ទាំង​អស់​នេះ​វា​គ្រាន់តែ​ជា​ការ​មួយ​ដែល​សម្រេច​ធ្វើ​ឲ្យ​ឃើញ​ថា​ តុលាការ​កំពូល​បាន​យក​ចិត្ត​ទុកដាក់​ទៅ​លើ​ករណី​នេះ​។ក៏​ប៉ុន្តែ​យើង​គិត​ពី​ភាព​យុត្តិធម៌​ហើយ​នឹង​វិរេចនកម្ម​ ឬក៏​ការ​ឈឺ​ចាប់​របស់​ជន​រង​គ្រោះ​ មាន​តែ​ជន​រង​គ្រោះ​ទេ​ដែល​ដឹង​ថា​អាច​ទទួល​យក​បាន​ដែរ ឬ​អត់»

អាស៊ី​មិន​ទាន់​សុំ​ការ​ពន្យល់​ជុំវិញ​ការ​រិះគន់​លើ​ការ​ចេញ​សាល​ក្រម​លើ​ករណី​វាយ​ដំ​អ្នក​តំណាង​សាស្ត្រ ពី​មន្ត្រី​​តុលាការ​កំពូល​ថា យ៉ាង​ណា​នៅ​ឡើយ​នៅ​ថ្ងៃ​ទី២៩ តុលា។

កាលពី​ថ្ងៃ​ទី​២៦ តុលា ឆ្នាំ​២០១៥ កន្លង​ទៅ អ្នក​តំណាង​រាស្ត្រ​គណបក្ស​សង្គ្រោះ​ជាតិ លោក គង់ សភា និង​លោក ញ៉យ ចំរើន ត្រូវ​កង​អង្គរក្ស​លោក ហ៊ុន សែន ព្រួត​គ្នា​វាយ​ទាត់​ធាក់​យ៉ាង​ដំណំ​រហូតដល់​បាក់​ខ្ទង់ច្រមុះ​និង​បែក​ភ្នែក​ខាង​ស្កាំ ខណៈ​ដែល​ពួកគេ​បាន​ចេញពី​ប្រជុំ​នៅ​ឯ​មន្ទីរ​រដ្ឋសភា​ជាតិ​ក្នុង​ទីក្រុង​ភ្នំពេញ។ ជន​ដៃដល់​ដែល​បាន​ប្រព្រឹត្ត​អំពើ​ហិង្សា​ទៅលើ​អ្នកតំណាងរាស្ត្រ​ទាំងពីរ​នេះ​មានឈ្មោះ លោក ចាយ សារិទ្ធ ម៉ៅ ហឿន និង សុត វណ្ណនី។ ពួកគេ​ជា​កង​អង្គរក្ស​លោកនាយក​រដ្ឋ មន្ត្រី ហ៊ុន សែន។

សាលាដំបូង​រាជធានី​ភ្នំពេញ​កន្លង​ទៅ​ធ្លាប់​សម្រេច​ផ្ដន្ទាទោស​ឱ្យ​ជន​ជាប់​ចោទ​ទាំង ៣នាក់​ឱ្យ​ជាប់​ពន្ធនាគារ ៤ឆ្នាំ ប៉ុន្តែ​អនុវត្ត​ទោស​រយៈ​ពេល ១ឆ្នាំ​ប៉ុណ្ណោះ ក្រោម​បទ​ចោទ​ប្រកាន់​ថា បាន​ប្រព្រឹត្ត​ហិង្សា​មាន​ស្ថាន​ទម្ងន់​ទោស​លើ​ក្រុម​តំណាងរាស្ត្រ។ ពួក​គេ​ត្រូវ​បាន​ដោះ​លែង​កាល​ពី​ថ្ងៃ​ទី៤ ខែ​វិច្ឆិកា ឆ្នាំ២០១៥ ក្រោយ​តុលាការ​សម្រេច​ព្យួរ​ទោស​ដែល​នៅ​សល់​ចំនួន ៣ឆ្នាំ​ទៀត។

ក្រោយ​ពេល​ចេញ​ពី​ពន្ធនាគារ លោកនាយក​រដ្ឋមន្ត្រី ហ៊ុន សែន បាន​ចេញ​អនុក្រឹត្យ​មួយ​នៅ​ថ្ងៃ​ទី១៧ ខែ​វិច្ឆិកា ឆ្នាំ២០១៦ ដោយ​ដំឡើង​ឋានន្តរសក្ដិ​ដល់​លោក សុត វណ្ណី និង​លោក ម៉ៅ ហឿន ពី​វរសេនីយ៍ទោ​ទៅ​ជា​វរសេនីយ៍ឯក ចំណែក​លោក ចាយ សារិទ្ធ ត្រូវ​បាន​ដំឡើង​ពី​វរសេនីយ៍ឯក​ទៅ​ជា​ឧត្ដមសេនីយ៍​ត្រី​ទៀត​ផង៕


កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល