អតីតសមាជិកគណបក្សសំបុកឃ្មុំសង្គមប្រជាធិបតេយ្យ លោក ហ៊ាង គឹមស្រឿន ដែលសាលាដំបូងរាជធានីភ្នំពេញ ចេញដីកាបង្គាប់ឲ្យចាប់ខ្លួននោះ ប្រាប់អាស៊ីសេរីកាលពីយប់ថ្ងៃទី២០ ខែមេសា ឆ្នាំ២០២០ ថា លោកកំពុងស្ថិតក្នុងទីមានសុវត្ថិភាពមួយ។
ចៅក្រមសាលាដំបូងរាជធានីភ្នំពេញ លោក កូយ សៅ ចេញដីកាបង្គាប់ឲ្យចាប់ខ្លួន លោក ហ៊ាង គឹមស្រឿន និងលោក ថុល សុផាន់ណា តាមបណ្ដឹងរបស់លោក ពេជ្រ ស្រស់ ប្រធានគណបក្សយុវជនកម្ពុជា ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងអំពើប្រមាថ ប្រព្រឹត្តនៅរាជធានីភ្នំពេញនៅថ្ងៃទី ៩ ទី១០ ខែតុលា ឆ្នាំ២០១៩ ប៉ុន្តែពុំបានបញ្ជាក់ជាក់លាក់ថា ជាអំពើល្មើសអ្វីនោះទេ។ ទោះជាយ៉ាងណាក្នុងហ្វេសប៊ុករបស់លោក ហ៊ាង គឹមស្រឿន បានរិះគន់ អាជ្ញាធរវៀតណាមកាលពីថ្ងៃទី២៥ ខែមីនា ដែលមានខ្លឹមសារដើមថា លោកសូមប្រកាសព័ត៌មានជាចំហជូនដល់ស្ថានទូតវៀតណាមប្រចាំព្រះរាជាណាចក្រកម្ពុជា និងរដ្ឋាភិបាលទីក្រុងហាណូយ សុំឱ្យមានការគោរពសិទ្ធិកម្ពុជា ក្នុងនាមជាប្រទេសឯករាជ្យ អធិបតេយ្យ ស្មើមុខស្មើមាត់ ដែលឈរលើគោលការណ៍ច្បាប់អន្តរជាតិជាធំ។ ដូច្នេះ រដ្ឋាភិបាលទីក្រុងហាណូយ គួរយកការអនុវត្តច្បាប់ជាធំ និងគោរពអធិបតេយ្យកម្ពុជា ដែលជាប្រទេសជិតខាងនឹងគ្នា ដែលរដ្ឋាភិបាលទីក្រុងហាណូយតែងតែប្រើសិទ្ធិអំណាចរំលោភមកលើដែនអធិបតេយ្យកម្ពុជា ជាច្រើនដងមកហើយនោះ។ ដូចជាករណីជាក់ស្ដែងថ្មីៗ នេះ គឺមានកងទ័ពវៀតណាមពាក់ឯកសណ្ឋានបានចុះមករារាំងប្រជាពលរដ្ឋខ្មែរ មិនធ្វើស្រែ ចូលមករំលោភដែនអធិបតេយ្យកម្ពុជា យ៉ាងធ្ងន់ធ្ងរមិនអាចទទួលបានឡើយ។
ទោះជាយ៉ាងណា ដើមបណ្ដឹងនៃរឿងនេះ គឺលោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកឧត្ដមក្រុមប្រឹក្សាពិគ្រោះ និងផ្ដល់យោបល់។ លោក ពេជ្រ ស្រស់ ចោទលោក ហ៊ាង គឹមស្រឿន ថា បានមាក់ងាយឧត្ដមក្រុមប្រឹក្សាពិគ្រោះយោបល់ និងព្រះមហាក្សត្រ ទាក់ទងនឹងយន្តការដោះស្រាយវិបត្តិព្រំដែនជាមួយវៀតណាម។ លោក ពេជ្រ ស្រស់ បានប្រាប់កាសែតគាំទ្រគណបក្សកាន់អំណាចថា៖ «ក្រោយពីខ្ញុំពិភាក្សាជាមួយមេធាវីរួច គឺមេធាវីបានសម្រេចឲ្យខ្ញុំប្ដឹងបុគ្គលនេះ (Heang Kimsroeun) តែម្ដង ដោយបុគ្គលនេះ បានប្រមាថយ៉ាងធ្ងន់ធ្ងរមកលើឧត្តមក្រុមប្រឹក្សាពិគ្រោះ និងផ្ដល់យោបល់ ជាពិសេសប្រមាថដល់អង្គព្រះមហាក្សត្រផងដែរ ពីព្រោះយន្តការឧត្ដមក្រុមប្រឹក្សានេះ គឺអាចដំណើរការទៅបាន ដោយសារតែមានព្រះមហាក្សត្រទ្រង់អនុញ្ញាតឲ្យដំណើរការ»។
នេះមិនមែនជាលើកទី១ ទេ ដែលលោក ពេជ្រ ស្រស់ ប្ដឹងអ្នកនយោបាយ និងសកម្មជនសង្គម ហើយតុលាការតែងចាត់ការតាមបណ្ដឹងរបស់លោក។ លោក ពេជ្រ ស្រស់ ធ្លាប់ប្ដឹងព្រះតេជព្រះគុណ ប៊ុត ប៊ុនតេញ ទៅតុលាការដោយចោទព្រះអង្គថា បានកិបកេងលួចលុយចូលបុណ្យសពបណ្ឌិត កែម ឡី ប៉ុន្តែព្រះតេជព្រះគុណ ប៊ុត ប៊ុនតេញ បដិសេធ ហើយភរិយារបស់បណ្ឌិត កែម ឡី ក៏បានចេញមុខច្រានចោលការចោទប្រកាន់នេះ ដោយបញ្ជាក់ថា ព្រះតេជព្រះគុណ ប៊ុត ប៊ុនតេញ មិនបានលួចលុយបុណ្យនោះទេ។ បុរសពូកែខាងប្ដឹង លោក ពេជ្រ ស្រស់ ក៏ជាប់មានស្នាដៃប្ដឹងរម្លាយគណបក្សសង្រ្គោះជាតិផងដែរ កាលពីឆ្នាំ២០១៦។
មកដល់ម៉ោងផ្សាយនេះ លោក ហ៊ាង គឹមស្រឿន និង លោក ថុល សុផាន់ណា ដែលរងការប្ដឹងដោយលោក ពេជ្រ ស្រស់ កំពុងលាក់ខ្លួននៅទីសុវត្ថិភាពក្រោយពីដឹងថា តុលាការចេញដីកាចុះថ្ងៃទី២០ មេសា តាមចាប់ខ្លួនលោកទាំងពីរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។