តុលាការ​សម្រេច​ឃុំខ្លួន​ជនជាតិ​ចិន​៤​នាក់​ពី​បទ​ជួញដូរ​ថ្នាំញៀន​ខុសច្បាប់

ដោយ ហេង រស្មី
2020-06-13
អ៊ីម៉ែល
មតិ
Share
បោះពុម្ព
ម្សៅ​ផលិត​គ្រឿង​ញៀន​សរុប​ប្រមាណ ២០០គីឡូក្រាម ម៉ាស៊ីន​លាយ​ថ្នាំ​ញៀន និង​ពុម្ព​គ្រាប់​ថ្នាំ​ញៀន​ជា​ច្រើន​ ដែល​ជនជាតិ​ចិន​គ្រោង​លួច​ផលិត​ថ្នាំ​ញៀន ហើយ​ត្រូវ​អាជ្ញាធរ​បង្ក្រាប​បាន នៅ​ភូមិ​អូរ​បែក​ក្អម សង្កាត់​អូរ​បែក​ក្អម ខណ្ឌ​សែន​សុខ នៅ​ថ្ងៃ​ទី២ ខែ​មីនា ឆ្នាំ២០១៩។
ម្សៅ​ផលិត​គ្រឿង​ញៀន​សរុប​ប្រមាណ ២០០គីឡូក្រាម ម៉ាស៊ីន​លាយ​ថ្នាំ​ញៀន និង​ពុម្ព​គ្រាប់​ថ្នាំ​ញៀន​ជា​ច្រើន​ ដែល​ជនជាតិ​ចិន​គ្រោង​លួច​ផលិត​ថ្នាំ​ញៀន ហើយ​ត្រូវ​អាជ្ញាធរ​បង្ក្រាប​បាន នៅ​ភូមិ​អូរ​បែក​ក្អម សង្កាត់​អូរ​បែក​ក្អម ខណ្ឌ​សែន​សុខ នៅ​ថ្ងៃ​ទី២ ខែ​មីនា ឆ្នាំ២០១៩។
រូប៖ អគ្គស្នងការដ្ឋាន​នគរបាល​ជាតិ

តុលាការ​ក្រុង​ភ្នំពេញ​បានសម្រេច​ឃុំខ្លួន​ជនជាតិ​ចិន​ចំនួន ៤​នាក់ ពី​បទ​ជួញដូរ ដឹកជញ្ជូន កែច្នៃ និង​រក្សាទុក​គ្រឿងញៀន​ខុសច្បាប់។ ចំណែក​ឯ​តុលាការ ខេត្ត​ព្រះសីហនុ​វិញ​កំពុង​បន្ត​នីតិវិធី​ស៊ើបសួរ​ជនជាតិ​ចិន ៤​នាក់​ផ្សេង​ទៀត​​ពី​បទ​សង្ស័យ​ថា ចាប់ជំរិត​មនុស្ស​ទារ​ប្រាក់។

ព្រះរាជអាជ្ញារង និង​ជា​អ្នកនាំពាក្យ​តុលាការ​ក្រុង​ភ្នំពេញ​លោក គុជ គឹមឡុង ប្រាប់​អាស៊ីសេរី​ថា ក្រោយ​ពី​បាន​សាកសួរ​ចំនួន ៣​ថ្ងៃ​ជាប់ៗ​គ្នា​រួចមក​។ តុលាការ​បានសម្រេច​ចេញ​ដីកា​ឃុំខ្លួន​ជនជាតិ​ចិន​ចំនួន ៤​នាក់ ជា​បណ្ដោះអាសន្ន​នៅ​ពន្ធនាគារ​ព្រៃ​ស ដើម្បី​រង់់ចាំ​ជំនុំជម្រះ​ទោស​ពី​បទ​ជួញដូរ​ថ្នាំញៀន​ខុស​ច្បាប់។

កម្លាំង​មាន​សមត្ថកិច្ច​នៅ​ក្នុង​ទីក្រុង​ភ្នំពេញ​បាន​ចាប់ខ្លួន​ជនជាតិ​ចិន​ចំនួន ៤​នាក់ កាលពី​ថ្ងៃ​ទី​៥​មិថុនា​កន្លង​ទៅ​នេះ និង​បាន​រក​ឃើញ​ថ្នាំញៀន​ប្រភេទ​មេតំហ្វេតាមីន ចំនួន​ជាង ៧​គីឡូក្រាម និង​សម្ភារៈ​កែច្នែ​ប្រមាណ​ជាង ១០០​គីឡូក្រាម​ទៀត​ពេល​ដែល​ជនសង្ស័យ​កំពុង​បើកបរ​រថយន្ត​នៅ​តាម​ផ្លូវ និង​បាន​រក​ឃើញ​ថា បាន​លាក់​ទុក​នៅ​នៅផ្ទះ​ជួល​មួយ នៅ​ក្នុង​សង្កាត់​ទន្លេបាសាក់​ក្រុងភ្នំពេញ ហើយ​សមត្ថកិច្ច​ក៏បាន​រក​រឹបអូស​សម្ភារៈ​កែច្នៃ និង​គ្រឿង​សម្រាប់​ផ្សំ​សារធាតុ​គ្រឿងញៀន​ជាង​១០០​គីឡូក្រាម។

ដោយឡែក​នៅខេត្ត​ព្រះសីហនុ ឯណោះ​វិញ តុលាការ​កំពុង​បន្ត​នីតិវិធី​សាកសួរ​ជនជាតិ​ចិន​ចំនួន​៤​នាក់ ពាក់ព័ន្ធ​នឹង​ករណី​ចាប់ជំរិត​ទារ​ប្រាក់​មិនបាន​សម្រេច​ទៅលើ​ជន​ជាតិ​ចិន​ដូចគ្នា​កាលពី​ថ្ងៃ​ទី៥ ខែ​មិថុនា​កន្លង​ទៅ។

កងកម្លាំង​មាន​សមត្ថកិច្ច​ខេត្ត​ព្រះសីហនុ​បាន​ចាប់ខ្លួន​ជនជាតិ​ចិន​ទាំង ៤​នាក់ កាល​ពី​ថ្ងៃ​ទី​០៩ មិថុនា ក្រោយ​ពី​មិត្តភ័ក្ដិ​ជនរងគ្រោះ​បាន​មក​ប្ដឹង​សមត្ថកិច្ច​ថា ជនរងគ្រោះ​ម្នាក់ ត្រូវ​បាន​គេ​ចាប់ជំរិត​ក្រោយ​ពី​ជនសង្ស័យ​មួយ​ក្រុម​បាន​ប្រើប្រាស់​បណ្ដាញ​សង្គម ដើម្បី​ជំរិត​ទារ​ប្រាក់​ពី​ក្រុម​គ្រួសារ​នៅ​ក្នុង​ប្រទេស​ចិន​ចំនួន ៥០​ម៉ឺន​យ័ន គឺ​ប្រមាណ​ជិត ៧​ម៉ឺន​ដុល្លារ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល