"តុលាការ​ក្រុង​ភ្នំពេញ​រំលោភ​ច្បាប់​ក្រម​ព្រហ្មទណ្ឌ​ករណី​យុវជន គង់ រ៉ៃយ៉ា និង​សួង នាគព័ន្ធ"

ដោយ ហេង រស្មី
2019-07-24
អ៊ីម៉ែល
មតិ
Share
បោះពុម្ព
យុវជន គង់ រ៉ៃយ៉ា (រូបខាងឆ្វេង)និង យុវជន សួង នាគព័ន្ធ (រូបខាងស្តាំ)។
យុវជន គង់ រ៉ៃយ៉ា (រូបខាងឆ្វេង)និង យុវជន សួង នាគព័ន្ធ (រូបខាងស្តាំ)។
រូបភាពពី បណ្តាញសង្គមហ្វេសប៊ុក

មេធាវី​ការពារ​ក្តី​ឱ​លោក គង់ រ៉ៃយ៉ា និង​លោក សួង នាគព័ន្ធ ចោទ​តុលាការ​របប​ក្រុងភ្នំពេញ​ថា កំពុង​រំលោក​លើ​នីតិវិធី​នៃ​ក្រមព្រហ្មទណ្ឌ​ពាក់ព័ន្ធ មិនបាន​ឆ្លើយតប​ទៅ​នឹង​ការ​ស្នើ​សុំ​ឱ្យ​កូន​ក្តី​របស់​លោក​ទាំង​ពី​រ​នាក់​ឱ្យ​បាន​នៅ​ក្រៅ​ឃុំ​ជា​បណ្ដោះអាសន្ន​។ មន្ត្រី​ឃ្លាំមើល​ការរំលោភ​សិទ្ធិមនុស្ស​ថា រាល់​សំណុំរឿង​ណា​ឱ្យ​តែ​ពាក់ព័ន្ធ​នឹង​រឿង​នយោបាយ​តុលាការ​មិនដែល​ហ៊ាន​ចាត់វិធានការ​ដោយ​ឯករាជ្យ​នោះ​ទេ។

មេធាវី​ការពារ​ក្តី សំ សុគង់ ប្រាប់​អាស៊ីសេរី​នៅ​ថ្ងៃ​ទី​២៣ កក្កដា​ថា មក​ទល់​ពេល​នេះ​តុលាការ​ក្រុង​ភ្នំពេញ​មិនទាន់​បាន​ឆ្លើយតប​ចំពោះ​សំណើ​ស្នើសុំ​ឱ​កូន​ក្តី​ពីរ​នាក់​គឺ​លោក គង់ រ៉ៃយ៉ា និង លោក សួង នាគព័ន្ធ នៅឡើយ​ទេ។ លោក​បញ្ជាក់​ថា លោក​បាន​ដាក់​ពាក្យ​ស្នើ​សុំ​ឱ​កូន​ក្តី​របស់​លោក​ទាំងពីរ​បាន​នៅ​ក្រៅ​ឃុំ​កាលពី​ថ្ងៃ​ទី​១៩ សប្ដាហ៍​មុន តែ​មកដល់ពេលនេះ​ដល់​រយៈពេល​៥​ថ្ងៃ​ហើយ តុលាការ​នៅ​មិន​ទាន់​ឆ្លើយតប​នៅ​ឡើយ។

លោក​បាន​ចោទ​ប្រកាន់​ថា តុលាការ​បាន​រំលោភ​ទៅលើ​នីតិវិធី​ក្រមព្រហ្មទណ្ឌ​ពី​ព្រោះ​ថា តុលាការ​ត្រូវតែ​ឆ្លើយ​រាល់​សំណើ​ស្នើសុំ​របស់​មេធាវី​ក្នុង​រយៈពេល​យ៉ាងយូរ​បំផុត​ចំនួន​៥​ថ្ងៃ ដើម្បី​សម្រេច​ថា តើ​តុលាការ​ឱ្យ ឬ​មិន​ឱ្យ​ចំពោះ​សំណើ​របស់​មេធាវី​ការពារ​ជនជាប់ចោទ៖ «ដោយសារ​ក្រុម​មេធាវី​យល់ឃើញ​ថា កូន​ក្តី​របស់​ខ្លួន​ហ្នឹង​មិនបាន​ប្រព្រឹត្ត​ដូច​បទចោទប្រកាន់​ទេ​នេះ ជា​ចំណុច​ទី​១។ ហើយ​ចំណុច​ទី​២​ទាក់ទិន​ទៅ​នឹង​លក្ខណ​ដែល​មាន​បញ្ញត្តិ​ក្នុង​ក្រម​នីតិវិធី​ព្រហ្មទណ្ឌ​ហ្នឹង​គឺ​បើសិនជា​បាន​នៅ​ក្រៅ​ឃុំ​ជា​បណ្ដោះអាសន្ន​ហ្នឹង ក៏​មិន​មាន​ការ​ព្រួយបារម្ភ​អ្វី​ដែរ ដោយសារ​កូន​ក្តី​ទាំងពីរ​នាក់​បាន​សន្យា​ចំពោះ​មុខ​តុលាការ​ថា មិន​បង្ក​ការ​លំបាក​ដល់​ការ​ស៊ើបសួរ​ហើយក៏​មិន​ធ្វើ​ឱ​មានការ​រាំងស្ទះ»

អាជ្ញាធរ​របប​ក្រុងភ្នំពេញ​បាន​ចាប់ខ្លួន​យុវជន​គង់ រ៉ៃយ៉ា និង លោក សួង នាគព័ន្ធ​ដាច់​ដោយ​ឡែកៗ​ពី​គ្នា​កាលពី​ថ្ងៃ​ទី​១០ ខែ​កក្កដា​កន្លង​ទៅ​នេះ នៅ​ក្នុង​ខណៈ​ដែល​ពួកគេ​បាន​ចូលរួម​គោរព​វិញ្ញាណក្ខន្ធ​គម្រប់​ខួប ៣​ឆ្នាំ នៃ​ការ​បាញ់សម្លាប់​លោក​បណ្ឌិត​កែម ឡី នៅ​ស្ថានីយ​ប្រេងសាំង​កាល់​តិច​ជិត​ស្តុប​បូកគោ ក្រុង​ភ្នំពេញ។

លោក ម៉េត មាសភក្តី អ្នកនាំពាក្យ​តុលាការ​រាជធានី​ភ្នំពេញ​មិន​អាច​ទាក់ទង​ដើម្បី​សុំ​ការ​បំភ្លឺ​បានទេ​នៅ​ថ្ងៃ​ទី​២៣ កក្កដា នេះ។

អ្នកនាំពាក្យ​សមាគម​អាដហុក (ADHOC) លោក ស៊ឹង សែន ករុណា បញ្ជាក់​ថា ទាំង​អ្នក​ទោស​នយោបាយ និង​អ្នកទោស​សកម្មជន​សិទ្ធិមនុស្ស​តុលាការ​របប​ក្រុងភ្នំពេញ​កម្រ​នឹង​ចាត់វិធានការ​ដោយ​ឯករាជ្យ​ណាស់។ លោក​បញ្ជាក់​ថា បើ​តុលាការ​បន្ត​ឃុំខ្លួន​អ្នក​ទាំង​ពីរ​បន្ត​ទៀត​នឹង​ធ្វើ​ឱ្យ​ប៉ះពាល់​ដល់​សិទ្ធិ​សេរីភាព​របស់​ជនសង្ស័យ​ក្នុង​ការ​ទទួល​បាន​យុត្តិធម៌​ខាង​ផ្លូវច្បាប់៖ «អ្នកទោស​មនសិការ ទាំង​អ្នកទោស ឬក៏​អ្នកទោស​សកម្មជន​សិទ្ធិមនុស្ស​ឬក៏​សកម្មជន​ដីធ្លី​អី​ជាដើម​យើង​ឃើញ​ថា ឧកាស​នៃ​ការ​បាន​នៅ​ក្រៅ​ឃុំ​នេះ​ឃើញ​ថា មានការ​គិតគូរ​តិចតួច​មែនទែន។ មានន័យថា វា​ជា​ជម្រើស​មួយ​ក្នុង​ការ​ដាក់​ទុក្ខទោស​សម្រាប់​ការ​ដាក់​ទណ្ឌកម្ម​ផ្លូវចិត្ត​ក្នុង​ន័យ​គំរាមកំហែង​មិន​ឱ្យ​មានការ​បន្ត​ទៅលើ​សកម្ម​ភាព ឬក៏​សេរីភាព​ក្នុង​ការ​ចូលរួម​ជីវភាព​នយោបាយ​អី​ទាំង​អស់ហ្នឹង»

លោក គង់ រ៉ៃយ៉ា អាយុ​២៨​ឆ្នាំ ត្រូវ​បាន​តុលាការ​ចោទប្រកាន់​ពី​បទ​ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍ តាម​មាត្រា​៤៩៤ និង ៤៩៥ នៃ​ក្រមព្រហ្មទណ្ឌ និង​យក​ទៅ​ឃុំខ្លួន​ក្នុង​ពន្ធនាគារ​ព្រៃ​ស កាលពី​ថ្ងៃ​ទី​១១ ខែ​កក្កដា​។ ទោស​ទណ្ឌ​ដែល​រហូតដល់​ឃុំខ្លួន​នេះ ដោយសារតែ​លោក​បាន​ផ្សព្វផ្សាយ​នៅលើ​បណ្ដាញ​សង្គម​ហ្វេ​ស​ប៊ុ​ក​អំពី​ការ​លក់​អាវយឺត​ដែល​មាន​រូបលោក​បណ្ឌិត កែម ឡី។ ចំណែក​យុវជន សួង នាគព័ន្ធ វិញ ត្រូវ​បាន​តុលាការ​ចោទប្រកាន់ និង​ឃុំខ្លួន​ក្នុង​ពន្ធនាគារ​កាលពី​ថ្ងៃ​ទី​១២ ខែ​កក្កដា ដូច​លោក គង់ រ៉ៃយ៉ា ដែរ ដោយសារតែ​លោក​បាន​ចូលរួម​ដាក់​កម្រងផ្កា​គោរព​វិញ្ញាណក្ខន្ធ​បណ្ឌិត កែម ឡី និង​កាន់​ខិត្តប័ណ្ណ​អំពាវនាវ​ឱ្យ​បញ្ឈប់​សម្លាប់​មនុស្ស​ក្រៅ​ប្រព័ន្ធ​ច្បាប់។

អ្នកស្រី សុខ ស្រីនិច ភរិយា​របស់​លោក គង់ រ៉ៃយ៉ា បញ្ជាក់​ថា អ្នកស្រី​ព្រួយ​បារម្ភ​ថា ចំពោះ​សុខភាព​អាច​នឹង​ប៉ះពាល់​បន្ត​ទៀត ប្រសិនបើ​តុលាការ​នៅតែ​បន្ត​ឃុំខ្លួន​នៅ​ក្នុង​ពន្ធនាគារ​នោះ៖ «ចា៎​គាត់​មាន​ផល​ប៉ះពាល់​ខ្លាំង​មែនទែន ដោយសារតែ​ក្នុង​ពន្ធនាគារ​មាន​ភាព​ចង្អៀត​ខ្លាំង ហើយ​ដូច​ថា​ឃើញ​ផ្ទាល់​ហើយ​នៅ​ក្នុង​ពន្ធនាគារ គឺ​គាត់​ធ្លាប់​ប្រាប់​ខ្ញុំ​ថា នៅ​ហ្នឹង​មាន​អ្នក​ជក់បារី​ច្រើន​អ៊ីចឹង។ បើសិនជា​តុលាការ​ឆ្លើយ​តប​មក​អ៊ីចឹង​មាន​ផល​ប៉ះពាល់​ច្រើន​ជុំវិញ​បញ្ហា​សុខភាព​គាត់»

អង្គការ​ជាតិ និង​អន្តរជាតិ លើកឡើង​ថា អ្នក​ទាំងពីរ គ្រាន់តែ​ជា​អ្នក​អនុវត្ត​សិទ្ធិ​សេរីភាព​បញ្ចេញមតិ​តាម​ច្បាប់​ប៉ុណ្ណោះ គ្មាន​ចំណុច​ណាមួយ​ជា​បទល្មើស​នោះ​ទេ ដូច្នេះ​ការ​ចោទប្រកាន់ និង​ឃុំខ្លួន​នេះ គឺ​ធ្វើឡើង​ទាំង​បំពាន​ច្បាប់ និង​ជា​ការ​រឹតត្បិត​សិទ្ធិ​សេរីភាព​ដល់​ពួកគេ។

មេធាវី​ការពារ​ក្តី​ជនជាប់សង្ស័យ​ទាំងពីរ​បញ្ជាក់​ថា តុលាការ​ក្រុង​ភ្នំពេញ​គួរតែ​អនុញ្ញាត​ឱ្យ​កូន​ក្តី​បាន​នៅ​ក្រៅ​ឃុំ​ដើម្បី​ចៀសវាង​ការ​ចោទប្រកាន់​ថា តុលាការ​មាន​ភាព​លំអៀង និង​អនុវត្ត​ច្បាប់​តាម​ស្តង់ដារ​ពីរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល