មន្ត្រីតុលាការថា ព្រះរាជអាជ្ញារងខេត្តស្ទឹងត្រែង ដែលដោះលែងជនជាតិចិន ៨នាក់ពុំបានរងទណ្ឌកម្ម និងចំណាត់ការអ្វីឡើយ
2024.08.14
រូបថតឯកសារ បង្ហាញជនជាតិចិនលួចឆ្លងដែនចូលកម្ពុជាដោយខុសច្បាប់ ៨នាក់ ដែលនគរបាលអន្តោប្រវេសន៍ខេត្តស្ទឹងត្រែងចាប់បាន កាលពីខែមករា ឆ្នាំ២០២៤។
រូប៖ រដ្ឋបាលខេត្តព្រះវិហារ
មន្ត្រីតុលាការខេត្តស្ទឹងត្រែងឱ្យដឹងថា ព្រះរាជអាជ្ញារង គឺលោក ជា សុភ័ក្រ ដែលបង្គាប់ឱ្យដោះលែងជនជាតិចិន ៨នាក់រឿងឆ្លងដែនខុសច្បាប់ ពុំទទួលរងទណ្ឌកម្ម និងចំណាត់អ្វីឡើយ។ មន្ត្រីសង្គមស៊ីវិលចាត់ទុក ករណីអនុវត្តច្បាប់ធូររលុង ចំពោះមន្ត្រី ដែលជាប់សង្ស័យរឿងពុករលួយនេះថា ជាគំរូអាក្រក់។
អ្នកនាំពាក្យសាលាដំបូងខេត្តស្ទឹងត្រែង លោក សុំ ស៊ាងហាក់ ប្រាប់វិទ្យុអាស៊ីសេរី នៅថ្ងៃទី១៣ ខែសីហាថា ទោះបីក្រសួងមហាផ្ទៃបង្កើតគណៈកម្មការ ដើម្បីស្រាវជ្រាវករណីដោះលែងជនជាតិចិនចំនួន ៨នាក់ ដែលមិនប្រក្រតីនាពេលកន្លងមកក្ដី ប៉ុន្តែ មកទល់ពេលនេះ ព្រះរាជអាជ្ញារងដែលកាន់សំណុំរឿង និងបង្គាប់ឱ្យដោះលែងជនជាតិចិនទាំង ៨នាក់នៅមានសេរីភាព និងបម្រើការងារជាធម្មតា។
លោក សុំ ស៊ាងហាក់៖ «ព្រោះអីគេបង្កើត [គណៈកម្មការ] នៅក្រសួង ខ្ញុំអ្នកនាំពាក្យនៅសាលាដំបូងអត់មានសិទ្ធដឹងរឿងហ្នឹងទេ គេអត់ឱ្យដឹងទេ ព្រោះអីការងារហ្នឹងដោះស្រាយនៅក្រសួង ខ្ញុំនៅសាលាដំបូងនៅថ្នាក់ក្រោមម៉េចដឹងថ្នាក់លើ»។
រដ្ឋមន្ត្រីក្រសួងមហាផ្ទៃ លោក ស សុខា កាលពីខែឧសភា បានបង្កើតគណៈកម្មការចំពោះកិច្ចមួយ ដែលមានការចូលរួមដោយរដ្ឋលេខាធិការក្រសួងយុត្តិធម៌ លោក គឹម សន្តិភាព កម្លាំងស្នងការដ្ឋាននគរបាលខេត្តស្ទឹងត្រែង នគរបាលថ្នាក់ជាតិ និងកម្លាំងអាវុធហត្ថជាដើម ដើម្បីស៊ើបអង្កេតលើព្រះរាជអាជ្ញារងខេត្តស្ទឹងត្រែង និងមន្ត្រីពន្ធនាគារខេត្ត ដែលបានដោះលែងជនជាតិចិនទាំង ៨នាក់ ដោយពុំបានធ្វើលិខិត និងប្រគល់ជនជាតិចិនទាំងនោះ មកមន្ត្រីនគរបាលអន្តោប្រវេសន៍ ដើម្បីបណ្ដេញចេញពីកម្ពុជា។
តុលាការខេត្តស្ទឹងត្រែងសម្រេចផ្ដន្ទាទោសជនជាតិចិនទាំង ៨នាក់ ឱ្យជាប់ពន្ធនាគាររយៈពេល ៤ខែ ពីបទលួចឆ្លងដែនដោយខុសច្បាប់ កាលពីថ្ងៃទី១០ កុម្ភៈ។ ប៉ុន្តែ ជាប់គុកបានប្រមាណជាង ១០ថ្ងៃប៉ុណ្ណោះ ក៏ត្រូវបានព្រះរាជអាជ្ញារងអមសាលាដំបូងខេត្តស្ទឹងត្រែង គឺលោក ជា សុភ័ក្រ បង្គាប់មន្ត្រីពន្ធនាគារខេត្តឱ្យដោះលែងពួកគេឱ្យមានសេរីភាពវិញ។ នេះបើយោងតាមអ្នកនាំពាក្យសាលាដំបូងខេត្តស្ទឹងត្រែង លោក សុំ ស៊ាងហាក់។
ចំណែកឯអ្នកនាំពាក្យក្រសួងមហាផ្ទៃ លោក ទូច សុខៈ បដិសេធអត្ថាធិប្បាយជុំវិញលទ្ធភាពស្រាវជ្រាវករណីដោះលែងជនជាតិចិនទាំង ៨នាក់នេះ ដោយលោកបញ្ជាក់យ៉ាងខ្លីថា រឿងនេះបានបិទបញ្ចប់ច្រើនខែមកហើយ។
វិទ្យុអាស៊ីសេរីមិនអាចទាក់ទងរដ្ឋលេខាធិការក្រសួងយុត្តិធម៌ លោក គឹម សន្តិភាព បាននៅឡើយទេនៅថ្ងៃទី១៣ ខែសីហា។
ទាក់ទងនឹងរឿងនេះ មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ប្រចាំខេត្តស្ទឹងត្រែង លោក ចឹក ចិត្រា សង្ស័យថា ករណីនេះអាចជាការឃុបឃិតប្រព្រឹត្តអំពើពុករលួយជាប្រព័ន្ធ ហើយប្រសិនជាគ្មានស្ថាប័នពាក់ព័ន្ធចាត់វិធានការលើមន្ត្រីដែលល្មើសច្បាប់ទេនោះ លោក បារម្ភថា ករណីមន្ត្រីតុលាការដោះលែងជនល្មើសឱ្យរស់នៅក្រៅប្រព័ន្ធច្បាប់អាចបន្តកើតឡើងដដែល។
លោក ចឹក ចិត្រា៖ «យើងទទូចឱ្យអាជ្ញាធរ ជាពិសេស គណៈកម្មការចំពោះកិច្ចលើការស៊ើបអង្កេតទៅលើការដោះលែង [ជនជាតិចិន ៨នាក់] គួរតែមានចំណាត់ការឱ្យតឹងរ៉ឹង ចំពោះមន្ត្រីទាំងអស់ហ្នឹង គួរណាមានការដាក់ទោសទណ្ឌឱ្យមានភាពតឹងរ៉ឹង ចំពោះភារកិច្ច ក៏ដូចជា ការបំពេញតួនាទី ចំពោះមន្ត្រីដែលរំលោភច្បាប់ ជាពិសេស មន្ត្រីផ្សេងៗ ដែលគាត់រំលោភច្បាប់មិនថា តែករណីជនជាតិចិនហ្នឹងទេ»។
មន្ត្រីសង្គមស៊ីវិលនៅតែអំពាវនាវដល់ស្ថាប័នពាក់ព័ន្ធ បោសសម្អាត ឬចាត់វិធានការលើមន្ត្រីដែលពាក់ព័ន្ធនឹងការប្រព្រឹត្តអំពើពុករលួយ ក្នុងការសម្រួលឱ្យជនល្មើសរួចផុតពីការដាក់ទោសទណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា