តុលាការកំពូលនឹងបើកការជំនុំជម្រះរឿងស្នើសុំអត្តសញ្ញាណប័ណ្ណ និងលិខិតឆ្លងដែនរបស់អតីតអ្នកយកព័ត៌មានអាស៊ីសេរី លោក អ៊ួន ឈិន និងលោក យាង សុធារិន្ទ នៅថ្ងៃទី២៧ ឧសភា សប្ដាហ៍ក្រោយនេះ។
មេធាវីការពារក្តីឱ្យអតីតអ្នកយកព័ត៌មានអាស៊ីសេរីទាំងពីររូប គឺលោក សំ ចំរើន ឱ្យដឹងថា សវនាការនេះធ្វើឡើងជាសាធារណៈ ហើយពួកលោកនឹងចូលរួមនៅក្នុងការជំនុំជម្រះនោះ។
ទោះបីជាលោក អ៊ួន ឈិន និងលោក យាង សុធារិន្ទ លែងស្ថិតក្រោមនីតិវិធីត្រួតពិនិត្យជាយូរមកហើយក្តី ក៏ចៅក្រមស៊ើបសួរតុលាការក្រុងភ្នំពេញ លោក ពេជ្រ វិជ្ជាធរ មិនព្រមប្រគល់លិខិតឆ្លងដែន និងអត្តសញ្ញាណប័ណ្ណដល់អ្នកទាំងពីរឡើយ ដោយសម្អាងថា វត្ថុចាប់យកទាំងនេះនៅមានភាពចាំបាច់ក្នុងដំណាក់កាលស៊ើបសួរ។ សាលាឧទ្ធរណ៍បានតម្កល់ការសម្រេចនេះទុកជាបានការដដែល ដោយទុកឱ្យខាងក្រុមប្រឹក្សាជំនុំជម្រះតុលាការក្រុងភ្នំពេញជាអ្នកសម្រេចវិញ។
ទាំងអ្នកច្បាប់ និងអ្នកការពារសិទ្ធិមនុស្សអះអាងដូចគ្នាថា លិខិតឆ្លងដែន និងអត្តសញ្ញាណប័ណ្ណ មិនមែនជាវត្ថុតាងស្វែងរកការពិតក្នុងសំណុំរឿងនោះឡើយ ដូច្នេះតុលាការត្រូវប្រគល់វត្ថុទាំងនោះឱ្យពួកគេវិញ។ ក្រុមអ្នកការពារសិទ្ធិមនុស្សថា ការរក្សាទុកឯកសារសម្គាល់ខ្លួនទាំងនេះ មានន័យថា សិទ្ធិសេរីភាពរបស់អ្នកទាំងពីរនៅតែស្ថិតក្រោមការគាបសង្កត់ដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។