តុលាការ​កំពូល​នឹង​ប្រកាស​សាលដីកា​បណ្ដឹង​សាទុក្ខ​របស់ អឿត អាង នៅ​ចុង​ខែ​ឧសភា​នេះ

ដោយ មាន ឫទ្ធិ
2019-05-08
អ៊ីម៉ែល
មតិ
Share
បោះពុម្ព
ជន​ត្រូវ​ចោទ ជួប សម្លាប់ ដែល​គេ​ស្គាល់​ឈ្មោះ​ពិត​ថា អឿត អាង ពេល​នាំ​ចេញ​ក្រោយ​សាកសួរ នៅ​សាលាដំបូង​រាជធានី​ភ្នំពេញ កាល​ពី​ថ្ងៃ​ទី​១៦ ខែ​កញ្ញា ឆ្នាំ​២០១៦។
ជន​ត្រូវ​ចោទ ជួប សម្លាប់ ដែល​គេ​ស្គាល់​ឈ្មោះ​ពិត​ថា អឿត អាង ពេល​នាំ​ចេញ​ក្រោយ​សាកសួរ នៅ​សាលាដំបូង​រាជធានី​ភ្នំពេញ កាល​ពី​ថ្ងៃ​ទី​១៦ ខែ​កញ្ញា ឆ្នាំ​២០១៦។
RFA

តុលាការ​កំពូល​នឹង​ប្រកាស​សាលដីកា​លើ​បណ្ដឹង​សាទុក្ខ​របស់​ទណ្ឌិត​ឈ្មោះ អឿត អាង ហៅ​ជួប សម្លាប់ នៅ​ថ្ងៃ​ទី​២៤ ឧសភា​។ ការប្រកាស​នេះ គឺ​ធ្វើ​ឡើង​បន្ទាប់ពី​ប្រធាន​ចៅក្រម​ជំនុំជម្រះ​តុលាការ​កំពូល លោក គង់ ស្រ៊ីម លើក​យក​សំណុំរឿង​ឃាតកម្ម​លើ​បណ្ឌិត កែម ឡី កាលពី​ខែ​កក្កដា​ឆ្នាំ​២០១៦ មក​ជំនុំជម្រះ​ឡើងវិញ នៅ​ថ្ងៃទី៨ ឧសភា។

អាស៊ីសេរី​មិន​អាច​សុំ​ការ​បំភ្លឺ​ពី​លោក អ៊ឹម ម៉ាច មេធាវី​ការពារ​ក្ដី​ឱ្យ​ពិរុទ្ធជន​ឈ្មោះ អឿត អាង បានទេ ដោយ​ហៅ​ទូរស័ព្ទ​ចូល​ជាច្រើន​ដង តែ​ប្រព័ន្ធ​ប្រាប់​ថា ជាប់រវល់។

តុលាការ​ក្រុង​ភ្នំពេញ​សម្រេច​ផ្ដន្ទាទោស ឱ្យ​ជាប់ពន្ធនាគារ​អស់​មួយ​ជីវិត កាលពី​ខែ​មិនា ឆ្នាំ​២០១៧ ពី​បទ «​ឃាតកម្ម​គិតទុក​ជាមុន​បាញ់សម្លាប់​លោក កែម ឡី និង​ការ​កាន់កាប់​អាវុធ​ខុសច្បាប់»។ ហើយ​នៅ​ខែ​ឧសភា ឆ្នាំ​២០១៨ សាលាឧទ្ធរណ៍​ក៏​សម្រេច តម្កល់​សាលក្រម​របស់​សាលាដំបូង​រាជធានី​ភ្នំពេញ ទុក​ជា​បាន​ការ​ក្រោយពី​ពិរុទ្ធជន​បាន​ដាក់​ពាក្យ​ប្ដឹង​ទាស់​នឹង​សាលក្រម​នោះ តាមរយៈ​មេធាវី។

អ្នកស្រាវជ្រាវ​ការ​អភិវឌ្ឍ​សង្គម លោក​បណ្ឌិត កែម ឡី ត្រូវ​បាន​ខ្មាន់កាំភ្លើង​បាញ់សម្លាប់​នៅ​ព្រឹក​ថ្ងៃទី​១០ ខែ​កក្កដា ឆ្នាំ​២០១៦ នៅ​ឯ​ស្ដារម៉ាត (Star Mart) ក្នុង​ស្ថានីយ​លក់​ប្រេងឥន្ធនៈ​កាល់តិច (Caltex)​។ ភា្លមៗ​ក្រោយពី​ការ​បាញ់សម្លាប់​លោក កែម ឡី បុរស​ឈ្មោះ ជួប សម្លាប់ ត្រូវ​បាន​ចាប់ខ្លួន ប៉ុន្តែ​នៅ​ក្នុង​សំណុំ​នេះ មាន​ចំណុច​ជាច្រើន​មិន​ប្រក្រតី ដែល​ធ្វើ​ឱ្យ​សហគមន៍​ជាតិ និង​អន្តរជាតិ​មិន​ជឿ​ថា ជួប សម្លាប់ ជា​ឃាតក​ពិត ឬក៏​ឃាតក​ទោស​ដែល​គ្មាន​អ្នក​ផ្សេងទៀត​នៅ​ពី​ក្រោយខ្នង។

ស្ថាប័ន​ជាតិ​និង​អន្តរជាតិ​ជាច្រើន​បាន​ថ្កោលទោស​ជា​ខ្លាំង​ករណី​ឃាតកម្ម បណ្ឌិត កែម ឡី ហើយ​ទាមទារ​ឱ្យ​រដ្ឋាភិបាល ស៊ើបអង្កេត​ដោយ​ឯករាជ្យ ដើម្បី​នាំ​យក​ឃាតក​ពិត ឬ​ជន​ពាក់ព័ន្ធ​ផ្សេងទៀត​មក​ផ្ដន្ទាទោស។ ប៉ុន្តែ​ជិត​៣​ឆ្នាំ​កន្លង​មក​នេះ តុលាការ និង​អាជ្ញាធរ​ក្រុងភ្នំពេញ​គ្មាន​បាន​បង្ហាញ​ការ​វិវត្ត​អ្វី​ថ្មី​ដល់​សាធារណជន​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

 

ព័ត៌មាន (0)
Share
គេហទំព័រ​ទាំងមូល