មនុស្សប្រមាណជិត ៥០០នាក់ ដែលជាព្រះសង្ឃ មន្ត្រីរាជការ យោធា យុវជន យុវតី សិស្ស និស្សិត លោកគ្រូ អ្នកគ្រូ ព្រមទាំងប្រជាពលរដ្ឋអ្នកស្រុកអ្នកភូមិមួយចំនួនទៀត បានចូលរួមក្នុងកិច្ចប្រជុំមួយស្ដីពីទិវាទ្វារចំហ ឬពិធីផ្សព្វផ្សាយធម៌វិបស្សនាកម្មដ្ឋាន។
កម្មវិធីនេះបានរៀបចំឡើងដោយមជ្ឈមណ្ឌលធម្មលដ្ឋិកា ក្នុងស្រុកបាណន់ ខេត្តបាត់ដំបង កាលពីថ្ងៃទី១៦ ខែកុម្ភៈ ឆ្នាំ២០១៤ ដែលពេលនោះគេបានណែនាំឲ្យអ្នកចូលរួមទាំងអស់ហាត់រៀនធ្វើសមាធិកម្មដ្ឋាន ដើម្បីអប់រំចិត្តបង្កើតគុណធម៌ សីលធម៌ល្អនៅក្នុងខ្លួនដែលនឹងនាំឲ្យជីវិតរស់នៅមានសេចក្ដីសុខ សន្តិភាពជាមួយគ្នានៅក្នុងសង្គមជាតិខ្មែរសព្វថ្ងៃនេះ។
មនុស្សក្នុងលោកនេះគឺមានទុក្ខនៅគ្រប់ទីកន្លែង ទាំងអ្នកក្រ ទាំងអ្នកមាន អ្នកធំ អ្នកតូច ស្ដេច រាស្ត្រ នាម៉ឺនមន្រ្តី ។ល។ គឺសុទ្ធតែមានទុក្ខទាំងអស់គ្នា។ សេចក្ដីទុក្ខនេះគឺបណ្ដាលមកពីមនុស្សមិនយល់ពីរបៀបរស់នៅត្រឹមត្រូវ។ តើគេត្រូវរស់នៅយ៉ាងណាដែលហៅថា ត្រឹមត្រូវនោះ? គឺការរស់នៅប្រកបដោយគុណធម៌ សីលធម៌ល្អ ទាំងផ្លូវកាយវាចាចិត្ត។
អាចារ្យប្រចាំមជ្ឈមណ្ឌលធម្មលដ្ឋិកា នៅខេត្តបាត់ដំបង លោក កួច សុងហាក់ បានមានប្រសាសន៍ដូច្នេះនៅក្នុងពិធីខួប ១០ឆ្នាំនៃមជ្ឈមណ្ឌលវិបស្សនាធម្មលដ្ឋិកា និងទិវាទ្វារចំហ ប្រកាសផ្សព្វផ្សាយពីសកម្មភាពរបស់មណ្ឌលក្នុងការបង្ហាត់បង្រៀនធម៌វិបស្សនានៅកម្ពុជា។
លោកអាចារ្យបានបញ្ជាក់ទៀតថា ធម៌វិបស្សនា គឺជាសិល្បសាស្ត្រនៃការរស់នៅមួយត្រឹមត្រូវ ដែលជួយមនុស្សអ្នកបដិបត្តិបានខ្ជាប់ខ្ជួនឲ្យឆ្ពោះទៅរកសេចក្ដីសុខ សន្តិភាពបាន ឬមួយយ៉ាងហោចណាស់ អាចជួយកាត់បន្ថយក្ដីលោភៈ ទោសៈ មោហៈ បានខ្លះដែរ។
លោកបានបន្ថែមថា សព្វថ្ងៃនេះមានមនុស្សបានមកបដិបត្តិធម៌វិបស្សនានៅមជ្ឈមណ្ឌលធម្មលដ្ឋិកា បានកើនឡើងច្រើនពីមួយឆ្នាំទៅមួយឆ្នាំ ដែលក្រៅពីជនជាតិខ្មែរពុទ្ធបរិស័ទមកបដិបត្តិ ក្នុងនោះក៏មានជាតិសាសន៍ និងនិកាយសាសនាផ្សេងៗទៀត ក៏បានមកចូលរួមបដិបត្តិនៅទីនេះដែរ ដោយសារតែគេទទួលបានផលប្រយោជន៍ក្រោយពេលបដិបត្តិ ហើយនិងយល់ថា ធម៌វិបស្សនាជាធម៌សកល មិនមានប្រកាន់និកាយ ឬសាសនាអ្វីឡើយ៖ «ព្រះពុទ្ធគោតមប្រសូតនៅប្រទេសឥណ្ឌា ជាជនជាតិឥណ្ឌា ប៉ុន្តែអ្នកដើរតាមការប្រៀនប្រដៅរបស់ព្រះអង្គ មានគ្រប់ពូជសាសន៍។ ក្នុងឆ្នាំ២០០៤ មជ្ឈមណ្ឌលធម្មលដ្ឋិកា ទទួលសិស្ស ៦៦៦នាក់។ នៅឆ្នាំ២០១៣ កន្លងទៅនេះ យើងទទួលសិស្ស ១.៣០០នាក់ លើសពី ២ដង គឺ ២០០%»។
ការប្រារព្ធពិធីខួប ១០ឆ្នាំរបស់មជ្ឈមណ្ឌលធម្មលដ្ឋិកា ដើម្បីផ្សព្វផ្សាយពីសកម្មភាពនៃការបដិបត្តិធម៌វិបស្សនា គេឃើញមានមនុស្សជាច្រើនបានមកចូលរួមប្រមាណជិត ៥០០នាក់ និងមកពីមជ្ឈដ្ឋានផ្សេងៗ ដូចជាព្រះសង្ឃ សិស្ស និស្សិត មន្ត្រីរាជការ គ្រូបង្រៀន មន្ត្រីយោធា និងប្រជាពលរដ្ឋក្នុងខេត្តបាត់ដំបង និងខេត្តដទៃទៀត និងពីភ្នំពេញខ្លះ។
នៅក្នុងពិធីនោះ គេឃើញមានការឡើងបង្ហាញពីបទពិសោធន៍នៃការបដិបត្តិធម៌វិបស្សនារបស់សិស្សចាស់មួយចំនួន ដើម្បីឲ្យភ្ញៀវបានយល់ថា តើការបដិបត្តិធម៌នៅទីនោះគេបានទទួលលទ្ធផលយ៉ាងណាខ្លះ។
ក្នុងចំណោមសិស្សចាស់ទាំងនោះ មានសិស្សចាស់មួយរូបឈ្មោះ ព្រីង រចនា បានឲ្យដឹងថា គាត់ជាគ្រូបង្រៀនមួយរូបនៅអនុវិទ្យាល័យរូងជ្រៃ ខេត្តបាត់ដំបង។ គាត់ធ្លាប់បានមកបដិបត្តិធម៌វិបស្សនានៅមជ្ឈមណ្ឌលតាំងពីឆ្នាំ២០០៨ ហើយ រហូតមកដល់ពេលនេះក៏នៅតែបន្តការបដិបត្តិជាប់រហូតដែរ ពីព្រោះបានធ្វើឲ្យគាត់ចេះពីវិធីសាស្ត្រអប់រំចិត្ត ហើយហ៊ានប្រឈមមុខក្នុងការងារលំបាកៗបានខ្លះ ដែលមិនដូចពីមុនចេះតែមានបញ្ហាភ័យខ្លាចច្រើន។
បញ្ជាក់ប្រាប់ស្រដៀងគ្នានេះដែរ អ្នកបដិបត្តិធម៌វិបស្សនាមួយរូបទៀត ឈ្មោះ ដាលីយ៉ា នៅភ្នំពេញ ដែលបានចូលរួមនៅក្នុងពិធីនោះដែរ បានបញ្ជាក់ថា ក្រោយពីបានបដិបត្តិធម៌នោះជាប់ជាប្រចាំមកបានធ្វើឲ្យរូបគាត់មានការផ្លាស់ប្ដូរទម្លាប់ចាស់បានមួយចំនួន ដូចជាកាត់បន្ថយកំហឹង កាត់បន្ថយការគិតច្រើនជាដើម៖ «កាលលើកមុនពេលមានបញ្ហាអី ទោះបីខ្ញុំអត់ទ្រាំយ៉ាងម៉េច តែនៅក្នុងចិត្តរបស់ខ្ញុំគឺវាមានទុក្ខ។ តែអ្វីដែលសំខាន់ដែលខ្ញុំមកក្នុងពេលឥឡូវនេះ ចេះគ្រប់គ្រងចិត្ត»។
មជ្ឈមណ្ឌលវិបស្សនាធម្មលដ្ឋិកានៅខេត្តបាត់ដំបង គឺជាសាខាមួយនៃមជ្ឈមណ្ឌលវិបស្សនាអន្ដរជាតិ ដែលមានទីតាំងចម្បងនៅធម្មគិរី ក្នុងរដ្ឋមហាភស្ដ្រានៃប្រទេសឥណ្ឌា ដែលមានចម្ងាយ ៣៥០គីឡូម៉ែត្រ ភាគខាងត្បូងនៃទីក្រុងបុមបេ។
នៅក្នុងសៀវភៅសិល្បសាស្ត្រនៃការរស់នៅស្ដីពីវិបស្សនាកម្មដ្ឋានដែលគេបានចែកជូនដល់ភ្ញៀវអ្នកចូលរួមក្នុងពិធីនោះបានបញ្ជាក់ថា វិបស្សនាគឺវិទ្យាសាស្ត្រនៃចិត្ត ដែលហួសផុតពីចិត្តវិទ្យា ជាបច្ចេកទេសសាកលឥតប្រកាន់និកាយ ពណ៌សម្បុរ និងសាសនាណាមួយនោះទេ។ វិប្សនាគឺជាសិល្បៈនៃការរស់នៅ ហើយបច្ចេកទេសនេះត្រូវបានរកឃើញដោយព្រះពុទ្ធគោតម កាលពីជាង ២.៥០០ (ពីរពាន់ប្រាំរយឆ្នាំ) មុន ហើយព្រះអង្គទ្រង់បានបង្រៀនបច្ចេកទេស ឬធម៌វិបស្សនានេះដល់មនុស្ស ឬសព្វសត្វទាំងអស់មិនរើសមុខ។
ក្នុងសៀវភៅដដែលបានបង្ហាញទៀតថា ការបដិបត្តិវិបស្សនាមិនគ្រាន់តែធ្វើឲ្យមនុស្សយល់ពីដំណើរការនៃការប្រព្រឹត្តទៅរបស់ចិត្តប៉ុណ្ណោះទេ ប៉ុន្តែបច្ចេកទេសនេះ គឺធ្វើឲ្យមនុស្សអ្នកបដិបត្តិខ្ជាប់ខ្ជួនមានចិត្តបរិសុទ្ធទៀតផង គឺមិនមានប្រឡាក់ប្រឡូសដោយគ្រឿងសៅហ្មងផងទាំងឡាយ។
ដោយបានឃើញគុណប្រយោជន៍នៃការបដិបត្តិធម៌វិបស្សនាយ៉ាងដូច្នោះ ហើយនិងចង់ឲ្យអ្នកដទៃទៀតបានទទួលផលប្រយោជន៍ដែរនោះ ទើបមជ្ឈមណ្ឌលវិបស្សនាធម្មលដ្ឋិកា បានប្រារព្ធធ្វើទិវាផ្សព្វផ្សាយស្ដីពីសកម្មភាពធម្មសិក្សានៅទីនោះ។ ការផ្សព្វផ្សាយនេះ គេឃើញមានការចាប់អារម្មណ៍ច្រើនដែរពីសំណាក់អ្នកចូលរួមនៅក្នុងពិធី។
ក្នុងចំណោមអ្នកទាំងនោះ កញ្ញា ហួត ផល្លែន ជានិស្សិតទន្តបណ្ឌិតនៅភ្នំពេញ បាននិយាយថា នាងខំស្កាត់មកតាំងពីភ្នំពេញ បន្ទាប់ពីបានដំណឹងថា មជ្ឈមណ្ឌលធម្មលដ្ឋិកានៅខេត្តបាត់ដំបង បានបើកទិវាផ្សព្វផ្សាយស្ដីពីវិបស្សនាកម្មដ្ឋាន ពីព្រោះចង់ដឹងថាអ្វីទៅជាវិបស្សនា ហើយបើបានបដិបត្តិ តើនឹងទទួលផលយ៉ាងណាខ្លះ?
កញ្ញា ហួត ផល្លែន៖ «ខ្ញុំសង្ឃឹមថា ឱកាសក្រោយៗទៀតខ្ញុំនឹងមានពេលចូលរួមរយៈពេល ១០ថ្ងៃ ២០ថ្ងៃអី។ ខ្ញុំមានអារម្មណ៍ថា ខ្ញុំចង់ចែករំលែកការដឹង ការស្គាល់ទីនេះទៅកាន់ក្រុមគ្រួសាររបស់ខ្ញុំ ស្គាល់ដូចខ្ញុំដែរ...»។
ចំពោះការបើកទិវាផ្សព្វផ្សាយធម៌វិបស្សនារបស់មជ្ឈមណ្ឌលធម្មលដ្ឋិកានេះដែរ ប្រធានមន្ទីរធម្មការនិងសាសនា ខេត្តបាត់ដំបង លោក សួន ប៊ុនជឿន ដែលបានចូលរួមក្នុងពិធីនោះ បានមានប្រសាសន៍ថា ការបើកកម្មវិធីនេះក្តី និងសកម្មភាពបង្រៀនធម៌វិបស្សនានៅទីនេះក្ដី កន្លងមកគឺជាការចូលរួមចំណែកមួយដ៏ល្អ ពីព្រោះបានជួយបណ្ដុះបណ្ដាល អប់រំគុណធម៌ សីលធម៌ដល់មនុស្សទូទៅនៅក្នុងសង្គមជាតិខ្មែរ។
លោក សួន ប៊ុនជឿន៖ «រហូតទៅដល់ប្រទេសខ្មែរយើងនេះអាចទទួលថា ជាប្រទេសដែលមានអរិយធម៌ល្អ កាន់ព្រះពុទ្ធសាសនា។ ក៏ប៉ុន្តែបើសិនជាអ្នកដែលមកប្រតិបត្តិ ជាអ្នកគ្រិស្ទានក្តី ជាអ៊ីស្លាមក្តី ចូលមកប្រតិបត្តិ អាចប្រតិបត្តិបាន ឲ្យតែប្រតិបត្តិតាមមាគ៌ា»។
គណៈកម្មការមជ្ឈមណ្ឌលធម្មលដ្ឋិកា បានបញ្ជាក់ប្រាប់ផងដែរថា នៅទីនោះ ក្រៅពីមានសកម្មភាពបង្រៀនធម៌វិបស្សនាកម្មដ្ឋានដល់មនុស្សពេញវ័យ ក្នុងនោះក៏មានបើកបង្រៀនធម៌អានាបាណស្សតិកម្មដ្ឋានដល់កុមារផងដែរ ដូចជានៅក្នុងឆ្នាំ២០១៣ កន្លងទៅនេះ បានបើកបង្រៀនចំនួន ៦វគ្គ ហើយនៅក្នុង ១វគ្គ គឺមានរយៈពេលមួយថ្ងៃ គឺនៅថ្ងៃអាទិត្យ ដែលកុមារឈប់សម្រាកពីការរៀនសូត្រចំណេះទូទៅនៅសាលារៀនរដ្ឋ។
ក្នុងឆ្នាំ២០១៣ គឺមានកុមារបានមកចូលរៀនបដិបត្តិធម៌អានាបា ចំនួនសរុប ៥៦៦នាក់ និងមានអាយុចាប់ពី ៨ ដល់ ១៦ឆ្នាំ ហើយជាសិស្សមកពីសាលាបឋមសិក្សាខ្លះ មកពីអនុវិទ្យាល័យខ្លះ និងមកពីតំបន់នានាក្នុងខេត្តបាត់ដំបង និងពីភ្នំពេញមួយចំនួន។
តាមរយៈនៃការបង្រៀនធម៌និងការសាកសួរកុមារ ក្រោយពីបានរៀនចប់ម្ដងៗ គេបានឃើញថា មានកុមារខ្លះបានទទួលផលប្រយោជន៍ ដូចជាទន្ទេញមេរៀនបានឆាប់ចាំ និងរៀនសូត្របានពិន្ទុល្អពូកែជាងមុន។ កុមារខ្លះទៀតនិយាយថា គេចេះស្ដាប់ដំបូន្មានរបស់ឪពុកម្ដាយ លោកគ្រូ អ្នកគ្រូ និងយល់ពីការរក្សាសីល៥ ដែលនាំឲ្យមានជីវិតរស់នៅល្អជាដើម។
លោកអាចារ្យប្រចាំមជ្ឈមណ្ឌលធម្មលដ្ឋិកា បានឲ្យដឹងដែរថា សព្វថ្ងៃនេះមានមជ្ឈមណ្ឌលវិបស្សនាដែលមានបច្ចេកទេសនិងប្រពៃណីដូចគ្នានេះ គឺមានចំនួន ១៧២ នៅក្នុងសកលលោក ក្នុងទ្វីបទាំង៥។ រីឯចំនួនសិស្សដែលបានទៅចូលរៀនវិបស្សនានៅទូទាំងសកលលោកក្នុង ១ឆ្នាំមានជាង ១លាននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។