ចលនាខ្មែរម្ចាស់ស្រុកពិនិត្យការគោរពសន្ធិសញ្ញាក្រុងប៉ារីស

សាខានៃចលនាខ្មែរម្ចាស់ស្រុក នៅទីក្រុង Sydney ប្រទេសអូស្ត្រាលី នឹងរៀបចំសន្និបាតអន្តរជាតិលើកទី៣ របស់ចលនាខ្មែរម្ចាស់ស្រុក នៅថ្ងៃទី៥ ទី៦ ខែសីហាខាងមុខនេះ។

ដោយ មឿង ទុម
2011-08-02

អង្គសន្និបាតអន្តរជាតិលើកទី៣ របស់ចលនាខ្មែរម្ចាស់ស្រុក ផ្ដោតលើប្រធានបទចំនួន ១៣ចំណុច ជាសំខាន់។ ប្រធានបទ៥ដំបូង រួមមានអំពីបទវិភាគរបស់វាគ្មិនពីប្រទេសអូស្ត្រាលី កម្ពុជា និងសហរដ្ឋអាមេរិក ទាក់ទិននឹងវិបត្តិសង្គមធំៗ នៅកម្ពុជា ដែលនឹងចាប់ផ្ដើមនៅថ្ងៃសុក្រក្នុងសប្ដាហ៍នេះ។ ប្រធានបទ៨ផ្សេងទៀតនឹងត្រូវលើកយកមកជជែកពិភាក្សាជាបន្តបន្ទាប់មកទៀត។ ក្នុងនោះរួមមាន បញ្ហាការគោរពសិទ្ធិមនុស្សក្នុងរយៈពេល ២០ឆ្នាំក្រោយពីមានសន្ធិសញ្ញាសន្តិភាពទីក្រុងប៉ារីស ឆ្នាំ១៩៩១ និងរិះរកដំណោះស្រាយ ដើម្បីឈានទៅរកសេរីភាពជូនប្រជាជាតិខ្មែរ តាមរយៈច្បាប់អន្តរជាតិ។ អង្គសន្និបាតទាំងថ្ងៃសុក្រ និងថ្ងៃសៅរ៍នេះ នឹងត្រូវរៀបចំឡើងនៅឯមហាវិទ្យាល័យ NEW SOUTH WALES នៅទីក្រុង Sydney ប្រទេសអូស្ត្រាលី។

លោកស្រីបណ្ឌិត ចាក់ សាខុន ប្រធានចលនាខ្មែរម្ចាស់ស្រុកមានប្រសាសន៍ឲ្យវិទ្យុអាស៊ីសេរីដឹងតាមទូរស័ព្ទមកថា វាគ្មិនសំខាន់ៗ ដែលនឹងចូលរួមមានទាំងអស់ ១២នាក់ ៖ «មានមន្ត្រីតំណាងតុលាការកំពូលអូស្ត្រាលី និងវាគ្មិនអ្នកបច្ចេកទេសពីមហាវិទ្យាល័យមួយចំនួន និងពីអង្គការសហប្រជាជាតិខ្លះមកចូលរួម»។

កិច្ចប្រជុំនៅថ្ងៃអាទិត្យនឹងរៀបចំឡើងនៅឯវត្តកេតនៈខ្មែរកម្ពុជាក្រោម នៅទីក្រុង Sydney ប្រទេសអូស្ត្រាលី។ លោក ប៊ុន ហ៊ាងអ៊ឹង តំណាងឲ្យខ្មែរម្ចាស់ស្រុកប្រចាំទីក្រុង Sydney មានប្រសាសន៍ឲ្យដឹងបន្ថែមថា អ្នកចូលរួមនៅថ្ងៃអាទិត្យខាងមុខនេះ អាចមានច្រើន ៖ «អាចមានពី៣ ដល់៤រយនាក់ឯណោះ។ សន្ធិសញ្ញាសន្តិភាពទីក្រុងប៉ារីស ២៣ តុលា មានសារសំខាន់ច្រើនដល់ខ្មែរ រួមមានការពារបូរណភាពដែនដី បញ្ឈប់បញ្ហាការរំលោភសិទ្ធិមនុស្សជាដើម»។

លោកស្រីបណ្ឌិត ចាក់ សាខុន បញ្ជាក់ថា ខ្មែរម្ចាស់ស្រុករៀបចំអង្គសន្និបាតអន្តរជាតិបែបនេះ បាន៣លើក រួមទាំងនៅលើកនេះផង ហើយក៏គ្រោងនឹងបន្តរៀបចំ ២ទៀត នៅក្នុងឆ្នាំ២០១១ ឲ្យបានទាំងអស់ ៥អង្គសន្និបាត ក្នុងបំណងជួយដល់កម្ពុជា ៖ «ពិនិត្យនូវកាលវេលា។ ទី៤ ធ្វើនៅញីវយ៉ក ទី៥ ធ្វើនៅប៉ារីស ដើម្បីឲ្យគេជួយដោះស្រាយបញ្ហាខ្មែរ»៕