ពលរដ្ឋ​ខ្មែរ​នៅ​កូរ៉េ ប្រារព្ធ​ពិធីបុណ្យ​ខួប​ ៣​ឆ្នាំ​ នៃ​​ឃាតកម្ម​​បណ្ឌិត កែម ឡី

ដោយ ហេង រស្មី
2019-07-07
អ៊ីម៉ែល
មតិ
Share
បោះពុម្ព
ប្រជាពលរដ្ឋ​ខ្មែរ​នៅ​ប្រទេស​កូរ៉េខាងត្បូង នាំគ្នា​ប្រារព្ធ​ពិធីបុណ្យ​រម្លឹក​ខួប ៣​ឆ្នាំ នៃ​ឃាតកម្ម​លោក បណ្ឌិត កែម ឡី នៅ​ថ្ងៃ​ទី៧ ខែ​កក្កដា ឆ្នាំ​២០១៩។
ប្រជាពលរដ្ឋ​ខ្មែរ​នៅ​ប្រទេស​កូរ៉េខាងត្បូង នាំគ្នា​ប្រារព្ធ​ពិធីបុណ្យ​រម្លឹក​ខួប ៣​ឆ្នាំ នៃ​ឃាតកម្ម​លោក បណ្ឌិត កែម ឡី នៅ​ថ្ងៃ​ទី៧ ខែ​កក្កដា ឆ្នាំ​២០១៩។
រូប​ពី​ហ្វេសប៊ុក​ពលរដ្ឋ​នៅ​កូរ៉េខាងត្បូង

ប្រជាពលរដ្ឋ​ខ្មែរ​នៅ​ប្រទេស​កូរ៉េខាងត្បូង នាំគ្នា​ប្រារព្ធ​ពិធីបុណ្យ​រម្លឹក​ខួប ៣​ឆ្នាំ នៃ​ឃាតកម្ម​លោក បណ្ឌិត កែម ឡី។ ពួកគេ​បង្ហាញ​ក្ដី​នឹករលឹក និង​ផ្ញើ​សារ​ទាមទារ​ឱ្យ​របប​ក្រុងភ្នំពេញ​ស្វែងរក​ឃាតក ពិត។

ប្រជា​ពលករ សិស្ស​និស្សិត និង​ស្ត្រី​រៀបការ​ប្ដី​នៅ​កូរ៉េ ប្រមាណ​ជាង ១០០​នាក់ នៅ​ថ្ងៃ​ទី​៧ ខែ​កក្កដា បាន​រៀបចំ​ពិធីបុណ្យ​ខួប​៣​ឆ្នាំ នៃ​ការ​បាញ់​សម្លាប់​លោក​បណ្ឌិត កែម ឡី នៅ​ទីក្រុង​អាន់សាន់ ប្រទេស​កូរ៉េខាងត្បូង ដើម្បី​ឧទ្ទិស​បុណ្យ​កុសល និង​បង្ហាញ​​ការ​នឹករលឹក​ដឹងគុណ​ចំពោះ​ការ​លះបង់​ដ៏​ធំធេង​របស់​លោក​បណ្ឌិត កែម ឡី ចំពោះ​សង្គមជាតិ​កម្ពុជា។

អនុប្រធាន​ចលនា​គណបក្ស​សង្គ្រោះ​ជាតិ​ប្រចាំ​ប្រទេស​កូរ៉េខាងត្បូង លោក ព្រំ រ័ត្ន រៀបរាប់​ថា ពិធី​បុណ្យ​ខួប​៣​ឆ្នាំនេះ គឺ​បាន​និមន្ត​ព្រះសង្ឃ​រាប់បាត្រ និង​ទេសនា​ដើម្បី​ឧទ្ទិស​កុសលផល​បុណ្យ ទាំងឡាយ​ដល់​ដួង​វិញ្ញាណក្ខន្ធ​លោក​បណ្ឌិត កែម ឡី។ បន្ទាប់​មក​ទៀត អ្នកចូលរួម​កម្មវិធី​បុណ្យ បាន​សំណេះសំណាល​គ្នា និង​រៀបរាប់​អំពី​ជីវប្រវត្តិ​លោក​បណ្ឌិត កែម ឡី ព្រមទាំង​សូត្រ​កំណាព្យ អំពី​វីរភាព​របស់​លោក​បណ្ឌិត ដើម្បី​ដាស់តឿន​ស្មារតី​យុវជន​ឱ្យ​បន្ត​ទាមទារ​លទ្ធិ​ប្រជាធិបតេយ្យ​និង ការ​ផ្លាស់ប្តូរ​នៅ​កម្ពុជា៖ «ក្រុម​យុវជន​នៅ​កូរ៉េ​ខាង​ត្បូង​គោរព​ស្រលាញ់​នូវ​វីរភាព​របស់​អ្នក ស្នេហា​ជាតិ ដែល​ហ៊ាន​និយាយ​ការ​ពិត​នៅ​ក្នុង​សង្គម ហ៊ាន​បើក​បង្ហាញ​ឲ្យ​ពលរដ្ឋ​បាន​យល់​ដឹង​អំពី ភាព​ចន្លោះ​ប្រហោង​នៃ​ការ​ដឹក​នាំ​របស់​រដ្ឋាភិបាល»

លោក ព្រំ រត្ន័ បន្ត​ក្នុង​ពិធី​បុណ្យ​ខួប​នេះ យុវជន​នៅ​កូរ៉េ​ខាង​ត្បូង ក៏​ផ្ញើ​សារ​ទាមទារ​ឱ្យ​របប​ក្រុង​ភ្នំពេញ​របស់​លោក ហ៊ុន សែន បើក​ការស៊ើបអង្កេត​ដើម្បី​រក​អ្នក​ពាក់ព័ន្ធ ឬ​អ្នក​នៅ​ពី​ក្រោយ​ខ្នង​ឃាតកម្ម​លើ​បណ្ឌិត កែម ឡី ព្រោះ​ពលរដ្ឋ​ខ្មែរ មិន​ជឿ​ថា មាន​តែ​ឃាតក​ម្នាក់ ឈ្មោះ​ជួប​សម្លាប់​នោះ​ទេ៖ «ក្នុង​នាម​ជា​យុវជន​នៅ​កូរ៉េ​ខាង​ត្បូង គឺ​យើង​ចង់​ឲ្យ​បង្ហាញ​នូវ​អង្គ​ចងចាំ​ដែល​ជា​កាមេរ៉ា​សុវត្ថិភាព ដើម្បី​ឲ្យ​យើង​បាន​ដឹង​ថា តើ​មាន​បុគ្គល​ណា​ខ្លះ ដែល​នៅ​ពី​ក្រោយ​ខ្នង និង​ចង់​ដឹង​ថា តើ​ឃាតក​ពិត គឺ​ជា​នរណា តើ​ជា ជួប សម្លាប់ ឬ​ជា​បុគ្គល​ណា​ផ្សេង

យុវជន​ខ្មែរ​នៅ​កូរ៉េ​មួយ​រូប​ទៀត គឺ​លោក ឯក ចេស្តា រៀបរាប់​ថា លោក បណ្ឌិត កែម ឡី នៅតែ​ស្ថិត​ក្នុង​ក្រអៅបេះដូង​កូន​ខ្មែរ​ភាគច្រើន ព្រោះ​លោក​បាន​លះបង់​ជីវិត​ដើម្បី​បុព្វហេតុ​ជាតិ​និង​ប្រជា​ពលរដ្ឋ​ពិតប្រាកដ​។ លោក​បន្ត​ថា មូលហេតុ​ដែល​ចូល​រួម​​ធ្វើបុណ្យ​គម្រប់​ខួប​៣​ឆ្នាំនេះ ដើម្បី​ឧទ្ទិស បុណ្យ និង​បង្ហាញ​ការ​គោរព​ដឹងគុណ​ដល់​លោក​បណ្ឌិត កែម ឡី ព្រមទាំង​មាន​ក្តី​ប្រាថ្នា​ឱ្យ​វីរបុរស​ម្នាក់​នេះ កើតជា​ខ្មែរ​ទៀត៖ «ខ្ញុំ​សោក​ស្ដាយ​ធនធាន​មនុស្ស​ដ៏​ល្អ​របស់​កម្ពុជា ជា​ពិសេស លោក​បណ្ឌិត កែម ឡី តែ​ម្ដង ដែល​ខ្ញុំ​ចងចាំ​មិន​ភ្លេច​នូវ​វីរភាព​របស់​គាត់។ ប្រសិន​បើ​គាត់​នៅ​មាន ជីវិត គាត់​នឹង​បន្ត​រូត​វាំងនន​សង្គម​កម្ពុជា​ឲ្យ​ប្រជា​ពលរដ្ឋ​បាន​យល់​បាន​ដឹង​ច្រើន​នូវ​អ្វី​ដែល​សង្គម សព្វ​ថ្ងៃ​កំពុង​លាក់បាំង»

អ្នកស្រាវជ្រាវ​ការ​អភិវឌ្ឍ​សង្គម និង​ជា​អ្នកវិភាគ​នយោបាយ​ដ៏​មាន​ប្រជាប្រិយភាព បណ្ឌិត កែម ឡី ត្រូវ​បាន​ខ្មាន់កាំភ្លើង​បាញ់សម្លាប់​នៅ​ព្រឹក​ថ្ងៃ​ទី​១០ ខែ​កក្កដា ឆ្នាំ​២០១៦ នៅ​ឯ​ស្ដារម៉ាត (Star Mart) ក្នុង​ស្ថានីយ​លក់​ប្រេងឥន្ធនៈ​កាល់តិច (Caltex) ក្នុង​ទីក្រុង​ភ្នំពេញ។ អំពើ​ឃាតកម្ម​នេះ តុលាការ​បាន​ផ្ដន្ទាទោស អឿត អាង ដែល​ហៅ​ខ្លួនឯង​ថា ជួប សម្លាប់ ឱ្យ​ជាប់ពន្ធនាគារ​អស់​មួយ​ជីវិត​។ ប៉ុន្តែ​សាធារណជន​នៅតែ​មិន​អស់ចិត្ត​នៅ​ឡើយ ព្រោះ​ពួកគេសុទ្ធតែ​ជឿ​ថា អឿត អាង មិន​អាច​ធ្វើ​រឿង​នេះ​បានតែ​ម្នាក់ឯង​នោះ​ឡើយ​។ ទំនងជា​ដើម្បី​បញ្ចៀស​ការរិះគន់ តុលាការ​ក្រុង​ភ្នំពេញ​បានសម្រេច​បំបែកសំណុំរឿង​នេះ​ជា​ពីរ ដើម្បី​ស៊ើបអង្កេត​រក​អ្នក​ពាក់ព័ន្ធ​ផ្សេងទៀត យក​មក​កាត់ ទោស ក៏ប៉ុន្តែ​តុលាការ​ខកខាន​មិនបាន​ផ្តល់​ព័ត៌មាន​ស្ដីពី​ការ​វិវឌ្ឍ​នៃ​សំណុំរឿង​ទី​ពីរ​នេះ​ឡើយ​រហូត​មក​ដល់​ពេល​នេះ។

អ្នកនាំពាក្យ​ក្រសួងយុត្តិធម៌ លោក ជិន ម៉ាលីន ប្រាប់​អាស៊ីសេរី​ថា សំណុំរឿង​ទី​មួយ​ដែល​ផ្ដោត​លើ​ការ​កាត់ទោស​បុគ្គល អឿត អាង បាន​បិទ​បញ្ចប់​ហើយ ចំណែក​សំណុំរឿង​ទី​២ កំពុង​ឋិត​ក្នុង​ដំណើរ ការ​ស៊ើបសួរ ដើម្បី​ស្វែងរក​ភាគី​ពាក់ព័ន្ធ ឬ​អ្នក​នៅ​ពីក្រោយ។ លោក​បន្ត​ថា យោង​តាម​នីតិវិធី​របស់​តុលាការ កាលណា​សំណុំរឿង​ឋិត​ក្នុង​ដំណាក់កាល​ស៊ើបសួរ គឺ​ចៅក្រម​ស៊ើបសួរ មាន​ឆន្ទានុសិទ្ធិ​ក្នុង​ការ​ផ្សព្វផ្សាយ ឬ​មិន​ផ្សព្វផ្សាយ​នូវ​ព័ត៌មាន​ស្ដីពី​ការ​វិវឌ្ឍ​នៃ​សំណុំរឿង​ទី​ពីរ ដើម្បី​ជៀសវាង​ការ​ប៉ះ​ពាល់​ភាព​សម្ងាត់​នៃ​ការស៊ើបអង្កេត​រួមមាន​ភស្តុតាង សាក្សី និង​ខ្សែអាត់​វីដេអូ​ពី​កាមេរ៉ា​សុវត្ថិភាព​ជាដើម៖ «ប៉ុន្តែ​ជា​គោលការណ៍​ច្បាប់​ភាគី​ពាក់ព័ន្ធ​មាន​មេធាវី និង​សាច់​ញាតិ អាច​ស្នើសុំ​ពិនិត្យ​មើល​បាន។ បើ​មាន​ការ​ស្នើសុំ​ជា​ផ្លូវការ គឺ​ចៅក្រម​ស៊ើបសួរ​នឹង​សម្រេច​ថា តើ អនុញ្ញាត ឬ​មិន​អនុញ្ញាត ហើយ​បើ​អនុញ្ញាត​ត្រឹម​កម្រិត​ណា ចៀសវាង​ដល់​ភាព​សម្ងាត់​នៃ​ការ​ស៊ើប​អង្កេត ប៉ុន្តែ​កន្លង​មក​តាម​ដឹង ដូច​ជា​មិន​មាន​ការ​ស្នើសុំ​ជា​ផ្លូវ​ការ​អី​ទេ ពី​ខាង​សាច់​ញាតិ​នោះ​ទេ​មានតែ អត្ថាធិប្បាយ​តាម​សារ​ព័ត៌មាន»

ដំណើរ​រក​យុត្តិធម៌​ក្នុង​សំណុំរឿង​បណ្ឌិត កែម ឡី ត្រូវ​បាន​សហគមន៍​ជាតិ និង​អន្តរជាតិ វាយ​តម្លៃ​ថា មិន​មាន​ភាព​ពេញលេញ និង​មិន​អាច​ទទួល​យក​បាន​តាំងពី​​ដំបូង ហើយ​ការ​ដែល​មន្ត្រី​ក្រសួង​យុត្តិធម៌ ប្រើ​ពាក្យ​ថា អាជ្ញាធរ​និង​តុលាការ កំពុង​បន្ត​ស៊ើបអង្កេត​នោះ គឺ​គ្រាន់តែ​ដើម្បី​កុំ​ឱ្យ​មាន ការ​រិះគន់​តែប៉ុណ្ណោះ ប៉ុន្តែ​ការ​ពិត ពួកគេ​គ្មាន​ឆន្ទៈ​ពិតប្រាកដ​ឡើយ។

ប្រធាន​មូលនិធិ​បណ្ឌិត កែម ឡី គឺ​លោក សៅ កុសល លើកឡើង​ថា ថ្វី​ដ្បិត​តែ​លោក​បណ្ឌិត កែម ឡី ត្រូវ​បាន​ឃាតក​បាញ់សម្លាប់​រយៈពេល​៣​ឆ្នាំ​ហើយ​ក្ដី ប៉ុន្តែ​សង្គម​ស៊ីវិល ប្រជាពលរដ្ឋ​ខ្មែរ​គ្រប់​ស្រទាប់​វណ្ណៈ ទាំង​មន្ត្រីរាជការ សិស្ស​និស្សិត និង​ព្រះសង្ឃ​ជាដើម នៅតែ​រន្ធត់ សោកស្ដាយ​និង នៅតែ​គោរព​ស្រលាញ់​ដល់​វីរភាព​របស់​លោក​បណ្ឌិត កែម ឡី ម៉្លោះ​ហើយ​ទើប​មាន​ពិធី​បុណ្យខួប ៣​ឆ្នាំ និង​ការ​ទាមទារ​រក​យុត្តិធម៌​ជូន​បណ្ឌិត កែម ឡី ស្ទើរ​គ្រប់​ទីកន្លែង​ទាំង​ក្នុង​ប្រទេស​កម្ពុជា និង​នៅ​ឯ​ក្រៅ​ប្រទេស៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល