សហភាពអឺរ៉ុប ចង់​ឃើញ​កម្ពុជា​បើក​ចំហ​លំហ​នយោបាយ​ជា​បន្ទាន់ និង​ចាប់​ផ្តើម​ដំណើរ​ការ​ផ្សះផ្សារ​ជាតិ​តាម​រយៈ​កិច្ច​សន្ទនា​ពិត​ប្រាកដ​មាន​ការ​ចូលរួម​ពី​គ្រប់​ភាគី​ពាក់ព័ន្ធ

ដោយ មាន ឫទ្ធិ
2019-11-11
អ៊ីម៉ែល
មតិ
Share
បោះពុម្ព
ទង់ជាតិ សហគមន៍អឹរ៉ុប។
ទង់ជាតិ សហគមន៍អឹរ៉ុប។
Facebook

សហភាព​អឺរ៉ុប​ គូសបញ្ជាក់​ជាថ្មី​ម្តង​ទៀត​ ចង់​ឃើញ​អាជ្ញាធរ​កម្ពុជា​ ចាត់​វិធានការណ៍​ជាបន្ទាន់​ បើកចំហ​រលំ​ហរ​នយោបាយ​ បង្កើត​ឲ្យ​មាន​នូវ​លក្ខខណ្ឌ​ចាំបាច់​នានា​ដើម្បីឲ្យ​មាន​គណបក្ស​ប្រឆាំង​តាម​បែប​ប្រជាធិបតេយ្យ​ និង​ជឿ​ទុកចិត្ត​បាន​ ហើយ​ចាប់ផ្តើម​ដំណើរការ​ផ្សះ​ផ្សារ​ជាតិ​តាមរយៈ​កិច្ច​សន្ទនា​ ដោយពិត​ប្រាកដ​ និង​មានការ​ចូលរួម​ពី​គ្រប់​ភាគី​ពាក់ព័ន្ធ​ទាំងអស់​។ មន្ត្រី​រដ្ឋាភិបាល​ បដិសេធ​ការ​ចង់​ឲ្យ​មានការ​ផ្សះ​ផ្សារ​ជាតិ​ឡើងវិញ​នេះ។

ក្រៅពី​គូសបញ្ជាក់​ពី​ចំណុច​សំ​ខាន់ៗ ចង់​ឃើញ​ឲ្យ​មានការ​បើក​លំហ​រន​យោ​បាយ​ និង​ផ្សះ​ផ្សារ​ជាតិ​ឡើងវិញ​នេះ​ សហភាព​អឺរ៉ុប​បញ្ជាក់​ក្នុង​សេចក្តី​ថ្លែងការណ៍​ផ្សាយ​កាលពី​ថ្ងៃ​ទី១១ វិច្ឆិកា​ថា «យើង​ចង់​ឃើញ​ឲ្យ​មានការ​ដោះលែង​លោក​ កឹម​ សុខា​ ទាំងស្រុង​ និង​មានការ​ផ្តល់​សិទ្ធិ​នយោបាយ​ឲ្យ​លោក​ឡើងវិញ​ ដើម្បីឲ្យ​លោក​ កឹម​ សុខា​ អាច​បំពេញ​តួនាទី​ពេញលេញ​ក្នុង​ជីវិត​នយោបាយ​​របស់​លោក»។‍‍‍‍ សហភាព​អឺរ៉ុប​ ក៏​រំពឹង​ចង់​ឃើញ​អាជ្ញាធរ​កម្ពុជា​ ផ្តល់​សិទ្ធិ​នយោបាយ​ដល់​គ្រប់​សមាជិក​គណបក្ស​ប្រឆាំង​ទាំងអស់​ដែល​ត្រូវ​បាន​ហាមប្រាម​មិន​ឲ្យ​ធ្វើនយោបាយ​ និង​ឲ្យ​មានការ​ដោះលែង​សមាជិក​ ក្រុម​អ្នកគាំទ្រ​ និង​សកម្មជន​គណបក្ស​ប្រឆាំង​ទាំងអស់​ ដែល​អាជ្ញាធរ​កម្ពុជា​បាន​ចាប់​ និង​ឃុំខ្លួន​ពួកគេ​ជាបន្តបន្ទាប់​នា​រយៈពេល​ចុងក្រោយ​នេះ។

ការ​ចេញ​សេចក្តី​ថ្លែង​ការណ៍​របស់​សហភាព​អឺរ៉ុបនេះ ធ្វើឡើង​មួយថ្ងៃ​មុន​ពេល​ដែល​សហភាព​អឺរ៉ុប​ នៅ​ថ្ងៃ​ទី១២ វិច្ឆិកា ចេញ​ផ្សាយ​របាយការណ៍​វាយតម្លៃ​បឋម​អំពី​ការ​រក​ឃើញ​របស់​ខ្លួន​ថា តើ​ត្រូវ​ឈាន​ទៅ​ដក​ហូត​ប្រព័ន្ធ​អនុគ្រោះ​ពន្ធ EBA ឬក៏​អត់។ ខណៈ​ពីរ​ថ្ងៃមុន​នេះ ចៅក្រម​តុលាការក្រុង​ភ្នំពេញ​ បាន​បន្ធូរ​បន្ថយ​លក្ខខណ្ឌ​លើ​លោក​ កឹម​ សុខា​ ពី​ការ​ឃុំខ្លួន​ក្នុង​ផ្ទះ​ ដោយ​អនុញ្ញាត​ឲ្យ​លោក​អាច​ដើរហើរ​ក្នុង​ប្រទេស​បាន​ តែ​ហាមប្រាម​មិន​ឲ្យ​លោក​ធ្វើនយោបាយ​ និង​ធ្វើដំណើរ​ទៅក្រៅ​ប្រទេស​បាន​ឡើយ។ សហភាព​អឺរ៉ុប​ ថា​ សេចក្តី​សម្រេច​របស់​តុលាការក្រុង​ភ្នំពេញ​ កែសម្រួល​លក្ខខណ្ឌ​នៃ​ការ​ឃុំខ្លួន​មេដឹកនាំ​គណបក្ស​ប្រឆាំង​ លោក​ កឹម​ សុខា​ នា​ពេលនេះ​ គឺជា​ជំ​ហ៊ាន​ដំបូង​ ក្នុង​ទិសដៅ​ត្រូវ​មួយ។ ក៏ប៉ុន្តែ​ សហភាព​អឺរ៉ុប​ថា លោក​ កឹម​ សុខា​ នៅតែ​ស្ថិត​ក្រោម​ការ​ត្រួត​ពិនិត្យ​​របស់​តុលាការ​ដដែល​ ហើយ​ថា​ សំណុំរឿង​របស់​លោក​ មិន​ត្រូវ​បាន​បិទ​បញ្ចប់​នៅឡើយ​ទេ​ ដោយសារ​លោក​ត្រូវ​បាន​ហាមប្រាម​មិន​ឲ្យ​ចូលរួម​ក្នុង​សកម្មភាព​នយោបាយ​ដដែល។

ឆ្លើយតប​នឹង​សេចក្តី​ថ្លែង​ការ​របស់​សហភាព​អឺរ៉ុប​នេះ​ ដូច​សព្វមួយដង​ អ្នកនាំពាក្យ​របប​ក្រុងភ្នំពេញ​ លោក​ ផៃ​ ស៊ី​ផាន​ ប្រាប់​អាស៊ី​សេរី​កាលពី​ថ្ងៃទី១១​ វិច្ឆិកា​ ថា​ ករណី​លោក​ កឹម​ សុខា​ និង​មន្ត្រី​បក្ស​ប្រឆាំង​ដទៃទៀត​ គឺជា​កិច្ចការ​របស់​តុលាការ។ លោក​ថា​ ការ​បន្ធូរបន្ថយ​លក្ខខណ្ឌ​មក​លើ​លោក​ កឹម​ សុខា​ នេះ​ មិន​ជាប់ពាក់ព័ន្ធ​នឹង​សម្ពាធ​ ឬគោលនយោបាយ​ណាមួយ​នោះ​ទេ​។ លោក​ ផៃ​ ស៊ី​ផាន​ ព្រលយ​ថា​ លោក​ ហ៊ុន​ សែន​ អាច​នឹង​ស្នើ​ទៅ​ព្រះមហាក្សត្រ​ឲ្យ​លើកលែងទោស​លោក​ កឹម​ សុខា​ បាន​ នៅពេល​ដែល​លោក​ កឹម​ សុខា​ ត្រូវ​បាន​តុលាការ​កាត់ទោស​រួចរាល់៖ «ការ​ចង់បាន​ពី​ភាគី​ដទៃទៀត​ គឺ​យើង​ស្វាគមន៍​ មិនមែន​ជា​រឿង​មិន​ស្វាគមន៍​នោះ​ទេ​ ក៏ប៉ុន្តែ​ត្រូវតែ​អនុវត្ត​នីតិវិធី​ឲ្យបាន​ចប់ចុងចប់ដើម​ អាស្រ័យ​ដោយ​រដ្ឋធម្មនុញ្ញ​កម្ពុជា​ហ្នឹង​ មាន​ចន្លោះ​មួយទៀត​ក្នុង​ន័យ​នយោបាយ​បន្ទាប់ពី​ការវិនិច្ឆ័យ​ហើយ​របស់​តុលាការ​ គឺ​មានតែ​នាយក​រដ្ឋមន្ត្រី​ទេ​ លោក​មាន​បុព្វសិទ្ធិ​ក្នុង​ការ​ស្នើសុំ​ទៅ​ព្រះមហាក្សត្រ​ដើម្បី​ព្រះរាជទាន​លើកលែងទោស​នេះឯង»

យ៉ាងណាក៏ដោយ​ លោក​ ផៃ​ ស៊ី​ផាន​ បដិសេធ​ចំពោះ​ការ​ចង់​ឃើញ​ឲ្យ​មានការ​ផ្សះផ្សា​ជាតិ​ឡើងវិញ​ពីសំណាក់​ភាគី​សហភាព​អឺរ៉ុប​ ដោយ​លោក​ថា​ រដ្ឋាភិបាល​មិន​អាច​ទៅ​ផ្សះ​ផ្សារ​ជាតិ​ជា​មួយ​នឹង​​ក្រុម​ ដែល​លោក​ហៅថា​ «ជា​អ្នក​ចង់​ធ្វើ​រដ្ឋប្រហារ​ផ្តួល​រំលំ​រដ្ឋាភិបាល​» នោះ​ទេ។

ផ្ទុយពី​ការ​លើកឡើង​របស់​លោក​ ផៃ​ ស៊ី​ផាន​ នេះ​ អ្នកស្រី​ មូរ សុខ​ហួរ អនុប្រធាន​គណបក្ស​សង្គ្រោះ​ជាតិ​​ ថា ​របប​នេះ​មិន​អាច​ជៀស​ផុត​ពី​ការ​មិនព្រម​ផ្សះផ្សា​ជាតិ​ពីសំណាក់​គ្រប់​ភាគី​នោះ​ទេ។ អ្នកស្រី​ថា​ កា​រប​ន្ធូ​បន្ថយ​ករណី​លោក​ កឹម​ សុខា​ តែឯង​ មិន​អាច​ដោះស្រាយ​រឿង​វិបត្តិ EBA នេះ​បានទេ​ ព្រោះ​នៅ​មាន​លក្ខខណ្ឌ​ជាច្រើន​ទៀត​ដែល​សហភាព​អឺរ៉ុប​បាន​ដាក់ចេញ​ និង​ទាមទារ៖ «លោក​ ហ៊ុន​ សែន​ គាត់​ធ្វើ​នេះ​ គឺ​នៅក្នុង​សេ​ណា​រី​យ៉ូ​របស់​គាត់​ទៀតហើយ។ គឺ​ជា​យុទ្ធវិធី​ ជា​យុទ្ធសាស្ត្រ​របស់​គាត់​នៅក្នុង​ការ​បំបែក​ឲ្យ​គណបក្ស​សង្គ្រោះ​ជាតិ​បែកគ្នា​ ឲ្យ​លោក​ប្រធាន​ កឹម​ សុខា​ នៅ​ឆ្ងាយ​ពី​លោក​ប្រធាន​ស្តីទី​ សម​ រង្ស៊ី​ ឲ្យ​យើងខ្ញុំ​នៅ​ឆ្ងាយ​ពី​ប្រទេសជាតិ​។ ខុស​ហើយ​ ខុស​ស្រលះ។ ជាតិ​របស់​យើង​ គឺ​យើង​ទាំងអស់គ្នា​ត្រូវ​កសាង​ជាមួយគ្នា​ ហើយ​ត្រូវ​មានការ​ផ្សះ​ផ្សារ​ជាតិ​ មិនបាច់​ចាំ​មក​បំបែក​គណបក្ស​សង្គ្រោះ​ជាតិ។ គណបក្ស​សង្គ្រោះ​ជាតិ​អត់​បែក​ជា​ដាច់ខាត»

មន្ត្រី​សង្គម​ស៊ីវិល និង​ជានា​យក​ប្រតិបត្តិ​អង្គការ​មជ្ឈមណ្ឌល​សម្ព័ន្ធភាព​ការងារ​ និង​សិទ្ធិមនុស្ស​ ហៅ​កាត់​ថា សង់​ត្រាល់ (CENTRAL) លោក មឿន តុលា ពុំ​មាន​សុទិដ្ឋិនិយម​ទេ​ថា របាយ​ការណ៍​វាយ​តម្លៃ​របស់​សហភាព​អឺរ៉ុប​ នឹង​មាន​ភាព​វិជ្ជមាន​នោះ​ ដោយសារតែ​មានការ​កើនឡើង​ករណី​ការ​ចាប់ខ្លួន​ ធ្វើទុក្ខ​បុកម្នេញ​មក​លើស​កម្ម​ជន​គណបក្ស​ប្រឆាំង​ ព្រមទាំង​ការ​ចល័ត​ទ័ព​ជាដើម៖ «ការ​ឆ្លើយ​តប​របស់​រដ្ឋាភិបាល​នា​ពេល​នេះ ហាក់​បី​ដូច​ជា​មិន​បាន​ឆ្លើយ​ទៅ​នឹង​អ្វី​ដែល​គេ​ចង់​បាន​ឡើយ។ អ៊ីចឹង​លទ្ធផល​នៃ​ការ​រក្សា​ប្រព័ន្ធ​អនុគ្រោះ​ពន្ធ​នេះ​ គឺ​ហាក់​ដូច​ជា​មិន​មាន​ជា​វិជ្ជមាន​សោះ។ ខ្ញុំ​ហាក់ដូចជា​បារម្ភ​ខ្លាំង​មែនទែន។ ជា​រឿង​មួយ​សោក​ស្តាយ​ដែល​អន្តរជាតិ​ គេ​ទៅជា​ជំរុញ​ឲ្យ​យើង​ព្យាយាម​ផ្សះ​ផ្សារ​ជាតិ​ទៅវិញ។ នេះ​ជា​ចំណុច​សំខាន់​ដែល​យើង​ ក្នុងនាម​ជាតិ​ខ្លួ​នយើងៗ​គួរ​ពិចារណាមើល​ថា​តើ​យើង​ឈ្លោះ​គ្នា​ដល់ណា​? នេះ​ជា​ចំណុច​មួយ​ធ្វើឲ្យ​អន្តរជាតិ​គេ​បារម្ភ​ពី​ជាតិ​យើង​ជំនួស​យើង​ទៅវិញ​នោះ»

សម្រាប់​លោក​ រ៉ុង​ ឈុន​ វិញ​ ក៏​យល់ឃើញ​ដែរ​ថា​ ការ​បន្ធូរបន្ថយ​បន្តិចបន្ទួច​របស់​របប​ក្រុងភ្នំពេញ​នេះ​ មិន​អាចយ​កទៅ​ទូទាត់​នឹង​លក្ខខណ្ឌ៥ចំណុច​ ដែល​សហភាព​អឺរ៉ុប​ទាមទារ​នោះ​ទេ​ ក្នុង​នោះ​មានការ​ដោះលែង​លោក​ កឹម​ សុខា​ ការ​ធ្វើឲ្យ​គណបក្ស​សង្គ្រោះ​ជាតិ​រស់​ឡើងវិញ​ ការ​លុប​បម្រាម​ដើម្បីឲ្យ​មន្ត្រី​ជាន់ខ្ពស់​គណបក្ស​សង្គ្រោះ​ជាតិ១១៨រូប​ធ្វើនយោបាយ​ឡើងវិញ​បាន​ ការ​ផ្តល់​តំណែង​ដល់​ក្រុមប្រឹក្សា​ឃុំ​សង្កាត់​គណបក្ស​សង្គ្រោះ​ជាតិ​ ៥០០៧នាក់​ និង​ការរៀបចំ​ការបោះឆ្នោត​ឡើងវិញ៖ «សហភាព​អឺរ៉ុប​ក៏​នៅ​មាន​ភ្ជាប់​លក្ខខណ្ឌ​បន្ថែម​លើ៥ចំណុច​ហ្នឹង ដូច​ជា លក្ខខណ្ឌ​ការងារ​កម្មករ​ផង​ដែរ​ ក៏ដូចជា​លក្ខខណ្ឌ​សារព័ត៌មាន​ដែល​តម្រូវឲ្យ​មានការ​ផ្សាយ​ឡើងវិញ​ផង​ដែរ។ ប៉ុន្តែ​ យើង​ពិនិត្យ​មើល​ជាក់​ស្តែង​ រដ្ឋាភិបាល​មិន​ទាន់​បាន​ដោះ​ស្រាយ​នូវ​រាល់​ចំណុច​ទាំងអស់​នេះ​នៅឡើយ​ទេ។ ដូច្នេះ​ គ្រាន់​តែ​ជា​ការ​បន្ធូរ​បន្ថយ​បន្តិចបន្តួច​ អ៊ីចឹង​មិន​អាច​រក្សា EBA បាន​ទេ បើសិនជា​រដ្ឋាភិបាល​កម្ពុជា​ មិនព្រម​ធ្វើការ​សម្រុះសម្រួល​ឲ្យបាន​ទាន់​ពេល​វេលា»

លោក រ៉ុង ឈុន​ អំពាវនាវ​ឲ្យ​អ្នក​នយោបាយ​តម្កល់​ផលប្រយោជន៍​ជាតិ​ជាធំ​ ជាជាង​គិតតែពី​ផលប្រយោជន៍​បុគ្គល​ ដើម្បី​ដោះស្រាយ​បញ្ហា​នយោបាយ​នៅ​កម្ពុជា​នេះ៖ «ដើម្បី​បញ្ចប់​នូវ​វិបត្តិ​នយោបាយ​នៅ​កម្ពុជា​ ត្រូវតែ​ធ្វើការ​សម្របសម្រួល​ទាំង​វត្តមាន​លោក​ សម​ រង្ស៊ី​ វត្តមាន​លោក​ កឹម​ សុខា។ អ្នកនយោបាយ​ខ្មែរ​ទាំងអស់​ត្រូវតែ​ចូលរួម​ជីវិត​នយោបាយ​ ឬធ្វើនយោបាយ​ឡើងវិញ​។ សូមឲ្យ​អ្នកនយោបាយ​ទាំងអស់​ ត្រូវតែ​តម្កល់​នូវ​ផលប្រយោជន៍​ជាតិ​ជាធំ​ កុំ​យក​រឿង​បញ្ហា​បុគ្គល​ បញ្ហា​រឿង​ផ្ទាល់ខ្លួន​ ទៅ​ធ្វើឲ្យ​ប៉ះពាល់​ដល់​ប្រយោជន៍ជាតិ​ ដល់​ផលប្រយោជន៍​ប្រជាពលរដ្ឋ។ នេះ​ជា​រឿង​មួយ​គ្រោះថ្នាក់​បំផុត​សម្រាប់​ប្រជាជាតិ​ខ្មែរយើង»

ក្រោយ​របប​ក្រុងភ្នំពេញ​​​រម្លាយ​គណបក្ស​ប្រឆាំង​ និង​ជម្នះ​បង្កើត​រដ្ឋាភិបាល​ និង​រដ្ឋសភា​ឯក​បក្ស​ តាមរយៈ​ការបោះឆ្នោត «ក្លែងក្លាយ» រួច​មក​ សហភាព​អឺរ៉ុប​ បាន​ចាប់ផ្តើម​ដំណើរការ​នីតិវិធី​ដក​ហូត​ប្រព័ន្ធ​អនុគ្រោះ​ពន្ធ «គ្រប់មុខ​ទំនិញ​ទាំង​អស់​លើកលែងតែ​អាវុធ​» ហៅ​កាត់​ថា EBA កាល​ពី​ថ្ងៃ​ទី១២​ ខែ​កុម្ភៈ​ ឆ្នាំ២០១៩​ ដើម្បី​ដាក់​សម្ពាធ​មក​លើ​របប​នេះ​ឲ្យ​ងាក​មក​ស្តារ​ប្រជាធិបតេយ្យ​ និង​ការគោរព​សិទ្ធិមនុស្ស​ឡើង​វិញ។ នៅ​ថ្ងៃ​ទី១២​ វិច្ឆិកា សហភាព​អឺរ៉ុប​នឹង​ចេញ​ផ្សាយ​របាយការណ៍​វាយតម្លៃ​ចំពោះ​ការ​រក​ឃើញ​របស់​ខ្លួន​ ជុំវិញ​បញ្ហា​រំលោភសិទ្ធិ​មនុស្ស​ សិទ្ធិ​នយោបាយ​ និង​សិទ្ធិ​ការងារ​នៅ​កម្ពុជា​ ដែល​ជាឯក​សារ​គោល​ក្នុង​ការ​យក​ទៅ​សម្រេចចិត្ត​ថា​តើ​ត្រូវ​ដក​ ឬមិន​ត្រូវ​ដក​ប្រព័ន្ធ​អនុគ្រោះ​ពន្ធ EBA នោះ។ របប​ក្រុង​ភ្នំពេញ​មាន​រយៈ​ពេល​មួយ​ខែ​ ដើម្បី​ឆ្លើយ​តប​ទៅ​នឹង​ការ​រក​ឃើញ​នេះ។ បន្ទាប់​មក​ សហភាព​អឺរ៉ុប​ នឹង​ធ្វើ​សេចក្តី​សម្រេចចិត្ត​ចុងក្រោយ​ ថា​តើ​ត្រូវ​ដកហូត​ប្រព័ន្ធ​អនុគ្រោះ​ពន្ធ​នេះ​ យ៉ាង​យូរ​បំផុត​ត្រឹម​ថ្ងៃ​ទី១២​ ខែ​កុម្ភៈ​ ឆ្នាំ២០២០។ ប្រសិន​បើ​សហភាព​​អឺរ៉ុប​ សម្រេច​ដកហូត​ហូត​ប្រព័ន្ធ​អនុគ្រោះ​ពន្ធ​ពី​កម្ពុជា​ នោះ​ការ​គិត​ពន្ធ​ជា​ផ្លូវការ​ពី​កម្ពុជា​ នឹង​ចាប់ផ្តើម​ពី​ពាក់កណ្តាល​ខែសីហា​ ឆ្នាំ២០២០ ត​ទៅ។ ស្ថាប័ន​អន្តរ​ជា​តិ​ធំៗ​ រួម​មាន​​ធនាគារ​ពិភពលោក (World Bank) ធនាគារ​អភិវឌ្ឍន៍​អាស៊ី (ADB) មូលនិធិ​រូបិយវត្ថុ​អន្តរជាតិ (IMF) សុទ្ធតែ​បាន​ព្រមាន​ព្រមៗ គ្នា​ថា​ សេដ្ឋកិច្ច​កម្ពុជា​ នឹង​ប្រឈម​នឹង​ការ​ធ្លាក់​ចុះ​ពី ៧ភាគ​រយ​​នៅ​ឆ្នាំ២០១៩ នេះ មក​នៅ ៦,៨ភាគ​រយ​ នៅ​ឆ្នាំ២០២០​ ដោយសារ​តែ​ភាព​មិន​ប្រាកដប្រជា​នៃ​ការ​ដក​ហូត​ប្រព័ន្ធ​អនុគ្រោះ​ពន្ធ​របស់​សហភាព​អឺរ៉ុប​។ កម្ពុជា​អាច​នឹង​ខាតបង់​រហូត​ដល់​ទៅ​ជិត​ ៧០០​លាន​ដុល្លារ​អាមេរិក​ក្នុង​មួយ​ឆ្នាំៗ ប្រសិនបើ​សហភាព​អឺរ៉ុប​សម្រេច​យក​ពន្ធ​លើ​រាល់​មុខ​ទំនិញ​ទាំង​អស់​របស់​កម្ពុជា​មែន​នោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល