មេធាវីការពារក្ដីឲ្យប្រធានគណបក្សសង្គ្រោះជាតិ មានជំនឿថា ចៅក្រមស៊ើបសួរសាលាដំបូងរាជធានីភ្នំពេញ នឹងបិទបញ្ចប់នីតិវិធីស៊ើបសួរ លើកូនក្ដីនៅពេលឆាប់ៗខាងមុខនេះ។ អ្នកវិភាគថា របបក្រុងភ្នំពេញ នឹងអាចបិទបញ្ចប់នីតិវិធីស៊ើបសួរ ហើយឈប់លេងល្ខោនមួយនេះ ព្រោះមិនអាចបោកប្រាស់ពលរដ្ឋ និងសហគមន៍អន្តរជាតិបាន។
មេធាវីម្នាក់ ក្នុងចំណោមសហមេធាវីការពារឲ្យ លោក កឹម សុខា គឺ លោក ផែង ហេង មានសុទិដ្ឋិនិយមថា ចៅក្រមស៊ើបសួរ អាចនឹងបិទបញ្ចប់នីតិវិធី ព្រោះការស៊ើបសួរបាន ធ្វើឡើងជាងមួយឆ្នាំហើយ ដោយមិនមានភស្តុតាងដាក់បន្ទុកក្រៅតែពីវីដេអូ ដែលគេធ្លាប់បញ្ចេញតាមហ្វេសប៊ុក ហើយត្រូវសហគមន៍អន្តរជាតិ បកស្រាយថា គ្មានអត្ថន័យពាក់ព័ន្ធនឹងទោសក្បត់ជាតិដូចការចោទប្រកាន់ឡើយ៖ «កាលដែលស៊ើបសួរនឹងវាជាងមួយឆ្នាំមក ហើយតុលាការសាលាដំបូងចៅក្រមស៊ើបសួរនឹងបើតាមការស៊ើបសួរ ភស្តុតាង វីដេអូ ដែលព្រះរាជ អាជ្ញាដាក់អោយបានកោះហៅសាក្សីមួយចំនួនមកឆ្លើយអញ្ចឹងហើយចៅក្រមស៊ើបសួរ និងអាចបិទការស៊ើបសួរ ប៉ុន្តែបិទនៅពេលណាថ្ងៃណា យើងមិនទាន់ដឹងទេបើចង់ដឹង មានតែនៅលើចៅក្រមស៊ើបសួរ»។
គិតត្រឹមថ្ងៃទី១៤ តុលា លោក កឹម សុខា ត្រូវបានសមត្ថកិច្ចរបបក្រុងភ្នំពេញ ឃុំខ្លួនក្នុងពន្ធនាគារត្រពាំងផ្លុង និងឃុំខ្លួនក្នុងផ្ទះ រយៈពេល៤០៧ ថ្ងៃ ឬស្មើនឹង ១ឆ្នាំ ៤២ថ្ងៃ ក្នុងបទចោទសន្ទិដ្ឋិភាព ឬ ក្បត់ជាតិ ប៉ុន្តែ ក្រុមអ្នកប្រជាធិបតេយ្យនិយម និងសហគមន៍អន្តរជាតិ ហៅបទចោទនេះ ជាការប្រឌិតឡើងដោយរបបលោក ហ៊ុន សែន ព្រោះខ្លាចចាញ់ឆ្នោត នៅអាណត្តិទី៦។
ក្រោយពេល លោក កឹម សុខា ជាប់ឃុំនៅពន្ធនាគារត្រពាំងផ្លុងជាង១ឆ្នាំ នៅថ្ងៃទី១០ ខែកញ្ញា នៅម៉ោងប្រមាណ៣ទៀបភ្លឺ សមត្ថកិច្ចរបបក្រុងភ្នំពេញ បានដឹកលោក កឹម សុខា ពីពន្ធនាគារត្រពាំងផ្លុង មកដល់បន្តឃុំខ្លួននៅគេហដ្ឋានរបស់លោក នៅទីក្រុងភ្នំពេញវិញ ដោយស្ងាត់ៗ ទាំងយប់។ចៅក្រមស៊ើបសួរ សាលាដំបូងរាជធានីភ្នំពេញ លោក គី ឬទ្ធី បានព្រមាន មិនឲ្យលោក កឹម សុខា ជួបនិយាយជាមួយបុគ្គលណាទាំងអស់ ដោយគ្មានការអនុញ្ញាតពីចៅក្រម។ រដ្ឋមន្ត្រីក្រសួងមហាផ្ទៃ លោក ស ខេង ជាអ្នកបង្ហើបថា លោកជាអ្នករៀបចំយុទ្ធសាស្ត្រឃុំខ្លួន លោក កឹម សុខា ក្នុងផ្ទះ ស្របពេលរបបក្រុងភ្នំពេញ មិនទាន់បង្កើតច្បាប់ឃុំខ្លួនមនុស្សនៅក្នុងផ្ទះ។
អាស៊ីសេរី មិនមានប្រភពសុំការបញ្ជាក់ពី ចៅក្រមស៊ើបសួរ លោក គី ឬទ្ធី បានទេ។ ចំណែក អ្នកនាំពាក្យតំណាងអយ្យការអមសាលាដំបូងរាជធានីភ្នំពេញ លោក លី សុផាណា មិនលើកទូរស័ព្ទ។
សមាជិកក្រុមអ្នកវិភាគវ័យក្មេង លោក បុង ដែត យល់ថា តាមស្ថានភាពនយោបាយសព្វថ្ងៃ របបក្រុងភ្នំពេញ អាចកំពុងរៀបចំយុទ្ធសាស្ត្រ បញ្ចប់ព្រឹត្តិការណ៍ចោទប្រកាន់ លោក កឹម សុខា ព្រោះសេនារីយោ ល្ខោនចាប់ចងមួយនេះ មិនអាចធ្វើឲ្យពលរដ្ឋ និងសហគមន៍អន្តរជាតិជឿបាន តែទទួលបានមកវិញនូវការព្រមាន និងភាពអាម៉ាស់លើឆាកអន្តរជាតិ ជារបបផ្ដាច់ការ ដែលប្រទេសលោកសេរី គេបញ្ឈប់ផ្ដល់ទិដ្ឋាការ មិនឲ្យចូលសហរដ្ឋអាមេរិក។ អ្នកវិភាគរូបនេះ សង្កេតឃើញថា របបក្រុងភ្នំពេញ កំពុងសសៀរទៅរកសហរដ្ឋអាមេរិក និងគ្រោងឱនលំទោនដាក់សហភាពអឺរ៉ុប ដើម្បីចង់ស្ដារសេដ្ឋកិច្ច ដែលជាគ្រឹះ នៃអំណាចរបស់ខ្លួន៖ «ដែលយើងបានឃើញថ្មីៗនេះថាមិនអោនក្បាលចំពោះ បរទេសណាអោយជាន់ក្បាលខ្លួននោះទេ ប៉ុន្តែឥលូវគេចាប់ផ្ដើមទៅរណបសហរដ្ឋអាមេរិកវិញ គេ កំពុងបោកប្រាស់ភ្នែកពលរដ្ឋគេកំពុងរៀបចំកន្លែងអស់ទាំងនឹង»។
លោកមេធាវី ផែង ហេង ឲ្យដឹងថា មកដល់ពេលនេះ សុខភាព លោក កឹម សុខា អាចហាត់ប្រាណបានច្រើននៅក្នុងផ្ទះ ហើយសុខភាព សម្ពាធឈាម ជាតិស្ករ គឺមានស្ថានភាពដូចអ្នកជំងឺទូទៅដែរ។ ប៉ុន្តែ ជំងឺសរសៃរបស់លោក កឹម សុខា នៅមិនទាន់អាចព្យាបាលបានទេ គឺទាល់តែពេទ្យជំនាញ នៅក្រៅប្រទេស ដែលធ្លាប់តាមដានជំងឺនេះ តាំងពីដើមមក ទើបដឹងច្បាស់ពីស្ថានភាពជំងឺ៕