ខ្មែរ​កម្ពុជា​ក្រោម​មិន​មាន​សិទ្ធិ​ពេញលេញ​ប្រារព្ធ​ពិធី​ចូល​ឆ្នាំ​ខ្មែរ​នៅ​លើ​ទឹក​ដី​កំណើត​របស់​ខ្លួន

ដោយ ទីន ហ្សាការីយ៉ា
2018-04-13
អ៊ីម៉ែល
មតិ
Share
បោះពុម្ព
ក្លោង​ទ្វារ​វត្ត​ពុត​ធ្លេ​ថ្មី ខេត្ត​ពល​លាវ ទឹកដី​កម្ពុជា​ក្រោម ក្នុង​ពេល​បុណ្យ​បញ្ចុះ​ខណ្ឌ​សីមា កាល​ពី​ខែ​មីនា ឆ្នាំ​២០១៨។
ក្លោង​ទ្វារ​វត្ត​ពុត​ធ្លេ​ថ្មី ខេត្ត​ពល​លាវ ទឹកដី​កម្ពុជា​ក្រោម ក្នុង​ពេល​បុណ្យ​បញ្ចុះ​ខណ្ឌ​សីមា កាល​ពី​ខែ​មីនា ឆ្នាំ​២០១៨។
Print screen

ខ្មែរ​កម្ពុជា​ក្រោម​នៅ​ប្រទេស​វៀតណាម ភូមិ​ភាគ​ខាង​ត្បូង ​កំពុងត្រៀម​ខ្លួន​ចូល​ឆ្នាំ​ថ្មី​ប្រពៃណី​ខ្មែរ​ដូច​ពលរដ្ឋ​ខ្មែរ ដែល​កំពុង​រស់​នៅ​កម្ពុជា​ដែរ ប៉ុន្តែ​ដោយសារ​រស់នៅ​ក្រោម​ការ​គ្រប់គ្រង​របស់​អាជ្ញាធរ​កុម្មុយនីស្ដ វៀតណាមនោះ ពួក​គាត់​មិន​មាន​សិទ្ធិ​ពេញលេញប្រារព្ធពិធីចូលឆ្នាំថ្មី​ដូច​ប្រជាពលរដ្ឋ​ខ្មែរ​នៅ​កម្ពុជា​នេះ​ទេ។

សហគមន៍​ខ្មែរ​កម្ពុជា​ក្រោម ទាម​ទារ​ឲ្យ​រដ្ឋាភិបាល​វៀតណាម បើក​ឱកាស​ឲ្យ​សិស្សានុសិស្ស កម្មករ​រោងចក្រ និង​មន្ត្រី​រាជការ​វៀតណាម ដែល​មាន​ដើម​កំណើត​ជា​ខ្មែរ​នោះ បាន​ឈប់​សម្រាក​នៅ​ថ្ងៃ​ចូល​ឆ្នាំ​ខ្មែរ ដូច​នឹង​រដ្ឋាភិបាល​កុម្មុយនីស្ត​វៀតណាម បាន​អនុញ្ញាត​ឲ្យ​ប្រជាពលរដ្ឋ​វៀតណាម និង​ចិន បាន​ឈប់​សម្រាក​នៅ​ក្នុង​ថ្ងៃ​ចូល​ឆ្នាំ​ប្រពៃណី​ចិន វៀតណាម​ដែរ។

សហគមន៍​ខ្មែរ​កម្ពុជា​ក្រោម បាន​លើក​ឡើង​ថា ការ​អនុញ្ញាត​ឲ្យ​ពលរដ្ឋ​ខ្មែរ​កម្ពុជា​ក្រោម នៅ​ក្នុង​ប្រទេស​វៀតណាម បាន​ឈប់​សម្រាក​នៅ​ក្នុង​ពិធី​បុណ្យ​ប្រពៃណី​របស់​ខ្លួន​នោះ ជា​ការ​ឆ្លុះ​បញ្ចាំង​អំពី​ការ​យក​ចិត្ត​ទុក​ដាក់ និង​ការ​គោរព​សិទ្ធិ​ស្មើ​គ្នា​ចំពោះ​មុខ​ច្បាប់ ​ចំពោះគ្រប់​ជន​ជាតិ​ទាំង​អស់ ដែល​រស់​នៅ​ក្រោម​ការ​ត្រួតត្រា​របស់​វៀតណាម។

ប្រធាន​ប្រតិបត្តិ នៃ​សហព័ន្ធ​ខ្មែរ​កម្ពុជា​ក្រោម​លោក ប្រាក់ សេរីវុឌ្ឍ មាន​ប្រសាសន៍​ថា សហព័ន្ធ​ខ្មែរ​កម្ពុជា​ក្រោម​បាន ចូលរួម​ប្រជុំ​មហាសន្និបាត​របស់​អង្គការ យូ​អ៊ិន​ភី​អូ (UNPO) នៅ​ប្រទេស​បែលហ្សិក (Belgium) ជម្រាប​ជូន​រដ្ឋមន្ត្រី​ក្រសួង​ការបរទេស​ប្រទេស​អូស្ត្រាលី (Austria) អាមេរិក សមាជិក​ព្រឹទ្ធសភា​ប្រទេស​បារាំង និង​សភា​អ៊ឺរ៉ុប ដើម្បី​ស្នើសុំ​ឲ្យ​រដ្ឋាភិបាល​កុម្មុយនីស្ដ​វៀតណាម​គោរព​ពលរដ្ឋ​ជនជាតិ​ដើម ដែល​រស់​នៅ​លើ​ដែន​ដី​កំណើន​របស់​ខ្លួន​នៅ​វៀតណាម​ខាង​ត្បូង និង​ស្នើសុំ​ឱ្យ​រដ្ឋាភិបាល​នៃ​ប្រទេស​ទាំង​នោះ ដាក់​សម្ពាធ​ទៅ​ដល់​រដ្ឋាភិបាល​វៀតណាម​ឱ្យ​គោរព​សិទ្ធិ​ពលរដ្ឋ​ខ្មែរ​កម្ពុជា​ក្រោម និង​ឈប់​ធ្វើ​ទុក្ខ​បុក​ម្នេញ​ពលរដ្ឋ​ខ្មែរ​ក្រោម។

លោក​បន្ថែម​ថា ពលរដ្ឋ​ខ្មែរ​ក្រោម​គ្មាន​សិទ្ធិ​ពេញលេញ​ប្រារព្ធ​ពិធី​បុណ្យ​ចូល​ឆ្នាំ​ថ្មី​ឡើយ ដោយសារ​បញ្ហា​មួយ​ចំនួន ដូចជា យុវជន​ភាគ​ច្រើន​បាន​ចំណាក​ស្រុក​ទៅ​ធ្វើ​ការ​នៅ​ខែត្​រផ្សេងៗ និង​ធ្វើ​ការ​នៅ​ព្រៃ​នគរ​ជា​ដើម ខាង​ថៅកែ​មិន​អនុញ្ញាត​ឲ្យ​ឈប់​សំរាក និង​ទី​កន្លែង​សម្រាប់​ធ្វើ​ពិធី​ចូល​ឆ្នាំ ចំពោះ​អ្នក​នៅ​ឆ្ងាយ​ពី​ស្រុក​កំណើត ដែល​ចង់​ឆ្លៀត​ពេល​ជួបជុំ​គ្នា​លេង​ល្បែង​ប្រជាប្រិយ​ផ្សេងៗ នា​ឱកាស​ពិធី​បុណ្យ​ចូល​ឆ្នាំ៖

ទីវត្ត​អារាម​ពេល​ចូល​ឆ្នាំ​ថ្មី​ប្រពៃណី​ជាតិ ឮ​សំឡេង​កង​រំពង​អំពី​ការ​សូត្រ​ធម៌ ការ​លេង​ល្បែង​ប្រជាប្រិយ្យ ហើយ​ពុទ្ធសាសនិក​ស្លៀក​សំលៀក​បំពាក់​តាម​បែប​ប្រពៃណី​យក​ចង្ហាន់​ប្រគេន​ព្រះសង្ឃ ហើយ​ពលរដ្ឋ​ខ្មែរ​ជា​ទូទៅ​មាន​ពេល​វេលា​ច្រើន​ក្នុង​ការ​ដើរ​លេង​កំសាន្ត និង​រៀបចំ​ពិធី​តាម​ពុទ្ធសាសនា​តាម​ទំនៀម​ទំលាប់​ប្រពៃណី​រៀងៗ ខ្លួន។ ការ​ជូបជុំ​គ្នា​មិន​ថា ក្មេង​ចាស់​ទេ ឱកាស​ចូល​ឆ្នាំ​ថ្មី​នេះ ជា​ឱកាស​ដ៏​ពិសេស​មួយ​សម្រាប់​ពលរដ្ឋ​ខ្មែរ ដែល​មួយ​ឆ្នាំ​មាន​ម្ដង​សម្រាប់​ជួបជុំ​ក្រុម​គ្រួសារ​មក​ពី​ទី​ជិត​ឆ្ងាយ។ លោក ប្រាក់ សេរីវុឌ្ឍ មាន​ប្រសាសន៍​ថា ចំពោះ​ពលរដ្ឋ​ខ្មែរ​ក្រោម​នៅ​លើ​ទឹក​ដី​កំណើត​របស់​ខ្លួន​វិញ គ្មាន​វាសនា​ឈប់​សំរាក​ជួបជុំ​បង​ប្អូន​ក្រុម​គ្រួសារ និង​រៀបចំ​ពិធី​ផ្សេងៗ នា​ឱកាស​ចូល​ឆ្នាំ​ថ្មី​នេះ​ឡើយ ទោះ​បី​ជា​ពលរដ្ឋ​ខ្មែរ​នៅ​កម្ពុជា​ក្រោម វៀតណាម​ភាគ​ខាង​ត្បូង ក៏​មាន​ប្រពៃណី វប្បធម៌ ទំនៀម​ទម្លាប់ ភាសា អក្សរសាស្ត្រ និង​កាន់​ពុទ្ធសាសនា ដូចជា​ពលរដ្ឋ​ខ្មែរ​នៅ​ប្រទេស​កម្ពុជា​ក្ដី។

លោក ប្រាក់ សេរីវុឌ្ឍ អះអាង​ថា វៀតណាម ប្រើ​នយោបាយ​ត្រជាក់ ដើម្បី​បន្សុទ្ធ​ខ្មែរ​ក្រោម​ឲ្យ​ភ្លេច​ដើម​កំណើត និង​ប្រពៃណី​របស់​ខ្លួន​បន្តិច​ម្ដងៗ ពិសេស គឺ​អាជា្ញធរ​វៀតណាម រឹត​បន្តឹង​មិន​ឲ្យ​ក្មេងៗ រៀន​អក្សរសាស្រ្ត​ខ្មែរ ហើយ​នៅ​តាម​វត្ត​អារាម​ខ្លះ វៀតណាម​ក៏​ឲ្យ​អាចារ្យ​វត្ត​ឈប់​បង្រៀន​អក្សរសាស្រ្ត​ខ្មែរ​ដែរ។

មាត្រា​១១ នៃ​សេចក្ដី​ប្រកាស​អង្គការ​សហប្រជាជាតិ​ស្ដីពី​ជនជាតិ​ដើម​ភាគ​តិច ចំណុច​ទី​១ ចែង​ថា ជនជាតិ​ដើម​ភាគ​តិច​មាន​សិទ្ធិ​បង្កើត និង​គ្រប់គ្រង​ស្ថាប័ន និង​ប្រព័ន្ធ​អប់រំ​របស់​ខ្លួន ដោយ​ផ្ដល់​ការ​អប់រំ​ជា​ភាសា​របស់​ខ្លួន​ផ្ទាល់ ក្នុង​លក្ខណៈ​សមស្រប និង​វិធីសាស្រ្ត​តាម​វប្បធម៌ នៃ​ការ​បង្រៀន និង​រៀនសូត្រ​របស់​ពួក​គេ។

រីឯ​ចំណុច​ទី​២ នៃ​មាត្រា​ដដែល​នេះ បញ្ជាក់​ថា បុគ្គល​ជនជាតិ​ដើម​ភាគ​តិច​គ្រប់​រួប ពិសេស​កុមារ​មាន​សិទ្ធិ​ទទួល​បាន​ការ​អប់រំ​គ្រប់​កំរិត និង​គ្រប់​រួបភាព​នៃ​ការ​អប់រំ​របស់​រដ្ឋ ដោយ​គ្មាន​ការ​រើសអើង​ឡើយ។

ដែន​ដី​កម្ពុជា​ក្រោម ត្រូវ​បាន​អាណានិគម​បារាំង គ្រប់គ្រង​ចាប់​តាំង​ពី​ឆ្នាំ​១៨៥៩។ រហូត​ដល់​ថ្ងៃ​ទី​៤ ខែ​មិថុនា ឆ្នាំ​១៩៤៩ បារាំង បាន​កាត់​ទឹក​ដី​នេះ​ទៅ​ឲ្យ​ស្ដេច​វៀតណាម បាវ ដាយ (Bao Dai) គ្រប់គ្រង ដើម្បី​ជា​ថ្នូរ​យក​កម្លាំង​របស់​ស្ដេច បាវ ដាយ ទៅ​ទប់ទល់​នឹង​កម្លាំង​កុម្មុយនីស្ត​របស់​លោក ហូ ជីមិញ (Ho Chi Minh)។ ការ​កាត់​ទឹក​ដី​កម្ពុជា​ក្រោម ទៅ​ឲ្យ​វៀតណាម គ្រប់គ្រង​នេះ បារាំង មិន​បាន​ឲ្យ​ពលរដ្ឋ​ខ្មែរ​ជា​ម្ចាស់​ស្រុក​បាន​ដឹង​ឡើយ។ តាំង​ពី​ពេល​នោះ​មក ពលរដ្ឋ​ខ្មែរក្រោម ដែល​ជា​ជនជាតិ​ដើម​ម្ចាស់​ស្រុក បាន​ក្លាយជា​ជនជាតិ​ភាគតិច ​រស់នៅ​លើ​ដែន​ដី​កំណើត​របស់​ខ្លួន ​ក្រោម​ការ​គ្រប់គ្រង និង​ត្រួតត្រា​របស់​​រដ្ឋាភិបាល​វៀតណាម

ភិក្ខុ​សុវណ្ណជោតោ យ៉ាន តូន គង់​នៅ​វត្ត​សូរិយា រង្ស៊ី ទីក្រុង Philadelphia ដែល​ព្រះអង្គ​ធ្លាប់​បាន​អាជ្ញាធរ​វៀតណាម​ចាប់​ដាក់​ពន្ធនាគារ​ផង​នោះ មាន​ថេរដីកា​ថា រដ្ឋាភិបាល​វៀតណាម​បាន​បង្ក​ការ​លំបាក​ដល់​ពលរដ្ឋ​ខ្មែរក្រោម​ប្រកប​របរ​កសិកម្ម ដូចជា​ផលិតផល​កសិកម្ម​គ្មាន​ទីផ្សារ មិន​សូវ​យក​ចិត្ត​ទុក​ដាក់​លើ​កសិករ​ដូច​វៀតណាម ទី​បំផុត​ពលរដ្ឋ​ខ្មែរ​ក្រោម​មួយ​ចំនួន ក៏​ធ្វើ​ចំណាក​ស្រុក ហើយ​គ្រួសារ​មួយ​ចំនួន​ខ្វះខាត​ជំពាក់​បំណុល​គេ​ច្រើន ក៏​លក់​ដី​ស្រែ។ នៅ​ទី​បំផុត​ពលរដ្ឋ​ខ្មែរ​ក្រោម​គ្មាន​ដី វៀតណាម​ទិញ​យក ហើយ​ពលរដ្ឋ​ខ្មែរ​ក្រោម​ក៏​ក្លាយ​ជា​អ្នក​ស៊ី​ឈ្នួល​វៀតណាម​វិញ និង​ភូមិឋាន​បាត់​រចនា​ដើម​ដែល​សំគាល់​ថា ជា​ភូមិ​របស់​ខ្មែរ ដោយសារ​តែ​ការ​រស់​នៅ​លាយឡំ និង​វៀតណាម។ ព្រះតេជគុណ​បន្ថែម​ថា នៅ​ពេល​បុណ្យទាន អាជ្ញាធរ​វៀតណាម មិន​សូវ​លើក​ទឹក​ចិត្ត ឬ​បើក​ទូលាយ​ឲ្យ​ពលរដ្ឋ​ទៅ​លេង​ល្បែង​ប្រជាប្រិយ​ក្នុង​វត្ត​ទេ ប៉ុន្តែ​វៀតណាម​ពង្វក់​យុវជន​ខ្មែរ​បើក​កម្មវី​រាំរែក​សប្បាយ ដែល​បទ​ចំរៀង​លាយឡំ និង​បទ​ចំរៀង​របស់​វៀតណាម​ជាដើម។

មាត្រា​១២ នៃ​សេចក្ដី​ប្រកាស​អង្គការ​សហប្រជាជាតិស្ដីពី​ជនជាតិ​ដើម​ភាគ​តិច ចែង​ថា ជនជាតិ​ដើម​ភាគ​តិច មាន​សិទ្ធិ​ប្រតិបត្តិ និង​ធ្វើ​ឲ្យ​រស់​រវើក​ឡើង​វិញ​នូវ​ប្រពៃណី និង​ទំនៀម​ទម្លាប់​ជា​វប្បធម៌​របស់​ខ្លួន។ សិទ្ធិ​នេះ រួមមាន​ទាំង​សិទ្ធិ​ក្នុង​ការ​ថែ​រក្សា​ការពារ និង​អភិវឌ្ឍន៍​អ្វីៗ ដែល​បង្ហាញ​អត្តសញ្ញាណ វប្បធម៌​របស់​ខ្លួន ដែល​មាន​ពី​អតីតកាល បច្ចុប្បន្ន និង​អនាគត ដូចជា​តំបន់​បុរាណវិទ្យា និង​តំបន់​ប្រវត្តិសាស្រ្ត​បុរាណវត្ថុ រចនាបថ ពិធី​បុណ្យ បច្ចេកវិទ្យា និង​សិល្បៈ ទស្សនីយភាព និង​ការ​សម្ដែង​សិល្បៈ និង​អក្សរសាស្រ្ត។

រដ្ឋ​ទាំងឡាយ ត្រូវ​ផ្ដល់​ឲ្យ​មាន​ដំណោះស្រាយ​តាម​រយៈ​យន្តការ​មាន​ប្រសិទ្ធិភាព ដែល​រួមមាន​ទាំង​បដិទាន ដោយ​បាន​រៀបចំ​បង្កើត​ឡើង​ជាមួយ​ជនជាតិ​ដើម​ភាគ​តិច ចំពោះ​កម្មសិទ្ធិ​វប្បធម៌​បញ្ញា សាសនា និង​ជំនឿ​របស់​ពួក​គេ ដែល​ត្រូវ​បាន​ដកហូត​ដោយ​គ្មាន​ការ​យល់​ព្រម​ដោយ​សេរី និង​ដោយ​មិន​បាន​ប្រាប់​ឲ្យ​ដឹង​ជា​មុន ឬ​ដែល​រំលោភ​លើ​ច្បាប់ ប្រពៃណី និង​ទំនៀម​ទម្លាប់​របស់​ពួក​គេ។

ភិក្ខុ​សុវណ្ណជោតោ យ៉ាន តូន សម្ដែង​ក្ដី​ព្រួយ​បារម្ភ​ខ្លាច​បាត់បង់​ប្រពៃណី​ខ្មែរ​នៅ​ពេល​អនាគត ដោយសារ​តែ​រដ្ឋាភិបាល​វៀតណាម មិន​បើក​សិទ្ធិ ឬ​មិន​អនុញ្ញាត​ឲ្យ​ពលរដ្ឋ​ខ្មែរ​ប្រារព្ធ​ពិធី​បុណ្យ​ចូល​ឆ្នាំ​ប្រពៃណី​ជាតិ​ឲ្យ​បាន​ទូលំទូលាយ​ទេ ព្រោះ​ថា នៅ​ពេល​ចូល​ឆ្នាំ​ប្រពៃណី​ចិន​វៀតណាម​វិញ អាជ្ញាធរ​អនុញ្ញាត​ឲ្យ​រយៈ​ពេល ១៥​ថ្ងៃ។

ពលរដ្ឋ​ខ្មែរ​ក្រោម​មួយ​ចំនួន​ទៀត រៀបការ​ជាមួយ​ជនជាតិ​វៀតណាម មាន​ទាំង​ប្រុស​ទាំង​ស្រី នៅ​ពេល​ពួក​គាត់​បាន​ចូល​ធ្វើ​ការ​ជាមួយ​គ្នា​ក៏​បាន​បង្កើត​នូវ​ចំណង​អាពាហ៍ពិពាហ៍ ហើយ​អ្នក​ខ្លះ​ក៏​មិន​ចេះ​និយាយ​ភាសា​ដើម​កំណើត​របស់​ខ្លួន​ក៏​មាន។ ពិសេស នៅ​ពេល​បុណ្យ​ទាន​ក្មេងៗ មិន​សូវ​យល់​ដឹង​អំពី​ប្រពៃណី​ទំនៀម​ទម្លាប់​របស់​ខ្លួន​ឲ្យ​បាន​ស៊ី​ជម្រៅ​នោះ​ទេ ហើយ​មេគណ​ខែត្រ និង​អ្នក​មាន​តួនាទី​មួយ​ចំនួន​ត្រូវ​បាន​វៀតណាម​គាប​សង្កត់ អ្នក​ខ្លះ​បាន​ធ្វើ​ការ​ឲ្យ​អាជ្ញាធរ​វៀតណាម​ថែម​ទៀត។

វត្តអារាម​នៅ​ទឹក​ដី​ខ្មែរ​កម្ពុជា​បច្ចុប្បន្ន​មាន​ជាង ៥០០​វត្ត ហើយ​គ្មាន​ស្ថិតិ​ណា​មួយ​បង្ហាញ​ថា ខ្មែរ​កម្ពុជា​ក្រោម​នៅ​លើ​ទឹក​ដី​កំណើត​របស់​ខ្លួន​នៅ​វៀតណាម​ភូមិភាគ​ខាង​ត្បូង​ថា មាន​ចំនួន​ប៉ុន្មាន​ពិត​ប្រាកដ​ឡើយ។ ប៉ុន្តែ​សៀវភៅ​ប្រវត្តិសាស្រ្ត​ខ្មែរ​ក្រោម​ចំណង​ជើង​ថា អំណាច​គ្មាន​ខ្មែរ​ក្រោម​សរសរ​ថា ពលរដ្ឋ​ខ្មែរ​ក្រោម​មាន​ជាង ១​លាន​នាក់។ សៀវភៅ​ដដែល​នេះ បាន​ស្រង់​ស្ថិតិ​ពី​សៀវភៅ​ដំណោះ​ឆ្ពោះ​ទៅ​ទិស​ខាង​លិច បញ្ជាក់​ថា នៅ​សតវត្ស​ទី​២១ នេះ ខ្មែរ​ក្រោម​មាន​ជាំង ៤​លាន​នាក់។ រីឯ​ខាង​សហព័ន្ធ​ខ្មែរ​ក្រោម​វិញ អះអាង​ថា ខ្មែរក្រោម​ទាំង​អស់​មាន​ជាង ៨​លាន​នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

I read only half of this article. I realized that Khmer Krom asking for the Vietnamese government to allow Khmer Krom people to have a day off as Vietnamese and Chinese during Chinese and Vietnamese New Year. Without allowing Khmer Krom people to have a day off indicated unfair treatment. This is unfair judgement to the Vietnamese government. In America, Canada, and other western countries, they don't let Chinese, Khmer, or other minority group have a day off due to celebrate their New Year. With that being said, the minority groups can request a day off on their own personal leave to celebrate their New Year or other religion activities freely. The only nation day off for America will be Christmas, New Year, Thanksgivings...
So, please reconsider what you have to write on your article. A report from only one perspective is not a good report. This is why there are so many fake news running around to influence our thought and decisions.

Apr 14, 2018 11:43 PM

គេហទំព័រ​ទាំងមូល