ធនាគារ​ពិភពលោក​ ​ព្រមាន​ថា​ ​កម្ពុជា​នឹង​មិន​អាច​សម្រេចបាន​គោលដៅ​ក្លាយជា​ប្រទេស​មាន​ប្រាក់​ចំណូល​មធ្យម​កម្រិត​ខ្ពស់​នៅ​ឆ្នាំ ២០៣០ ​និង​ជា​ប្រទេស​មាន​ចំណូល​ខ្ពស់​នៅ​ឆ្នាំ ២០៥០ ​​ទេ​

ដោយ មាន ឫទ្ធិ
2018-11-29
អ៊ីម៉ែល
មតិ
Share
បោះពុម្ព
ក្របរបាយការណ៍​របស់​ធនាគារ​ពិភពលោក (World Bank)
ក្របរបាយការណ៍​របស់​ធនាគារ​ពិភពលោក (World Bank)
World Bank

ធនាគារ​ពិភពលោក​ ​ព្រមាន​ថា​ ​កម្ពុជា​នឹង​មិន​អាច​សម្រេចបាន​គោលដៅ​ ​ឬ​ចក្ខុ​វិស័យ​អភវិវឌ្ឍន៍​សេដ្ឋកិច្ច​ ​ដើម្បី​ក្លាយ​ខ្លួន​ជា​ប្រទេស​មាន​ប្រាក់​ចំណូល​មធ្យម​ កម្រិត​ខ្ពស់​ ​នៅ​ឆ្នាំ ២០៣០ ​និង​ជា​ប្រទេស​មាន​ចំណូល​ខ្ពស់​ ​នៅ​ឆ្នាំ ២០៥០ ​ដូច​តាម​ការអះអាង​ និង​សុទ្ទិដ្ឋិនិយម​របស់​របប​ក្រុង​ភ្នំពេញ​នោះ​ទេ​ ​ប្រសិនបើ​កម្ពុជា​បន្ត​រក្សា​កំណើន​សេដ្ឋកិច្ច​ក្នុង​កម្រិត​ដូច​ពេល​បច្ចុប្បន្ន​នេះ​។ ​នេះ​បើ​យោង​តាម​របាយការណ៍​បច្ចុប្បន្នភាព​ចុងក្រោយ​នៃ​សេដ្ឋកិច្ច​កម្ពុជា​ ​ទើប​នឹង​ចេញផ្សាយ​ដោយ​ធនាគារ​ពិភពលោក​ កាលពី​ថ្ងៃ​ទី ២៨ ​វិច្ឆិកា​ ​ម្សិល​ម៉ិញ​នេះ។

របាយការណ៍​ធនាគារ​ពិភពលោក​ ​ផ្សាយ​កាលពី​ថ្ងៃ​ទី២៨ ​វិច្ឆិកា ​ផ្តល់​ហេតុផល​ថា​ ​ដើម្បីឲ្យ​កម្ពុជា​សម្រេចបាន​ជា​ប្រទេស​មាន​ប្រាក់​ចំណូល​មធ្យម​កម្រិត​ខ្ពស់​ ត្រឹម​ឆ្នាំ ២០៣០ ​កម្ពុជា​ចាំបាច់​ត្រូវ​មាន​កំណើន​សេដ្ឋកិច្ច​ ៩,៣ ​ភាគរយ​ជា​មធ្យម​ក្នុង​មួយ​ឆ្នាំ​ៗ​ ​គិត​ចាប់ពី​ឆ្នាំ ២០១៨ នេះ​ រហូតដល់​ឆ្នាំ ២០៣០។ ​ក៏ប៉ុន្តែ​ ​ផ្អែក​តាម​ការព្យាករណ៍​ ​កំណើន​សេដ្ឋកិច្ច​ជា​មធ្យម​ដែល​កម្ពុជា​សម្រេចបាន​ក្នុង​រយៈពេល​នេះ​ ​នឹង​មាន​ត្រឹម​ចន្លោះ​ពី​ ៥ ​ទៅ​ ៦ ​ភាគរយ​តែ​ប៉ុណ្ណោះ​។ ​ហេតុការណ៍​នេះ​ របាយការណ៍​ពន្យល់​ថា​ ​នឹង​បណ្តាល​ឲ្យ​ចំណូល​ដុល​របស់​ជាតិ​ ​(GNI) ​ដែល​រួមមាន​ចំណូល​បាន​មកពី​ផលិផល​ក្នុង​ស្រុក​សរុប​ (​ផសស​) ​និង​ចំណូល​បាន​មក​ពី​ក្រៅ​ប្រទេស​ របស់​កម្ពុជា​ក្នុង​មនុស្ស​ម្នាក់ៗ​ ​គឺ​នៅ​ទាប​ជាង​ដល់​ទៅ​ ២ ភាគ ៣ ​ពី​គោលដៅ​ចង់បាន​។ ​ដូចគ្នា​នេះ​ដែរ​ ​ដើម្បីឲ្យ​កម្ពុជា​សម្រេចបាន​គោលដៅ​ក្លាយ​ខ្លួន​ជា​ប្រទេស​មាន​ចំណូល​ខ្ពស់​ត្រឹម​ឆ្នាំ ២០៥០ ​កម្ពុជា​ ​ត្រូវ​មាន​កំណើន​សេដ្ឋកិច្ច​ ៧,២ ​ភាគរយ​ជា​មធ្យម​ក្នុង​មួយ​ឆ្នាំ​ៗ​ ​គិត​ចាប់ពី​ឆ្នាំ ២០១៨ នេះ​ រហូតដល់​ឆ្នាំ ២០៥០ ​ខណៈ​ដែល​តាម​ការព្យាករណ៍​ ​ជា​មធ្យម​កម្ពុជា​សម្រេចបាន​កំណើន​សេដ្ឋកិច្ច​ត្រឹមតែ​ចន្លោះ​ពី​ ៥,៤ ​ទៅ​ ៦,៤ ​ភាគរយ​តែ​ប៉ុណ្ណោះ​។ ​ធនាគារ​ពិភពលោក​ពន្យល់​ថា​ ​ហេតុការណ៍​នេះ​នឹង​បណ្តាល​ឲ្យ​ចំណូល​ដុល​របស់​ជាតិ​ ​(GNI) ​របស់​កម្ពុជា​ក្នុង​មនុស្ស​ម្នាក់ៗ គឺ​នៅ​ទាប​ជាង​គោលដៅ​រហូតដល់​ទៅ​ ៣ ភាគ ៤ ​ឯណោះ។

ដោយ​ពុំ​ទាន់​គិត​ពី​ហានិភ័យ​ធ្ងន់ធ្ងរ​ដល់​សេដ្ឋកិច្ច​ជាតិ​ ​ដោយសារ​កម្ពុជា​កំពុង​ទទួលរង​ការឈាន​ទៅ​រក​ការដកហូត​ប្រព័ន្ធ​អនុគ្រោះ​ពន្ធ ​«គ្រប់​មុខ​ទំនិញ​ទាំងអស់​លើកលែងតែ​អាវុធ» ​ឬ​ EBA ​របស់​សហភាព​អឺរ៉ុប​ផង​ ដែល​អាចនឹង​កើតមាន​ឡើង​នៅ​ឆ្នាំ ២០១៩ ខាងមុខ​នេះ​ ​ប្រសិនបើ​ការព្យាករណ៍​នេះ​ក្លាយជា​ការពិត​មែន​នោះ​ ​នោះ​ហេតុការណ៍​នេះ​ ​នឹង​តែ​ធ្វើឲ្យ​របប​ក្រុង​ភ្នំពេញ​មាន​ការខកចិត្ត​ខ្លាំង​។ ​លោក​ ហ៊ុន ​សែន ​និង​មន្ត្រី​របស់​លោក​ ​តែង​បាន​បង្ហាញ​សុទិដ្ឋិនិយម​ និង​ជឿជាក់​ថា​ ​កម្ពុជា​ពិត​ជា​អាច​សម្រេចបាន​នូវ​ចក្ខុ​វិស័យ​ ក្លាយជា​ប្រទេស​មាន​ប្រាក់​ចំណូល​មធ្យម​កម្រិត​ខ្ពស់​ ត្រឹម​ឆ្នាំ ២០៣០ ​និង​ក្លាយជា​ប្រទេស​មាន​ចំណូល​ខ្ពស់​ត្រឹម​ឆ្នាំ​ ២០៥០ ​ដោយ​លោក​ ហ៊ុន ​សែន ​ធ្លាប់​អះអាង​ថា​ ​កម្ពុជា​ ​នៅ​មាន​ចិន​ ​និង​ជប៉ុន​ចាំ​ជួយ​គាំទ្រ​សេដ្ឋកិច្ច​ជានិច្ច៖ «យើង​បាន​ខិតខំ​រំដោះ​ខ្លួន​ពី​ប្រទេស​មួយ​ដែល​គេ​ហៅ​ថា​ ​ប្រទេស​ក្រីក្រ​តោកយ៉ាក ​ឲ្យ​ទៅ​ជា​ប្រទេស​ដែល​មាន​ប្រាក់​ចំណូល​មធ្យម​កម្រិត​ទាប​ ​ហើយ​យើង​មាន​ចក្ខុ​វិស័យ​តម្រង់​ឈ្មោះ​ទៅ​រក​ប្រទេស​ដែល​មាន​ប្រាក់​ចំណូល​មធ្យម​កម្រិត​ខ្ពស់​នៅ​ឆ្នាំ ២០៣០ ​ដែល​យើង​យល់​ថា​ ​នឹង​អាច​ធ្វើ​បាន។ នាយករដ្ឋមន្ត្រី​ ស៊ិន ​ហ្សូ​អាបេ ​របស់​ជប៉ុន​ ​ក៏​បាន​និយាយ​ជាមួយ​ពូ​ក្នុងពេល​ទស្សនិកិច្ច​កាលពី​ឆ្នាំ​ទៅ​ ​ថា​ជប៉ុន​នឹង​ខិតខំ​ជួយ​កម្ពុជា​ ​ដើម្បី​សម្រេច​នូវ​ចក្ខុ​វិស័យ​ ក្លាយទៅជា​ប្រទេស​ដែល​មាន​ប្រាក់​ចំណូល​មធ្យម​កម្រិត​ខ្ពស់​នៅ​ឆ្នាំ ២០៣០។ ប្រទេស​ចិន​ ​ប្រធានាធិបតី​ ស៊ី ​ជិន​ពីង ​ក៏​ដូចជា​នាយករដ្ឋមន្ត្រី​ លី ​ឃឺ​ឈៀង​ របស់​ចិន​ ​ក៏​បាន​និយាយ​ច្រើន​លើក​ច្រើន​សារ​នៃ​ការគាំទ្រ​ទាំងឡាយ​សម្រាប់​កម្ពុជា​ ​ហក់​ឡើង​នៅក្នុង​ការអភិវឌ្ឍន៍​សេដ្ឋកិច្ច​សង្គម​របស់​ខ្លួន»

ផ្ទុយពី​អ្វី​ដែល​លោក​ ហ៊ុន ​សែន ​បាន​អះអាង​នេះ​ ធនាគារ​ពិភពលោក​ថា ​ដើម្បី​សម្រេច​បាន​គោលដៅ​ទាំង​នេះ​ ​កម្ពុជា​ចាំបាច់​ត្រូវ​មាន​កំណើន​សេដ្ឋកិច្ច​ឆាប់រហ័ស​ និង​ប្រកបដោយ​ចីរភាព​។ ធនាគារ​ពិភពលោក​ ​កំណត់​ថា​ ​ដើម្បី​អាច​ក្លាយ​ខ្លួន​ជា​ប្រទេស​មាន​ប្រាក់​ចំណូល​មធ្យម​កម្រិត​ខ្ពស់​បាន​ ​ចំណូល​ដុល​របស់​ជាតិ (GNI) ក្នុង​មួយ​ឆ្នាំៗ សម្រាប់​មនុស្ស​ម្នាក់ៗ ត្រូវ​មាន​ចំនួន​យ៉ាង​ហោច​ណាស់​ឲ្យបាន​ ៣.៨៩៦ ​ដុល្លារ​អាមេរិក​ ​ហើយ​ដើម្បីឲ្យ​អាច​ក្លាយជា​ប្រទេស​ដែល​មាន​ចំណូល​ខ្ពស់​បាន​ ​ចំណូល​ដុល​របស់​ជាតិ (GNI) ក្នុង​មួយ​ឆ្នាំ​ៗ​សម្រាប់​មនុស្ស​ម្នាក់​ៗ​ ត្រូវ​មាន​ចំនួន​យ៉ាង​ហោច​ណាស់​ឲ្យ​បាន​ចាប់ពី​ ១២.០៥៦ ​ដុល្លារ​អាមេរិក​ឡើង​ទៅ​។ ​ផ្ទុយទៅវិញ​ ​សម្រាប់​កម្ពុជា​ ​ក្នុង​ឆ្នាំ ២០១៧ កន្លងទៅ​ ​ចំណូល​ដុល​របស់​ជាតិ (GNI) សម្រាប់​មនុស្ស​ម្នាក់​ៗ​ ​គឺ​មាន​ត្រឹមតែ​ ១.២៣០ ​ដុល្លារ​អាមេរិក​ប៉ុណ្ណោះ​ ​ដែល​នេះ​ ​មាន​ន័យ​ថា​ ​ក្នុង​រយៈ ១៣​ឆ្នាំ​ទៅ​មុខ​ទៀត​នេះ​ រហូតដល់​ឆ្នាំ ២០៣០ ​កម្ពុជា​ ​ត្រូវ​បង្កើន​ចំណូល​ដុល​របស់​ជាតិ (GNI) សម្រាប់​មនុស្ស​ម្នាក់​ៗ​ ​ឲ្យបាន​ដល់​ទៅ​បី​ដង​លើស​ពី​កម្រិត​បច្ចុប្បន្ន​នេះ​ ​ទើប​អាច​ងើប​ផុត​ពី​ប្រទេស​មាន​ប្រាក់​ចំណូល​មធ្យម​កម្រិត​ទាប ​ដែល​កម្ពុជា​សម្រេចបាន​កាលពី​ឆ្នាំ ២០១៥ កន្លងទៅ។

សម្រាប់​ឆ្នាំ ២០១៨ នេះ​ ធនាគារ​ពិភពលោក​ព្យាការណ៍​ថា​ ​អត្រា​កំណើន​សេដ្ឋកិច្ច​របស់​កម្ពុជា​ ​នឹង​កើនឡើង​បន្តិចបន្តួច​ គឺ​ក្នុង​រង្វង់​ ៧,១ ​ភាគរយ​តែ​ប៉ុណ្ណោះ​ ​ដោយសារតែ​មាន​កត្តា​ហានិភ័យ​ជាច្រើន​បន្ត​កើនឡើង​ក្នុង​វិស័យ​ហិរញ្ញវត្ថុ​ ​ជាពិសេស​ពាក់ព័ន្ធ​ច្រើន​ទៅលើ​វិស័យ​សំណង់​ ​និង​អចលន​ទ្រព្យ​។​ ក្រៅពី​នោះ​ ​នៅ​មាន​ហានិភ័យ​ពី​មជ្ឈដ្ឋាន​ខាងក្រៅ​ ​ក្នុង​នោះ​រួមមាន​ការដក​ប្រព័ន្ធ​អនុគ្រោះ​ពន្ធ​លើ​ទំនិញ​នាំចេញ​សម្រាប់​កម្ពុជា​ទៅកាន់​សហភាព​អឺរ៉ុប​ និង​ផលប៉ះពាល់​ដែល​មិន​អាច​ព្យាករណ៍​ទុក​បាន​ ​ដែល​កើត​ចេញ​ពី​ជម្លោះ​ពាណិជ្ជកម្ម​រវាង​សហរដ្ឋ​អាមេរិក​ ​និង​ចិន​ ​ដែល​កំពុង​បន្ត​កើត​មាន​ឡើង​នាពេល​បច្ចុប្បន្ន​នេះ។

ប្រធាន​គ្រប់គ្រង​ធនាគារ​ពិភពលោក​ប្រចាំ​កម្ពុជា​ ​អ្នកស្រី​ ​អ៊ីង​ហ្គូណា ​ដូ​ប្រាចា ​(Inguna Dobraja) ​ផ្តល់​អនុសាសន៍​តាមរយៈ​សេចក្តីថ្លែងការណ៍​របស់​ធនាគារ​ពិភពលោក​ ​ថា​ ​ដើម្បីឲ្យ​កម្ពុជា​អាច​ក្លាយជា​ប្រទេស​ដែល​មាន​ប្រាក់​ចំណូល​មធ្យម​កម្រិត​ខ្ពស់​ កម្ពុជា​ចាំបាច់​ត្រូវ​បង្កើន​ការវិនិយោគ​របស់​ខ្លួន​លើ​ផ្នែក​ធនធាន​មនុស្ស​ ​និង​ហេដ្ឋារចនាសម្ព័ន្ធ​ ​និង​ធ្វើ​កំណែទម្រង់​នានា​ដែល​គាំទ្រ​ដល់​កំណើន​សេដ្ឋកិច្ច​លើ​គ្រប់​វិស័យ​ និង​ប្រកបដោយ​ចីរភាព​។ ​អ្នកស្រី​ថា​ ​ការកៀរគរ​ប្រាក់​សន្សំ​ក្នុង​ស្រុក​ឲ្យបាន​ច្រើន​ ​ដើម្បី​យក​ទៅ​បង្កើន​ការវិនិយោគ​ ​ក៏​ជា​កត្តា​សំខាន់​មួយ​ក្នុង​ការឈាន​ទៅ​ដល់​គោលដៅ​មួយ​ ​ដូច​បណ្តា​ប្រទេស​មាន​សេដ្ឋកិច្ច​ល្អ​ជាង​គេ​នៅ​អាស៊ី​សម្រេចបាន​ផងដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល