តំណាងរាស្ត្រ​បក្ស​ប្រជាជន​បោះ​ឆ្នោត​​ដក​​​​លោក កឹម សុខា ពី​អនុប្រធាន​ទី​១​​រដ្ឋសភា​

ដោយ ប្រាជ្ញ ចេវ
2015-10-30
Share
បោះឆ្នោត​ទម្លាក់​លោក កឹម សុខា ៦២០ លោក​នាយករដ្ឋមន្ត្រី ហ៊ុន សែន (ជួរ​មុខ​ពី​ឆ្វេង) និង​សមាជិក​រដ្ឋសភា​បក្ស​ប្រជាជន បោះឆ្នោត​ទម្លាក់​លោក កឹម សុខា ពី​អនុប្រធាន​ទី​១​រដ្ឋសភា នៅ​ថ្ងៃ​ទី​៣០ ខែ​តុលា ឆ្នាំ​២០១៥។
RFA/Rann Samnang

គណបក្ស​សង្គ្រោះ​ជាតិ ចាត់​ទុក​ការ​ដក​តំណែង​លោក កឹម សុខា ចេញ​ពី​អនុ​ប្រធាន​ទី​១ រដ្ឋសភា​ដោយ​តំណាងរាស្ត្រ​គណបក្ស​ប្រជាជន​កម្ពុជា ថា​ជា​ការ​រំលោភ​រដ្ឋធម្មនុញ្ញ និង​រំលោភ​កិច្ច​ព្រមព្រៀង​នយោបាយ​រវាង​គណបក្ស​ទាំង​២។ ប្រតិកម្ម​ភ្លាមៗ​នេះ គឺ​នៅ​បន្ទាប់​ពី​សមាជិក​សភា​មក​ពី​គណបក្ស​ប្រជាជន​កម្ពុជា ទាំង ៦៨​រូប បាន​សម្រេច​បោះ​ឆ្នោត​ដក​លោក កឹម សុខា ចេញ​ពី​តំណែង​កាល​ពី​ព្រឹក​ថ្ងៃ​ទី​៣០ ខែ​តុលា។

ការ​បោះ​ឆ្នោត​ដក​តំណែង​អនុ​ប្រធាន​ទី​១​រដ្ឋសភា​ពី​លោក កឹម សុខា នេះ ធ្វើ​ឡើង ៣​ថ្ងៃ​ប៉ុណ្ណោះ ក្រោយ​ពី​មាន​បាតុកម្ម​របស់​អ្នក​គាំទ្រ​គណបក្ស​ប្រជាជន​កម្ពុជា ដែល​បណ្ដាល​ឲ្យ​តំណាងរាស្ត្រ​គណបក្ស​ប្រឆាំង​រង​របួស​ខ្លាំង​ធ្ងន់​ពីរ​នាក់។ ចំណែក​តំណាងរាស្ត្រ​របស់​គណបក្ស​សង្គ្រោះ​ជាតិ ទាំង ៥៥​រូប បាន​ធ្វើ​ពហិការ​មិន​ចូល​ប្រជុំ​នោះ​ទេ។

លោក ស ខេង រដ្ឋមន្ត្រី​ក្រសួង​មហាផ្ទៃ និង​ជា​អនុ​ប្រធាន​គណបក្ស​ប្រជាជន​កម្ពុជា ថា ការ​បោះ​ឆ្នោត​ទម្លាក់​លោក កឹម សុខា មិន​ប៉ះពាល់​វប្បធម៌​សន្ទនា​ទេ។ លោក ស ខេង ថ្លែង​ឲ្យ​វិទ្យុ​អាស៊ីសេរី ដឹង​ក្រោយ​កិច្ច​ប្រជុំ​សភា​ថ្ងៃ​ទី​៣០ ខែ​តុលា ថា លោក​បាន​ផ្ញើ​លិខិត​ជូន​ដំណឹង​ទៅ​លោក សម រង្ស៊ី ថា គណបក្ស​ប្រជាជន​កម្ពុជា នៅ​តែ​រក្សា​វប្បធម៌​សន្ទនា៖ «អត់​មាន​ប៉ះពាល់​អី​ទេ! ខ្ញុំ​បាន​ផ្ញើ​លិខិត​ទៅ​គាត់​ថា បក្ស​ប្រជាជន​កម្ពុជា នៅ​តែ​ថែរក្សា​វប្បធម៌​សន្ទនា»

​នៅ​ថ្ងៃ​ទី​៣០ ខែ​តុលា ដដែល​នេះ ប្រធាន​រដ្ឋ​សភា លោក ហេង សំរិន បាន​ផ្ញើ​លិខិត​ទៅ​កាន់​លោក សម រង្ស៊ី ប្រាប់​ពី​ការ​បោះ​ឆ្នោត​ទម្លាក់​លោក កឹម សុខា ចេញ​ពី​តំណែង។ នៅ​ក្នុង​លិខិត​នោះ លោក ហេង សំរិន បាន​ស្នើ​ឲ្យ​លោក សម រង្ស៊ី បញ្ជូន​ឈ្មោះ​បេក្ខជន​សម្រាប់​តំណែង​អនុ​ប្រធាន​ទី​១ រដ្ឋ​សភា ដើម្បី​ឲ្យ​សភា​រៀបចំ​ការ​បោះ​ឆ្នោត​ជ្រើសតាំង​បេក្ខជន​នោះ​ជំនួស​លោក កឹម សុខា។

លោក​នាយករដ្ឋមន្ត្រី ហ៊ុន សែន ដើរ​ចូល​បន្ទប់​ប្រជុំ​នៅ​រដ្ឋ​សភា នៅ​ថ្ងៃ​ទី​៣០ ខែ​តុលា ឆ្នាំ​២០១៥។
លោក​នាយករដ្ឋមន្ត្រី ហ៊ុន សែន ដើរ​ចូល​បន្ទប់​ប្រជុំ​នៅ​រដ្ឋ​សភា នៅ​ថ្ងៃ​ទី​៣០ ខែ​តុលា ឆ្នាំ​២០១៥។
RFA/Brach Chev

ភ្លាមៗ​នោះ​ដែរ លោក ឈាង វុន អ្នក​នាំ​ពាក្យ​រដ្ឋសភា​ដែល​ជា​មន្ត្រី​ជាន់​ខ្ពស់​របស់​គណបក្ស​ប្រជាជន​កម្ពុជា បាន​ធ្វើ​សន្និសីទ​សារព័ត៌មាន​ដោយ​បញ្ជាក់​បន្ថែម​ថា ការ​ដក​តំណែង​លោក កឹម សុខា មិន​មែន​ធ្វើ​តាម​បាតុកម្ម​របស់​ពលរដ្ឋ​នោះ​ទេ  ប៉ុន្តែ​យោង​លើ​ញត្តិ​តំណាងរាស្ត្រ កិច្ច​ព្រមព្រៀង​នយោបាយ ២២ ខែ​កក្កដា និង​វប្បធម៌​សន្ទនា។ លោក ឈាង វុន ថា ប្រសិនបើ​ទុក​លោក កឹម សុខា ធ្វើ​ជា​អនុ​ប្រធាន​សភា​បន្ត​ទៀត នឹង​ធ្វើ​ឲ្យ​ប៉ះពាល់​ខ្លាំង​ដល់​ស្ថានការណ៍​ទូទៅ​នៅ​កម្ពុជា៖ «ប៉ះពាល់​ច្រើន​ណាស់ ព្រោះ​ពេល​គាត់​ចេញ​ទៅ​ក្នុង​តួនាទី​គាត់​ជា​ថ្នាក់ដឹកនាំ​រដ្ឋ​សភា គាត់​និយាយ​ទៅ​វាយ​ប្រហារ​ក្នុង​នាម​ជា​អនុ​ប្រធាន​ទី​១ គាត់​វាយ​ប្រហារ​ពី​គណបក្ស​មួយ​ទៅ​គណបក្ស​១ មិន​សម​ទេ»

ឆ្លើយ​តប​ចំណាត់​ការ​របស់​គណបក្ស​ប្រជាជន​កម្ពុជា បែប​នេះ  គណបក្ស​សង្គ្រោះ​ជាតិ បាន​ចេញ​សេចក្ដី​ថ្លែងការណ៍​ថា ការ​បោះ​ឆ្នោត​ទម្លាក់​លោក កឹម សុខា មាន​ភាព​មិន​ប្រក្រតី​ធ្ងន់ធ្ងរ និង​ផ្ទុយ​នឹង​មាត្រា ៨៧ នៃ​រដ្ឋធម្មនុញ្ញ។

មាត្រា​៨៧ នៃ​រដ្ឋធម្មនុញ្ញ កថាខណ្ឌ​ទី​៣ ចែង​ថា ករណី​ប្រធាន និង​អនុ​ប្រធាន​រដ្ឋ​សភា​លាលែង​ពី​មុខ​តំណែង ឬ​ទទួល​អនិច្ចកម្ម ត្រូវ​បោះឆ្នោត​ជ្រើសតាំង​ប្រធាន និង​អនុ​ប្រធាន។ ផ្ទុយ​ទៅ​វិញ រដ្ឋ​សភា​ចេញ​សេចក្ដី​ថ្លែងការណ៍​មួយ​បញ្ជាក់​ថា ការ​ដក​តំណែង​លោក កឹម សុខា នេះ គឺ​ស្រប​តាម​​មាត្រា ៨២​ថ្មី នៃ​រដ្ឋធម្មនុញ្ញ​​ដែល​ចែង​​​ពី​ការ​ជ្រើស​តាំង​តំណែង​ប្រធាន និង​អនុ​ប្រធាន​រដ្ឋសភា គឺ​ធ្វើ​ឡើង​ដោយ​ការ​បោះឆ្នោត​ពី​សមាជិក​រដ្ឋ​សភា​ទាំង​មូល​នៃ​សំឡេង​ភាគ​ច្រើន​ដាច់​ខាត។

ដូចគ្នា​នេះ​ដែរ មន្ត្រី​ជាន់​ខ្ពស់​គណបក្ស​សង្គ្រោះ​ជាតិ លោក អេង ឆៃអ៊ាង និយាយ​ថា នៅ​រដ្ឋធម្មនុញ្ញ​របស់​កម្ពុជា គ្មាន​មាត្រា​ណា​មួយ​ចែង​អំពី​ការ​ដក​តួនាទី​ថ្នាក់ដឹកនាំ​រដ្ឋ​សភា​នោះ​ទេ ហើយ​ជា​ការ​រំលោភ​កិច្ច​ព្រមព្រៀង​នយោបាយ​របស់​គណបក្ស​ទាំង​ពីរ ថ្ងៃ​ទី​២២ ខែ​កក្កដា ឆ្នាំ​២០១៤។ ទោះ​បែប​នេះ​ក្តី លោក អេង ឆៃអ៊ាង អះអាង​ថា គណបក្ស​សង្គ្រោះ​ជាតិ មិន​បោះបង់​វប្បធម៌​សន្ទនា​ដែរ៖ «អ្វី​ដែល​ រដ្ឋសភា​ដែល​ដឹកនាំ​ដោយ​គណបក្ស​ប្រជាជន​បោះ​ឆ្នោត​ដក​លោក កឹម សុខា ចេញ​ពី​តំណែង​អនុប្រធាន​ទី​១​រដ្ឋសភា ជា​ការ​រំលោភ​រដ្ឋធម្មនុញ្ញ​យ៉ាង​ធ្ងន់ធ្ងរ»

ស្រប​ពេល​ជាមួយ​គ្នា រដ្ឋមន្ត្រី​ក្រសួង​ការបរទេស លោក ហោ ណាំហុង ក៏​បាន​អញ្ជើញ​អង្គទូត​នានា​ប្រចាំ​នៅ​កម្ពុជា ឲ្យ​ចូល​ជួប​ដើម្បី​ជម្រាប​អំពី​ការវិវត្តន៍​នយោបាយ​នៅ​កម្ពុជា ក្នុង​ពេល​ថ្មីៗ។ លោក​ថា ការ​ទម្លាក់​លោក កឹម សុខា ចេញ​ពី​តំណែង​អនុ​ប្រធាន​រដ្ឋសភា ព្រោះ​លោក កឹម សុខា ញុះញង់​ប្រជាពលរដ្ឋ​ឲ្យ​ប្រឆាំង​រដ្ឋាភិបាល។

សាស្ត្រាចារ្យ​វិទ្យាសាស្ត្រ​នយោបាយ លោក​បណ្ឌិត រស់ រ៉ាវុធ យល់​ថា ការ​ទម្លាក់​តំណែង​លោក កឹម សុខា នៅ​ពេល​នេះ បង្ហាញ​ពី​ការ​បែកបាក់​ផ្ទៃក្នុង​សង្គម​ខ្មែរ។ លោក​ថា ស្ថានការណ៍​បែប​នេះ​នឹង​ធ្វើ​ឲ្យ​ប្រទេស​ជិត​ខាង​កាន់​តែ​ប្រមាថ​ប្រទេស​កម្ពុជា ពី​បែកបាក់​នេះ៖ «ជា​រឿង​គួរ​ឲ្យ​សោកស្ដាយ​ មួយ​ក្នុង​ការ​បែកបាក់​សង្គម​ខ្មែរ ការ​ដក​តំណែង​លោក កឹម សុខា ធ្វើ​ឡើង​ក្នុង​ពេល​មាន​ជម្លោះ​ផ្ទៃក្នុង​រវាង​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ»

លោក អេង ឆៃអ៊ាង ព្រមាន​ថា តំណាងរាស្ត្រ​គណបក្ស​​សង្គ្រោះ​ជាតិ នឹង​មិន​ចូល​ប្រជុំ​សភា​នោះ​ទេ ប្រសិនបើ​​តំណាងរាស្ត្រ​គណបក្ស​ប្រជាជន​កម្ពុជា ធ្វើ​មិន​ត្រឹមត្រូវ​ ​ខុស​បទបញ្ជា​ផ្ទៃ​ក្នុង​សភា និង​ធ្វើ​ខុស​រដ្ឋធម្មនុញ្ញ ដូច​​ការ​ដក​តំណែង​លោក កឹម សុខា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល