លោក ស ខេង ថា មិន​ទាន់​មាន​មន្ត្រី​បក្ស​ប្រឆាំង​ដាក់​ពាក្យ​ស្នើសុំ​សិទ្ធិ​ធ្វើ​នយោបាយ​ឡើងវិញ

ដោយ សុ ជីវី
2019-01-03
អ៊ីម៉ែល
មតិ
Share
បោះពុម្ព
ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួង​មហាផ្ទៃ លោក ស ខេង ថ្លែង​ក្រោយ​បិទ​បញ្ចប់​កិច្ច​ប្រជុំ​ស្ដីពី​ស្ថានភាព​ពន្ធនាគារ នា​ក្រសួង​មហាផ្ទៃ កាលពី​​ថ្ងៃ​ទី​៦ មករា ឆ្នាំ​២០១៦។
ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួង​មហាផ្ទៃ លោក ស ខេង ថ្លែង​ក្រោយ​បិទ​បញ្ចប់​កិច្ច​ប្រជុំ​ស្ដីពី​ស្ថានភាព​ពន្ធនាគារ នា​ក្រសួង​មហាផ្ទៃ កាលពី​​ថ្ងៃ​ទី​៦ មករា ឆ្នាំ​២០១៦។
Photo: RFA

លោក ស ខេង រដ្ឋមន្ត្រី​ក្រសួងមហាផ្ទៃ បញ្ជាក់​ថា មកដល់ពេលនេះ​នៅ​មិន​ទាន់​មាន​មន្ត្រី​ជាន់ខ្ពស់​គណបក្ស​សង្គ្រោះជាតិ​ណា​ម្នាក់ ដាក់​សំណើសុំ​សិទ្ធិ​ធ្វើ​នយោបាយ​ឡើងវិញ​នៅឡើយ ដ្បិត​ច្បាប់​ស្ដីពី​វិសោធនកម្ម​ច្បាប់​ស្ដីពី​គណបក្ស​នយោបាយ​នៅ​មិនទាន់​ចូល​ជា​ធរមាន​នៅឡើយ។

ថ្លែងប្រាប់​អ្នកសារព័ត៌មាន​កាលពី​ព្រឹក​ថ្ងៃទី៣ ខែ​មករា ថា លោក ស ខេង លើកឡើង​ទៀត​ថា ករណី​លោក កឹម សុខា ប្រធាន​គណបក្ស​សង្គ្រោះជាតិ វិញ​គឺ​មិន​អាច​និយាយ​ថា យ៉ាងណា​បាន​ឡើយ​នៅ​ពេល​ដែល​សំណុំ​រឿង​នេះ​កំពុង​ឋិត​ក្នុង​នីតិវិធី​របស់​តុលាការ៖ «ដោយសារតែ​ច្បាប់​ហ្នឹង​មិន​ទាន់​បាន​ព្រះករុណា​ព្រះអង្គ​លោក​ឡាយ​ព្រះហស្ថលេខា​ប្រកាស​អោយ​ប្រើ​ប្រាស់​ចូល​ជា​ធរមាន​នៅឡើយ ក្រោយ​ច្បាប់​ចូល​ជា​ធរមាន​នោះ​យើង​នឹង​ដឹង។ សំនួរ​៖​តើ​បុគ្គល​បក្ស​ប្រឆាំង​ណាខ្លះ ដែល​មិន​អាច​ស្ដារ​នីតិសម្បទា​ឡើងវិញ​បាន? បញ្ហា​នេះ​ខ្ញុំ​ក៏​មិន​អាច​និយាយ​បាន ពីព្រោះ​វា​មាន​បញ្ហា​ត្រង់​ថា​យើង​មិន​អាច​ធ្វើការ​វាយតម្លៃ​ស្មាន​កើត​ទេ ទាល់​តែ​មាន​ឯកសារ។ សំនួរ​៖ ឯកឧត្ដម កឹម សុខា តើ​អាច​ជា​បេក្ខភាព​ត្រូវ​ពិចារណា ឬក៏​បែប​ម៉ិច​ដែរ? បញ្ហា​យើង​ត្រូវ​មើល​បញ្ហា​ពី​ដើម​ថា មូលហេតុ​អី​បានជា​គាត់​ត្រូវ​បាន​សមត្ថកិច្ច​ឃាត់ខ្លួន តើ​មកដល់​ហ្នឹង​ដំណើរការ​ដល់​ណា នីតិវិធី​តុលាការ​គឺ​នៅ​មិនទាន់​ចប់​នៅឡើយ​ទេ។ សំនួរ​៖ ប្រសិនបើ​មិន​ជាប់​នីតិវិធី​តុលាការ​ទេ គឺ​គាត់​អាច​ស្នើសុំ​ធ្វើ​នយោបាយ ឬក៏​បែប​ម៉ិច​? អាហ្នឹង​ខ្ញុំ​មិន​ដឹង​ទេ ពី​ព្រោះ​ឥឡូវ​គាត់​ស្ថិត​នៅ​ក្នុង​នីតិវិធី​តុលាការ»

នេះ​ជា​លើក​ទី​១​ហើយ ដែល​លោក ស ខេង លើកឡើង​ពី​សំណុំរឿង​របស់ លោក កឹម សុខា នៅ​ក្រោយ​ពេល​ដែល លោក សម រង្ស៊ី ប្រធាន​ស្ដីទី​គណបក្ស​សង្គ្រោះជាតិ និង​មេដឹកនាំ​របប​ក្រុងភ្នំពេញ លោក ហ៊ុន សែន បាន​ព្រមព្រៀងគ្នា​លេងល្បែង​ភ្នាល់​ទៅតាម​សម្ដី​របស់​លោក សម រង្ស៊ី។ ល្បែងភ្នាល់​នោះ​បញ្ជាក់ ប្រសិនបើ​មានការ​ដោះលែង​លោក កឹម សុខា មែន​នោះ លោក ហ៊ុន សែន សុខចិត្ត​ចុះចេញ​ពី​តំណែង​តាម​ការ​បបួល​ភ្នាល់​របស់​លោក សម រង្ស៊ី ប៉ុន្តែ​បើ​លោក កឹម សុខា មិន​ត្រូវ​បាន​ដោះលែង​វិញ​នោះ នៅ​ចន្លោះ​ពី​ថ្ងៃ​ទី​២៩​ធ្នូ ឆ្នាំ ២០១៨ ដល់ ថ្ងៃ​ទី​០៣ ខែ​មីនា ទេ​លោក សម រង្ស៊ី ចុះចាញ់​ហើយ​ចូល​អោយ​ចាប់ខ្លួន​ភ្លាម​បន្ទាប់ពី​បញ្ចប់​ការ​ភ្នាល់។

លោក ហ៊ុន សែន​កាល​ពី​ពេល​ថ្មីៗ​នេះ​ថា បាន​បញ្ជា​ឲ្យ​អាជ្ញាធរ​លោក​អនុញ្ញាត​ឲ្យ​លោក សម រង្ស៊ី មក​ស្រុក​វិញ​ដើម្បី​ចាប់​ដាក់​ពន្ធនាគារ។ បើ​តាម​សម្ដី​របស់​លោក ស ខេង ហាក់​ចង់​បង្ហាញ​ថា ករណី​លោក កឹម សុខា គឺ​ឋិត​ក្នុង​នីតិវិធី​តុលាការ ហើយ​ប្រសិនបើ​មានការ​ដោះលែង ឬ​បន្ត​ការ​ឃុំខ្លួន​លោក​នៅ​ចន្លោះ​ពេល​នៃ​ល្បែងភ្នាល់​នេះ​គឺជា​សមត្ថកិច្ច​របស់​តុលាការ ដែល​មិន​ពាក់ព័ន្ធ​អ្វី​សោះនឹង​លោក ហ៊ុន សែន ពោល​គឺ​មិនមែន​លោក ហ៊ុន សែន ជា​អ្នក​ដោះលែង​នោះ​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល