សកម្មជន​បក្ស​ប្រឆាំង​ទទួលមរណភាព​ក្រោយ​ចេញ​ពី​ពន្ធនាគារ​បាន​ជាង​ប្រាំ​ខែ

ដោយ មួង​ ណារ៉េត
2019-02-14
អ៊ីម៉ែល
មតិ
Share
បោះពុម្ព
លោក យា ថុង សកម្មជន​គណបក្ស​សង្គ្រោះជាតិ និង​ជា​អតីត​អ្នក​ទោស​នយោបាយ​នៃ​របប​ក្រុង​ភ្នំពេញ។
លោក យា ថុង សកម្មជន​គណបក្ស​សង្គ្រោះជាតិ និង​ជា​អតីត​អ្នក​ទោស​នយោបាយ​នៃ​របប​ក្រុង​ភ្នំពេញ។
Screenshot

សកម្មជន​បក្ស​ប្រឆាំង ដែល​ធ្លាប់​ជា​អ្នកទោស​មនសិការ បាន​ទទួល​មរណភាព​ក្រោយ​ចេញពី​ពន្ធនាគារ បាន​ជាង​ប្រាំ​ខែ។ មន្ត្រី​គណបក្ស​សង្គ្រោះ​ជាតិ អ្នក​ធ្លាប់​ជាប់ពន្ធនាគារ​ជាមួយ​លោក និង ក្រុម​គ្រួសារ​ស្ដាយ​វីរភាព​ស្នេហា​ជាតិ របស់​សកម្មជន​រូប​នេះ។

សកម្មជន​បក្ស​ប្រឆាំង លោក យា ថុង បាន​ទទួល​មរណភាព កាល​ថ្ងៃទី១៤ ខែ​កុម្ភៈ ដោយ​ជំងឺ​។ លោក​មាន​ជំងឺ​នេះ​ធ្ងន់ តាំងពី​លោក​នៅ​ជាប់​ពន្ធនាគារ អស់​រយៈពេល ១.១១៩ ថ្ងៃ​នោះ​មក​ម្ល៉េះ​។ ប៉ុន្តែ កាល​លោក​នៅ​ជាប់​ពន្ធនាគារ លោក​មិន​ទទួល​បាន​ការ​ព្យាបាល​នោះ​ឡើយ ដោយសារតែ​មន្ត្រី​ពន្ធនាគារ មិន​អនុញ្ញាត​ឱ្យ​លោក​បាន​ទៅ​ព្យាបាល​ខាងក្រៅ។

តំណាងរាស្ត្រ​គណបក្ស​សង្គ្រោះជាតិ និង​ធ្លាប់​ជា​អ្នក​ទោស​នយោបាយ ដែល​ជាប់ពន្ធនាគារ​ជាមួយ​លោក យា ថុង គឺ​លោក អ៊ំ សំអាន ប្រាប់​អាស៊ីសេរី ថា​ពេល​កំពុង​ជាប់ឃុំ លោក យា ថុង មិន​បាន​ទទួល​ការ​ព្យាបាល​ជំងឺ​នេះ​ឡើយ បើ​ទោះ​បី​ជា​លោក​បាន​ស្នើសុំ​ខាង​ពន្ធនាគារ ដើម្បី​បញ្ជូន​លោក​ទៅ​ព្យាបាល នៅ​មន្ទីរពេទ្យ​មិត្តភាព​កម្ពុជា​-​សូវៀត ជាច្រើនលើក​ច្រើន​សា​ក៏ដោយ៖ «មុន​ចេញ​ប្រហែល​មួយ​ឆ្នាំ គាត់​ចុក​ចង្កេះ ចុក​ខ្នង​ចុក​ខ្លាំង រហូតដល់​ដេក​មិនកើត ត្រូវ​ក្រៀក។ គាត់​សុំ​គេ​ទៅ​ព្យាបាល​បី​បួន​ដង​ដែរ តែ​គេ​មិន​ឱ្យ​ទៅ»

លោក យា ថុង ជាប់​ពន្ធនាគារ​ពី​ខែ​សីហា ឆ្នាំ​២០១៥ រហូតដល់​ខែ សីហា ឆ្នាំ​២០១៨ ពី​បទ​ចូលរួម​ចលនា​កុបកម្ម ដែល​បាន​ប្រព្រឹត្តិ​ទៅ​នៅ​ទីលាន​ប្រជាធិបតេយ្យ កាលពី ខែ​កក្កដា ឆ្នាំ​២០១៤។ តុលាការ​បាន​កាត់ទោស​ឱ្យ​លោក​ជាប់ពន្ធនាគារ ៧​ឆ្នាំ​។ ប៉ុន្តែ ដោយមាន​សម្ពាធ​ពី​សហគមន៍​អន្តរជាតិ របប​លោក ហ៊ុន សែន បាន​បន្ធូរបន្ថយ​ស្ថានការណ៍​នយោបាយ ដោយ​ដោះលែង​អ្នកទោស​មនសិការ និង​សកម្មជន​គណបក្ស​ប្រឆាំង​ជាច្រើន រួម​ទាំង​លោក យា ថុង ផង កាលពី សីហា ឆ្នាំ​២០១៨ នោះ។

បើ​ទោះ​ជា​តុលាការ​ចោទ​លោក យា ថុង ពី​បទ​ឧក្រិដ្ឋ​ដូច​ការចោទប្រកាន់​នេះ​ក្តី ក៏​អង្គការ​សង្គម​ស៊ីវិល​ជាតិ និង​អន្តរជាតិ​ចាត់​ទុក​ការ​ចាប់ខ្លួន​គណបក្ស​សង្គ្រោះជាតិ​នេះ គឺជា​រឿង​នយោបាយ។

លោក អ៊ំ សំអាន សរសើរ​ពី​វីរភាព និង​ភាព​ស្មោះត្រង់​របស់​លោក យា ថុង ដែល​ប្ដេជ្ញា​គាំទ្រ​គណបក្ស​សង្គ្រោះ​ជាតិ ដើម្បី​ឱ្យ​មានការ​ផ្លាស់ប្ដូរ​នៅ​កម្ពុជា​។ លោក​បន្ថែម​ថា ក្នុង​ពេល​កំពុង​ជាប់ឃុំ​នោះ មាន​មនុស្ស​របស់​គណបក្ស​កាន់អំណាច មក​បញ្ចុះបញ្ចូល​ឱ្យ​ក្រុម​លោក​សរសេរ​លិខិត​ទៅ​សុំ​ទោស​លោក ហ៊ុន សែន និង​ចុះចូល​ជាមួយ​គណបក្ស​ប្រជាជន​កម្ពុជា គេ​នឹង​ដោះលែង​ភ្លាម ប៉ុន្តែ គាត់​ប្រកែក៖ «គាត់​ថា គាត់​មិន​ទៅ​ណា​ទេ នៅតែ​ជាមួយ​គណបក្ស​សង្គ្រោះ​ជាតិ មិន​ចុះចូល​ជាមួយ​គណបក្ស​ប្រជាជន​កម្ពុជា​ទេ។ គោលបំណង​របស់​គាត់ គាត់​ថា​គាត់​នៅតែ​ស្រលាញ់​ប្រជាធិបតេយ្យ ចង់បាន​ការ​គោរព​សិទ្ធិមនុស្ស ចង់​បាន​ប្រជាធិបតេយ្យ ចង់​បាន​ការ​ផ្លាស់ប្តូរ​វិជ្ជមាន​។ គាត់​ថា​គាត់​ស្លាប់​ក៏​បិទ​ភ្នែក​ជិត​ដែរ ឱ្យ​តែ​មាន​ការ​ផ្លាស់ប្ដូរ»

តំណាងរាស្ត្រ​គណបក្ស​សង្គ្រោះ​ជាត​ដដែល​រូប​នេះ បន្ត​ថា លោក យា ថុង មិន​ត្រឹមតែ​អ្នក​ស្នេហា​ជាតិ​មោះមុត​ប៉ុណ្ណោះ​ទេ តែ​ជា​មនុស្ស​មាន​សន្តាន​ចិត្តល្អ ចេះ​ជួយ​យក​អាសា​អ្នកដទៃ និង​អ្នក​ខ្វះខាត ទោះបីជា​រូបលោក​ផ្ទាល់ មាន​ធនធាន​តិចតួច​ក៏ដោយ៖ «ក្នុង​ពន្ធនាគារ​ហ្នឹង គាត់​ត្រូវ​គ្នា​ច្រើន​ជាមួយ​អ្នកទោស​មនសិការ និង​មន្ត្រី​ពន្ធនាគារ​។ គាត់​ចែក​ម្ហូបអាហារ និង​ធ្លាប់​ដាំបាយ ឱ្យ​ខ្ញុំ​ហូប​ដែរ​។ គាត់​ជា​មនុស្ស​ល្អ​មែនទែន​។ គាត់​ចេះ​ចែក​រំលែក​ដល់​អ្នកក្រ»

អ្នកទោស​មនសិការ​មួយ​រូប​ទៀត គឺ​យុវជន គង់ រ៉ៃយ៉ា បាន​សរសេរ​បង្ហោះ​លើ​ហ្វេសប៊ុក សម្ដែង​ការ​សោកស្ដាយ និង​ក្រៀមក្រំ ដែល​លោក យា ថុង លាចាក​លោក​ឆាប់​បែបនេះ​។ យុវជន គង់ រ៉ៃយ៉ា ថ្លែង​ថា លោក​​អរគុណ​អាហារ​ឆ្ងាញ់ៗ ដែល​លោក យា ថុង ផ្ដល់​ឱ្យ​កាល​រស់​នៅ​ក្នុង​គុក​ព្រៃ​ស ជាមួយគ្នា​។ លោក​បន្ថែម​ថា លោក​ចាំ ថា​កាល​នៅ​ក្នុង​គុក លោក យា ថុង ធ្លាប់​និយាយ​ថា លោក​មិន​ចង់បាន​ដំណែង​អ្វី​ធំដុំ​ទេ លោក​គ្រាន់តែ​ចង់​ធ្វើជា​មន្ត្រី​មូលដ្ឋាន ដើម្បី​ធ្វើការ​បម្រើ​ពលរដ្ឋ​មូលដ្ឋាន និង​មាន​ផ្ទះ​តូច​ល្មម អាច​រស់​ជួបជុំ​គ្រួសារ ដាំ​បន្លែ ចិញ្ចឹម​សត្វ រស់​ដោយមាន​សុភមង្គល​ប៉ុណ្ណោះ។

ភរិយា​របស់​លោក យា ថុង គឺ​អ្នកស្រី ប៉ុល រំដួល បាន​សរសេរ​សារ​ចុងក្រោយ បញ្ជាក់​អំពី​ការ​សោកស្ដាយ ដែល​ស្វាមី​លោកស្រី លាចាក​លោកស្រី នឹង​កូន​រហូត​ហើយ គ្មាន​ថ្ងៃ​វិលត្រឡប់​ទេ​។ អ្នកស្រី​សុំទោស​សព​លោក យា ថុង ព្រោះ​មិនបាន​រៀបចំ​សព​ឱ្យ​សមរម្យ ដោយសារ​ជីវភាព​ខ្វះខាត និង ផ្ទះ​នៅ​ឯ​ស្រុកស្រែ​ដាច់​ស្រយាល​ពី​គេ។ ទោះជា​យ៉ាង​នេះ​ក្តី លោកស្រី​សន្យា​ថា នឹង​រៀបចំ​ពិធី​សព​ឱ្យ​លោក យា ថុង សម​ជា​វីរបុរស​កូន​ខ្មែរ។ ជា​ចុងក្រោយ លោកស្រី ថា “ប្ដី​សម្លាញ់​បង​ហត់​ហើយ បង​គេង​ចុះ​ណា៎ អូន​អត់​រំខាន​បង​ទេ”៕

ព័ត៌មានបន្ថែមនៅថ្ងៃទី ១៥ ខែ កុម្ភៈ

ភរិយា​របស់លោក យា ថុង លោកស្រី ប៉ុល រំដួល អំពាវនាវដល់​ជនរួមជាតិទាំងអស់ ជួយចូលរួម​ពិធីបុណ្យសពរបស់​លោក យា ថុង ទាំងពេលនេះ និង បុណ្យ៧ថ្ងៃ ដែលនឹង​ធ្វើ​នៅថ្ងៃ ពុធ ទី ២០ ខែ កុម្ភៈ នៅភូមិស្រែជ័យ ឃុំបឹង​ក្រាញ់ខាង​ត្បូង ស្រុក​សំរោង ខេត្ត​តាកែវ។ លោក យា ថុង មានវ័យ ៤៥ ឆ្នាំ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល