កម្ពុជាផលិតបាននាឡិកា២៥គ្រឿង ដើម្បីចែកជូនប្រធានគណៈប្រតិភូដែលមកចូលរួមកិច្ចប្រជុំកំពូលអាស៊ានសប្ដាហ៍ក្រោយនេះ។
ក៏ប៉ុន្តែអ្នកវិភាគយល់ឃើញថា ការផ្ដល់វត្ថុអនុស្សាវរីយ៍ជានាឡិកាបែបនេះ និងមិនផ្ដល់កិត្តិយសដល់កម្ពុជានោះទេ ពីព្រោះក្រុមហ៊ុនចិនគឺជាអ្នកផលិតនាឡិកាទាំងនោះ។
កម្ពុជាបានផលិតនាឡិកា២៥គ្រឿង សម្រាប់ចែកជូនដល់ថ្នាក់ដឹកនាំក្នុងកិច្ចប្រជុំកំពូលអាស៊ានរួចហើយ ដោយនាឡិកាទាំងនោះ ត្រូវបានផលិតឡើងដោយ ក្រុមហ៊ុន ព្រីនស៍ ហូរ៉ូឡូជី (Prince Horology) របស់ចិនមានទីតាំងនៅក្នុងប្រទេសកម្ពុជា។
ទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន បានបង្ហោះរូបនាឡិកា ២សេរី នៅថ្ងៃទី៣ ខែវិច្ឆិកា និងបានបញ្ជាក់ថា កម្ពុជាបានផលិតនាឡិកា២៥គ្រឿង សម្រាប់ជូនប្រធានគណៈប្រតិភូដែលអញ្ជើញមកចូលរួមប្រជុំកំពូលអាស៊ាននៅកម្ពុជាឆ្នាំ២០២២។ លោក ហ៊ុន សែន ក៏បានសរសេរដែរថា នាឡិកាទាំងនោះត្រូវ បានរៀបចំ និងផ្គុំឡើងដោយអ្នកបច្ចេកទេសខ្មែរសុទ្ធសាធ ហើយលោកបានបញ្ជាក់ថា នេះគឺជាការរីកចំរើនខាងផ្នែកវិទ្យាសាស្ត្រ (ខ្មែរអាចធ្វើបាន)។ ជាមួយគ្នានេះនៅលើតួនៃនាឡិកាទាំងនោះ មានពាក្យថា អាស៊ាន កម្ពុជា ២០២២ (ASEAN Submit 2022, Cambodia) ចំណែកផ្នែកខាងក្នុងមានពាក្យថា ព្រីនស៍ ហូរ៉ូឡូជី (Prince Horology) និងពាក្យ ធួប៊ីលលិន (Tourbillon) ដែលជាប្រព័ន្ធដំណើរការនាឡិកាដៃប្រណិត មានតម្លៃចាប់ពីរាប់ម៉ឺនដុល្លារ រហូតដល់ខ្ទង់លានដុល្លារអាមេរិក។
គេហទំព័រនៃក្រុមហ៊ុននេះបានបញ្ជាក់ថា ក្រុមហ៊ុននេះគឺជាផ្នែកមួយនៃក្រុមហ៊ុន ព្រីនស៍ រៀល អ៊ីសស្តែត (Prince Real Estate) ដែលប្រធានសម្ព័ន្ធក្រុមហ៊ុនដ៏ធំមួយនេះ គឺជាលោក ចេន ហ្ស៊ី (Chen Zhi) ជាជនជាតិចិន និងជាទីប្រឹក្សាផ្ទាល់របស់លោក ហ៊ុន សែន ហើយក្នុងពេលថ្មីៗនេះ លោក ចេន ហ្ស៊ី (Chen Zhi) បានទិញយកក្រុមហ៊ុនលក់ស៊ីហ្គា (Cigar) របស់គុយបា (Cuba) ក្នុងតម្លៃជាង ១,៤ ពាន់លានដុល្លារ។
វិទ្យុអាស៊ីសេរីមិនអាចទាក់ទងទៅអ្នកគ្រប់គ្រងក្រុមហ៊ុន ព្រីនស៍ ហូរ៉ូជី (Prince Horology) ដើម្បីសាកសួរព័ត៌មានបន្ថែមអំពីនាឡិកាបានឡើយ នៅថ្ងៃទី៤ ខែវិច្ឆិកា។
ចំណែកអ្នកវិភាគនយោបាយ លោក គឹម សុខ យល់ឃើញថា ភាគច្រើននៃថ្នាក់ដឹកនាំដែលមកចូលរួមក្នុងកិច្ចប្រជុំអាស៊ាន នឹងមិនសប្បាយចិត្តទទួលយកនាឡិកានោះទេ ពីព្រោះតាមរយៈដំណើរការផលិតនាឡិកា បង្ហាញថាឥទ្ធិពលចិនបានជ្រៀតចូលយ៉ាងជ្រៅ ទៅក្នុងផ្ទៃក្នុងអាស៊ានតាមរយៈលោក ហ៊ុន សែន និងធ្វើឱ្យអាស៊ានមិនអាចដើរទៅមុខរួច។ លោក គឹម សុខ បន្ថែមថា ការចែកនាឡិកាទាំងនេះ មិនបានផ្ដល់កិត្តិយសដល់កម្ពុជា ឬឆ្លុះបញ្ចាំងថា ខ្មែរធ្វើបាននោះទេ ព្រោះក្រុមហ៊ុនចិនជាអ្នកផលិតនាឡិកាទាំងនោះ ហើយបច្ចេកទេសផលិតគឺយកមកពីប្រទេសស្វីសតែប៉ុណ្ណោះ។
លោក គឹម សុខ៖ « ការយកនាឡិការបស់ថៅកែចិនទៅចែកភ្ញៀវអន្តរជាតិ និងបណ្ដាមេដឹកនាំអាស៊ាននានា ហើយអួតថាខ្មែរធ្វើបានបែបនេះ វារឹតតែធ្វើឱ្យប្រជាជាតិខ្មែរខ្មាសគេថែមទៀតទេ ពីព្រោះទី១ ប្រើលុយទិញបច្ចេកទេសរបស់ស្វីស ទី២ ប្រើលុយរបស់ថៅកែចិនដើម្បីផលិតនាឡិកាហ្នឹង ហើយទី៣ វាបង្ហាញអំពីឥទ្ធិពលរបស់ចិន ទៅលើមេដឹកនាំនៃរដ្ឋាភិបាលរបស់លោក ហ៊ុន សែន ដែលកំពុងតែដឹកនាំកម្ពុជា ហើយក៏កំពុងតែធ្វើជាប្រធានប្ដូរវេននៃបណ្ដាប្រជាជាតិអាស៊ីអាគ្នេយ៍ហៅកាត់ថា អាស៊ាន ហ្នឹង »។
ទោះជាបែបនេះក្ដី អ្នកនាំពាក្យគណបក្សកាន់អំណាច លោក សុខ ឥសាន អះអាងថា ការផ្ដល់វត្ថុអនុស្សាវរីយ៍ជានាឡិកាទៅដល់ថ្នាក់ដឹកនាំកំពូលក្នុងកិច្ចប្រជុំអាស៊ាននេះ គឺគ្មានអ្វីទាស់ខុសនោះឡើយ ព្រោះការផ្ដល់វត្ថុអនុស្សាវរីយ៍ ត្រូវមានការផ្លាស់ប្ដូរ។
លោក សុខ ឥសាន៖ « គេចង់ជូនអីក៏បានដែររឿងកាដូហ្នឹង ក្មួយឯងគិតមើល ពេលនេះម្ដងនេះជូននោះទៅ ម្ដងជូននេះទៅ អាហ្នឹងវាមិនទៀងទេ »។
អ្នកវិភាគនយោបាយ ធ្លាប់បានលើកឡើងថា កម្ពុជាមិនគួរចែកនាឡិកាប្រណិត ដែលមានតម្លៃខ្ពស់ ទៅដល់ថ្នាក់ដឹកនាំដែលមកចូលរួមកិច្ចប្រជុំអាស៊ាននោះទេ ព្រោះវា មិនបានផ្ដល់កិត្តិយស និងបង្ហាញពីអត្តសញ្ញាណរបស់កម្ពុជា។ ពួកគេថា ការចែកនេះគឺធ្វើឡើងទៅតាមបំណងរបស់លោកនាយករដ្ឋមន្ត្រី ហ៊ុន សែន ដែលជាមនុស្សឈ្លក់វង្វេងនឹងការបង្អួតនាឡិកាដែល មានតម្លៃរាប់លានដុល្លារអាមេរិក និងមិនបានខ្វល់ខ្វាយពីប្រជាពលរដ្ឋដែលមានជីវភាពក្រីក្រតែប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។