អ្នកជំនាញ​ថា ការ​ឆ្លើយតប​របស់​ចិន និង​កម្ពុជា​រឿង​កំពង់ផែ​រាម នៅតែ​មិនអាច​ធ្វើ​ឱ្យ​អាមេរិក​ទុកចិត្ត​បាន

ដោយ មាន ឬទ្ធិ
2022.11.17
Share on WhatsApp
Share on WhatsApp
អ្នកជំនាញ​ថា ការ​ឆ្លើយតប​របស់​ចិន និង​កម្ពុជា​រឿង​កំពង់ផែ​រាម នៅតែ​មិនអាច​ធ្វើ​ឱ្យ​អាមេរិក​ទុកចិត្ត​បាន (ឆ្វេង) នាយករដ្ឋមន្ត្រី​ចិន លោក លី ខឺឈាង (Li Keqiang) និង​លោក​នាយករដ្ឋមន្ត្រី ហ៊ុន សែន (ស្ដាំ) ក្នុង​ជំនួប នៅ​រាជធានី​ភ្នំពេញ កាល​ពីថ្ងៃទី៩ ខែ​វិច្ឆិកា ឆ្នាំ​២០២២។
រូប៖ ហ្វេសប៊ុក​លោក ហ៊ុន សែន

អ្នកជំនាញ​ភូមិសាស្ត្រ​នយោបាយ និង​អ្នកវិភាគ លើកឡើង​ថា ការ​ឆ្លើយ​តប​របស់​ចិន និង​កម្ពុជា​ក្នុង​រឿង​ធ្វើ​ទំនើបកម្ម​កំពង់ផែ​រាម​ នឹង​នៅ​តែ​មិន​អាច​ធ្វើ​ឱ្យ​ភាគី​សហរដ្ឋអាមេរិក​ទុកចិត្ត​បាន​ឡើយ។ ផ្ទុយទៅវិញ​ពួកគេ​ថា បញ្ហា​សង្ស័យ​ពី​រឿង​វត្តមាន​កង​ទ័ពចិន​នៅ​កំពង់ផែ​រាម និង​ការណ៍​ដែល​ចិន​អាច​បំប្លែង​កំពង់ផែ​រាម​ទៅជា​មូលដ្ឋាន​ទ័ព​របស់​ខ្លួន នឹង​រឹតតែ​តានតឹងឡើង​រវាង​ភាគី​អាមេរិក និង​ចិន ដែល​កម្ពុជា​មិនអាច​មើល​រម្លង​បាន​ឡើយ។

រឿងរ៉ាវ​​សង្ស័យ​ពី​វត្តមាន​កងទ័ព​ចិន​នៅ​កំពង់ផែ​រាម និង​ការណ៍​ដែល​ចិន​អាច​បំប្លែង​កំពង់ផែ​នេះ​ទៅ​ជា​មូលដ្ឋាន​ទ័ព​នៅ​ក្រៅ​ប្រទេស​ទីពីរ​របស់​ខ្លួន បាន​កើត​មាន​ឡើង​សាជាថ្មី​ ស្របពេល​ដែល​កម្ពុជា​កំពុង​រៀបចំ​កិច្ច​ប្រជុំ​កំពូលអាស៊ាន។

ប្រធានាធិបតី​អាមេរិក លោក ចូ បៃឌិន (Joe Biden) បាន​លើកឡើង​ពី​កង្វល់​ទាំងនេះ​នៅក្នុង​ជំនួប​ទ្វេភាគី​ដ៏​កម្រ​មួយ​មិនធ្លាប់​​មាន​ពី​មុន​មក​ជាមួយ​លោកនាយករដ្ឋមន្ត្រី ហ៊ុន សែន កាលពី​ថ្ងៃទី​១២ ខែវិច្ឆិកា ស្របពេល​ដែល​លោក​មក​ចូលរួម​កិច្ច​ប្រជុំ​កំពូល​អាស៊ាន​នៅ​កម្ពុជា។ ពីរ​ថ្ងៃ​ក្រោយ​មក ភាគី​ចិន​បាន​ចេញ​មុខ​មក​ឆ្លើយតបតាមរយៈ​អ្នកនាំពាក្យ​ក្រសួងការបរទេស​របស់​ខ្លួន អះអាង​ថា ចិន​ជួយ​កម្ពុជា​កែ​លម្អ​កំពង់ផែ​កងទ័ពជើងទឹក​រាម​នេះ គឺ​ជា​រឿង «ធម្មតា» និង​មិន​ដាក់ «គោលដៅ» ប្រឆាំង​ភាគី​ទីបី​ណាមួយ​ឡើយ។

121122.jpeg
ជំនួប​ទ្វេភាគី​រវាងលោក​ប្រធានាធិបតី​ ចូសេប បៃឌិន (Joseph R. Biden) (ឆ្វេង) និង​លោក​នាយករដ្ឋមន្ត្រី ហ៊ុន សែន អំឡុងពេល​កិច្ច​ប្រជុំ​អាស៊ាននៅ​កម្ពុជា ថ្ងៃទី១២ ខែ​វិច្ឆិកា ឆ្នាំ​២០២២។ AP

សហ​ស្ថាបនិក​វិទ្យាស្ថាន​ប្រជាធិបតេយ្យ​កម្ពុជា និង​ជា​អ្នក​ជំនាញ​ភូមិសាស្ត្រ​នយោបាយ បណ្ឌិត រ៉ូ វណ្ណៈ ពន្យល់​ប្រាប់ វិទ្យុ​អាស៊ីសេរី ថា ការ​បក​ស្រាយ​ទាំង​សំណាក់​ភាគី​ចិន និង​ភាគី​កម្ពុជា​ខ្លួនឯង មិនអាច​ធ្វើ​ឱ្យ​សហរដ្ឋ​អាមេរិក​​ទុកចិត្ត​បាន​ឡើយ ខណៈ​រឿង​នេះ​ពាក់ព័ន្ធ​នឹង​កត្តា​ភូមិសាស្ត្រ​នយោបាយ និង​ការប្រកួតប្រជែង​អំណាច​រវាង​អាមេរិក និង​ចិន​នៅ​ក្នុង​តំបន់​នេះ៖ ‌

បណ្ឌិត រ៉ូ វណ្ណៈ៖ «សហរដ្ឋអាមេរិកមើលឃើញ​ថា ចិន​គឺជា​ដៃគូ​ប្រជែង​ឥទ្ធិពល និង​ផលប្រយោជន៍​របស់​អាមេរិក​សំខាន់​នៅក្នុង​តំបន់។ អ៊ីចឹង វត្តមាន​នៃ​ឥទ្ធិពល​យោធា​របស់​ចិន​នៅក្នុង​តំបន់​ណា នៅក្នុង​ប្រទេស​ណា​ក៏ដោយ វា​គឺ​ជា​ការ​គំរាមកំហែង​ទៅដល់​តួនាទី ទៅដល់​ផលប្រយោជន៍​របស់​អាមេរិក សម្ព័ន្ធមិត្ត​របស់​អាមេរិក និង​ដៃគូ​យុទ្ធសាស្ត្រ​របស់​អាមេរិក។ បើ​យើង​និយាយ​ពី​ដៃគូ​យុទ្ធសាស្ត្រ​របស់​អាមេរិក​នៅ​តំបន់​អាស៊ីអាគ្នេយ៍ គឺ​វៀតណាម​ហ្នឹង​ហើយ... ហើយ​បើសិនជា​លទ្ធភាព​នៃ​វត្តមាន​យោធា​របស់​ចិន​មាន​មែន​នៅក្នុង​ប្រទេស​កម្ពុជា វា​គឺ​ជា​ការ​គំរាមកំហែង​ទៅដល់​សន្តិសុខ​របស់​តំបន់ ឬ​របស់​ដៃគូ​យុទ្ធសាស្ត្រ។ ខ្ញុំ​មើលឃើញ​ថា ទោះ​បី​យ៉ាងណា សហរដ្ឋអាមេរិក​នៅតែ​ទទូច នៅតែ​ទាមទារ ហើយ​លើក​ករណីនេះ​ទៅ​ជជែក​ម្តង​ហើយ​ម្តង​ទៀត​ជាមួយនឹង​ភាគី​កម្ពុជា»

រីឯអ្នកវិភាគ​នយោបាយ​ឥត​សំចៃ​មាត់​ដែល​បច្ចុប្បន្ន​កំពុង​រស់នៅ​ភៀសខ្លួន​នៅ​ប្រទេស​ហ្វាំងឡង់ (Finland) ដើម្បី​គេច​ចេញ​ពី​ការ​តាម​ធ្វើ​ទុក្ខបុកម្នេញ​ពី​សំណាក់​រដ្ឋាភិបាល​លោក​នាយករដ្ឋមន្ត្រី ហ៊ុន សែន គឺ​លោក គឹម សុខ លោក​មើល​ឃើញ​ថា រឿងរ៉ាវ​សមុទ្រ​រាម​នេះ នឹង​រឹត​តែ​មានការ​ប្រឈមមុខ​ដាក់គ្នា​កាន់តែ​ខ្លាំង​រវាង​ភាគី​សហរដ្ឋ​អាមេរិក និង​ចិន។ បើ​តាម​លោក គឹម សុខ មូលហេតុ​មួយ​នោះ គឺ​ដោយ​សារ​តែ​ចុង​ក្រោយ​នេះ​កម្ពុជា​បាន​ឈាន​ទៅ​ចុះ​កិច្ច​សហប្រតិបត្តិការ​យោធា និង​សន្តិសុខ​ជា​ចំហ​ជាមួយ​ប្រទេស​ចិន។

លោក គឹម សុខ៖ «ភាព​ច្បាស់លាស់​មួយ​នៅ​ត្រង់ថា​ ពីមុន​វត្តមាន​កងទ័ព​ចិន​នៅ​លើ​ទឹកដី​កម្ពុជា​គ្រាន់តែ​ជា​ការ​សង្ស័យទេ ប៉ុន្តែ​មកដល់​ពេលនេះ រដ្ឋាភិបាល​ចិន និង​រដ្ឋាភិបាល​លោក ហ៊ុន សែន រហូត​ទៅ​ដល់​ប្រកាស​ជា​ចំហ​អំពី​ការ​ចុះ​កិច្ចព្រមព្រៀង​សហប្រតិបត្តិការ​កងទ័ព​នៃ​រដ្ឋាភិបាល​ទាំងពីរ​តែម្តង។ មិន​ដែល​មាន​ពី​មុន​មក​ទេ។ មានន័យថា​ រដ្ឋាភិបាល​លោក ហ៊ុន សែន និង​រដ្ឋាភិបាល​ចិន កាន់តែ​បង្ហាញ​ជា​ចំហ និង​ស៊ីជម្រៅ​នូវ​អ្វី​ដែល​ជា​សហប្រតិបត្តិការ​នៃ​កងទ័ព​រដ្ឋាភិបាល​ទាំងពីរ»

កម្ពុជា និង​ចិន ក្នុង​ដំណើរ​ទស្សនកិច្ច​ផ្លូវការ​របស់​នាយករដ្ឋមន្ត្រី​ចិន លោក លី ខឺឈាង (Li Keqiang) មក​កម្ពុជា​នៅ​មុន​ពេល​កិច្ច​ប្រជុំកំពូល​អាស៊ាន បាន​ចុះ​កិច្ចព្រមព្រៀង​ជាច្រើន។ ក្នុង​នោះ ភាគី​ទាំងពីរ​បាន​ឯកភាព​ថា នឹង​ពន្លឿន​ការ​កសាង​សហគមន៍​វាសនា​រួម​កម្ពុជា-ចិន ដោយ​សន្យា​ថា នឹង​ប្រើប្រាស់​ឱ្យ «អស់​សក្តានុពល» នូវ​យន្តការ​ផ្លាស់ប្ដូរ និង​កិច្ច​សហប្រតិបត្តិការ​យោធា​ដោយ​បង្កើន​ទំនាក់ទំនង​រវាង​ស្ថាប័ន​ការពារជាតិ និង​យោធា​គ្រប់កម្រិត​នៃ​ប្រទេស​ទាំងពីរ​តាមរយៈ​កិច្ចសហប្រតិបត្តិការ​ជាក់ស្តែង ដូចជា ការ​បណ្តុះបណ្តាល និង​ការ​ហ្វឹកហាត់​រួមគ្នា ការ​ផ្តល់​បរិក្ខា​យោធា បច្ចេកវិទ្យា សេវា​សុខាភិបាល ឡូជីស្ទីក និង​សន្តិសុខ​ពហុភាគី។

លោក គឹម សុខ មើលឃើញ​ថា ការ​ប្រកាស​ជា​ចំហ​បែបនេះ សហរដ្ឋអាមេរិក​ទំនងជា​មិនអាច​ទទួល​យក​មិន​បាន​ឡើយ ហើយ​រដ្ឋាភិបាល​ចិន​ដឹង​ថា ក្រុម​លោក ហ៊ុន សែន កំពុង​ជាប់​អន្ទាក់​មិនអាច​រើ​ខ្លួន​រួច។

កម្ពុជា និង​សាធារណរដ្ឋ​ចិន​បាន​បើក​ការដ្ឋាន​គម្រោង​ធ្វើ​ទំនើបកម្ម​កំពង់ផែ​កងទ័ព​ជើងទឹករាម កាលពីថ្ងៃទី៨ ខែ​មិថុនា។ គម្រោង​រយៈពេល​ពីរ​ឆ្នាំ​នេះ គឺជា​ជំនួយ​ឥត​សំណង​របស់​រដ្ឋាភិបាល​ចិន​ដល់​កងទ័ពជើងទឹក​កម្ពុជា ក៏ប៉ុន្តែ ទាំង​ភាគី​កម្ពុជា និង​ភាគី​ចិន​ពុំបាន​លាតត្រដាង​ឱ្យ​ដឹង​ពី​ចំនួន​ទឹកប្រាក់​ជាក់លាក់​នៃ​ជំនួយ​យោធា​នេះ​ទេ។ គម្រោង​នេះ​មាន​ដូចជា ការសាងសង់​រោងជាង​ជួសជុល​នាវា ផែ​សំចត និង​ស្តារ​ឃ្លង ជាដើម ត្រូវ​បាន​អនុវត្ត​ដោយ​ក្រុមហ៊ុន​គ្រប់គ្រង​ដោយ​រដ្ឋអំណាច​ចិន​ឈ្មោះ Metallurgical Group Corporation (MCC) ដែល​បាន​ចុះ​កិច្ចព្រមព្រៀង​ជាមួយ​កម្ពុជា​តាំង​ពី​ឆ្នាំ​២០១៦ ​មក។ នៅមុន​ការ​បើក​ការដ្ឋាន​នេះ សារព័ត៌មាន​អាមេរិក ឌឹ វ៉ាស៊ីនតុន ប៉ុស្តិ៍ (Washington Post) បាន​ស្រង់​សម្តី​មន្ត្រី​ជំនាញ​នៃ​ប្រទេស​លោក​ខាងលិច មក​ចុះ​ផ្សាយ​ថា ប្រទេស​ចិន​កំពុង​លួច​សាងសង់​មូលដ្ឋាន​កងទ័ព​ជើងទឹក​ដោយសម្ងាត់​នៅ​កម្ពុជា​សម្រាប់​បម្រើ​ឱ្យ​វិស័យ​យោធា «ផ្តាច់​មុខ»។ ដោយឡែក កាលពី​ខែកក្កដា ឆ្នាំ២០១៩ កាសែត ឌឹ វ៉លស្រ៊ីត ជ័រណល (The Wall Street Journal) បាន​ទម្លាយ​ព័ត៌មាន​ថា រដ្ឋាភិបាល​លោក ហ៊ុន សែន បាន​លួច​ចុះ​កិច្ចព្រមព្រៀង​សម្ងាត់​ជាមួយ​សាធារណរដ្ឋ​ចិន ដែល​អនុញ្ញាត​ឱ្យ​កងទ័ព​ប្រទេស​នេះ​អាច​ប្រើប្រាស់​កំពង់ផែ​កងទ័ព​ជើង​ទឹក​រាម​ផ្តាច់​មុខ​រហូតដល់​ទៅ ៣០ឆ្នាំ ហើយ​កិច្ច​ព្រមព្រៀងនេះ​អាច​បន្ត​រៀងរាល់ ​១០ឆ្នាំម្តង។

អ្នកនាំពាក្យ​ផ្លូវការ​នៃ​កិច្ច​ប្រជុំ​កំពូល​អាស៊ាន លោក គង់ ភោគ កាល​ពី​ថ្ងៃទី១២ ខែវិច្ឆិកា បាន​បកស្រាយ​ថា រាល់​ការ​ពន្យល់​របស់​កម្ពុជា និង​ការអនុញ្ញាត​ឱ្យ​ទៅ​មើល​ដល់​ទីតាំង​កំពង់ផែ​រាម​ដោយ​ផ្ទាល់​សម្រាប់​ភាគី​អាមេរិក និង​ប្រទេស​ពាក់ព័ន្ធ គួរតែ​គ្រប់គ្រាន់​សម្រាប់​ប្រទេស​ទាំង​នោះ វាយតម្លៃ​ដោយ​យុត្តិធម៌​សម្រាប់​កម្ពុជា។

លោក គង់ ភោគ៖ «យើង​មិន​ដែល​មាន​ការ​លាក់បាំង​អី​ទេ។ តាមពិត​ទៅ យើង​អនុញ្ញាត​ឱ្យ​សេនានុព័ន្ធ​យោធា​របស់​សហរដ្ឋអាមេរិក​ទៅ​មើល​ទីតាំង​ហ្នឹង​ទៅទៀត។ សូម្បីតែ​ស្ថានទូត​របស់​បរទេស​មួយ​ចំនួន​ ក៏​យើង​បាន​អនុញ្ញាត​ឱ្យ​ទៅ​មើល​នៅ​ទីតាំង​នោះ​ដែរ។ ឧទាហរណ៍​ដូចជា ទូត​របស់​អូស្ត្រាលី​ជាដើម។ តាមពិត​ រាល់​ជំហាន​ទាំងអស់​នេះ គឺ​មិន​ធ្លាប់​មានទេ​សម្រាប់​ប្រទេស​មួយចំនួន​ផ្សេងទៀត ពីព្រោះ​នេះ​គឺ​ជា​អធិបតេយ្យ ឯករាជភាព​នយោបាយ​របស់​ប្រទេស​មួយ។ ប៉ុន្តែ ដើម្បី​បង្ហាញ​អំពី​ភាព​ស្មោះត្រង់​របស់​យើង ថាយើង​អត់មាន​អី​លាក់បាំង​ទេ។ តម្លាភាព​របស់​យើង​គឺ​ យើង​អនុញ្ញាត​ឱ្យ​ទៅ​មើល​ទាំងអស់។ ដូច្នេះ យើង​សង្ឃឹមថា ដៃគូ​របស់​យើង​ក៏​ផ្តល់​សច្ចភាព​ឱ្យ​យើង​វិញ​ដែរ»

ទោះយ៉ាង​ណា កាលពី​ពេល​កន្លង​ទៅ មន្ត្រី​អនុព័ន្ធ​យោធា​អាមេរិក​ធ្លាប់​លើកឡើង​ថា កម្ពុជា​បាន​ព្យាយាម​បិទបាំង​មិនបាន​អនុញ្ញាត​ឱ្យ​ខ្លួន​អាច​ទៅ​មើល​ទីតាំង​គ្រប់កន្លែង​នៅ​មូលដ្ឋាន​កងទ័ព​ជើង​ទឹក​រាម​នោះ​ទេ។

អ្នកជំនាញ​ភូមិសាស្ត្រ​នយោបាយ បណ្ឌិត រ៉ូ វណ្ណៈ យល់​ថា រឿងរ៉ាវ​ចម្រូងចម្រាស​នៅ​កំពង់ផែ​កងទ័ព​ជើង​ទឹក​រាម​នេះ នឹង​មិន​ងាយ​ដាច់​ស្រេច​ឡើយ ដរាបណា​កម្ពុជា​បង្ហាញ​តម្លាភាព​បែប​ស្រពិចស្រពិល។ លោក​ថា កម្ពុជា​គួរ​ព្យាយាម​សម្របសម្រួល និង​បង្ហាញ​តម្លាភាព​កាន់តែ​ទូលំទូលាយ​ជាង​មុន​ដោយ​អនុញ្ញាត​ឱ្យ​មាន​ភាគី​ច្រើន​មហាអំណាច​ដទៃទៀត​ដូចជា បារាំង (France) អូស្ត្រាលី (Australia) ជប៉ុន (Japan) អាល្លឺម៉ង់ (Germany) សហគមន៍​អឺរ៉ុប (EU) ឬ​បណ្តា​ប្រទេស​ដទៃទៀត​នៅ​អាស៊ី អាច​ចូលរួម​ទៅ​មើល​តំបន់​នេះ​ឱ្យ​បាន​កាន់តែ​ទូលំទូលាយ​ដោយ​ប្រកាន់ខ្ជាប់​នូវ​នយោបាយ​ការបរទេស​អព្យាក្រឹត្យ ឯករាជ្យ និង​មិន​រណប​នឹង​បរទេស​ណាមួយ។ ទន្ទឹម​នឹង​នេះ លោក​ថា កម្ពុជា​ខ្លួនឯង​ក៏​ត្រូវ​ធានា​ឱ្យ​បាន​នូវ​ការ​អនុវត្ត​លទ្ធិប្រជាធិបតេយ្យ​ សេរី​ ពហុបក្ស​ ពិតប្រាកដ ជាពិសេស​នៅក្នុង​ស្ថាប័ន​សភា ដើម្បី​ធានា​នយោបាយ​ការបរទេស​ឯករាជ្យ។

បណ្ឌិត រ៉ូ វណ្ណៈ៖ «...បង្ហាញ​ទៅ​ប្រទេស​មហាអំណាច​ថា កម្ពុជា​គឺ​អនុវត្ត​តាម​រដ្ឋធម្មនុញ្ញ​ដែល​មាន​ចែង​ក្នុង​រដ្ឋធម្មនុញ្ញ​ឆ្នាំ១៩៩៣ នូវ​ប្រជាធិបតេយ្យ សេរី​ពហុបក្ស ហើយ​នយោបាយ​ការបរទេស​ឯករាជ្យ គឺ​វា​ទាល់​តែ​យន្តការ​ប្រជាធិបតេយ្យ​របស់​យើង​កាន់តែ​រឹងមាំ ហើយ​មាន​យន្តការ​រស់រវើក​នៃ​អង្គការ​សង្គម​ស៊ីវិល ក្រុម​ផល​ប្រយោជន៍ និង​គណបក្ស​ជំទាស់​ដែល​រស់រវើក​ដើម្បី​ធ្វើ​ឱ្យ​ឃើញ​ថា យើង​មាន​ពហុ​និយម ពហុបក្ស។ អ៊ីចឹង ការ​លាប​ពណ៌​របស់​មហាអំណាច​ថា យើង​ផ្អៀង ឬ​ក៏​យើង​អាច​ធ្វើ​ឱ្យ​មាន​លទ្ធភាព​នៃ​វត្តមាន​យោធា​របស់​បរទេស វា​កាត់​បន្ថយ។ នៅ​ពេល​ដែល​ការគ្រប់គ្រង​បែប​សភា​ឯក​បក្ស​បែបនេះ ប្រទេស​មហាអំណាច​គេ​ព្រួយ​បារម្ភ​ពី​លទ្ធភាព​នៃ​ការ​រក្សា​ជំហរ​អព្យាក្រឹត្យ​របស់​ខ្លួន​ចំពោះ​មហាអំណាច​ដ៏​ធំ គឺ​វា​ពិបាក​ពី​ព្រោះ​យើង​អត់មាន​យន្តការ​​នៃ​ការ​ទប់​អំណាច​នៅ​ក្នុង​យន្តការ​សភា»

ក្នុង​ជំនួប​ទ្វេភាគី​ជាមួយ​លោក​នាយករដ្ឋមន្ត្រី ហ៊ុន សែន កាលពី​ថ្ងៃទី១២ ខែ​វិច្ឆិកា ប្រធានាធិបតី​អាមេរិក លោក ចូ បៃឌិន បាន​លើកឡើង​ពី​កង្វល់​នានា​ជុំវិញ​ស្ថានភាព​នៅ​មូលដ្ឋាន​កងទ័ព​ជើង​ទឹករាម និង​បាន​គូស​បញ្ជាក់​ពី​សារសំខាន់​នៃ​ការ​បង្ហាញ​តម្លាភាព​ពេញលេញ​អំពី​សកម្មភាព​នានា​ដោយ​យោធា​នៃ​សាធារណរដ្ឋ​ប្រជាមានិត​ចិន​នៅ​មូលដ្ឋាន​កំពង់ផែ​រាម។ លោក ចូ បៃឌិន ក៏បាន​ជំរុញ​ឱ្យ​លោក​នាយករដ្ឋមន្ត្រី ហ៊ុន សែន បើកចំហ​លំហ​សង្គម​ស៊ីវិល និង​នយោបាយ​នៅ​កម្ពុជា​នៅ​មុន​ការ​បោះឆ្នោត​ជាតិ​ឆ្នាំ២០២៣​ខាងមុខ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។