លោកនាយករដ្ឋមន្ត្រី ហ៊ុន សែន ប្ដេជ្ញាថា លោកនឹងធ្វើច្បាប់ដើម្បីកំណត់អាយុនាយករដ្ឋមន្ត្រីចូលនិវត្តន៍ នៅមុនពេលលោកប្រគល់តំណែងឲ្យកូនប្រុសច្បងនៅឆ្នាំ២០២៣។ មន្ត្រីគណបក្សប្រឆាំង និងអ្នកវិភាគយល់ថា ច្បាប់នេះសំដៅដល់ការទប់ស្កាត់ផ្ទៃក្នុងបក្ស ដើម្បីកុំឲ្យដណ្ដើមអំណាចពីកូនប្រុងច្បងរបស់លោក ហ៊ុន សែន គឺលោក ហ៊ុន ម៉ាណែត។
មន្ត្រីបក្សប្រឆាំងរិះគន់ថា ផែនការធ្វើច្បាប់កំណត់អាយុនាយករដ្ឋមន្ត្រីនេះ មិនមែនសំដៅទៅលោក សម រង្ស៊ី ដូចការលើកឡើងរបស់លោក ហ៊ុន សែននោះទេ។ ផ្ទុយទៅវិញ នេះជាអាកប្បកិរិយាគំរាមកំហែងផ្ទៃក្នុងបក្សកាន់អំណាច ពិសេស គឺក្រុមមន្ត្រីចាស់ៗនៅក្នុងបក្សនេះ តែប៉ុណ្ណោះ។
អនុប្រធានគណបក្សសង្គ្រោះជាតិប្រទេសណូវែលសេឡង់ (Newzeland) លោក សៅ រ៉ាស៊ី យល់ថា លោក ហ៊ុន សែន នៅមិនទាន់ស្ងប់ចិត្តទេ បើទោះជាលោកបានគំរាមឲ្យមន្ត្រីបក្សបោះឆ្នោតឲ្យកូនប្រុសបន្តវេនរួចហើយក៏ដោយ។ លោកមើលឃើញថា សារគំរាមជាបន្តបន្ទាប់របស់លោក ហ៊ុន សែន គឺសំដៅទៅរដ្ឋមន្ត្រីក្រសួងមហាផ្ទៃលោក ស ខេង ដើម្បីបង្ខំឲ្យលោកព្រមទទួលយកលោក ហ៊ុន ម៉ាណែត ឲ្យឡើងធ្វើជានាយករដ្ឋមន្ត្រីបន្តពីលោក។
មន្ត្រីបក្សប្រឆាំងរូបនេះបន្តថា លោក ហ៊ុន សែន ក៏កំពុងដំឡើងយស និងខិតខំផ្គាប់ចិត្តរដ្ឋមន្ត្រីក្រសួងការពារជាតិលោក ទៀ បាញ់ ដែរ ដើម្បីទុកជាបង្អែកនៃផែនការផ្ទេរអំណាចនេះ៖ «មានការអ្វីគឺ ទៀ បាញ់ ជាអ្នកទប់គាត់។ អ៊ីចឹងហើយបានប៉ុន្មានថ្ងៃនេះ គាត់ខំបញ្ជោរតាទៀ បាញ់ សម្បើមណាស់។ មានការអាសន្នអន់ក្រអ្វីហ្នឹង គឺតា ទៀ បាញ់ ហ្នឹងហើយ ជាអ្នកនៅក្បែរគាត់។ អ៊ីចឹង ឥឡូវនេះមានការអាសន្នអន់ក្រអ្វីហ្នឹង ឲ្យតា ទៀ បាញ់ ហ្នឹង ជាអ្នកទប់អំណាច ស ខេង»។
ការលើកឡើងនេះ ក្រោយពេលលោក ហ៊ុន សែន បានថ្លែងក្នុងពិធីសម្ពោធដាក់ឲ្យប្រើប្រាស់អគាររដ្ឋបាល និងសាលប្រជុំទីស្តីការក្រសួងការពារជាតិ នៅថ្ងៃទី២៩ ខែធ្នូថា លោកនឹងផ្ចាញ់លោក សម រង្ស៊ី តាមរយៈការធ្វើច្បាប់កំណត់អាយុនាយករដ្ឋមន្ត្រីចូលនិវត្តន៍ ឲ្យបានមុនពេលដែលលោកប្រគល់អំណាចឲ្យកូនប្រុសនៅឆ្នាំ២០២៣។ លោក ហ៊ុន សែន ក៏ប្រកាសត្រៀមខ្លួន រហូតដល់ធ្វើជាជីតានាយករដ្ឋមន្ត្រីផងដែរ៖ «នៅពេលដែលខ្ញុំចាកចេញពីនាយករដ្ឋមន្ត្រី ខ្ញុំនឹងសម្រេចនូវបំណងរបស់អ្នកស្នើសុំ ហើយរៀបចំច្បាប់កំណត់អាយុចូលនិវត្តន៍របស់នាយករដ្ឋមន្ត្រី។ ខ្ញុំហ្នឹងធ្វើជូន។ ឥឡូវអ្នកឯងចង់បានអាយុប៉ុន្មាន ប្រាប់មកមួយសារទៀត»។
ទាក់ទងនឹងផែនការចង់ធ្វើច្បាប់កំណត់អាយុនាយករដ្ឋមន្រ្តីនេះប្រធានស្ដីទីគណបក្សសង្គ្រោះជាតិលោក សម រង្ស៊ី ថ្លែងកាលពីថ្ងៃទី២៥ ខែធ្នូថាលោកបានស្នើឲ្យធ្វើច្បាប់នេះរយៈពេលពីរឆ្នាំមកហើយ។ លោក សម រង្ស៊ី លើកឡើងថាល្មមដល់ពេលលោក ហ៊ុន សែននិងមន្រ្តីវ័យចំណាស់ផ្សេងទៀតលាឈប់ពីនយោបាយដើម្បីផ្ដល់ឱកាសឲ្យក្មេងជំនាន់ក្រោយតែមិនមែនផ្ទេរអំណាចឲ្យកូនតពូជពង់វង្សត្រកូលដូចដែលលោក ហ៊ុន សែន កំពុងតែធ្វើនេះឡើយ៖ «បានស្នើរយៈពេលពីរឆ្នាំមកហើយ ព្រោះឥលូវនេះ មេដឹកនាំចាស់ៗអស់ហើយ លោក ហេង សំរិន ៩០ឆ្នាំ លោក ហ៊ុន សែន ៧០ឆ្នាំ ហើយខ្ញុំជាង៧០ឆ្នាំ ។ ខ្ញុំសប្បាយចិត្តណាស់ ដែលលោក ហ៊ុន សែន ចង់ធ្វើច្បាប់កំណត់អាយុនាយករដ្ឋមន្រ្តីនេះ »។
ក្រៅពីលោក ហ៊ុន សែន ចង់ធ្វើច្បាប់កំណត់អាយុមេដឹកនាំនោះ លោកក៏ព្រមាននឹងដកតំណែងមេយោធាណាដែលមិនព្រមធ្វើសកម្មភាពទប់ស្កាត់ចលនាបដិវត្តន៍។ លោក ហ៊ុន សែន ប្រាប់អនុព័ន្ធយោធាទាំងអស់ដែលបានចូលរួមក្នុងពិធីនោះថា លោកនឹងមិនបណ្តោយឱ្យនរណាម្នាក់ធ្វើបដិវត្តន៍ពណ៌ នៅកម្ពុជាបានឡើយ។
អ្នកវិភាគនយោបាយលោក គឹម សុខ យល់ថា ការបន្តប្រើសារគំរាមបែបនេះ ព្រោះផ្ទៃក្នុងបក្សកាន់អំណាចមិនទាន់ស្រុះស្រួលព្រមទទួលយកផែនការផ្ទេរអំណាចឲ្យលោក ហ៊ុន ម៉ាណែត។ លោក គឹម សុខ បន្តថា សារព្រមានញយៗនេះ ជាការបង្កើតឲ្យមន្ត្រីផ្ទៃក្នុងបក្សមានការមិនពេញចិត្ត និងបណ្ដាលឲ្យបែកបាក់ផ្ទៃក្នុង៖ «លោក ហ៊ុន សែន ចេញសារដើម្បីប្រាប់ទៅក្រុមអ្នកដឹកនាំផ្ទៃក្នុងនៅក្នុងគណបក្សប្រជាជនកម្ពុជាថា ផែនការរបស់គាត់ កុំឲ្យអ្នកផ្សេងស្រមៃជំទាស់ពេក ព្រោះមិនមែន ( ផ្ទេរត្រឹម ) ពីកូនគាត់ទៅគាត់ទេ គឺមានដល់ចៅគាត់ទៀត។ នេះគឺជាការសម្លុតផ្ទៃក្នុង»។
លោក ហ៊ុន សែន បានរៀបចំបញ្ជីឈ្មោះគណៈរដ្ឋមន្ត្រីអនាគតរួចហើយ ដោយភាគច្រើនជាអ្នកមានអាយុក្រោម ៦០ ឆ្នាំ និងមានសញ្ញាប័ត្របណ្ឌិត។ ប៉ុន្តែលោក សម រង្ស៊ី សរសេរលិខិតចំហជូន សមាជិកសមាជិកាគណៈកម្មាធិការកណ្តាលបក្សប្រជាជនកម្ពុជាទាំងអស់ថា លោក ហ៊ុន សែន កំពុងប្រើល្បិចពិសពុលសណ្ដោងក្រុមគ្រួសាររបស់ឥស្សរជននៅជុំវិញគាត់មួយចំនួន ឲ្យមកភ្ជាប់វាសនាជាមួយក្រុមគ្រួសារលោក ហ៊ុន សែន។
លោក សម រង្ស៊ី បញ្ជាក់ថា ល្បិចពិសពុលនេះ ជាផែនការអយុត្តិធម៌សម្រាប់ក្រុមគ្រួសារខ្មែរ និងជាអំពើអយុត្តិធម៌ចំពោះយុវជនខ្មែរផ្សេងទៀតដែលមានសមត្ថភាពដឹកនាំប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។