អ្នកគាំទ្រគណបក្សភ្លើងទៀនម្នាក់ទៀត លោក ធន ច័ន្ទថា បានរងបួសស្ទើរពេញខ្លួន និងត្រូវដេរជាច្រើនថ្នេរ ដោយសារមនុស្សមិនស្គាល់មុខចំនួន ៤នាក់ បានព្រួតគ្នាលបវាយលោកនឹងដំបងដែក និងឈើ នៅពេលលោកជិះម៉ូតូ កាលពីវេលាថ្ងៃត្រង់ថ្ងៃទី២៣ ខែមេសា។
លោក ច័ន្ទថា ឱ្យដឹងទៀតថា នៅពេលលោកជិះម៉ូតូចេញពីតំបន់បឹងតាមោក ទៅដល់ចំណុច ភូមិកំបោរ សង្កាត់ស្វាយប៉ាក ទល់មុខបុរីអង្គរព្រីមៀរ ក្នុងខណ្ឌឫស្សីកែវ ក៏មានមនុស្សប្រុស៤នាក់ជិះម៉ូតូ២គ្រឿង បានប្រើដំបងដែកជាប្រភេទដែកបំពង់ទីប និងដំបងឈើវាយរូបលោកពីក្រោយ ត្រង់ក្បាល និងខ្នង បណ្ដាលឱ្យម៉ូតូរបស់លោកដួលផ្ទប់នឹងចិញ្ចើមផ្លូវ។ លោកបន្តថា ភ្លាមៗពេលម៉ូតូដួលមនុស្សមិនស្គាល់មុខទាំងនោះបានចោមវាយលោកបន្ថែមទៀត ប៉ុនប៉ងវាយសម្លាប់រូបលោក ប៉ុន្តែនៅពេលបានអ្នកឃើញហេតុការណ៍ស្រែកឆោឡោឡើង ពួកគេទាំង៤នាក់បានជិះម៉ូតូគេចខ្លួន។
លោក ធន ច័ន្ទថា ថ្លែងប្រាប់វិទ្យុអាស៊ីសេរី ពីបន្ទប់សម្រាកព្យាបាលរបួសក្នុងមន្ទីរពេទ្យថា លោកពុំធ្លាប់មានជម្លោះជាមួយអ្នកណាឡើយ។ លោកចាត់ទុកអំពើហិង្សាលើរូបលោកនេះថា ជារឿងនយោបាយ។
លោក ធន ច័ន្ទថា៖ «ដេញវាយខ្ញុំតាមផ្លូវហើយ ដួលទៅនឹងចិញ្ចើមផ្លូវ ហើយគឺសង្គ្រុបវាយខ្ញុំតែម្ដង។ រឿងដែលគេវាយខ្ញុំនេះ ខ្ញុំអត់ដែលមានបញ្ហាជាមួយបងប្អូនណា ញាតិជិតខាងណាទេ គឺសំខាន់ជារឿងនយោបាយសុទ្ធសាធ។ តែខ្ញុំអត់ចោទថា ទៅខាងណា ខាងទេ តែជារឿងនយោបាយ»។
លោក ច័ន្ទថា បញ្ជាក់ថា នេះមិនមែនជាលើកទី១ទេ ដែលលោករងអំពើហិង្សាបែបនេះ ហើយលោកគិតថាទង្វើនេះគ្មានបំណងអ្វីក្រៅតែពីធ្វើឱ្យរូបលោក និងសកម្មជនដទៃទៀតភ័យខ្លាច លែងហ៊ានគាំទ្រគណបក្សប្រឆាំង ឬគណបក្សភ្លើងទៀនតទៅទៀត។
លោក ច័ន្ទថា ឱ្យដឹងដែរថា លោកនឹងទៅដាក់បណ្ដឹងនៅសង្កាត់កើតហេតុ ប៉ុន្តែលោកពុំមានសង្ឃឹមថា នឹងបានយុត្តិធម៌ឡើយ។
លោក ធន ច័ន្ទថា ធ្លាប់ជាប់ជាចៅសង្កាត់រងមកពីគណបក្ស សម រង្ស៊ី នៅសង្កាត់ផ្សារដេប៉ូទី២។ លោកត្រូវអាជ្ញាធររដ្ឋាភិបាល លោក ហ៊ុន សែន ចាប់ដាក់ពន្ធនាគាររយៈពេល១ឆ្នាំ កាលពីឆ្នាំ២០២១ ក្រោមបទចោទញុះញង់បង្កអសន្តិសុខសង្គម ដោយសារតែលោកសកម្មក្នុងការចូលរួមទាមទារឱ្យអាជ្ញាធរដោះលែងប្រធានសហជីព លោក រ៉ុង ឈុន ដែលបច្ចុប្បន្នជាអនុប្រធានគណបក្សភ្លើងទៀន។
មកដល់ពេលនេះមានករណីលបវាយសកម្មជនគណបក្សប្រឆាំង និងសកម្មជនសង្គមកើតមានជិត៥០ករណីហើយ។ ភាគច្រើនជនបង្កបានបិទមុខជិត ប្រើដំបងដែក និងឈើ វាយសន្ធាប់ទៅលើអ្នករងគ្រោះ គោលដៅចម្បងគឺសំដៅក្បាលពួកគេ។ ជាមួយគ្នានេះក៏មានករណីគ្រោះថ្នាក់ចរាចរកើតលើសកម្មជនទាំងនោះជាច្រើនករណីដែរ ដែលជនរងគ្រោះសង្ស័យថាជាការរៀបចំ ដើម្បីធ្វើបាបពួកគេ។ ជនរងគ្រោះមួយចំនួនបានស្លាប់ដោយសាររបួសធ្ងន់ធ្ងរពេក និងខ្លះទៀតធ្លាក់ខ្លួនពិការ។
បើទោះជាយ៉ាងណាអាជ្ញាធរបានខកខានមិនបានចាប់ជនដៃដល់នៃករណីអំពើហិង្សាទាំងនោះមកផ្ដន្ទាទោសតាមច្បាប់ឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។