សាលាឧទ្ធរណ៍ភ្នំពេញបើកសវនាការ​សម្រេចបន្តការឃុំលោក ស៊ុន ចន្ធី ដោយគ្មានវត្តមានជនជាប់ចោទ និងមេធាវី

ដោយ ច័ន្ទ ដារ៉ូ
2024.06.11
សាលាឧទ្ធរណ៍ភ្នំពេញបើកសវនាការ​សម្រេចបន្តការឃុំលោក ស៊ុន ចន្ធី ដោយគ្មានវត្តមានជនជាប់ចោទ និងមេធាវី (រូបឯកសារ) លោក ស៊ុន ចន្ធី ប្រធាន​បក្សកម្លាំងជាតិ​ ក្នុងសមាជបក្ស​លើក​ទី១ កាល​ពី​ថ្ងៃ​ទី១២ ខែវិច្ឆិកា ឆ្នាំ២០២៣។
រូប៖ ហ្វេសប៊ុកគណបក្សកម្លាំងជាតិ

មេធាវីលោក ស៊ុន ចន្ធី ពហិការ​មិន​ចូលរួម​សវនាការ ដោយសារ​មន្រ្តីពន្ធនាគារ​មិន​បញ្ជូន​កូនក្ដីខ្លួន​ចូល​សវនាការ។ ប៉ុន្តែ​តុលាការ​នៅតែ​បើក​សវនាការ ដោយ​តម្កល់​សេចក្តីសម្រេច​របស់​តុលាការ​ក្រុងភ្នំពេញ ដែល​ឃុំខ្លួន​មេបក្សជំទាស់​រូប​នេះ​ទុក​ជា​បានការ​ដដែល។ មេធាវី និង​មន្រ្តី​សិទ្ធិមនុស្ស​ចាត់ទុក​សវនាការ​គ្មាន​វត្តមាន​ជនជាប់ចោទ​ជា​រឿង​មិន​ត្រឹមត្រូវ បំពាន​លើ​សិទ្ធិ និង​គោលការណ៍​ច្បាប់។

សាលាឧទ្ធរណ៍ភ្នំពេញ​​​រសៀល​ថ្ងៃទី១១ ខែមិថុនា បាន​បើក​សវនាការ សម្រេចបដិសេធ​​លើ​​បណ្តឹង​​សាទុក្ខ​ស្នើសុំ​​ដោះលែង​​បណ្តោះ​​អាសន្ន​​របស់​​ប្រធាន​​គណបក្សកម្លាំងជាតិ​​លោក ស៊ុន ចន្ធី ពាក់ព័ន្ធ​រឿង​លោក​រិះគន់​រដ្ឋាភិបាល​ចែក​ប័ណ្ណ​ក្រីក្រ​ថា​គ្មាន​តម្លាភាព​កន្លងមក។  តែយ៉ាងណា​​មេធាវី​​របស់​​ជនជាប់ចោទ គឺ​លោក ជូង ជូងី មិន​ព្រម​ចូលរួម​សវនាការ​នោះ​ទេ ​ដោយសារ​​មន្រ្តី​ពន្ធនាគារ​​មិន​បាន​​ដឹក​​លោក ស៊ុន ចន្ធី ពី​​ពន្ធនាគារ​ ម៤ ឱ្យ​​ចូល​​ខ្លួន​​មក​​ត​តាំង​ក្តី​​តាម​​នីតិវិធី នៅក្នុង​​សវនាការ​​ចំពោះ​​មុខ​​នោះ។

មេធាវី​ការពារ​ក្ដី​ឱ្យ​លោក ស៊ុន ចន្ធី គឺ​លោក ជូង ជូងី ថ្លែង​ថា​តាមច្បាប់ វត្តមាន​ជនជាប់ចោទ​នៅក្នុង​សវនាការ​ជា​រឿង​ចាំបាច់ ដូច្នេះ​បើ​គ្មាន​វត្តមាន​របស់​ជនជាប់​គឺ​សវនាការ​នោះ​គ្មានន័យ និង​ជា​ការបំពាន​លើ​សិទ្ធិ​ទទួល​បាន​ការជំនុំ​ជម្រះ​ក្តី​ដោយ​យុត្តិធម៌​សម្រាប់​កូនក្តី​របស់​លោក​ដែរ។ 

មេធាវី ជូង ជូងី៖ «ចៅក្រម​ស៊ើបសួរ​សម្រេច​ឃុំខ្លួន​គាត់​ដោយ​សំអាង​ថា​បើ​ដោះលែង​គាត់​ខ្លាច​គាត់​រត់​គេច​ខ្លួន ខ្លាច​គាត់​​មិន​ចូល​តុលាការ អ៊ីចឹង​បើ​ឃុំខ្លួន​គាត់​ហើយ​ម្តេច​មិន​យក​គាត់​ចូល​តុលាការ ដូច្នេះ​សវនាការ​នេះ​ដំណើរការ​ដោយ​អត់មាន​​វត្តមាន​លោក ស៊ុន ចន្ធី ហើយ​មេធាវី​ក៏​អត់​ចូលរួម​ដែរ ពីព្រោះ​អត់​យក​ជន​ដែល​ត្រូវបាន​ដាក់​កំហិត​ហ្នឹង​ចូលរួម​សវនាការ»។

ចំណែក​បរិយាកាស​នៅ​ក្រៅ​តុលាការ​វិញ​មាន​អ្នកគាំទ្រ​ជាង១០០នាក់​មក​ពី​បណ្តា​ខេត្ត​នានា​ដូចជា​ខេត្តកណ្តាល កំពង់ធំ សៀមរាប និង​ខេត្ត​មួយចំនួន​ទៀតដើម្បី​លើក​ទឹកចិត្ត​មេដឹកនាំ​ពួកគេ។ រីឯ​សមត្ថកិច្ច​រាប់​សិប​នាក់​វិញ​បាន​រឹតបណ្តឹង​សន្តិសុខ​នៅ​ទី​នោះ​ដោយ​ដាក់​រនាំង​បិទ​ផ្លូវ​ដោយ​អ្នក​ខ្លះ​ប្រើ​ពាក្យ​សម្តី​មិន​សមរម្យ និង​រុញច្រាន​លើ​ក្រុម​ស្រ្តី​ថ្ងៃសុក្រ​មិន​ឱ្យ​ចូល​ឃ្លាំមើល​នៅ​មុខ​អគារ​តុលាការ​នោះ។

ទីប្រឹក្សា​គណបក្ស​កម្លាំងជាតិ​ លោក រ៉ុង ឈុន ឆ្ងល់​ថា​ហេតុ​អ្វី​បាន​ជា​មន្រ្តីពន្ធនាគារ​មិន​បញ្ជូ​នលោក ស៊ុន ចន្ធី ចូលរួម​សវនាការ​សុំ​នៅ​ក្រៅឃុំ​នៅ​ពេល​នេះ។ លោក​បញ្ជាក់​ថា​គណបក្ស​នៅតែ​រក្សា​ជំហរ​សម្តែងមតិ​នៅ​ថ្ងៃ​ទី១៦ ខែមិថុនា ខាងមុខ​ដដែល​ដើម្បី​ទាមទារ​ឱ្យ​តុលាការ​ដោះលែង​មេបក្សជំទាស់​រូប​នេះ​ឱ្យ​មា​នសេរីភាព​ឡើង​វិញ ពីព្រោះ​លោក​ថា​ការចាប់ខ្លួន​លោក ស៊ុន ចន្ធី ដាក់គុក ដោយសារ​តែ​និយាយ​រិះគន់​រដ្ឋាភិបាល​ក្នុង​ន័យ​ស្ថាបនា​គឺ​ជា​រឿង​អយុត្តិធម៌។

លោក រ៉ុង ឈុន៖ «បែរ​ជា​មិន​បាន​យក​អ្នកជាប់​ចោទ​ចូលរួម​សវនាការ យើង​មាន​ការភ្ញាក់​ផ្អើល​ដែរ ខ្ញុំ​គិត​ថា​វា​មិន​ត្រូវ​មាន​បញ្ហា​ហ្នឹង​កើត​ឡើង ពីព្រោះ​យើង​មិន​ដឹង​ថា​តើ​សមត្ថកិច្ច ក៏​ដូច​ជា​អាជ្ញាធរ​ហ្នឹង​មាន​ការព្រួយ​បារម្ភ​អ្វី​បាន​ជា​មិន​បាន​យក​គាត់​ចូល​សវនាការ គាត់​ត្រូវការ​សេរីភាព​ដោយ​ស្នើសុំ​​នៅ​ក្រៅ​ឃុំ»។

អាជ្ញាធរ​បាន​ចាប់​ខ្លួន ប្រធាន​បក្សកម្លាំងជាតិ​លោក ស៊ុន ចន្ធី កាល​ពី​ថ្ងៃ​ទី៩ ខែឧសភា។ មួយ​ថ្ងៃ​បន្ទាប់​មក គឺ​នៅ​ថ្ងៃ​ទី១០ ខែឧសភា ចៅក្រម​សាលាដំបូង​រាជធានីភ្នំពេញ បាន​បង្គាប់​ឱ្យ​សមត្ថកិច្ច​ឃុំខ្លួន​លោក ស៊ុន ចន្ធី ដាក់​ពន្ធនាគារ​ក្នុង​តំបន់​ដាច់​ស្រយាល ស្ថិត​នៅ​ជាប់​ជើង​ភ្នំក្រវាញ​ខេត្ត​ពោធិ៍សាត់ ពីបទ​«ញុះញង់​បង្ក​ឱ្យ​មាន​ភាពវឹកវរ​ធ្ងន់ធ្ងរ​ដល់​សន្តិសុខសង្គម» ពាក់ព័ន្ធ​នឹង​ការបញ្ចេញ​មតិ​រិះគន់​រដ្ឋាភិបាល​ក្នុង​ការចែកប័ណ្ណ​ក្រីក្រ​មាន​ការរើសអើង។

ក្រៅ​ពី​ក្តីក្តាំ​នេះ​ហើយ​លោក ស៊ុន ចន្ធី នៅ​ជាប់​ក្តីក្តាំ​នៅ​តុលាការ​មួយ​ទៀត។ សាលាដំបូង​ខេត្តកំពង់ធំ​បាន​សម្រេច​ចោទ​លោក​មួយ​សំណុំ​រឿង​ទៀត​ពីបទ​ «ឆបោក» តាម​បណ្តឹង​របស់​មន្រ្តី​គណបក្សភ្លើងទៀន​ចំនួន​៩នាក់ ពាក់ព័ន្ធ​រឿង​លោក​ប្រមូល​លុយ​ពី​សមាជិក​សម្រាប់​ឃោសនា​បោះឆ្នោត​ក្នុង​ឆ្នាំ២០២៣ កាល​លោក​នៅ​ជា​មន្ត្រី​គណបក្ស​នេះ។ បន្ទាប់មក តុលាការ​ខេត្ត​នេះ​កាល​ពី​ថ្ងៃ​ទី១៣ ខែមេសា ក៏​បាន​សម្រេច​ផ្ទេរ​សំណុំ​រឿង​នេះ​ទៅ​សាលាដំបូង​រាជធានីភ្នំពេញ​ដើម្បី​អនុវត្ត​តាម​នីតិ​វិធី​បន្តទៀត ក្រោយពេល​អាជ្ញាធរ​ចាប់​​ខ្លួនលោក​ដាក់​ពន្ធនាគារ។ ទោះជាយ៉ាងណា លោក ស៊ុន ចន្ធី បាន​បដិសេធ​ចំពោះ​ការចោទប្រកាន់​នេះ ។

ជុំវិញរឿងនេះ មន្រ្តីជាន់ខ្ពស់​នៃ​សមាគមការពារ​សិទ្ធិ​មនុស្សអាដហុក​ (Adhoc) លោក យី សុខសាន្ត មាន​ប្រសាសន៍​ថា​ការណ៍​ដែល​មេធាវី ជនជាប់ឃុំ ​ស្នើ​លើក​ពេល​សវនាការ ជា​រឿង​ត្រឹមត្រូវ ហើយ​ជនជាប់ចោទ​ត្រូវ​ទទួល​បាន​សវនាការ​នៅ​ចំពោះ​មុខ ស្រប​តាម​គោល​ការណ៍​ច្បាប់ជាតិ និង​អន្តរជាតិ។ 

លោក យី សុខសាន្ត៖ «មតិ​ជាតិ​នឹង​អន្តរជាតិ​ក៏​គេ​មើល​ឃើញ​(សំណុំ​រឿង​មេដឹកនាំ​បក្ស​ជំទាស់)​ដែរ គេ​ស្នើសុំ​ដល់​រដ្ឋាភិបាល​មេត្តា​ផ្តល់​បរិយាកាស​ល្អ​ដើម្បី​បានចូលរួម​ទាំងអស់​គ្នា​កុំឱ្យ​​​មាន​​ការភ័យខ្លាច កុំ​ឱ្យ​​មាន​ការរត់​គេចខ្លួន កុំ​ឱ្យ​មាន​ការចាប់ខ្លួន​ទាំងអស់​ហ្នឹង»។ 

កាល​ពី​ថ្ងៃ​ទី៧ ខែមិថុនា ប្រព័ន្ធ​ឃោសនា​របស់​លោក ហ៊ុន សែន បាន​ផ្សាយ​លិខិត ដែល​ពួកគេ​អះអាង​ថា ជា​លិខិត​របស់​ប្រធាន​បក្សកម្លាំងជាតិ​ លោក ស៊ុន ចន្ធី សុំទោស​រដ្ឋាភិបាល​លោក ហ៊ុន ម៉ាណែត ពី​ពន្ធនាគារ​ ម៤ នៅ​ខេត្តពោធិ៍សាត់។ ខ្លឹមសារ​ក្នុង​លិខិត​ដែល​មាន​មន្ទិល​នោះ លោក ស៊ុន ចន្ធី បាន​សម្តែង​ការសោកស្ដាយ​នូវ​មតិ​លើក​ឡើង​ខុស​ឆ្គង​ដោយ​អចេតនា ក្នុង​កម្មវិធី​សំណេះ​សំណាល​នៅ​ប្រទេស​ជប៉ុន​កន្លងទៅ ​ដែល​ធ្វើឱ្យ​ប៉ះពាល់​ដល់​កិត្តិយស និង​ដំណើរ​ការអភិវឌ្ឍ​ប្រទេស​របស់​រដ្ឋាភិបាល។ ទោះជាយ៉ាង​ណាក្ដី គេនៅ​មិន​ទាន់​អាច​ដឹងឱ្យ​ប្រាកដ​ថា តើ​លិខិត​នោះ​ជា​របស់​លោក ស៊ុន ចន្ធី ឬ​យ៉ាងណា​នោះ​ទេ ហើយ​ពី​ខាង​លោក​នាយករដ្ឋមន្រ្តី ហ៊ុន ម៉ាណែត វិញ​ក៏​មិន​ទាន់ឃើញ​ឆ្លើយតប​ទៅ​នឹង​លិខិត​របស់​លោក ស៊ុន ចន្ធី នៅឡើយ​ដែរ មក​ដល់​ពេលនេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។